Bitkoin, arxiv şəkli

Qlobal reytinqdə yüksəlmişik: amma bunun xeyri dələduzların cibinə gedir

23
Kriptovalyuta mayninqi mövzusu bu ilin əvvəlində dünya üzrə kibercinayətkarların diqqətini yenidən çəkməyə başlayıb.

BAKI, 20 avqust — Sputnik. İlin əvvəlindən etibarən “Kaspersky” dünya üzrə potensial kriptovalyuta investorlarını və ya kriptovalyuta mayninqi ilə maraqlanan istifadəçiləri hədəf alan 1500-dən çox fırıldaqçılıq mənbəyini qeydə alıb. Şirkətdən Sputnik Azərbaycan-a daxil olan məlumatda bildirilir ki, bu müddət ərzində şirkət istifadəçilərin bu saytlara 70 mindən çox keçid cəhdini önləyib*.

Təcavüzkarların istifadə etdiyi ən geniş yayılmış sxemlər:

• saxta kripto birja saytlarının yaradılması: bu halda istifadəçiyə birjadakı hesabını doldurmaq üçün guya bir kupon verilir, lakin ondan istifadə etmək üçün yoxlama ödənişi (adətən 0,005 bitkoin və ya təxminən 200 ABŞ dolları) tələb olunur və bu məbləğ kibercinayətkarların cibinə gedir;

• videokartlar və digər kripto mayninq avadanlıqlarının saxta satışı ilə bağlı mesaj göndərişləri: avadanlıq almaq üçün istifadəçidən əvvəlcədən ödəniş etmək tələb olunur. Məbləğ daxil edildikdən sonra elan müəllifləri ünsiyyəti dayandıraraq yoxa çıxır;

• kriptovalyuta cüzdanı ilə əlaqəli bütün rəqəmsal aktivlərə giriş əldə etməyə imkan verən şəxsi açarları oğurlamaq üçün fərqli məzmunlu fişinq səhifələrinin yaradılması.

Məsələn, aşkar edilən sxemlərdən biri belə işləyirdi: istifadəçilər növbəsiz və yalnız bitkoin sahibləri üçün eksklüziv koronavirus peyvəndinin satılması barədə mesaj alır. Bu dələduzluq metodu peyvəndin hələ təzə-təzə meydana çıxdığı vaxtlarda xüsusilə geniş yayılmışdı. İstifadəçi peyvəndi əvvəlcədən sifariş etmək üçün messencerdə bir kontaktın göstərildiyi sayta daxil olur. Daha sonra bitkoinlə öncədən ödəniş etmək lazım gəlir. Pul isə təcavüzkarların hesabına gedir və həmin şəxs qarşılıq olaraq heç nə almır.

Təcavüzkarlar adətən saytları məşhur domen zonalarında yerləşdirirlər: .com, .net, .org, .info, onları ucuz domen satılan zonalarda da görmək olur: .site, .xyz, .online, .top, .club, .live. Kriptovalyuta sahəsində fişinq və digər saxtakarlıqların fərqli xüsusiyyəti veb sayt hazırlanmasında hər bir detala önəm verilməsidir. Məsələn, saxta kripto birjalarında tez-tez mövcud birjalardan real məlumatlar, xüsusən də bitkoin məzənnələri yüklənir. Təcavüzkarlar başa düşürlər ki, bu sahə ilə maraqlanan və ya ona sərmayə qoymaq istəyən insanlar texniki anlamda daha çox səriştəlidirlər. Buna görə də, digər insanların məlumatlarına və pullarına çatmaq üçün öz texnikalarını daha da çətinləşdirirlər.

Xatırladaq ki, kriptovalyuta mayninqi mövzusu bu ilin əvvəlində dünya üzrə kibercinayətkarların diqqətini yenidən çəkməyə başladı. “Kaspersky” mütəxəssislərinin ehtimallarına görə, bunun səbəbi kriptovalyutanın, xüsusən də bitkoinin qiymətinin artması ola bilər və bu səbəbdən maynerlər yenidən iş başına qayıdıblar. “Kaspersky”-nin informasiya təhdidlərinin inkişafı ilə bağlı hesabatlarına görə, bu ilin birinci rübündə mayninq hücumlarının – kriptovalyuta yaradılması üçün proqramların ən çox qeydə alındığı ölkələr arasında Azərbaycan 17-cı sırada yer alıb, ikinci rübdə isə 9-cu yerdə dayanıb.

"Kriptovalyuta maynerlərinin hücumuna məruz qalan ölkələrin qlobal reytinqlərində Azərbaycanın yüksəlməyə başladığını müşahidə edirik. Bundan əlavə, fırıldaqçılar da fəallaşıblar. Son zamanlar istifadəçilər kriptovalyutalara daha çox maraq göstərirlər və təcavüzkarlar bunu öz sxemlərində istifadə etmək fürsətini əldən vermirlər. Dələduzların qurbanları həm kriptovalyutalara sərmayə qoymaq və ya onun mayninqi ilə məşğul olmaq istəyənlər, həm də bu cür vəsaitlərin sahibləri ola bilər", - deyə “Kaspersky”-nin Azərbaycandakı nümayəndəsi Müşviq Məmmədov bildirib.

Kiber cinayətkarların qurbanı olmamaq üçün “Kaspersky” istifadəçilərə tövsiyə edir:

• məktublar, messencerlər və sosial şəbəkələrdəki mesajlar vasitəsilə göndərilən linklərə keçid etməyin;

• şəbəkədəki olduqca səxavətli təkliflərə həssas yanaşın;

• tətbiqi yalnız rəsmi mağazalardan yükləyin;

• fişinq və skamı neytrallaşdıran, həmçinin zərərli proqramların yüklənməsini önləyən qoruma həllərindən istifadə edin;

• əgər mağaza tanınmış deyilsə, ondan məhsul almazdan əvvəl, xüsusi WHOIS saytlarında həmin domenin neçə müddətdir mövcud olması və onun sahibinin kim olması barədə məlumatları araşdırın: əgər o lap yenidirsə və fiziki şəxsin adına qeydiyyatdadırsa, alış-verişdən vaz keçməyiniz daha məsləhətdir.

*2021-ci ilin yanvar - iyul aylarında “Kaspersky” həllərinə edilmiş geridönüşlərin anonimləşdirilmiş statistikası əsasında.

Eləcə də oxuyun:

23
Teqlər:
kriptovalyuta, vaksin, vaksinasiya, fırıldaq, fırıldaqçı, dələduz
BakıKart terminalı, arxiv şəkli

"BakıKart" balansını onlayn artırmaq mümkün olacaq

273
(Yenilənib 16:04 24.09.2021)
Yaxın bir həftədə Bakı şəhərinin bütün ərazisindəki “MilliÖn” terminallarında “BakıKart” ödənişi qəbul olunacaq.

BAKI, 24 sentyabr — Sputnik. Bakıda mövcud avtobus parkının 70%-dən çoxu “BakıKart” sisteminə inteqrasiya edilib. İş prosesinə uyğun olaraq digər marşrut xətlərinin də mərhələli şəkildə nağdsız ödəniş sisteminə inteqrasiyası nəzərdə tutulub.

Bakı Nəqliyyat Agentliyindən Sputnik Azərbaycan-a verilən xəbərə görə, fəaliyyət planına əsasən mərhələli qaydada internet portalı üzərindən ödəmənin tətbiqi, QR kod, NFC və EMV (bank kartı il birbaşa ödəniş) texnalogiyalarından istifadə nəzərdə tutulub: “Bunun üçün online.bakikart.az portalına daxil olub e-mail və ya telefon nömrəsi ilə qeydiyyatdan keçib şəxsi kabinet yaratmaq lazımdır. Kartın balansını iki üsulla artırmaq mümkündür: birbaşa və ya kartın şəxsi kabinetə əlavə edilməsi ilə. Daha operativ ödəniş üçün kartı kabinetə əlavə etmək tövsiyə olunur. Ödənilən məbləğ kartın balansına ən geci bir saat ərzində oturacaq".

Bundan başqa, qeyd olunub ki, “BakıKart” sisteminə inteqrasiya olunan “MilliÖn” ödəmə terminallarının sayı da artırılaraq 1000-ə çatdırılıb: "Vətəndaşlar artıq yalnız avtobus dayanacaq məntəqələrində deyil, Bakı şəhərinin müxtəlif ərazilərində fəaliyyət göstərən iaşə obyektlərində, iri ticarət mərkəzlərində və marketlərdə yerləşdirilən “MilliÖn” terminalları vasitəsilə də “BakıKart" balansını artıra biləcəklər. Yaxın bir həftə ərzində isə Bakı şəhərinin bütün ərazisindəki “MilliÖn” terminallarında “BakıKart” ödənişi qəbul olunacaq. Məlumat üçün bildiririk ki, sərnişin ödəmə terminalının əsas ekranında nəqliyyat xidmətləri bölümünə daxil olaraq “BakıKart” işarəsini seçib kartı kart oxuyucuya yerləşdirərək ödəniş edə bilər".

Növbəti mərhələdə digər ödəmə və balans artırma üsullarının da tətbiqi istiqamətində işlər davam etdirilir”.

273
Teqlər:
'BakıKart', Bakı, onlayn
İnternet şəbəkəsi, arxiv şəkli

İki provayder internet tariflərini dəyişdirdi

173
(Yenilənib 19:24 21.09.2021)
Yeni tariflərə əsasən, internet xidmətlərinə qoşulan istifadəçilər üçün sürətlər artırılıb, bunun müqabilində aylıq ödəniş haqqı endirilib.

 

BAKI, 21 sentyabr — Sputnik. İnformasiya texnologiyalarının tətbiqinin genişləndirilməsi, telekommunikasiya xidmətlərinə tələbatın müasir dövrün tələblərinə uyğun şəkildə təmin edilməsi məqsədilə Nəqliyyat, Rabitə və Yüksək Texnologiyalar Nazirliyinin tabeliyində fəaliyyət göstərən "Aztelekom" MMC və "Bakı Telefon Rabitəsi" MMC (Baktelecom) internet tariflərinə dəyişiklik edib.

Nazirlikdən Sputnik Azərbaycan-a verilən məlumata görə, yeni tariflərə əsasən, internet xidmətlərinə qoşulan istifadəçilər üçün sürətlər artırılıb, bunun müqabilində aylıq ödəniş haqqı endirilib.

Beləliklə, internet şəbəkəsi üzərindən məlumatların yüksək trafiklə ötürülməsi təmin edilib. Bu da onlayn qoşulma, ağır həcmli yükləmələr və digər əməliyyatların sürətli icrasına imkan yaradıb.

Dəyişikliklərə əsasən, ADSL texnologiyası vasitəsilə xidmət alan bütün abunəçilər üçün aylıq istifadə haqqı minimum 35%-dək endirilib.

O cümlədən, GPON (Gigabit Passive Optical Network) texnologiyası üzərindən göstərilən xidmətlərin tariflərinə də dəyişiklik olunub.

Qeyd edək ki, "Baktelecom.az" saytı üzərindən "onlayn qoşulma" funksiyası da fəaliyyət göstərir. Optik internet xidmətinə qoşulmanı seçilən tarif əsasında məsafə qət etmədən və növbələrdə vaxt itirmədən onlayn sifariş etmək mümkündür.

Yeni tariflər barədə ətraflı məlumatı hər iki şirkətin rəsmi veb-səhifəsi üzərindən əldə etmək mümkündür.

Eləcə də oxuyun: 

173
Teqlər:
internet, provayder, qiymət, azalma

Ceyhun Bayramov Beynəlxalq Qırmızı Xaç Komitəsinin prezidenti ilə görüşüb

0
(Yenilənib 22:27 25.09.2021)
BQXK-nin prezidenti humanitar sahədə əməkdaşlığın və münaqişənin həlli kontekstində müvafiq layihələrin bundan sonra da davam etdiriləcəyini vurğulayıb.

BAKI, 25 sentyabr - Sputnik. Sentyabrın 24-də xarici işlər naziri Ceyhun Bayramov BMT Baş Assambleyasının 76-cı sessiyası çərçivəsində Beynəlxalq Qırmızı Xaç Komitəsinin prezidenti Peter Maurer ilə görüşüb.

Görüşdə Azərbaycan ilə BQXK arasındakı münasibətlərin hazırkı vəziyyəti və perspektivləri barədə fikir mübadiləsi aparıldı və tərəflər arasındakı uğurlu əməkdaşlığın gələcəkdə daha da inkişaf edəcəyinə ümid ifadə edilib. 

Ceyhun Bayramov münaqişə sonrası regionda mövcud olan vəziyyət, xüsusilə də mina təhlükəsi və onun doğurduğu fəsadlar, azad edilmiş ərazilərdə həyata keçirilən bərpa, yenidənqurma işləri barədə qarşı tərəfə ətraflı məlumat verib. Nazir münaqişə kontekstində BQXK-nın fəaliyyətinin Azərbaycan tərəfindən müsbət qiymətləndirildiyini həmsöhbətinin diqqətinə çatdırıb.

Öz növbəsində BQXK-nin prezidenti Piter Maurer verilmiş məlumatlara görə təşəkkürünü bildirərək, təmsil etdiyi qurum tərəfindən bu istiqamətdə aparılan işlər barəsində məlumat verib. O, humanitar sahədə əməkdaşlığın və münaqişənin həlli kontekstində müvafiq layihələrin bundan sonra da davam etdiriləcəyini vurğulayıb.

Görüş zamanı, həmçinin ümumi humanitar məqsədli fəaliyyət barədə fikir mübadiləsi aparılıb.

Həmçinin oxuyun:

Ceyhun Bayramov Amerika Yəhudi Komitəsinin nümayəndələri ilə görüşüb

Ceyhun Bayramov Ermənistan XİN rəhbəri ilə görüşüb

0
Teqlər:
Ceyhun Bayramov, BQXK