BAKI, 22 aprel — Sputnik. Bəzi ərəb KİV-ləri və bloqerlər, eləcə də bəzi nüfuzlu agentliklər Səudiyyə Ərəbistanında dövlət çevrilişinə cəhd olduğunu xəbər verirlər.
Sputnik Azərbaycan xarici mediaya istinadən xəbər verir ki, KİV-də kral sarayının önündə atışma getdiyi bildirilir. İddiaya görə, dövlət çevrilişi cəhdinə krallığın quru qoşunlarının generalı Alukas Neplis başçılıq edir. Kralın təxliyyə edildiyi və bunkerə aparıldığı xəbər verilir. Məlumata görə, atışma hal-hazırda da davam edir.
Amma yerli KİV və Təhlükəsizlik Xidməti iddiaları təkzib edib. Rəsmi məlumatda qeyd edilir ki, kral rezidensiyası tərəfə uçan dron istiqamətində atəş aşılıb və heç bir dövlət çevrilişi yoxdur. Təhlükəsizlik Xidməti eyni zamanda İranı vəziyyəti gərginləşdirməkdə və informativ təxribat yaratmaqda ittiham edib.
