Qeyri-adi üsulla ev inşa edən astaralı qadın - video

81
(Yenilənib 17:21 27.01.2021)
Qadının ev inşa etdiyini desək, bəlkə də çoxları inanmayacaq. Lakin Astaranın Sım kənd sakini Aliyə Xalıqova qeyri-adi üsulla gildən ev inşa edən ustadır.

Sım kəndində insanlar əzəldən palçıq evlər tikiblər. Kənddə mişar daşından ev tikənlər də var, lakin palçıq evlərin inşası qədim ənənə olduğu üçün bu gün də yaşadılır. Sputnik Azərbaycan-ın müxbiri ilə həmsöhbət olan Aliyə xanım deyir ki, bu,  əsasən qadın işidir, çünki kənd yeri elə bir yerdir ki, qadınlar artıq bu işə alışıblar.                                  

"Kənd elə bir yerdir ki, necə deyərlər, hər bir kənd qızı çulunu sudan çıxarmalıdır. Bu, xüsusi işdir, bu işi qadın görməlidir. Mən təxminən 35 ildir ki, bu işlə məşğulam. Əvvəl mən anama və böyük bacılarıma kömək etmişəm, daha sonra isə özüm sərbəst bu işi görməyə başladım. Məlum məsələdir ki, ev inşa edən zaman mütləq köməkçin olmalıdır. Gili ələyən zaman və ya palçığı ayaqlayan zaman kim yanımda olursa, oğlum və yaxud qızım, onlar köməklik edirlər. Dediyim kimi, demək olar istənilən kənd uşağı bu sənəti bacarır".

Aliyə xanım belə evlərin inşası üçün isə hər palçığın yaramadığını, bunun üçün xüsusi gil lazım olduğunu vurğuladı. Çünki istənilən palçıq divarda qalmır. Həm də ev inşası üçün lazım olan gili kəndin istənilən yerindən əldə etmək olmur:

“Ev inşası üçün də xüsusi gil var. Palçığın suyu tez çəkildiyindən onu divara hörəndə az-az suvayıram. Çünki suvaq palçığının suyu tez çəkilərsə, onu hamarlamaq olmur. Palçıq evlər də digər evlər kimi demək olar, daimidir. Kənar təsirlər olmazsa, palçıq evlərə heç bir şey olmur. Sadəcə palçığın tərkibində qılçalar olduğundan quşlar divarları dimdikləyirlər. Əgər vaxtında divar məcunlanarsa və ya əhənglənərsə, ümumiyyətlə, belə evlərə heç bir şey təsir etməz”.

Usta xanım Aliyə Xalıqova sənətini öz övladlarına da öyrədib. Hazırda oğlu Ruziyar Şıxvəlizadə Aliyə xanımla birgə gil evlər inşa edir.

“Mən dünyanı dərk edəndən anamın gildən ev tikdiyini görmüşəm. Əlimdən gəldiyi qədər anama suvaq işləri görən zaman köməklik edirəm. Əsasən palçığı ayaqlamaqda, palçığı vedrələrə doldurub evə daşımaqda, bir də suvaq işini görəndə anama kömək edirəm”.

81

Azərbaycan Ali Hərbi Məktəbinin yaradılmasının 103-cü ildönümü qeyd olunub - VİDEO

11
(Yenilənib 22:38 02.03.2021)
Bir əsrdən çox tarixi olan təhsil ocağında bu gün 23 ixtisas üzrə Ordumuz üçün hərb sənətinə yiyələn peşəkar və liderlik qabiliyyətinə malik savadlı kadrlar yetişdirilir.

Heydər Əliyev adına Azərbaycan Ali Hərbi Məktəbinin yaradılmasının 103-cü ildönümü münasibətilə tədbir keçirilib.

Sputnik Azərbaycan xəbər verir ki, əvvəlcə Azərbaycan xalqının ümummilli lideri Heydər Əliyevin və şəhidlərin xatirəsi bir dəqiqəlik sükutla yad edilib.

Sonra Azərbaycan Respublikasının Dövlət Himni səsləndirilib.

Heydər Əliyev adına Azərbaycan Ali Hərbi Məktəbinin rəisi, general-mayor Füzuli Salahov çıxış edərək məktəbin 103 illik tarixi və şərəfli yol keçdiyini bildirib. Müsəlman korpusunun komandiri general-leytenant Əliağa Şıxlinskinin Milli Hərbiyə Məktəbinin açılması üçün müraciətindən sonra Zaqafqaziya Komissarlığının razılığı ilə 1918-ci il martın 1-də Milli Hərbiyə Məktəbi yaradılıb. Tarixin bütün dönəmlərində uğurla fəaliyyət göstərən bu təhsil ocağının Azərbaycan hərb tarixində xüsusi yeri və rolu vardır.

Azərbaycan Respublikası Prezidentinin 10 mart 2004-cü il tarixli Fərmanına əsasən Azərbaycan Ali Hərbi Məktəbinə ümummilli lider Heydər Əliyevin adı verilib. Bildirilib ki, müstəqillik illərində hərbi məktəb Ali Baş Komandanın diqqət və qayğısı sayəsində böyük və tarixi inkişaf yolu keçərək dünyanın tanınmış qabaqcıl hərbi təhsil müəssisələrindən birinə çevrilib. Bir əsrdən çox tarixi olan təhsil ocağında bu gün 23 ixtisas üzrə Ordumuz üçün hərb sənətinə yiyələn peşəkar və liderlik qabiliyyətinə malik savadlı kadrlar yetişdirilir.

Həmçinin qeyd olunub ki, Ali Baş Komandan İlham Əliyev tərəfindən orduya olan diqqət və qayğının nəticəsində, bu gün kursantların sosial-məişət şəraiti, sağlamlığı, fiziki hazırlığı üçün hərbi məktəbdə yüksək səviyyədə lazımi şərait yaradılıb.

Qeyd edilib ki, Vətən müharibəsi zamanı hərbi təhsil müəssisəsinin şəxsi heyətinin də qələbədə böyük rolu olub. Belə ki, torpaqlarımızın işğaldan azad edilməsi uğrunda gedən döyüşlərdə təhsil ocağının 10 zabiti şəhid olub, 29-u isə yaralanıb. Daha sonra Müdafiə naziri general-polkovnik Zakir Həsənovun təbriki şəxsi heyətə çatdırılıb.

Çıxışlardan sonra Ali Hərbi Məktəbin orkestri və Həzi Aslanov adına Ordu İdeoloji və Mədəniyyət Mərkəzinin kollektivi tərəfindən vətənpərvərlik mövzusunda konsert proqramı təqdim edilib.

Sonda təhsil müəssisəsinin zabit heyəti və təhsildə fərqlənən kursantlar təltif olunub.

11

Xeyirxahlığa "yoluxmaq" mümkündür? - VİDEO

36
(Yenilənib 16:17 02.03.2021)
Koronavirus pandemiyası ilə bağlı toy və ya yas mərasimləri kimi kütləvi tədbirlərin keçirilməsi qadağan olduğu zaman Şəmkir rayonu Dəllər Cəyir kəndinin sakinləri ehsan süfrələrinin əvəzinə xeyirxah işlər görürlər.

Koronavirus pandemiyası ilə bağlı kütləvi tədbirlərin, toyların, yas mərasimlərinin keçirilməsi virusun qarşısını alınması məqsədilə qadağan edilib. Bəzi hallarda, xüsusən vəfat edən şəxsin ailəsi, yaxınları ehsan verə bilmədiklərinə görə özlərini narahat hiss edirlər. Şəmkir rayon Dəllər Cəyir kənd sakinləri ehsan süfrələrini xeyirxah əməllərlə əvəz etməyə qərara gəlib. Belə ki, ehsan üçün nəzərdə tutulmuş vəsaitlə kənd ərazisində yollar çəkilir, dayanacaqlar qurulur və digər xeyriyyə işləri görülür.

Bu işlərin təşəbbüskarlarından biri olan Namiq Məmmədov artıq bir ildir ki, yaxınları vəfat edən ailələrə baş çəkir. Onları dəbdəbəli məclis qurmaqdan çəkindirərək kəndin hər hansı kiçik problemində pay sahibi olmağa dəvət edir. Onun sözlərinə görə, indiyədək sakinlərin hər biri bu işdə yaxından köməkliyini göstərib:

“Pandemiyaya görə yas məclisləri dayandırıldı və o vaxtdan insanlara istiqamət verdik ki, ehsan süfrəsinə çəkdiyiniz xərcin əvəzinə kənddə müəyyən işlər görə bilərsiz. Bunun nəticəsində ondan artıq küçəyə çınqıl-daşlar döşənib. Bir küçəyə asfalt örtük çəkilib. Kəndin futbol stadionunda idman qurğuları, oturacaqlar quraşdırlıb. 20 Yanvar Şəhidlər abidəsi əsaslı təmir edilib. Bu görülən işlər son deyil və bu gün də davam edir”, - deyə məlumat verib.

Kənddə xeyriyyəçiliyin digər təşəbbüskarlarından olan Seymur Xəlilov soydaşlarının görülən işlərdən özlərinin də ruhlandığını, artıq insanların ona yaxınlaşaraq hansı işlərin görülməli olduğunu, köməyə ehtiyacı olan həmkəndliləri ilə maraqlandıqlarını bildirib. Bu işlərdə nəinki kənddə olan, eyni zamanda Rusiyada yaşayan Dəllər Cəyirli sakinlərinin də yaxından iştirak etdiklərini deyib:

“Bütün işlərdə kənddə yaşayanlarla yanaşı, Rusiyada olan həmkəndlilərimiz də yaxından iştirak edirlər. Mütəmadi olaraq əlaqə saxlayırlar, imkansız həmkəndilərimizə kömək, yaxud kəndin ümumi mənafeyi naminə hər hansı bir iş görmək istədiklərini bildirirlər. Hazırda onların da yaxından dəstəyi ilə  kənd qəbiristanlığına yeni yol çəkilir, darvaza qoyulur. Orada işləyənlərin özləri də təmənnasız olaraq çalışırlar”, - deyə bildirib.

Dəllər Cəyir sakinləri bu xoş tendensiyanın Azərbaycanın digər ərazilərinə də yayılmasını arzu edirlər.

36
Teqlər:
video, abadlıq, xeyir, kənd, Şəmkir
Bakıda XİN-nin binası, arxiv şəkli

XİN: Bəzi ölkələrin parlamentarları qərəzli mövqelərini hər şeydən üstün tuturlar

0
Bir daha vurğulamaq istərdik ki, hərbi əməliyyatların dayandırılmasına dair razılığın əldə olunması ilə bölgədə yaranmış yeni vəziyyətdə, dayanıqlı sülhün əsas təminatçısı qismində çıxış edən üçtərəfli bəyanatların həyata keçirilməsi olduqca vacibdir.

BAKI, 3 mart — Sputnik. Azərbaycan Respublikasının Xarici İşlər Nazirliyinin (XİN) Mətbuat xidməti idarəsinin rəisi Leyla Abdullayeva bəzi Avropa ölkələrinin parlamentlərinin qəbul etdiyi sənədlərlə bağlı yerli KİV-in sualını cavablandırıb.

Sputnik Azərbaycan L.Abdullayevaya ünvanlanmış sualı və onun cavabını təqdim edir:

- Son günlər bəzi Avropa ölkələrinin qanunverici qurumları tərəfindən Ermənistan və Azərbaycan arasında əsirlərin mübadiləsi məsələsi ilə bağlı qətnamələr qəbul edilir. Bununla bağlı fikirlərinizi öyrənmək istərdik.

- Qeyd etmək istərdim ki, Vətən müharibəsindən sonra bölgədə yaranan yeni vəziyyət və 10 noyabr tarixli üçtərəfli bəyanatın icrası sadəcə bölgə ölkələrinin deyil, beynəlxalq ictimaiyyətin diqqət mərkəzində saxladığı məsələlərdəndir. Azərbaycan tərəfi hər zaman bəyan edib və bir daha vurğulayırıq ki, bölgədə dayanıqlı sülh və təhlükəsizliyin, inkişafın təmin olunması üçün imzalanmış üçtərəfli bəyanatların yerinə yetirilməsi vacib şərtdir. Doğru qeyd edirdiniz, son günlərdə bəzi Avropa ölkələrinin qanunverici qurumları bölgədəki vəziyyət və razılaşmaların icrası ilə bağlı sənədlərlə çıxış edirlər. Bu ilin 2 mart tarixində İtaliya Parlamentinin Deputatlar Palatasının Xarici əlaqələr daimi komissiyasında "Ermənistan və Azərbaycan arasında razılaşmanın yerinə yetirilməsi vəziyyəti haqqında" qətnamə qəbul olunub. Qətnamədə hər iki tərəfə müraciət edilərək, tərəflər konstruktiv fəaliyyətə dəvət olunurlar. Balanslaşdırılmış mövqe nümayiş etdirən İtaliya Parlamenti İtaliya hökumətinə Ermənistan və Azərbaycan arasında gələcək barışıq şəraitinin yaranması üçün etimad quruculuq tədbirlərini təşviq etmək istiqamətində hər iki dövlətlə ikitərəfli səviyyədə iş aparmağı tapşırıb. Burada ən önəmli məsələ kimi, Parlamentin ərazilərin minalardan təmizlənməsi məsələsinə diqqət ayırdığını və bu xüsusda minalanmış ərazilərin xəritələrinin verilməsini qeyd etdiyini vuruğulamaq istərdim. Ümumiyyətlə, bildiyiniz kimi, artıq ikinci dəfədir ki, İtaliya Parlamenti üçtərəfli bəyanatın icrası ilə bağlı məsələyə diqqət ayırır. Bir müddət öncə 18 noyabr 2020-ci il tarixində qəbul olunmuş qətnamədə də sözügedən birgə bəyanatın imzalanması alqışlanmış və tərəflər, bu bəyanatdan irəli gələn öhdəliklərini yerinə yetirməyə dəvət olunmuşdular.

Bununla yanaşı, bu ilin 25 fevral tarixində Niderland Parlamentinin Xarici əlaqələr komitəsi tərəfindən "Azərbaycan tərəfindən həbs edilmiş hərbi əsirlərin azad edilməsi ilə bağlı" Niderland hökumətinə çağırış edən qətnamə qəbul olunmuşdu. Niderland Parlamentinin növbəti əsassız və tamamilə birtərəfli xarakter daşıyan bu sənədi Komitənin hər zaman qərəzli mövqeyi ilə tanınan üzvlərinin canfəşanlığı nəticəsində qəbul olunub. Qeyd etmək istərdim ki, qətnamənin müzakirəsi zamanı iclasda çıxış edən Niderland xarici işlər naziri Stef Blok qətnamənin əleyhinə çıxış etmiş, həm Ermənistan, həm də Azərbaycanın hərbi əsirlərlə bağlı qarşılıqlı iddialarının olduğunu söyləmiş və qətnamədə hər iki tərəfə çağırışın edilməsi düzəlişini təklif etmişdir. Buna rəğmən qətnaməyə düzəliş edilməmişdir. Bu, bir daha bəzi ölkələrin parlamentarlarının öz qərəzli mövqelərini hər şeydən, hətta bölgədə sülhün təmin olunması səylərindən üstün tutduqlarını göstərir.

Bir daha vurğulamaq istərdik ki, hərbi əməliyyatların dayandırılmasına dair razılığın əldə olunması ilə bölgədə yaranmış yeni vəziyyətdə, dayanıqlı sülhün əsas təminatçısı qismində çıxış edən üçtərəfli bəyanatların həyata keçirilməsi olduqca vacibdir və bölgəmizdə sülhü arzulayan hər hansı tərəf məhz bu razılaşmaların icrasına istər bəyanatları, istərsə də fəaliyyəti ilə töhfə verməlidir.

0