Şimal axını – 2 qaz kəmərinin tikintisi, arxiv şəkli

Rusiya neftinə qadağa qoymaq istəyən ABŞ paradoksal vəziyyətlə üzləşib

19
(Yenilənib 19:47 14.09.2020)
Keçən il Donald Tramp Venesuelaya qarşı sanksiya tətbiq edib. Nəticədə, Venesueladan neft ixracatı düşüb. Amerikanın neftayırma zavodları xammal çatışmazlığı böhranının qarşısını almaq üçün Rusiyanın "Urals" neftini və Rusiya mazutunu fəal şəkildə almağa başlayıblar.

BAKI, 14 sentyabr — Sputnik, Natalya Dembinskaya. Amerikalılar "Şimal Axını 2" layihəsi ilə bağlı yeni sanksiyalar elan etməyə hazırlaşırlar. Özləri isə Rusiya neftinin ən iri idxalçısına çevriliblər. Aparıcı analitik nəşrlərdən birinin qeyd etdiyi kimi, bu riyakar bir mövqedir və Rusiyadan tədarükü ümumiyyətlə qadağan etmək lazımdır. Lakin bu çətin ki, mümkün olsun: bu vəziyyətdə ağır neftə uyğunlaşmış neftayırma zavodlarının işi dayanacaq.

Ən böyük istehlakçı

Konqres "Şimal Axını 2" layihəsi ilə bağlı olan Avropa şirkətlərinə məhdudiyyətlər qoymağı planlaşdırır. Bu, artıq Almaniyada ciddi tənqidlərə səbəb olub. Hətta Berlin əks-sanksiyalarla hədələyib.

Amerikanın nüfuzlu analitik nəşri olan "The National Interest" qeyd edir ki, bu cür reaksiya tamamilə başadüşüləndir: Vaşinqtonun riyakarlığı göz qabağındadır. Bu il ABŞ Rusiyanın xam neftinin idxalçıları arasında liderə çevrilib. ABŞ Rusiyanın ümumi xam neft ixracının 12 faizini alıb.

ABŞ-ın Enerji İnformasiya Agentliyinin (EIA) məlumatına görə, ilk yarım il ərzində Rusiyadan Birləşmiş Ştatlara 9 milyon tondan çox neft məhsulu (68 milyon barel) gətirilib və bu, 16 il ərzində rekord göstəricidir.

Riyakar yanaşma

EIA bildirir: formal olaraq Birləşmiş Ştatlar ikinci yerdədir, çünki Niderland 12,19 milyon ton alıb. Amma bu ölkə tranzit qovşağıdır və oradan neft məhsulları başqa dövlətlərə göndərilir. Amerika isə nefti öz emalı üçün alır və burada Vaşinqton rəqabətdən kənardır.

“The National Interest” nəşri isə belə bir təkliflə çıxış edir: Rusiyadan idxal qanunla qadağan edilsin. Məsələn, Konqres bu tədarükü təmin edən şirkətlərə qarşı maliyyə sanksiyaları tətbiq edə bilərdi.

Amma bunu praktik olaraq həyata keçirməyin mümkünlüyü tamamilə anlaşılmazdır, çünki üçüncü ölkələrə qarşı öz sanksiyaları sayəsində amerikalılar Rusiya xammalından birbaşa asılı vəziyyətə düşüblər. Və bunu rəsmi olaraq hələ keçən il etiraf ediblər.

Alternativ yoxdur

Rusiya ABŞ-a xam neft tədarükü üzrə altıncı yerdə idi. 2020-ci ilin fevralında isə ikinci yerə çıxıb və yalnız Kanadadan geridə qalıb. Ağır Venesuela neftindən məhrum olmuş və İrandan idxalın kəskin şəkildə aşağı düşməsi ilə üzləşmiş amerikalılar təcili olaraq alternativ tədarükçülər axtarmağa məcbur olublar.

Problem ondadır ki, bir sıra neft emalı müəssisələrinin texnologiyası Perm hövzəsindən və Qərbi Texasdan gələn yüngül nefti istifadə etməyə imkan vermir. Meksika körfəzi və şərq sahillərindəki neft emalı müəssisələri ən çətin vəziyyətə düşüb. Bu zavodlar kükürdlü neft növləri üçün nəzərdə tutulub, buna görə də yüngül nefti (əvvəllər Venesueladan alınan) ağır neftlə qarışdırmaq lazımdır.

Lakin keçən ilin yanvarında Donald Tramp Venesuelaya qarşı sanksiya tətbiq edib. Nəticədə, Venesueladan ixracat 32 faiz — sutkada 1,001 milyon barelə düşüb. Amerikanın neftayırma zavodlarının qarşısında xammal çatışmazlığı səbəbindən işin dayanması təhlükəsi yaranıb. Böhranın qarşısını almaq üçün amerikalılar Rusiyanın "Urals" neftini və Rusiya mazutunu fəal şəkildə almağa başlayıblar.

Ötən il ABŞ Rusiyadan 11 milyon ton mazut idxal edib – 2018-ci ildə olduğundan iki dəfə çox.

“Bu, Venesueladan yüksək kükürdlü yanacağın tədarükü kollapsını kompensasiya etməyə kömək edib”, – ABŞ-ın "Vortexa" şirkətinin analitikləri qeyd ediblər.

Səudiyyə Ərəbistanının kimyəvi tərkibcə yaxın olan nefti alternativ ola bilərdi, lakin səudiyyəlilər hasilatı artırmaqdan imtina ediblər. Nəticədə iqtisadiyyat siyasəti sıxışdırıb – ABŞ Rusiyaya müraciət etmək məcburiyyətində qalıb.

Uyğun xüsusiyyətlərinə əlavə olaraq, Rusiya xammalı qiymətinə görə də cəlbedicidir. Yanvar-iyul aylarında "Urals" neftinin bir bareli orta hesabla 40,34 dollara satılıb, ötən ilin yanvar-iyul aylarında isə onun qiyməti 65,27 dollar olub.

Bundan əlavə, neft yükünün daşınma qiyməti əhəmiyyətli dərəcədə azalıb. Karantinin bitməsindən sonra isə yanacağa tələbat artıb – insanlar yenidən avtomobillərdə gedirlər və təyyarələrdə uçurlar.

Amerikanın neft emalı zavodlarının Rusiyadan ağır nefti almaqdan başqa heç bir seçimi qalmırdı. Buna heç dövlətlərarası münasibətlərin pisləşməsi və ya Vaşinqtonun Moskvaya qarşı tətbiq etdiyi çoxsaylı sanksiyalar mane olmayıb. Bütün bunların fonunda "Şimal Axını 2" layihəsini boğmaq cəhdləri getdikcə daha çox paradoksal görünür.

19
Ceyhun Bayramov, arxiv şəkli

Ceyhun Bayramov: Pandemiya yeni fürsət təqdim edir

12
(Yenilənib 16:53 27.11.2020)
İnkişaf və əməkdaşlıq üçün yeni imkanlar meydana çıxır və QDİƏT yeni reallıqları qiymətləndirməli və onlardan faydalanmalıdır.

BAKI, 27 noyabr — Sputnik. Azərbaycanın Xarici işlər naziri Ceyhun Bayramov Qara Dəniz İqtisadi Əməkdaşlıq Təşkilatı (QDİƏT) üzv dövlətlərinin Xarici İşlər Nazirləri Şurasının 42-ci iclasında çıxış edib.

Sputnik Azərbaycan xəbər verir ki, nazir çıxışında bildirib:

"İlk növbədə, QDİƏT gündəliyində olan bir sıra vacib məsələlərin əlaqələndirilməsi və həlli üçün Rumıniya nümayəndə heyətinin səylərini yüksək qiymətləndirərək, Rumıniyanı səmərəli sədrliyinə görə təbrik etmək istərdim. Eyni zamanda, Şimali Makedoniya Respublikasını 13-cü üzvümüz qismində salamlamaqdan məmnunluq duyuram. Bu üzvlük müştərək maraq sahələrində əməkdaşlığın artırılması üçün imkanlar yaradaraq, Şimali Makedoniya Respublikası ilə QDİƏT üzv dövlətləri arasında əlaqələrin gücləndirilməsinə xidmət edəcək.

Təşkilatımız gələcəyə birgə baxış və qarşılıqlı əməkdaşlıq yolu ilə Qara dənizi sülh, sabitlik və firavanlıq bölgəsinə çevirmək məqsədilə yaradılmışdır. QDİƏT bir sıra sahələrdə, o cümlədən ticarət, enerji, nəqliyyat, turizm kimi sahələrdə qarşılıqlı faydalı əməkdaşlıq imkanlarının genişləndirməsinə xidmət edən əhəmiyyətli bir platforma səviyyəsinə yüksəldi.

Bir çox vacib təşəbbüslərin elan edilməsi təqdirəlayiqdir, lakin xalqlarımızın mənafeyi naminə bu təşəbbüslərin praktiki nəticələrini təmin etmək üçün daha böyük əməkdaşlıq zəruridir. Müxtəlif işçi qrupları arasında qarşılıqlı əlaqənin asanlaşdırılması, sektoral və dövlət-özəl əməkdaşlığının gücləndirilməsi vasitəsilə QDİƏT, üzv dövlətlərə COVİD böhranının çoxsaylı təsirlərinin öhdəsindən gəlmək və daha yaxşı yenidənqurmanı həyata keçirməkdə köməklik göstərə bilər.

Öz tərəfindən, Azərbaycan regional əməkdaşlığın möhkəmləndirilməsi və asanlaşdırılması istiqamətində davamlı iş aparır. Ölkəm Xəzər dənizi - Qara dəniz əməkdaşlığının gücləndirilməsində konkret təşəbbüslər vasitəsilə fəal rol oynayır. Enerji, nəqliyyat, İKT, ticarət və KOBİ-lər əsas prioritetlərimiz sırasındadır və biz QDİƏT-in sektoral qurumları və əlaqəli təşkilatlarında əməkdaşlığımızın dərinləşdirməsinə ümidvarıq. Növbəti fəaliyyətdə olan sədr kimi Albaniyanın nəticəyönümlü səylər vasitəsilə əməkdaşlığı inkişaf etdirəcəyinə ümid edirik.

COVID-19 pandemiyası iqtisadi itkilərə gətirən zərərini davam etdirir. Eyni zamanda, pandemiya regional ticarəti inkişaf etdirmək, özəl sektoru təşviq etmək və davamlı artımı dəstəkləmək üçün fürsət təqdim edir. Ticarət, sərmayə və artıma yenidən diqqət yetirərək, biz QDİƏT bölgəsində sürətli və davamlı sosial-iqtisadi bərpaya töhfə verə bilərik.

İnkişaf etmiş infrastruktur və daha yaxşı biri-biri ilə birləşən nəqliyyat dəhlizləri vasitəsi ilə geniş Qara dəniz bölgəsində daha yaxşı əlaqələr naminə işimizi davam etdirməliyik. Bu kontekstdə tranzitin asanlaşdırılması, əməliyyatların rəqəmsallaşdırılması, nəqliyyat və ticarətdə tənzimləyici və prosedura maneələrinin aradan qaldırılması üçün səylərin iki dəfə artırılması vacibdir.

Azərbaycan Bakı-Tbilisi-Qars magistral dəmir yolu xətti, Bakı Beynəlxalq Dəniz Ticarət Limanı və iri investorlar üçün münasib Ələt Azad İqtisadi Zonası ilə yanaşı, Trans-Xəzər Beynəlxalq Nəqliyyat Marşrutu, Lapis-Lazuli nəqliyyat dəhlizinin, habelə bütün regionun tranzit imkanlarının artırılmasına yönəlmiş Şimal-Cənub, Cənub-Qərb və Şimal-Qərb ticarət yolları inkişafına praktik töhfəsini davam etdirir.

Tikinti işlərinin başlamasından dörd il yarım sonra Trans-Adriatik boru kəmərinin kommersiya istismarı başlayıb. Bu irəliləyiş bizə Cənubi Qaz Dəhlizinin uğurlarını möhkəmləndirməyə imkan verir. Biz qaz təminatı coğrafiyasının genişləndirilməsi üçün Avropa İttifaqı ilə yaxından işləyirik. Bir neçə QDİƏT üzv dövlətini birləşdirən bu layihə enerji təhlükəsizliyinin genişləndirilməsi ilə yanaşı, Avropada sıfır emissiya enerji sisteminə keçiddə də mühüm rol oynayacaqdır.

Münaqişələr, uzun sürən xarici işğalçılıq və cavabdehliyin olmaması sülh və təhlükəsizliyi təhlükə altına qoyur. Bu həm də regional əməkdaşlığı əngəlləyir. Şuranın diqqətinə məmnunluqla çatdırmaq istərdim ki, bu ilin 9 noyabrında Azərbaycan Prezidenti, Rusiya Prezidenti və Ermənistanın Baş nazirinin imzaladığı bəyanat Ermənistan-Azərbaycan Dağlıq Qarabağ münaqişəsinin həllində yeni səhifə açdı. Ermənistan Azərbaycanın işğal edilmiş ərazilərdən öz silahlı qüvvələrini çıxarır. Azərbaycan öz ərazi bütövlüyünü və suverenliyini bərpa edir. Keçmiş münaqişə zonasına sülhməramlı qüvvələr yerləşdirilir və birgə atəşkəs monitorinq mərkəzi yaradılır.

Münaqişənin həllində yeni mərhələyə, yenidənqurma və reabilitasiya mərhələsi, dinc birgəyaşayışın bərpası mərhələsinə qədəm qoymuşuq. İnkişaf və əməkdaşlıq üçün yeni imkanlar meydana çıxır və QDİƏT yeni reallıqları qiymətləndirməli və onlardan faydalanmalıdır.

Azərbaycan, Ermənistan və Rusiya liderlərinin Qarabağ münaqişəsinin həllinə dair birgə bəyanatında əks olunduğu kimi, bölgədəki bütün iqtisadi və nəqliyyat əlaqələri açılır. Bu o deməkdir ki, Asiya ilə Avropa arasında ticarətdə regionumuzun rolunun gücləndirilməsinə imkanlar yaradacaq həyati əhəmiyyətli müstəqil quru dəhlizi fəaliyyətə başlaya bilər.

Azərbaycanın bütün tərəfdaşlarına təklif edə biləcəyi və artıq təklif etdiyi çox şey var. QDİƏT üzv dövlətləri birləşdirən və müştərək firavan gələcək qurmağa imkan verən təşəbbüslərimiz regional əməkdaşlığı genişləndirmək və dərinləşdirmək üçün maraq və potensialımızın ən yaxşı nümunəsidir. Gələcək əməkdaşlıq üçün hazırıq.

Yalnız müştərək əzmkarlıq, xüsusilə dövlətlərin suverenliyinə və ərazi bütövlüyünə hörmət və beynəlxalq səviyyədə tanınmış sərhədlərinin toxunulmazlığı ilə bağlı olan beynəlxalq öhdəliklərə tam əməl etməklə biz dinc, firavan və sabit gələcəyə nail ola bilərik".

12
Teqlər:
münaqişə, əməkdaşlıq, iqtisadiyyat, Ceyhun Bayramov, iclas, QDİƏT
Qarabağda Rusiya sülhməramlıları , arxiv şəkli

Rusiya Qarabağla bağlı Türkiyə ilə təmaslarını davam etdirir

15
(Yenilənib 16:34 27.11.2020)
Rusiya Xarici İşlər Nazirliyinin sözçüsü Maria Zaxarova iki ölkə arasındaki müxtəlif istiqamətdə qarşılıqlı əlaqələrin həyata keçirildiyini bildirib

BAKI, 27 noyabr — Sputnik. Rusiya Federasiyası Qarabağ münaqişəsinin nizamlanması məsələsi ilə bağlı Türkiyə ilə təmasdadır. Sputnik Azərbaycan-ın RİA Novosti-yə istinadən yaydığı xəbərə görə, bu barədə cümə günü keçirilən brifinqdə Rusiya Xarici İşlər Nazirliyinin sözçüsü Mariya Zaxarova məlumat verib.

"Türkiyə ilə qarşılıqlı əlaqələrmizə gəlincə, bu, müxtəlif istiqamətlərdə gedir. Bura həm siyasi və diplomatik, həm də hərbçilərimiz arasındakı təmaslar aiddir. Əlbəttə ki, əsas gedişat bölgədəki vəziyyəti müntəzəm olaraq müzakirə edən dövlət başçıları tərəfindən müəyyənləşdirilir", - deyə Zaxarova bildirib.

Xatırldaqaq ki, noyabrın 10-da Rusiya, Azərbaycan və Ermənistan liderləri Dağlıq Qarabağda hərbi əməliyyatların tamamilə dayandırılması barədə birgə bəyanat imzalayıblar. Həmin bəyanata görə, erməni işğalı altında olan rayonlar Azərbaycanın nəzarətinə keçir, tərəflər əsirlərin mübadiləsini aparır, təmas xətti və Ermənistanı Qarabağla birləşdirən Laçın dəhlizi boyunca Rusiya sülhmərmalıları yerləşdirilir.

 

15
Teqlər:
diplomatiya, hərbçilər, sülhməramlılar, "Qarabağ, Azərbaycan, Türkiyə, Rusiya
Mövzu:
Azərbaycan və Ermənistan arasında müharibə
Bakıda köhnə avtobus, arxiv şəkli

Gözəl ağa çox gözəl idi, vurdu... - İctimai nəqliyyatmızın ağır günləri hələ qarşıdadır

3
(Yenilənib 17:42 27.11.2020)
Ekspert: "Dizellə işləyən avtobusların yığışdırılması sərnişindaşımada ciddi avtobus çatışmazlığına səbəb olacaq".

Zülfiyyə Quluyeva, Sputnik Azərbaycan

BAKI, 27 noyabr — Sputnik. Yaxın gələcəkdə Bakı şəhərində sərnişindaşımada istismarda olan dizel yanacağı ilə işləyən avtobuslar xətlərdən kənarlaşdırılacaq. Sputnik Azərbaycan-ın məlumatına görə, bunu Bakı Nəqliyyat Agentliyinin (BNA) Yol hərəkətinin təşkili şöbəsinin müdiri Tərlan Səfərov deyib. Onun sözlərinə görə, hazırda dövlət sifarişi ilə ölkəyə avtobus gətirən sahibkarlara avtobusların CNG yanacağı ilə işləyən, mütləq ekoloji təmiz olması tapşırılır: "Gələcək planlarda isə həmçinin, elektrik enerjisi ilə işləyən avtobusların gətirilməsi də nəzərdə tutulur".

Sputnik Azərbaycan dizel yanacağı ilə işləyən avtobusların xətlərdən nə vaxt çıxardılacağını, bu boşluğun nə ilə dolduracağını araşdırıb.

Nəqliyyat məsələləri üzrə tanınmış ekspert, hüquqşunas Ərşad Hüseynov Sputnik Azərbaycan-a açıqlamasında bildirib ki, dizellə işləyən avtobusların xətdən kənarlaşdırılacağı real görünmür. Ekspert bildirir ki, belə halda paytaxtda sərnişindaşımada ciddi avtobus çatışmazlığı yarana bilər: "2019-cu il 7 mart tarixində "Bakı şəhərində sərnişindaşımada istifadə olunan avtobuslara və taksi minik avtomobillərinə, onların sürücülərinə, sərnişindaşıma fəaliyyətini həyata keçirən daşıyıcılara, nəqliyyat mübadilə mərkəzlərinə, avtobuslar üçün dayanacaq məntəqələrinə və taksi minik avtomobilləri üçün duracaq yerlərinə dair Tələblər"in təsdiq edilməsi haqqında Nazirlər Kabineti qərar verib. Həmin qərarın 2-ci bəndində "Bakı şəhərinin inzibati ərazisində müntəzəm şəhərdaxili (qəsəbədaxili) sərnişin daşımalarını yerinə yetirən avtobuslara dair tələblər" yer alıb. Qərarın 2.1.14. bəndində qeyd olunur ki, avtobuslar müvafiq avtonəqliyyat vasitələri üçün qüvvədə olan ekoloji standartlara uyğun olmaqla, sıxılmış təbii qaz və ya elektrik mühərriki ilə təchiz edilməlidir. Qərarın son icra tarixində isə qeyd edilir ki, bu tələblərin 2.1.14-cü yarımbəndi 2022-ci il yanvarın 1-dən qüvvəyə minir. Belə çıxır ki, paytaatda sərnişindaşımada istismar edilən dizel yanacağı ilə işləyən avtobuslar 2021-ci ilin yanvar ayının 1-dən etibarən xətlərdə istismardan tam uzaqlaşdırılacaq. Bu qərarın icrası həmin tarixədək real deyil. Düzdür, dünyanın əksər ölkələrində daxili yanma mühərriki dizellə işləyən avtobusları xətlərdən yığışdırırlar. Amma küllü məbləğdə vəsait tələb edir. Bu günədək dövlət vəsaiti hesabına 700 ədəd BakuBus avtobusları alınıb. Bu gün Bakıda istismarda olan 1400-dən çox avtobus dizellə işləyir. Xətdə olan 2200 avtobus Bakı və Bakıətrafının sərnişindaşıma tələblərini ödəmir. Dünyada sərnişindaşımada keyfiyyəti artırmaq üçün metro, trolleybus, tramvaydan istifadə olunur. Bakıda isə ancaq sərnişinlər Bakı metrosu və avtobuslarla daşınır. Metro isə məhduddur, 26 stansiyadan ibarətdir ki, bu da ancaq şəhəri əhatə edir, şəhərətrafında yoxdur. Yəni, bu gün 2200 avtobus sərnişindaşımada azlıq edir. Əhalinin ictimai nəqliyyatdan daha rahat istifadəsi üçün avtobusların sayı artırılmalıdır. Belə bir şəraitdə bu sərt tələbin icrası real deyil və avtobus çatışmazlığına gətirib çıxarar.

Bu gün sərnişindaşıma ilə həm dövlətə aid "BakuBus", həmçinin də özəl sektor məşğul olur. Özəl sektorun isə CNG ilə işləyən avtobusları almaq imkanı yoxdur. Çünki, CNG ilə işləyən avtobuslar dünyanın ən bahalı avtobuslarıdır. "BakuBus"a 700 avtobus Azərbaycan dövləti tərəfindən 5 il müddətində alınıb. Qısa vaxtda dizellə işləyən avtobusların dövlət hesabına alınmış CNG ilə işləyən avtobuslarla əvəzlənməsi inandırıcı deyil. Üstəlik işğaldan azad edilmiş ərazilərimizə iri həcmli investisiya tələb olunur. Belə bir vaxta dövlətin yüz milyonlarla vəsaiti sırf avtobusların alınması üçün xərcləməsi inandırıcı görsənmir. CNG ilə işləyən avtobusların birinin qiyməti 500 min manat, bir qədər ondan yuxarıdır. NK-nın həmin qərarı Bakı Nəqliyyat Agentliyinin təklifi ilə qəbul olunub. Bu qərar yəqin ki, bir qədər uzadılacaq. Bundan sonra isə elə bir dövr gəlir ki, artıq CNG ilə işləyən avtobuslar yox, elektrobuslar gündəmə gəlir. Amerika və Rusiyada artıq elektrobuslar dövriyyəyə buraxılır. Onlarda daxili yanma mühərriki yoxdur. Havaya ümumiyyətlə zəhərli qazlar buraxmırlar. Azərbaycanda isə hələlik dizel mühərrikli avtobusları istismara yararlı saxlamaq lazımdır. Həmin qərar qəbul olunduqdan sonra Vergi Məcəlləsinə də dəyişiklik edildi. Dəyişiklikdən sonra dizel mühərrikli avtobusların gətirilməsinə qoyulmuş rüsum artırırldı. Bu gün özəl daşıyıcıların GNG ilə işləyən avtobusları gətirmək imkanı yoxdur. Hətta mən belə deyərdim ki, rüsumları əvvəlki vəziyyətinə qaytarmaq lazımdır. Dizellə işləyən, amma ekoloji cəhətdən ən son ekoloji tələblərə uyğun avtobuslar gətirilsin. Dövlət özəl şirkətlərə elektrobusların gətirilməsi istiqamətində stimullaşdırıcı tədbirlər görməlidir. Əks halda, dizellə işləyən avtobusların yığışdırılması sərnişindaşımada ciddi avtobus çatışmazlığına səbəb olacaq".

Bakı Nəqliyyat Agentliyinin mətbuat katibi Mais Ağayev isə Sputnik Azərbaycan-a açıqlamasında bildirib ki, Bakı şəhərində müntəzəm sərnişindaşımalarına cəlb olunan avtobuslarla bağlı Nazirlər Kabinetinin 4 mart 2019-cu tarixli 73 saylı qərarı ilə təsdiq olunan norma və standartlar var: "Həmin sənədə əsasən 2022-ci ilin 1 yanvar tarixindən sərnişindaşımalar üzrə CNG və Elektirik mühərrikli avtobuslar qəbul olunacaq. Həmin vaxtda xətdə olacaq dizel mühəttikli avtobuslar isə tədricən marşrut sistemindən kənarlaşdırılacaq. Bu gün Bakı şəhərində məlumat üçün bildirim ki, dizel mühərrikli avtobusların sayı təxminən 2 min ədədə yaxındır. Ötən dövrdə dövlət tərəfindən sərnişindaşımalar üzrə xidmətin keyfiyyətinin artırılması istiqamətində mühüm tədbirlər görülüb. Bu çərçivədə şəhərimizə yeni və komfortlu avtobuslar gətirilərək istismara buraxılıb. Bu avtobusların hamısı məhz CNG mühərriklidir. Hazırda Bakı şəhərində müntəzəm sərnişindaşımalara cəlb olunan avtobusların 604 CNG yəni sıxılmış qaz mühərriklidir. Bu avtobusların 1 ədədi Xaliq Faiqoğlu şirkətinin istsmarında olan nəqliyyat vasitəsidir. 603-ü isə BakuBus MMC-yə aiddir. Lakin bu statistika dəyişilməkdədir. Çünki bilirsiz ki, daha 115 ədəd BMC markalı müasir və komfortlu avtobusların gətirilir şəhərimizə. Onlarında hamısı CNG mühərrikli avtobuslardır. Növbəti il üçün alınması nəzərdə tutulan avtobuslar da eyni qayadada CNG mühərrikli olacaqdır. Daşıyıcılara da bununla bağlı həm yazılı həm də şifahi məlumat verilib, tapşırılıb ki, yeni avtobuslar gətirilərkən mütləq həmin norma və starndarları o cümlədən CNG və elektirik mühərrikli olmasını nəzərə alsınlar".

M. Ağayev bildirib ki, paytaxt Bakının ekoloji tarazlığını qorumaq üçün tədbirlər davam etdirilir.

3
Teqlər:
Ərşad Hüseynov, BakuBus, BNA, Mais Ağayev, Bakı şəhəri, sərnişindaşıma, ictimai nəqliyyat, avtobuslar