Lotte World Tower göydələni, arxiv şəkli

Səma qapılarını döyənlər - FOTO

7
(Yenilənib 01:26 31.03.2021)
Betonun hökmranlığı artıq proqressiv ideya hesab olunmur – göydələnləri getdikcə daha çox bitkilərlə örtməyə və ərazini daha çox maşınlara deyil, insanlara həsr etməyə çalışırlar

BAKI, 31 mart — Sputnik. Göydələnlər artıq çoxdandır ki, meqapolislər üçün adi elementə çevrilib. Ucu buludların arasında gizlənən binaların arası ilə işdən evə, evdən işə getmək isə əvvəlki kimi gündəlik heyrət doğurmur. Bir-birinə oxşayan şüşə konstruksiyalar dünyanın müxtəlif hissələrində inşa olunur və bu da onları unikallıqdan məhrum edir. Lakin memarlıq və dizayn sahəsində əsas məcmuələrdən olan "Dezeen" jurnalı yaxın bir neçə il ərzində şəhərlərin görkəmini dəyişəcək bir neçə ən maraqlı göydələn layihəsini seçməyə müvəffəq olub.

​Həmin layihələrin üzərində dünyanın müxtəlif yerlərindən olan məşhur peşəkarlar – mərhum Zaha Hadidin bürosunda çalışan dizaynerlərdən tutmuş memarlıq sahəsində ən nüfuzlu mükafatın sahibi olan Frenk Geriyə qədər mütəxəssislər məşğul olurlar.

​Hündür binalar üçün adi olan şüşə və betonu yüngülləşdirərək onları daha sadə və ekoloji etməyə çalışırlar. Göydələnlər şəhərlərin fonunda, demək olar ki, şəffaf görünür və artıq piyadaların əhvalına pis təsir etmir.

​Betonun hökmranlığı artıq proqressiv ideya hesab olunmur – göydələnləri getdikcə daha çox bitkilərlə örtməyə və ərazini daha çox maşınlara deyil, insanlara həsr etməyə çalışırlar.

​Şəhərlərin sakinlərinə qayğı ilə yanaşı, memarlar bir-biri ilə də rəqabət aparır, növbəti göydələnin hündürlüyünü millimetrə qədər hesablayırlar. Onlar çoxdankı rekordları vurmağa və "ən hündür bina" statusunu əldə etməyə çalışırlar.

​Bütün bu ideyalar uğurla həyata keçiriləcəyi təqdirdə Londondakı məşhur "Şüşə qırığı" öz nüfuzlu titulunu itirə bilər. Yaponiyada isə yeni memarlıq rekordçusu inşa edilə bilər. 

​Göydələnlərin inşası birinciliyində mübarizəyə yaponiyalı memar və bu sahədə öz bürosunu təsis etmiş Sou Fudzimoto da qoşulub. "Mitsubishi Jisho Sekkei" şirkəti ilə birlikdə o, 2028-ci ildə ölkənin ən hündür binasını — "Torch Tower"i (Məşəl) tikmək niyyətindədir. Layihənin adında metafora gizlənib – memarlar "şəhəri məşəllə işıqlandırmaq" niyyətindədirlər. Fudzimoto gələcək binanın yuxarı hissəsinə "tac" – ayrıca tikili əlavə edəcək və bununla da arzusunda olduğu hündürlüyə - 390 metrə çatacaq.

​Əyri formada olan tikilini iri gövdəli sütunların üzərinə quraşdırılacaq ki, bu da onun daxilində seyr meydançası yaratmağa imkan verəcək. Onu şüşələyib, üzərinə bitki örtüyü və yüngül döşəmə çəkiləcək. Fudzimotonun sözlərinə görə, o sadəcə "obyekt" deyil, "insanlar üçün guşə" yaratmaq niyyətindədir. Binanın məşələ oxşarlığına isə memar narıncı rəngin və günün qaranlıq saatlarında işıqlanmanın hesabına nail olacaq. Göydələnin daxilində ofislər, mehmanxanalar və mağazalar yerləşəcək.

7
Prezident İlham Əliyev, arxiv şəkli

"Ermənistan Azərbaycanla aqressiv davranmağa cəhd etmək durumunda deyil" - İlham Əliyev

3
"Bəli, mən prezidentəm və öz öhdəliklərimi yerinə yetirməliyəm. Lakin biz hamımız insanıq, hisslərimiz var. Biz onları gizlədə, onları idarə edə bilərik. Bəzən bu çox çətindir".

Eldar Tanrıverdiyev, Sputnik Azərbaycan

BAKI, 13 aprel — Sputnik. Təbii ki, azərbaycanlıların və ermənilərin gələcəkdə necə qarşılıqlı əlaqədə olacağını təxmin etmək çətindir. Düşünürəm ki, bu, böyük ölçüdə siyasətçilərin iradəsindən və siyasi müdrikliyindən asılı olacaq. Düşünürəm ki, burada, həm də Yerevanda körpülər qurmaq üçün daha aktiv olmalıyıq. Təbii ki, əgər bunu Ermənistan istəyirsə. Biz onların niyyətlərini bilmirik. Onlar bunu heç vaxt açıqlamayıblar. Sputnik Azərbaycan xəbər verir ki, bunu Azərbaycan Prezidenti İlham Əliyev bu gün ADA Universitetində keçirilən "Cənubi Qafqaza yeni baxış: Münaqişədən sonra inkişaf və əməkdaşlıq" adlı konfransda çıxışında deyib.

"Mən artıq bir neçə dəfə demişəm ki, biz müharibə səhifəsinin bağlandığını düşünürük. Mən artıq bir neçə dəfə demişəm ki, biz artıq Ermənistanla mümkün sülh razılaşması ilə bağlı da danışa bilərik. Bu bizim planlarımızdır. Lakin biz Ermənistan tərəfindən belə bir mesajlar görmürük.

Ermənistan Baş naziri susub. Ermənistan xarici işlər naziri isə aqressivdir. Ermənistan Azərbaycanla aqressiv davranmağa cəhd etmək durumunda deyil. Müharibə zamanı baş verənləri xatırlamalıdırlar. Erməni müxalifəti əslində isteriyadadır. Hazırda Azərbaycanafobiya və türkofobiya yeganə amilə çevrilib. Bu onlarda həmişə ən önəmli faktorlardan biri olub. Onların seçki kampaniyalarını Azərbaycanafobiya və türkofobiya, revanşizm hissi üzərində quracaqlarına əminəm.

Buna görə bu qarşılıqlı əlaqəni birtərəfli qura bilmərik. Mövqeyimiz aydındır. Biz buna hazırıq. Bu asan olmayacaq. Ağdama və digər işğaldan azad olunan ərazilərə qayıdacaq sabiq məcburi köçkünlər ermənilərin onların torpaqlarına, onların yaxınların məzarlarına, dini abidələrə nə etdiklərini görəcəklər. Onlar nə hiss edəcəklər? Mən bunu təxmin edə bilərəm. Bilirsiniz, mən müharibə zamanı təmas xəttini keçəndə və ya Ağdama binokl vasitəsi ilə baxanda və işğaldan azad olunan ərazilərə səfər edəndə eyni şeyi hiss etdim. Bəli, mən prezidentəm və öz öhdəliklərimi yerinə yetirməliyəm. Lakin biz hamımız insanıq, hisslərimiz var. Biz onları gizlədə, onları idarə edə bilərik. Lakin bəzən bu çox çətindir. Mən Azərbaycanlı qaçqınların hansı hissləri keçirəcəyini proqnozlaşdıra bilmərəm. Lakin gələcəyə baxan bir insan kimi, əgər Ermənistan tərəfi müsbət siqnallar verərsə, biz bu əlaqələri qurmaq üçün hər şeyi edəcəyik", -  Azərbaycan Prezidenti əlavə edib.

3

"İskəndər-M" raketləri barədə Bakı Moskvaya rəsmi məktub ünvanlayıb

7
(Yenilənib 11:49 13.04.2021)
"Mən Azərbaycan xalqından heç nə gizlətmirəm və hesab edirəm ki, Azərbaycan xalqı hər şeyi bilməlidir".

BAKI, 13 aprel — Sputnik. Azərbaycan Prezidenti İlham Əliyev rusiyalı həmkarı Vladimir Putinlə Qarabağda "İskəndər-M" raketlərinin qalıqlarının aşkar olunması barədə məlumatı müzakirə etdiyini bildirib. Sputnik Azərbaycan bildirir ki, Azərbaycanın Müdafiə Nazirliyi Rusiyanın Müdafiə Nazirliyinə rəsmi məktub ünvanlayıb.

"Aprelin 1-də mənim rusiyalı həmkarım Vladimir Putinlə telefon danışığım olub. Adətən, bildiyiniz kimi, telefon danışıqlarının məzmunu iki tərəf arasında razılaşdırılır, birgə, razılaşdırılmış məlumat verilir. Lakin mən Azərbaycan xalqından heç nə gizlətmirəm və hesab edurəm ki, Azərbaycan xalqı hər şeyi bilməlidir. Biz bu məsələni müzakirə etmişik (Putinlə)", - deyə İlham Əliyev "Cənubi Qafqaza yeni baxış: Münaqişədən sonra inkişaf və əməkdaşlıq" adlı konfransda çıxışında bildirib.

"Mənim göstərişimlə Azərbaycanın Müdafiə Nazirliyi şəkillərlə, sübutlarla birlikdə rəsmi məktub göndərib. Lakin biz hələ heç bir cavab almamışıq", - deyə dövlət başçısı bildirib.

Prezident rəsmi Yerevanın adı çəkilən raketlərdən istifadə olunması barədə bəyanatını "qəribə" adlandırıb.

"Onlar gah partlamamış raketlər barədə danışırlar, gah deyirlər ki, bu sirdir. Deməli, raketlər istifadə olunub. Biz Yerevandan rəsmi cavab gözləyirik. Mən sizə hələ bundan artığını deyəcəyəm: bizdə kifayət qədər sübut var, lakin biz rəsmi izahatları gözləyəcəyik", - deyə Əliyev vurğulayıb.

7
Teqlər:
məktub, Moskva, Bakı, raket, "İskəndər"