BAKI, 13 mart — Sputnik. Venesuela rəhbərliyi ABŞ diplomatlarına ölkəni tərk etmək üçün 3 gün vaxt verib. Sputnik Azərbaycan "RİA Novosti"yə istinadən xəbər verir ki, bunu Venesuelanın xarici işlər naziri Xorxe Arreasa bildirib.
"ABŞ-ın diplomatik personalı Venesuela ərazisini 72 saat ərzində tərk etməlidir", - deyə Arreasa öz "Twitter" səhifəsində yazıb.
Qeyd edək ki, daha əvvəl ABŞ-ın dövlət katibi Mayk Pompeo bəyan edib ki, ABŞ bu həftə Karakasda olan diplomatlarını geri çağırmaq niyyətindədir.
Xatırladaq ki, yanvarın 23-də Venesuelada müxalifət lideri, parlamentin sədri Xuan Quaydo özünü müvəqqəti prezident elan edib. Amerika qitəsindəki 34 ölkə onun prezidentliyini tanıyıb. Rusiya, Meksika, Boliviya, Türkiyə isə Maduronu dəstəklədiklərini bildirib.
Yanvarın 26-sı Almaniya, Fransa, İspaniya, daha sonra Böyük Britaniya və Niderland 8 gün ərzində Venesuelada yeni seçkilər keçirilməcəyi təqdirdə Quaydonu müvəqqəti prezident kimi tanıyacaqlarına söz verib.
Fevralın 1-i Quaydo bəyan edib ki, Venesuelada hakimiyyət dəyişikliyi bu ölkənin ən böyük kreditorları olan Çin və Rusiyanın da xeyrindədir. Onun fikrincə Bolivar Respublikasının qanuni prezidenti Nikolas Maduro heç kimin maraqlarını qoruya bilmək iqtidarında deyil.
