(2:27 / 15.71Mb / просмотров видео: 300)

Azərbaycanda ən kiçik kitab İçərişəhərdə saxlanılır

796
Bakının qədimi hissəsi olan İçərişəhərin küçələrindən birində dünyada yeganə olan miniatür kitablar muzeyi yerləşir. Muzey ildən-ilə kolleksiyasını genişləndirərək daha çox turist cəlb edir. Fərəhli haldır ki, unikal kolleksiya dünyada ən böyük həcmli olaraq qəbul olunub - onu Ginnessin rekordlar kitabına daxil ediblər.

Miniatür çap məhsulları səltənətinin yaradıcısı əməkdar mədəniyyət işçisi Zərifə Salahova həqiqətən unikal olan kolleksiyanı toplaya bilib. Kolleksiyada yeddi min beş yüzdən artıq kitab var. Buradakı ən qədim kitab Qurandır. Səudiyyə Ərəbistanından gətirilmiş müqəddəs kitab iki nüsxədədir və XVII əsrə aiddir.

"Çox az insan bilir ki, muzey açılanda 25 vitrində 3200 nüsxə var idi. İndi isə burada dünyanın 68 ölkəsində çap olunmuş 35 vitrində nümayiş etdirilən 5600 miniatür var. Onlardan 2913 kitab 75х75 mm formatındakı miniatür kitablardır», deyə Salahova bildirir.

Zərifə xanımın bildirdiyinə görə, Birinci Avropa oyunlarından sonra turistlərin sayı artıb və onların əksəriyyətini muzeyin ziyarətindən sonra heyrətlərini gizlətməyən rus turistlər təşkil edir.

"Rusiyalı turistləri daha çox gülərüzlülük, qonaqpərvərlik və əlbəttə ki, Azərbaycanın milli mətbəxi valeh edir", deyə əməkdar mədəniyyət işçisi qeyd edir.

Bundan əlavə, 1985-ci ildən başlayaraq Zərifə Salahova miniatür kitablar çap edir.

"Mən uşaqlar üçün mini kitablar seriyasını çap etdirdim. Ora yeddi kitab — Sabirin şeirləri, Azərbaycan xalq nağılları daxil idi. Bütün kitablar şəkillidir. Onların çoxunu məktəblərdə, ümumtəhsil tədbirləeində paylayıram", deyə Salahova əlavə edir.

Yeri gəlmişkən, ən maraqlı nəşrlərdən biri Rusiya prezidenti Vladimir Putinin Valdayda Beynəlxalq işgüzar klubun iclası zamanı etdiyi çıxışa həsr olunmuş kitabdır.

Muzey turistlər arasında populyardır, lakin paytaxt ictimaiyyəti də həmişə dünya mədəniyyəti nümunələrinin unikal toplusu barədə fəxrlə söz açır. Çünki Zərifə Salahovanın təşəbbüskarlığının sayəsində minlərlə bakılılar və paytaxtın qonaqları bu sərvətlə tanış ola bilirlər. Ən əsası, miniatür kitabın gözəlliyi ondadır ki, kiçik olsa da, özündə kitabın bütün keyfiyyətlərini ehtiva edir.

 

796

Təbii həkim: Azərbaycanda pandemiya dövründə qarağat bağları çoxalır

45
(Yenilənib 18:09 06.08.2020)
Fermerlərimiz qarağat təsərrüfatlarını genişləndirməyi planlaşdırır. Pandemiya dövründə bu giləmeyvəyə olan tələbat getdikcə artır. Plantasiyadan daha ətraflı videomuzda izləyin.

Ağstafanın Qarahəsənli kəndində fermerlər kənd təsərrüfatının ən gəlirli sahələrindən sayılan qarağatı yığırlar. 

Bu rayonda əsasən giləmeyvənin qara rənglisi becərilir. Mərhələli şəkildə yetişdikcə əl ilə bir-bir, yaxud salxım-salxım yığılan qarağat əziyyətlə toplansa da yaxşı qiymətə gedir. Bu səbəbdən fermerlər qarağat bağlarını ildən-ilə genişləndirirlər. 

Pandemiya dövründə isə qarağata olan tələbat daha da artıb. Belə ki, orqanizm üçün faydalı olan bu meyvə insanda immuniteti yüksəltməklə yanaşı, qış üçün də yaxşı azuqələrdən sayılır.

Fermer Məhəmməd Babayev hazırda qarağatın kiloqramının sahələrdə 2 manata, 2 manat 50 qəpiyə satdıqlarını bildirir.

“Azərbaycanda hər bir evdə, demək olar ki, qarağatdan istifadə edilir. Əsasən kompot və mürəbbə hazırlanır. Qiyməti də qane edir. Hətta onlayn şəkildə bizə müraciət edirlər. Çatdırırıq, pulumuzu alırıq”, -  deyə fermer bizimlə bölüşüb.

Lakin fermerlər bu sahədə də çətinliklərin olduğunu, məhsuldarlığa təsir edən ziyanvericilərlə fərdi şəkildə mübarizə edə bilmədiklərini deyirlər. Fermer Süleyman Babayev bunu lazım olan dərmanlardan düzgün istifadə edə bilmədikləri ilə əlaqələndirir.

Fermerlər deyirlər ki, pandemiya dövründə təsərrüfatlarında rahat işləyib öz məhsullarını yığmaqda heç bir çətinliklə üzləşməyiblər. Qarağatdan bu il yaxşı gəlir götürdüklərindən giləmeyvə bağlarını bir qədər də artırmağı düşünürlər.

45

Bakı Xan Sarayının yeraltı hamamı yer üzünə çıxır

48
(Yenilənib 17:06 05.08.2020)
Sputnik Azərbaycan Qoşa Qala darvazasının yaxınlığında yerləşən bərpa edilən hamama baş çəkib. Nəhayət yenilənmiş abidənin indi necə göründüyünü videomuzda izləyin.

2018-ci ildə Azərbaycanın Birinci Vitse-prezidenti Mehriban Əliyevanın təşəbbüsü ilə Bakı Xan Sarayı kompleksinin bərpa və rekonstruksiya işləri başlayıb. Kompleksin ərazisində həm də XVII əsrə aid yeraltı hamam da yerləşir. Bərpa işləri iki il ərzində bu sahənin ən tanınmış və aparıcı Avropa şirkətlərindən olan Avstriyanın “Atelier Erich Pummer GmbH” tərəfindən aparılıb.

Zamana səyahət: Bakı Xan Sarayı qonaq gözləyir
© Sputnik / Kamilla Əliyeva / Taleh Mahmudov / Leyla Orucova

Hamam Qoşa Qala qapısının yaxınlığında yerləşir. XIX əsrin əvvəlində Rusiya İmperiyası qoşunları tərəfindən Bakı xanlığının tutulmasından sonra kompleks yer altında qalmışdı. Yer altında bu qədər çox müddət qaldığını nəzərə alsaq, hamam, belə desək, “təbii konservasiya” edilib və buna görə də günümüzə qədər yaxşı vəziyyətdə çatıb. Hamamın yalnız günbəzləri dağılmışdı və onlar da Abşeron əhəngdaşı istifadə etməklə bərpa edilib.

Hamamın daxilində muzey fəaliyyət göstərir. Burada 17-18-ci əsrlərə aid hamam ləvazimatları, çini qablar, sikkələr nümayiş etdirilir. Hamamda bütün ərazilər – dəhlizlər, sauna və istirahət zonaları bərpa edilib. Hamamın qərb hissəsində isə qazıntılar zamanı aşkar edilmiş və radiokarbon analizi üçün Almaniyaya göndərilmiş taxta element saxlanılır. Nəticələr bu elementin 1640-cı ilə aid olduğunu göstərib. Bundan başqa, burada həm də divara həkk edilmiş küplər saxlanılır. Onlar hamamın akustikasını və su səsinin söhbətlərə mane olmamasını təmin edirdi.

Hamamın “ürəyi” olan qazanxana da tamamilə öz formasında saxlanılıb və bərpa edilib. Burada su qızdırılır və hamamçı çimmək üçün uyğun su temperaturunu qoruyub-saxlayırdı.

Bakı sakinləri və qonaqları bu yeraltı hamamı koronavirusun yayılmasının qarşısını almaq üçün təyin edilən karantin rejiminin bitməsindən sonra ziyarət edə biləcəklər.

48
ABŞ dollarları, arxiv şəkli

Qarşılayın! Bu da yeni ultramilyarderimiz

0
(Yenilənib 16:01 07.08.2020)
Zukerberqin sərvəti ona məxsus "Instagram" tətbiqində yeni "Reels" servisinin işə salınması fonunda "Facebook" şirkətinin səhmlərinin bahalaşması hesabına artıb

BAKI, 7 avqust — Sputnik. "Facebook" şirkətinin yaradıcısı və rəhbəri Mark Zukerberqin sərvəti ilk dəfə olaraq 100 milyard dolları keçib. Bu barədə Sputnik Azərbaycan "Bloomberg" nəşrinə istinadən xəbər verir.

Bununla da o dünyada yeni ultramilyarder olub. Daha əvvəl ultramilyarder adını "Amazon" şirkətinin rəhbəri Ceff Bezos və "Microsoft" şirkətinin yaradıcısı Bill Qeyts qazanmışdı.

Zukerberqin sərvəti ona məxsus "Instagram" tətbiqində yeni "Reels" servisinin işə salınması fonunda "Facebook" şirkətinin səhmlərinin bahalaşması hesabına artıb. "Reels" funksiyası "TikTok" tətbiqinə bənzəyir.

0