Filmlərə layiq sevgi hekayəsi: Əlilliyi olan cütlük hər şeyə rəğmən xoşbəxtdir

134
(Yenilənib 13:30 28.03.2019)
Reportajımızın qəhrəmanlarının hər ikisi 1-ci qrup əlil hesab edilir. Fərqli xəstəliklərdən qaynaqlanmasına baxmayaraq, oxşar fiziki məhdudiyyətlərdən əziyyət çəkirlər. Onların sevgi hekayəsini Sputnik Azərbaycan-ın videosunda izləyin.

Namaz Namazov və Fatma Bayramova bir neçə tədbirdə görüşüblər, dost kimi ünsiyyət qurublar. Amma onların sevgi nağılı dərhal başlamayıb. Namaz Fatmaya elçi göndərməzdən öncə bəzi problemlərini həll etmək istəyib. Valideynlərin xeyir-duasından sonra 6-7 ay nişanlı qalan Namaz və Fatma nəhayət ki, evləniblər. Hal-hazırda isə xoşbəxt cütlük qızlarını böyütməklə məşğuldur.

29 yaşlı Namaz Gəncə şəhərində anadan olub. Uşaqlıqdan səhhətində yaranan problemlərə görə təhsil ala bilməyib və iş həyatında da çətinliklər yaranıb. Amma məhdudiyyətlər Namazı ruhdan sala bilməyib və o, qarşısına məqsəd qoyub, onları reallaşdırmağı özünə borc bilib. Həkimlərin ciddi qadağalarına baxmayaraq, valideynlərindən xəbərsiz pauerliftinq idman növüylə məşğul olmağa başlayıb. Son iştirak etdiyi yarış isə onu izləyənlərin yaddaşına həkk olub. Namazın 42 kq çəkisi olmasına rəğmən, 3-cü hərəkətin sonunda 251 kiloqramın öhdəsindən gələrək Gürcüstanda Avropa Çempionu tituluna sahib olub. Bütün bu əziyyətlərə baxmayaraq, Avropa birinciliyindən sonra diqqət və vəsait çatışmazlığı səbəbindən idmandan uzaqlaşmaq məcburiyyətində qalıb.

Fatma Babayeva isə omba çıxığı və diz qapaqları olmadan dünyaya gəlib. Atasını heç tanımayıb, anası isə Fatma hələ körpə ikən onu uşaq evinə verib. 9 yaşında isə xeyirxah bir ailə tərəfindən övladlığa götürülüb. Məhz onların nəvazişi və sevgisi Fatmaya bütün çətinliklərin öhdəsindən gəlməyə yardımçı olub.

Bu dəstəyin nəticəsi olaraq Fatma öz bacarıqlarını hələ məktəb yaşlarından üzə çıxarıb. Evdə fərdi təhsil alan Fatma eyni zamanda toxuculuq dərslərinə gedib. Çox gözəl əl qabiliyyəti olan Fatma zövqlü xalçalar toxumaqla yanaşı çox gözəl hörmə işləri də görür. O, onu başa düşən bir ailəyə düşdüyü üçün özünü xoşbəxt hesab edir.

Cütlüyün bir müddət öncə bir qız övladları dünyaya gəlib. Hər iki valideyni 1-ci qrup əlil olan körpənin normal inkişaf etməsi bütün ailənin sevincinə səbəb olub.

İşsizlik, yol, hərəkət, uşağa qayğı kimi çətinliklərlə üzləşən cütlük normal həyat sürmək, xoşbəxt olmaq, ən əsası isə körpə qızlarını sevgi içində böyütmək üçün var gücü ilə çalışır. 

134

Müharibənin əks-sədası: torpaqların təmizlənməsini gözləmək lazımdır - VİDEO

27
(Yenilənib 17:15 22.04.2021)
Azərbaycanın müharibə bölgəsindəki kəndlərinin sakinləri vaxtaşırı düşmənin yerləşdirdiyi minaya düşürlər. Kəndlilər belə bir həyat haqqında nə düşünürlər. Bu barədə daha ətraflı Sputnik Azərbaycan-ın videosunda.

Azərbaycan torpaqlarını işğal edərkən Ermənistan tərəfi məqsədyönlü şəkildə bu əraziləri minalayıb. Üçtərəfli atəşkəs bəyannaməsi imzalanandan bəri mina partlaması nəticəsində Azərbaycanın 20 mülki vətəndaşı və hərbçisi ölüb, daha 85 nəfər müxtəlif dərəcəli bədən xəsarətləri alıb.

Sakinlər inanırlar ki, səbrlə bu ərazilərin minalardan təmizlənməsini gözləməlidirlər. Çünki Azərbaycan Respublikası Ərazilərinin Minalardan Təmizlənməsi üzrə Milli Agentliyinin əməkdaşları azad edilmiş ərazilərdə intensiv rejimdə işləyirlər.

Düşmən Tərtər bölgəsindəki Qapanlı kəndinin sakinlərini daim qorxu içində saxlamağa çalışaraq, bu illər ərzində həmin kəndə bütün növ silahlardan atəş açıblar, eyni zamanda təxribatçı qruplar oraya minalar yerləşdiriblər.

Mülki əhali "müharibənin əks-sədası"ndan əziyyət çəkməyə və ölməyə davam edir. Ermənistan tərəfinin minalanmış ərazilərin xəritələrini verməkdən imtina etdiyini nəzərə alsaq, bütün bu torpaqların minalardan tamamilə təmizlənməsini hələ uzun müddət gözləmək lazım gəlir.

 

27
Teqlər:
video, işğaldan azad edilmiş ərazilər, Qarabağ, mina

Zenit-raket bölmələrinin döyüş atışlı taktiki təlimləri keçirilir - VİDEO

13
(Yenilənib 10:12 22.04.2021)
Real döyüş vəziyyətinə uyğun şəraitdə keçirilən təlimlərdə şərti hava hədəfləri dəqiq atəşlə məhv edilir.

BAKI, 22 aprel — Sputnik. Müdafiə nazirinin təsdiq etdiyi 2021-ci il üçün döyüş hazırlığı planına əsasən, Azərbaycan Ordusunda zenit-raket bölmələrinin döyüş atışlı taktiki təlimləri keçirilir.

Müdafiə Nazirliyindən Sputnik Azərbaycan-a verilən xəbərə görə, təlimlərdə müxtəlif çaplı zenit qurğularından və zenit-raket komplekslərindən nümunəvi döyüş atışları icra olunur.

Real döyüş vəziyyətinə uyğun şəraitdə keçirilən təlimlərdə şərti hava hədəfləri dəqiq atəşlə məhv edilir.

Təlimlərdə əsas diqqət Vətən müharibəsində əldə edilən təcrübə nəzərə alınmaqla bölmələrin operativ idarəedilməsi, onların digər qoşun növləri ilə qarşılıqlı əlaqədə döyüş fəaliyyətinin təşkili üzrə vərdişlərinin təkmilləşdirilməsi və şəxsi heyətin döyüş hazırlığı səviyyəsinin yüksəldilməsinə yönəldilir.

13
Teqlər:
video, raket, hərbi təlimlər, Azərbaycan Ordusu
Beynəlxalq Muğam Mərkəzinin səhnəsində tamaşa

Nizami Gəncəvi ilə Yunus Əmrənin ruhlarını birləşdirdilər

2
(Yenilənib 23:34 22.04.2021)
Qardaş ölkələr arasında mədəni körpülərin davam etdirilməsi üçün hər iki ölkənin tanınmış şairinin ortaq əsərləri əsasında ssenari yazılaraq, fərqli kompozisiya təqdim edilib.

Şahpəri Abbadova, Sputnik Azərbaycan

BAKI, 23 aprel — Sputnik. Bu il dahi şair və mütəfəkkir Nizami Gəncəvinin 880 illiyi münasibətilə ölkəmizdə "Nizami İli" elan edilib. Qardaş Türkiyədə isə bu il böyük şair və mütəfəkkir Yunus Əmrənin vəfatının 700-cü ildönümü qeyd edilir. Qardaş ölkələr arasında mədəni körpülərin davam etdirilməsi üçün hər iki ölkənin tanınmış şairinin ortaq əsərləri əsasında ssenari yazılaraq, fərqli kompozisiya təqdim edilib. Bu kompozisiya əsasında Azərbaycan Milli Konservatoriyası nəzdində İncəsənət Gimnaziyasının şagirdləri Nizami hikmətlərindən və Yunus Əmrədən olan seçmələri səsləndiriblər. Türkiyədə tanınan rəssam, kurator Günay Zebic (Mehdizadə) və Yunus Əmrə İnstitutunun hazırladığı təqdimat-tamaşanın məşqi Beynəlxalq Muğam Mərkəzinin səhnəsində nümayiş olunub. İki hissədən ibarət tamaşanın birincisi Yunus Əmrəyə, ikincisi Nizamiyə həsr olunub.

Bu barədə Sputnik Azərbaycan-a məlumat verən layihənin rəhbəri, tamaşanın ssenari müəllifi Günay Zebic Yunus Əmrə İnstitutu ilə birgə hər iki dahinin əlamətdar ildönümlərinə töhfə olaraq belə bir layihəni hazırlamaq qərarına gəldiyini bildirib:

"İstər döyüş meydanında, istər iqtisadi sahədə, istərsə də mədəniyyət aləmində qardaş ölkə Türkiyə ilə Azərbaycan öz həmrəyliyini, möhkəm şəkildə bağlı olduqlarını dünyaya bir daha sübut etdi. Biz də mədəni əlaqələrin daha da möhkəmləndirilməsi və mədəniyyət körpüsünün daha sağlam tellərlə bağlanması üçün hər iki ölkənin dəyərli sənətkarlarını bir araya gətirdik. Fərqli kompozisiya şəklində onu nümayiş etdirməyə çalışdıq. Düşündük ki, bunu tamaşa şəklində hazırlayıb, təqdim etsək, daha çox kütləyə çatmış olar. Bunu şagirdlərlə etməkdə məqsəd isə məhz onların təqdimatında məktəblilərə, şagirdlərə və gənclərə hər iki ölkənin dahi şairini tanıtmaq, əsərləri ilə tanış etmək onların mədəni irsimizdəki rolunu göstərməkdən ibarətdir. Çünki yetişən gənclik bizim dövlətimizin gələcək qurucularıdır. İlkin təməl bu işdə əsas rol oynayır. Bunun üçün maarifləndirməyə məhz onlardan başlamağı uyğun bildik".

© Photo : Courtesy of Lala Azeri
Beynəlxalq Muğam Mərkəzinin səhnəsində tamaşa

Zebicin sözlərinə görə, tamaşalarda hər iki dahinin yaradıcılığına toxunulub: "Nizami Gəncəvinin "Xəmsə"si, Yunus Əmrənin "Divan"ı və şeirlərindən istifadə etdik. Tamaşanın aktyor heyəti İncəsənət Gimnaziyasının şagirdləridir. Bu qrupla artıq beş ildir ki, çalışıram. Kollektivlə Türkiyə və Azərbaycanın qardaşlığına həsr olunan layihələr həyata keçirmişik. Bunlardan 2017-ci ildə Bursa şəhərində "Qardaş məktəb", "Azərbaycan Cümhuriyyətinin 100 illiyi və Qafqaz İslam ordusunun Bakıya gəlişi", 2019 Türkiyənin Kayseri şəhərində "Nəsimi 650" teatrı ilə Beynəlxalq XIV teatr festivalında iştirak etmişik. Bundan başqa 2020-ci ildə Qobu 3 parkında Xarı Bülbül İncəsənət mərkəzində COVID-19 "Biz Birlikdə Güclüyük" tablomun açılışı və "Xarı Bülbül" kiçik tamaşasını uğurla nümayiş etdirdik. Bir rəssam kimi mənə tablolarda gördüyüm kompozisiyaları səhnələşdirmək, onları ssenari şəklində yazmaq və səhnə geyimlərini yaratmaq böyük əhəmiyyət kəsb edir. Azərbaycanın Nizami Gəncəvisi və Türkiyənin Yunus Əmrə kimi böyük şairlərinin şeir və poemalarını canlandırmaq mənə qürür hissi verir. İndi iş prosesimizin demək olar ki, yarısından çoxunu bitirmişik. May ayının əvvəllərində tamaşaçılara bu layihəni televiziya vasitəsi ilə təqdim edəcəyik".

Bakıdakı Yunus Əmrə İnstitutunun rəhbəri Səlçuk Karakılıç qeyd edib ki, Türkiyənin böyük şairi Yunus Əmrənin nüfuz, təsir sahəsi o qədər geniş və dərindir ki, onu Anadoluya sığdırmaq mümkün deyil: "Böyük ruhların fərqli xüsusiyyətləri, yaşadıqları dövrü və mühiti aşaraq universal bir dil yarada bilmələridir. Niyə Yunus Əmrə səkkiz yüz ildən sonra da xatırlanır və dildən dilə ötürülür? Yunus Əmrəni böyük bir sənətkar edən və onu universal bir dilə gətirən əsas səbəb, dünyanı eyni anda anlamaq və şərh etmək bacarığı idi. Böyük ruhların ən fərqli xüsusiyyətləri, yaşadıqları dövrü və mühiti aşaraq universal bir dil yarada bilmələridir. Onun Türkiyədə çox sevilməsi, ayrıca hər dövrün özündə əks etdirməsi və davamlı istinad edilməsi sənətkarın dərinliyinin, böyüklüyünün göstəricidir. Hacı Bektaşi Vəli, Mövlana, Yunus Əmrə kimi türk dərvişləri, Asiya içindən gələrək Anadoluda tarixin ən əzəmətli təşkilatın quruluşunu imzaladılar, Türkiyə də qurulan belə bir universal dövlətdir".

© Photo : Courtesy of Lala Azeri
Beynəlxalq Muğam Mərkəzinin səhnəsində tamaşa

Səlçuk Karakılıç Yunus Əmrənin Anadolunun həqiqi memarlarından biri olduğunu, böyük sənətkarların dar mühitin deyil, daha geniş bir dünyanı izah etməyə çalışanlardan olduğunu bildirib: "Yunus Əmrə Türkiyədə olduğu kimi, Azərbaycanda da diqqətlə oxunur, haqqında araşdırmalar edilir. Bu il Yunus Əmrənin vəfatının 700-cü il dönümüdür, böyük şairimizi Azərbaycanda daha geniş kütlələrə izah etmək məqsədilə bir tamaşa ərsəyə gətirdik. "Yetmiş iki millətə bir gözlə baxmaq" Ümumdünya bəşəri dəyərlər prinsipi üzərində qurulmuş fəlsəfəsi ilə bütün bəşəriyyətlə danışan Yunus Əmrənin və Azərbaycan ədəbiyyatının böyük şairi Nizami Gəncəvinin xatirəsini anmağın uyğun olduğuna qərar verdik. Günay Zebiçin hazırladığı mövzunu əhatə edən tamaşanın bu günlərdə gənc nəsil üçün daha faydalı olacağını düşünürəm. Şübhəsiz ki, həm Yunus Əmrə, həm də Nizami Gəncəvi Türk dünyasının ortaq dəyərləridir. Bizim vəzifəmiz Yunus Əmrə və Nizami Gəncəvi kimi dövrünün böyük sənətkarlarını dəqiq təsvir etmək və onları yaşatmaqdır".

Qeyd edək ki, sözügedən layihənin nəinki Azərbaycanda, eyni zamanda Türkiyədə və Xorvatiyada festivallarda iştirakı da gözlənilir.

2