Ukraynada prezident seçkiləri

Zelenskini prezident edən səbəb onun sonunu yaxınlaşdıra bilər

3664
(Yenilənib 15:17 22.04.2019)
Vladimir Zelenskinin ən zəif tərəflərindən biri də onun parlamentdə fraksiyasının olmamasıdır

Eldar Tanrıverdiyev, Sputnik Azərbaycan

BAKI, 22 aprel - Sputnik. Ukraynada keçirilən prezident seçkilərinin ikinci turu artıq başa çatıb. Sputnik Azərbaycan Ukrayna Mərkəzi Seçki Komissiyasına istinadən xəbər verir ki, artıq Ukraynada bülletenlərin 97,04 faizi sayılıb.

Nəticələrə əsasən, Vladimir Zelenski 73,15 faiz səs toplayıb. Zelenskiyə 13 milyondan çox ukraynalı səs verib. Onun rəqibi Petro Poroşenko isə 4,4 milyon ukraynalının və ya seçicilərinin 24,52%-inin səsini toplayıb. Ötən gün Azərbaycanda olan Ukrayna vətəndaşları da bu ölkənin Azərbaycandakı səfirliyinə gələrək öz səsvermə hüququndan istifadə ediblər.

Ukraynanın Azərbaycandakı səfirliyindən Sputnik Azərbaycan-a verilən məlumata görə, ümumilikdə səfirlikdə 233 Ukrayna vətəndaşı seçkilərə qatılıb. Onların 51,5 faizi Zelenskinin lehinə, 48,5% seçici isə Pyotr Poroşenkonun lehinə səs veriblər.

Artıq Pyotr Poroşenko da qələbə münasibəti ilə öz rəqibini təbrik edib və ona uğurlar arzulayıb.

Sputnik Azərbaycan "Atlas" Araşdırmalar Mərkəzinin rəhbəri, politoloq Elxan Şahinoğlunun Ukraynada prezident seçkilərinin nəticələri, həmçinin bundan sonra Ukraynanı nələrin gözləməsi, xüsusilə Ukraynanın yeni prezidenti Vladimir Zelenskinin Azərbaycanla münasibətləri necə quracağı ilə bağlı ehtimallarını öyrənib.

Elxan Şahinoğlu qeyd edib ki, Ukraynada prezident seçkilərinin nəticələri gözlənilən kimi olub: "Bütün rəy sorğuları seçkinin birinci və ikinci turundan əvvəl Zelenskinin xeyrinə idi. Zelenski böyük səs çoxluğu ilə qalib gəldi. Prezident seçkilərinin birinci turundan sonra çoxları düşünürdü ki, Pyotr Poroşenko mahir bir siyasətçi kimi keçiriləcək debatlarda fərqi azalda biləcək. Lakin bu, baş vermədi, əksinə, debatlarda Zelenski öz opponentinə çox kəskin suallar verdi".

Politoloq Pyotr Poroşenkonun məğlubiyyətinin səbəblərini də izah edib: "Poroşenko prezident seçiləndə Ukrayna dağılmış vəziyyətdə idi. Krım artıq ilhaq olunmuş, Donbasda separatizm başlamışdı. Bundan başqa ordu və təhlükəsizlik sistemi dağılmışdı. Poroşenkonun prezident vəzifəsində ilk işi ordunu və təhlükəsizlik sistemini qurmaq oldu. Poroşenko buna böyük əziyyətlə nail oldu".

Ekspertin sözlərinə görə, Pyotr Poroşenko iqtisadiyyatdakı və sosial sahədəki ağır problemləri həll edə bilməyib: "Ukraynanın borcları artdı, dağılmış sənayeni bərpa etmək mümkün olmadı. Pyotr Poroşenkonun dövründə Ukraynanı tərk edənlərin də sayı artdı. Poroşenko insanların çox arzuladığı oliqarxik sistemə son qoya bilmədi. Bəlkə də bu, onun imkanı xaricində idi. Çünki birincisi, özü də oliqarxdır və əlindəki maliyyə imkanlarından imtina edə bilməzdi. İkincisi, Ukraynada oliqarxik sistem müstəqillik illərindən qurulub və bunu neytrallaşdırmaq ən güclü prezidentin belə, imkanı xaricindədir. Oliqarxlar öz adamları vasitəsilə ölkədə mümkün olan hər şeyə nəzarət edirlər. Bütün bunlar Poroşenkonun reytinqinə mənfi təsir etdi".

Elxan Şahinoğlu qeyd edir ki, Zelenski artist və yumoristik proqramın aparıcısı kimi məşhurluq qazanıb: "Zelenskinin yeganə üstünlüyü onda idi ki, nə qədər əcaib səslənsə də, siyasətçi deyil. Ukraynalıların böyük əksəriyyəti mövcud idarəetmədən və siyasətçilərdən beziblər, çünki verilən vədlər yerinə yetirilməyib. Ona görə də vətəndaşlar yeni simaya üstünlük verməyə qərar verdilər".

Prezident seçkilərindən sonra nələrin baş verəcəyindən danışan ekspert qeyd edib ki, Vladimir Zelenski oliqarxik sistemi dəyişə bilməyəcək: "Bu, onun əlində deyil. Əksinə, Zelenskinin özünün oliqarx İqor Kolomoyski ilə yağınlığı var. Kolomoyski, böyük ehtimalla, İsraildən Ukraynaya geri qayıdacaq.

Vladimir Zelenskinin dağılmış iqtisadiyyatı düzəltmək üçün milyardlarla dollar investisiyalara ehtiyacı var. Çətin ki, Qərb dövlətləri və beynəlxalq maliyyə instituları həmin milyardları yeni prezidentə versinlər. Poroşenko qərbpərəst siyasətinə rəğmən, istədiyi investisiyaları ala bilmədi. Zelenski isə Qərb üçün qara qutudur. Digər tərəfdən, Zelenskinin iqtisadi proqramı haqqında da məlumat yoxdur.

Vladimir Zelenskinin Krım və Donbass siyasəti bəlli deyil. Əlbəttə, Zelenski Krımın ilhaqını və Donbassın işğalını qəbul etmir. Ancaq Zelenski Poroşenkonun Rusiya ilə bağlı sərt siyasətini davam etdirməyə də bilər. Vladimir Zelenski Avropa İttifaqına üzvlüyü qarşısına hədəf kimi qoysa da, NATO ilə bağlı fərqli siyasət yürüdə bilər: "Poroşenkonun NATO-ya üzvlük hədəfi birmənalı idi. Zelenski NATO-ya üzvlük hədəfindən yayına bilər ki, bu da Kremlin xeyrinə olacaq".

Azərbaycanlı politoloq vurğulayıb ki, Vladimir Zelenskinin ən zəif tərəflərindən biri də onun parlamentdə fraksiyasının olmamasıdır: "Ali Radanın böyük səlahiyyətləri var. Ukraynada oktyabr ayında parlament seçkisi keçiriləcək. Zelenski oktyabra qədər hazırkı yüksək reytinqini qoruya bilsə, rəhbəri olduğu "Xalqın xidmətçisi" hərəkatını parlamentə keçirə bilsə, onda müəyyən hadisələrə təsir edə biləcək. Ancaq ona qədər Ukraynada proseslər tərsinə də gedə bilər. Çünki onun istədiyi qanunlar parlamentdən keçməlidir. Zelenskinin siyasətçi olmamaq üstünlüyü onun əleyhinə çevrilə bilər. Zelenskinin siyasətdə təcrübəsinin olmaması və komandasındakı fiqurların yanlış qərarları ona baha başa gələ bilər. Onu da unutmayaq ki, Ukraynadakı parlament seçkisinə Rusiya da ciddi hazırlaşır, Ukraynadakı tərəfdarlarının və siyasi qruplarının təmsilçilik hüququnu artırmağı qarşısına məqsəd qoyub".

Pyotr Poroşenkonun rəhbərlik etdiyi blokun parlament seçkilərində iştirakı və Poroşenkonun Zelenski tərəfindən vəzifəyə təyin olunacağına dair iddialara münasibət bildirən politoloq vurğulayıb ki, bu heç bir halda mümkün deyil. Çünki xalq Poroşenkonun prezidentliyi dövründə gördüyü işlərdən narazıdır: "Poroşenkonun bu ilin oktyabrında Ukraynada keçiriləcək parlament seçkilərində səs qazanması da mümkün deyil. Onun "Blok Poroşenko" hərəkatı böyük nüfuza sahib ola bilməyəcək. Hətta bu hərəkat dağıla da bilər. Ukraynanın yaxın tarixində belə hadisələr çox olub. Sabiq prezident Viktor Yuşenkonun da "Bizim Ukrayna" adlı hərəkatı var idi. O, prezident olanda hərəkat da parlament seçkilərində qalib gəldi. O, prezidentlik şansını itirdikdən sonra hərəkatın nüfuzu çox aşağı düşdü və o dağıldı. Poroşenkonun baş nazir olmaq şansı çox aşağıdır. Ona görə də Zelenskinin Pyotr Poroşenkoya vəzifə verəcəyinə inanmıram. Bu baş tutsa, Zelenskinin özünün də reytinqi aşağı düşəcək".

Zelenskinin Cənubi Qafqaz və Azərbaycan siyasəti barədə danışan ekspert qeyd edib ki, Ukraynanın bütün prezidentlərinin Azərbaycanla çox sıx münasibətləri olub, Azərbaycana səfərlər ediblər: "Pyotr Poroşenko da prezidentliyi dövründə Azərbaycana rəsmi səfərə gəlib. Ukrayna GUAM-ın üzvü kimi Azərbaycanın strateji tərəfdaşıdır. Azərbaycanın Dövlət Neft Şirkətinin (SOCAR) Ukraynada investisiyaları var. İki ölkə arasında yük daşımacılığı artır. Yeni prezidentin də bu əlaqələri davam etdirilməsi vacibdir. Bunu Zelenskiyə onun müşavirləri və təyin edəcəyi yeni xarici işlər naziri də anladacaq. Zelenskinin bir müddət sonra Azərbaycana da rəsmi səfər etməsi mümkündür".

 

3664
Əlaqədar
Ukrayna prezidentini seçdi: Zelenski rəqibini darmadağın etdi
Politoloq Zelenski və Poroşenkonun şanslarını qiymətləndirir
Ukraynada böyük gün: Poroşenko və Zelenski "son döyüşə" çıxacaq
Azərbaycanda olan ukraynalılar da Zelenskini seçdi – Səfirlik detalları açıqladı
Laboratoriya işçisi, arxiv şəkli

Koronavirusla mübarizədə yeni üsul - şüa terapiyası

5
(Yenilənib 23:07 14.08.2020)
Rusiya alimlərinin fikrincə isə bu müalicə forması heyvanlar üzərində sınandıqdan sonra istifadə edilə bilər.

BAKI, 15 avqust — Sputnik. Alimlər koronavirusun müalicəsi üçün yeni üsul təklif ediblər.

Sputnik Azərbaycan xarici mətbuata istinadla xəbər verir ki, alimlər koronavirusu müalicə etmək üçün şüalanmadan istifadə etməyi təklif edirlər.

Məlumata görə, müalicə üsulunu eyni zamanda bir çox ölkələrin elmi kollektivləri təklif edib. Söhbət şüalanma terapiyasından gedir.

Məsələn, Kanadanın Xərçəng Mərkəzinin Tibbi Fizika şöbəsinin mütəxəssisləri müəyyən ediblər ki, aşağı dozalı rentgen şüaları pnevmoniyadan ölüm riskini 20 faiz azaldır.

Eyni zamanda bu terapiya üsulu sətəlcəmin ən kəskin dövründə ölüm hallarını iki dəfə azalda bilər.

Artıq bu metodika ABŞ-da sınaqdan keçirilib.

Araşdırmada iştirak edən 10 xəstə 12 gün əvəzinə 3 günə sağala bilib, bununla yanaşı, xəstəxanadan çıxma müddəti 20 gündən 12 günə düşüb.

Eyni zamanda, Amerika radioloqları bu müalicənin əks-təsirləri haqqında məqalə hazırlayıblar. Onların fikrincə, şüa terapiyası yalnız iltihabı azaldır, həm də koronavirusla mübarizə üçün lazım olan immun hüceyrələri öldürür.

Rusiya alimlərinin fikrincə isə bu müalicə forması heyvanlar üzərində sınandıqdan sonra istifadə edilə bilər.

"COVID-19 zamanı ağciyər toxumalarının bərpası pozulur. Radiasiya terapiyası bu prosesi yalnız ağırlaşdıra bilər. Ağciyərlərin fibrozlaşması yalnız şiddətlənər", - deyə professor Qalina Reva bildirib.

Onun sözlərinə görə, alimlər hələ də koronavirus infeksiyası barədə çox məlumatlı deyillər. Bu səbəbdən də insan bədənini sınaq meydanına çevirmək yolverilməzdir.

5
Teqlər:
müalicə, Koronavirus, COVID-19
Mövzu:
Dünyanı cənginə almış bəla
Əlaqədar
ABŞ koronavirus istehsalına başlayıb – peyvənd olanlara vurulacaq
Koronavirusa yoluxanların sayı 21 milyona yaxınlaşır
Hindistan koronavirus əleyhinə dərmanın satışına başladı - 64 manata
Rusiya dünyada koronavirus əleyhinə peyvəndi qeydiyyatdan keçirən ilk ölkə oldu
ABŞ-ın baş infeksionisti Rusiyanın koronavirus peyvəndinə şübhə edib
Aktrisa Leoni Hemsvort oğlu Kris Hemsvortla birgə, arxiv şəkli

Aktyor Kris Hemsvortun altmış yaşlı anasının gəncliyi gözəlliyi hər kəsi şoka salıb

11
(Yenilənib 22:48 14.08.2020)
Fotomodel və aktrisa olan Elsa Pataki qaynanası Leoninin ciddi qidalanma rejimi sayəsində 30 il daha gənc göründüyünü bildirib

BAKI, 15 avqust — Sputnik. Aktyor Kris Hemsvortun "əbədi gənc" hesab olunan 60 yaşlı anasının gözəlliyinin sirri açılıb. Aktyorun həyat yoldaşı Elsa Patakinin (Elsa Pataky) qaynanası ilə bağlı fikirləri Britaniyanın Daily Mail tabloidində yer alıb.

Fotomodel və aktrisa olan Elsa Pataki qaynanası Leoninin ciddi qidalanma rejimi sayəsində 30 il daha gənc göründüyünü izah edib. "O, bizim bildiyimiz ciddi intervalla aclıq prinsiplərinə riayət etməyə başlayan ilk adam idi. Və Leoni möhtəşəm görünür. Onun 60 yaşı var, lakin ildən-ilə daha da gözəlləşir", - deyə Pataki bildirib.

Leoni bu rejimə həftədə bir gün yeməkdən başlayıb. Sonra o, hər gün 15-16 saat ərzində qidadan uzaq durmağa başlayıb.

Leoni Hemsvortun zahiri görünüşü aktyorun pərəstişkarlarını heyran edib. Kris may ayında Analar Günündə anası ilə çəkdirdiyi şəklini paylaşıb. Şəkli şərh edənlər Leoninin zahiri görünüşünə təriflər yağdırıblar. Hətta qeyd ediblər ki, Leoni sanki Krisin anası yox, bacısıdır.

Daha əvvəl media 56 il aktyor sənəti və ingilis dili üzrə müəllim işləmiş 81 yaşlı London sakininin gənc və gözəl görünüşünün sirrini açmağa çalışmışdı. Qadın bildirmişdi ki, aktiv həyat tərzi keçirir, gündəlik meditasiya edir və cavanlaşdırıcı kremlərdən istifadə edir.

11
Əlaqədar
Hollivud ulduzu Kemeron Diaz kinodan niyə getdiyini açıqlayıb
Canet Cekson azərbaycanlı müğənniyə təşəkkür edib: Mahnımı gözəl oxuyursan
Bədən tərbiyəsi müəllimi arıqlamağın sadə yolunu öyrədib
Dünya şöhrətli model: "Özümü faydasız hiss edirəm"
Türkiyəli məşhur aktrisadan nümunəvi addım
Həkim, arxiv şəkli

Uzun müddət COVID-19-dan müalicə alan həkimdən şad xəbər var

0
(Yenilənib 14:19 15.08.2020)
Yaqut Qarayeva bildirib ki, aldıqları son məlumata görə, Cavid Paşayevin xəstəxanada müalicə müddəti başa çatıb.

BAKI, 15 avqust — Sputnik. "Həkim renaimatoloq Cavid Paşayev ATU-da COVID-19 xəstələrinin mülaicəsi ilə məşğul idi. o uzun müddət COVID-19-dan müalicə alırdı".

Anestezioloq Cavid Paşayev

Sputnik Azərbaycan-ın xəbərinə görə, bu barədə TƏBİB rəsmisi Yaqut Qarayeva bugünkü brifinqdə məlumat verib. O bildirib ki, artıq aldıqları son məlumata görə, Cavid Paşayevin xəstəxanada müalicə müddəti başa çatıb: Bu xəbər bizim üçün çox sevindiricidir".

0