Dini nigah

Din xadimlərinə rəsmi səlahiyyət verilir - Təfərrüat

435
(Yenilənib 10:10 20.10.2017)
Dindar kəsim bu təklifdən məmnun olsa da, qarşı tərəf narazılıq edir

BAKI, 18 oktyabr — Sputnik. Türkiyədə müftilərə (imamlara) rəsmi nikah kəsmək icazəsi verən qanun layihəsi, müzakirə edilməsi üçün bir həftə əvvəl parlamentə göndərilib. Prezident Rəcəb Tayyib Ərdoğan, müftiliyə rəsmi nikah kəsmə haqqı verən təklifin məclisdə qəbul olunacağına inandığını söyləyib.

Sözügedən qanun layihəsi cəmiyyətdə birmənalı qarşılanmayıb. Dünyəvi kəsim hökumətin yeni qanun təklifinə sərt şəkildə qarşı çıxır. Onlar yeni qanunla, 18 yaşını tamamlamamış şəxslərin də evlənəcəyini, bu halın dünyəvi dövlət prinsiplərinə zidd olduğunu bildirirlər.

İnanclı təbəqə isə prosesdən məmnun görünür. Dindarlar düşünürlər ki, əgər qanun məclisdən keçsə, onların da evlilik işləri asanlaşar.

Ancaq bir məqam var ki, insanların çoxu qanun layihəsində yer alan bəzi maddələrdən xəbərsizdir. Təklifi tənqid edənlərin də, tərifləyənlərin də çoxu qanunda yer alan müddəaları tam olaraq bilmir.

Belə ki, AKP hökumətinin məclisə göndərdiyi təklifdə açıq şəkildə qeyd olunur ki, evlilik şərtlərində heç bir dəyişiklik yoxdur. Yəni, yaşı 18-i tamamlamayan şəxslərin rəsmi nikahını müfti (imam) də qanuniləşdirə bilməz. Nikah kəsilsə belə, o, rəsmi status daşımayacaq.

Siyasi şərhçi Güngör Gökdağ
© Photo : Güngör Gökdağ şəxsi arxivindən
Siyasi şərhçi Güngör Gökdağ

Məsələni, Misirin Əl-Əzhər Universitetinin məzunu, Türkiyənin Səlcuq Universitetinin əməkdaşı Güngör Gökdağ Sputnik Azərbaycan-a şərh edib. "Türkiyədə hər sahədə olduğu kimi, bu məsələdə də qütbləşmə yarandı. Bir qrup insan müftilərə rəsmi nikah kəsmə icazəsi verilməsinə qarşı çıxır, digər tərəf isə buna müsbət baxır" — deyə o bildirib.

"Qərb ölkələrində keşişin, yəhudilərdə ravvinin kəsdiyi nikahlar keçərli sayılır. Ona görə düşünürəm ki, Türkiyədə də sözügedən qanun layihəsi təklifinə müsbət yanaşılmalıdır. Çünki bu, türk millətinin uzun tarixi keçmişində və mədəniyyətində var" — Gökdağ bildirib.

Bununla belə, o, hesab edir ki, Türkiyədə xeyli sayda dünyəvi dövlət tərəfdarları var və qanun layihəsinin müzakirəsi zamanı onların da həssaslığı nəzərə alınmalıdır: "Ortada səhv anlaşılma var. Hökumət dəyişikliyin, sadəcə evlənmə prosesini asanlaşdıracağını düşünür. Yəni evlilik şərtlərini tənzimləyən qanunda hansısa dəyişikliyə gedilmir".

"Belə ki, parlamentə təklif edilən qanun layihəsində yaş kateqoriyası əvvəlki kimi qalır. Evlənmə yaşı yenə əvvəlki kimi — 18 olaraq qalır. 12, 14 yaşlı kimsə evlənmək üçün müraciət etsə, müfti onun nikahını rəsmiləşdirməyəcək. Hətta valideynin icazəsi olsa belə, bu nikah rəsmi sayılmayacaq" — ekspert deyib.

Güngör Gökdağ daha sonra əlavə edib: "Hökumətin əsas məqsədi evlilik prosesini asanlaşdırmaqdır. Tutaq ki, yaşı 18 və ya yuxarı olan inanclı şəxs iki dəfə nikaha girməyə məcbur qalmayacaq. Həm məmura müraciət et, həm da imama — bunlar olmayacaq".

"Qısası, dövlət inanclı insanların da işini asanlaşdırmaq üçün bu addımı atır. Bu günədək dünyəvi kəsim 1 dəfə nikaha girirdisə, inanclı insanlar iki proses keçmək məcburiyyətində qalırdılar. Sözügedən qanun qəbul olunarsa, dindar təbəqənin mənsubları da ikili əziyyətdən xilas olacaqlar" — müsahibimiz əlavə edib.

Mövzunu Sputnik Azərbaycan-a hüquq müdafiəçisi Murad Sadəddinov da şərh edib. Onun sözlərinə görə, ümumiyyətlə, son dövrlər Türkiyədə İslam dini ilə bağlı proseslər rəsmiləşdirilir: "Yəni, din dövlət qurumlarında daha çox rol almağa başlayır".

"Açığı Türkiyə ilə bağlı mənfi və ya müsbət rəy söyləmək çətindir. Çünki müsəlman ölkələr içərisində Türkiyə ən demokratik, ən aparıcı rola malik dövlətdir. Üstəlik, beynəlxalq aləmdə hər zaman Azərbaycanın yanında yer alır" — hüquqşünas bildirib.

Bununla belə, o, "şəxsən mən rəsmi nikahın ancaq dövlət məmuru tərəfindən kəsilməsinin tərəfdarıyam. Çünki əgər biz dünyəvi dövlətdən danışırıqsa, o zaman din dövlətdən ayrı olmalıdır, əks halda bu prinsip pozula bilər" deyə əlavə edib.

"Yanlış anlaşılmasın, dini kəbinə qarşı deyiləm. İnanclı insanlar istəyirlər ki, evliliklərini Allah qarşısında etsinlər. Bu, son dərəcə normaldır. Bunu məmur qarşısındakı nikahdan dərhal sonra din adamının yanına gedərək edə bilərlər. Ancaq söhbət burada dünyəvi dövlətdən gedir" — M. Sadəddinov vurğulayıb.

435
Teqlər:
Murad Sadəddinov, dünyəvi kəsim, inanclı kəsim, müfti, imam, dindar, Güngör Gökdağ, kəbin, nigah, Sputnik Azərbaycan, təklif, din, AKP, Türkiyə, Azərbaycan, qanun, hökumət
Əlaqədar
Hər 4 evliliyə 1 boşanma
Çoxunuzun hər gün izlədiyi evlilik proqramı ilə bağlı şok fakt üzə çıxdı
Evli qadınlarla sevgi yazışmalarından pul qazanan fırıldaqçılar peyda olub
Eyni cinslilərin nigahı: demokratiyanın təntənəsi və ya qürubu?
Kəbindənkənar övlad....
Dieqo Armando Maradona

Maradonanın həkimi ittihamlara cavab verdi

15
(Yenilənib 23:55 29.11.2020)
Bu gün məlumat yayılıb ki, Lukenin evində və klinikasında axtarış aparılıb. Bundan başqa həkimi Maradonaya kömək göstərməməkdə və bilməyərəkdən onun ölümünə səbəb olmaqda ittiham edirlər

BAKI, 29 noyabr - Sputnik. Argentina millisinin sabiq oyunçusu Dieqo Armando Maradonanın həkimi Leopold Luke futbolçunun ölümü barədə ittihamlara reaksiya verib.

Sputnik Azərbaycan xarici mətbuata istinadən bildirir ki, həkim baş verənlərdə heç kimi, o cümlədən də özünü günahkar bilmir. O həmçinin istintaqla əməkdaşlıq etməyə hazır olduğunu da deyib. Luke vurğulayıb ki, Maradonanın evindəki tibbi heyət futbolçunun alkoqol asılılığından müalicəsi ilə məşğul idi və ürəktutmasının qarşısını ala bilmədi.

Bu gün məlumat yayılıb ki, Lukenin evində və klinikasında axtarış aparılıb. Bundan başqa həkimi Maradonaya kömək göstərməməkdə və bilməyərəkdən onun ölümünə səbəb olmaqda ittiham edirlər.

​Maradona noyabrın 25-də 60 yaşında dünyasını dəyişib. Ölümə səbəb üərk çatışmazlığı səbəbindən ağciyərdə kəskin şişkinlik yaranması olub.

Dieqo Maradona "Barselona", "Napoli", "Nyuells Old Boyz"  klublarında oynayıb. Argentina millisi ilə 1986-cı ildə dünya çempionu olub. Futbol tarixində ən parlaq oyunçulardan hesab olunur.

15
Teqlər:
axtarış, ittiham, həkim, ölüm, Dieqo Armando Maradona
Микрофон

Uşaq "Avroviziya"sının qalibi bəlli oldu - VİDEO

16
(Yenilənib 23:14 29.11.2020)
Müsabiqənin finalında 12 ölkənin: Almaniya, Belarus, Gürcüstan, Qazaxıstan, İspaniya, Malta, Niderland, Polşa, Rusiya, Serbiya, Ukraynanın və Fransanın təmsilçiləri iştirak ediblər

BAKI, 29 noyabr - Sputnik. Fransanı təmsil edən Valentina Trünel J'imagine mahnısı ilə beynəlxalq "Uşaq Avroviziyası-2020" müsabiqəsinin qalibi olub.

Sputnik Azərbaycan bildirir ki, müsabiqənin finalı Polşada telekörpü formatında keçirilib. Valentina peşəkar münsiflər heyəti və tamaşaçıların səsi ilə 200 xal toplayıb.

İkinci yerə Qazaxıstan təmsilçisi Karakat Başanova, üçüncü yerə isə İspaniyadan Solea layiq görülüblər.

Rusiya təmsilçisi Sofya Feskova 88 xalla 10-cu yeri tutub. Müsabiqənin finalında 12 ölkənin: Almaniya, Belarus, Gürcüstan, Qazaxıstan, İspaniya, Malta, Niderland, Polşa, Rusiya, Serbiya, Ukraynanın və Fransanın təmsilçiləri iştirak ediblər.

İştirakçıların nəticələri peşəkar münsiflər heyəti və tamaşaçıların müsabiqənin saytındakı səsverməsi ilə təyin olunub. Böyüklərin "Avroviziya"sından fərqli olaraq, burada tamaşaçılar öz ölkələrinə səs verə bilirdilər. Ancaq bu zaman tamaşaçılar minimum üç bəyəndikləri iştirakçıya səs verməli idilər.

16
Teqlər:
Fransa, final, müsabiqə, Polşa, Uşaq Avroviziyası, uşaqlar