Qayğıkeş vətəndaş AXC-nin tarixinə sədaqətini nümayiş etdirir

28
(Yenilənib 13:42 28.05.2019)
Zaqatala rayonunun Yengiyan kənd sakini Şaiq Əlixanov Azərbaycan Xalq Cümhuriyyəti dönəmindən yadigar qalan qəzeti göz-bəbəyi kimi qoruyur. Daha ətraflı Sputnik Azərbaycan-ın videosunda izləyin.

Əvvəllər tarix müəllimi olan Əlixanov qəzetin 1918-ci ildə Azərbaycan Kənd Təsərrüfatı Nazirliyi tərəfindən dərc edildiyini deyib. Qəzetin əsas məzmunu kənd təsərrüfatı ilə məşğul olan insanlara verilən mal-qara, subsidiyaların sığortalanması haqqındadır. Qəzetin kənarında Azərbaycan bayrağının rəngləri əks olunub.

Şaiq müəllim həmkəndlisinin bu cür qəzetə malik olduğunu öyrənəndə, maddi durumu yaxşı olmamasına baxmayaraq, borc-xərc edib onu əldə etməyə qərara gəlib. Arzusunu həyata keçirib və və bundan sonra onu evinin ən gözəl guşəsində göz-bəbəyi kimi qoruyub.

"Cümhuriyyətimiz yaşasaydı, bəlkə də bu gün dünyanın ən inkişaf etmiş ölkələri sırasında olardıq. Əfsus ki, belə olmadı. Amma bizdən sonra gələn nəsillər bu şanlı tariximizi bilməlidirlər" – deyə Əlixanov bildirib.

O, hətta qəzetin korlanmaması üçün onu çərçivəyə salıb və əski ərəb qrafika ilə yazılan qəzeti axunda tərcümə etdirib. Həmsöhbətimiz Sputnik Azərbaycan-ın bölgə müxbirinə bildirib ki, bu qəzetin analoqu mövcud deyil.

28