Ermənistan Baş naziri Nikol Paşinyan

Paşinyan Qarabağdan ötrü "geniş kombinasiya" axtarır

59
(Yenilənib 12:08 01.09.2019)
"Biz özümüzün iqtisadi tərəqqimizi ciddi şəkildə təmin etməliyik. Qarabağ məsələsi ayrılıqda diplomatik, yaxud hərbi yolla həll oluna bilməz"

BAKI, 1 sentyabr — Sputnik. "Dağlıq Qarabağ münaqişəsinin həlli təkcə diplomatik və ya hərbi fəzada mümkün deyil".

Sputnik Ermənistan bildirir ki, bunu Ermənistanın Baş naziri Nikol Paşinyan Fransa ermənilərinin  Nouvelle d'Arménie jurnalına müsahibəsində deyib.

"Bizim münaqişəmiz var və o, həll edilməyib. Əgər biz strateji düşüncəyə malik xalqıqsa, mən buna əminəm, biz məsələləri qısa zamanda, bir neçə günə həll edə bilmərik", - Paşinyan qeyd edib.

Onun sözlərinə görə, Qarabağ probleminin həlli üçün ölkənin potensialının konsolidasiyası gərəkdir. Birinci növbədə Ermənistanın cəmiyyəti və iqtisadiyyatı, nazirin fikrincə, rəqabətqabiliyyətli olmalı, daimi inkişaf yoluna qədəm qoymalıdır.

"Biz özümüzün iqtisadi tərəqqimizi ciddi şəkildə təmin etməliyik. Qarabağ məsələsi ayrılıqda diplomatik, yaxud hərbi yolla həll oluna bilməz. Mərkəzində güclü və rəqabətqabiliyyətli iqtisadiyyat, qüdrətli cəmiyyət və yüksək texnologiyalar dayanan geniş kombinasiya tələb olunur", - Paşinyan deyib.

"İdeya belədir ki, biz mümkün düşmənlərimizə xalq, cəmiyyət kimi bir olduğumuzu, bizimlə müharibə etməyin mənasız olduğunu göstərə bilək, çünki bunun yeganə nəticəsi yalnız onların məğlubiyyəti olacaq", - nazir bildirib.

Onun sözlərinə görə, münaqişə və onun həlli - hökumətin və baş nazirin özünün birinci dərəcəli vəzifəsidir. Öz rolunu isə Paşinyan milli potensialın birləşdirilməsi və inkişafı üçün real imkanların yaradılmasında görür.

Xatırladaq ki, ötən həftə Nikol Paşinyan Dağlıq Qarabağ Muxtar Vilayətinin (DQMV) Azərbaycan SSR-dən zor gücü ilə ayrılmasını Azərbaycanın SSRİ-dən çıxması prosesi ilə əsaslandırmağa cəhd etmişdi. Azərbaycan XİN isə bunu Paşinyanın hüquqi savadsızlığının və ya yalana əl atmasının sübutu kimi dəyərləndirmişdi.

 Azərbaycan tərəfinin bəyanatında həmçinin qeyd edilir ki: "Ermənistan tərəfinin tez-tez istinad etdiyi 1990-cı il 3 aprel tarixli "Müttəfiq respublikanın SSRİ-dən çıxması ilə əlaqədar məsələlərin həlli qaydası haqqında" SSRİ Qanununun məqsədi, müttəfiq respublikaların SSRİ-dən ayrılması halında, SSRİ daxilindəki qarşılıqlı münasibətləri müəyyən bir prosedura yaratmaqla tənzimləməkdən ibarət idi. Müttəfiq respublikanın SSRİ-dən çıxması yalnız mürəkkəb çoxmərhələli proseduradan keçdikdən və nəticədə SSRİ Xalq Deputatları Qurultayı tərəfindən müvafiq qərar qəbul edildikdən sonra tamamlanmış hesab edilə bilərdi. Lakin qeyd olunan Qanun heç vaxt tətbiq edilmədi və heç bir müttəfiq respublika, o cümlədən Azərbaycan və Ermənistan bu Qanunda nəzərdə tutulmuş ayrılma qaydasından istifadə etmədi.

59
Teqlər:
Azərbaycan, Ermənistan, Dağlıq-Qarabağ münaqişəsi, Dağlıq Qarabağ
Əlaqədar
Rəsmi Bakıdan Paşinyana sərt cavab verildi
Söz "müharibəsi": "Ermənistan bizi ittiham edə biləcək subyektlər sırasında ən sonuncudur"
Ermənistanda müəmmalı istefaların səbəbi bilindi
XİN Mnatsakanyana cavab verdi: Səbrimiz tükənməz deyil
Azərbaycanın Dağlıq Qarabağ üzərində suverenliyini bərpa etməsi hər an yetişə bilər - XİN