Clubhouse

2021-in yeni trendi: indi izləyicilər Clubhouse-a qaçırlar

48
(Yenilənib 17:55 12.02.2021)
Təkcə yanvar ayının son 6 günü ərzində yeni şəbəkəyə 1,1 milyon insan qoşulub. Ancaq bu, elə də asan deyil. Məsələn, oraya dəvəti hətta satırlar

BAKI, 12 fevral — Sputnik. 2021-ci ildə yeni sosial şəbəkə – "Clubhouse" çox məşhurlaşdı. Bu şəbəkəyə daxil olmaqla İlon Mask, Mark Zukerberq kimi məşhurlarla birbaşa ünsiyyətdə olmaq mümkündür. Təkcə yanvar ayının son 6 günü ərzində yeni şəbəkəyə 1,1 milyon insan qoşulub. Ancaq "Clubhouse"-a qoşulmaq digər sosial şəbəkələrdə qeydiyyatdan keçmək qədər asan iş deyil. Ora yalnız "invite", yəni, dəvətnamə ilə düşmək mümkündür. İş o yerə çatıb ki, "Clubhouse"-a dəvətlər "eBay", "Alibaba" kimi nəhəng elektron ticarət saytlarında satışa çıxarılır.

Bəs bu yeni sosial şəbəkənin mahiyyəti nədir və onun ətrafında niyə bu qədər ajiotaj yaranıb?

Əvvəlcə onu qeyd edək ki, "Clubhouse"-un hələ heç bir yaşı da tamam olmayıb. Bu şəbəkə 2020-ci ilin aprel ayında Stenfordun iki məzunu – "Google"-un yaradıcılarından olan Pol Devisonla Roqan Set tərəfindən istifadəyə verilib. Devison sosial şəbəkə işində, necə deyərlər, köhnə adamdır, o, hələ 2012-ci ildə "Highlight" tətbiqini işləyib-hazırlamışdı. Bu tətbiqin qəribə iş prinsipi var idi: yaxınlıqda olan eyni maraq dairəsinə sahib istifadəçilərin bir-birini tapmasına kömək edirdi. Proqram bu məqsədlə istifadəçilərin "Facebook" profillərini analiz edirdi. Ancaq bir şərtlə ki, həmin istifadəçilərin hamısı "Highlight"-da hesaba sahib olmalı idilər.

Mobil tətbiq məxfilik prinsipinə xələl gətirməsi və istifadəçilər haqqında məlumatların başqaları ilə paylaşılması səbəbindən (istifadəçilər özləri bunu məhdudlaşdırmaq imkanına malik deyildilər) çox tənqid olundu. Nəticədə 2015-ci ildə "Highlight" bağlandı. Amma onun yaradıcıları bu addımdan sonra heç də məyus olmadılar və mahiyyəti etibarı ilə "Instagram"-a bir xeyli bənzəyən "Shorts" sosial şəbəkəsini yaratdılar. "Highlight" qədər olmasa da, "Shorts" şəbəkəsi də səs-küy doğurdu. Məsələ burasındadır ki, istifadəçilərin smartfonundakı bütün şəkillər (o cümlədən, bir o qədər də uğurlu alınmayan və intim xarakterli fotolar) "Shorts"-a düşə bilərdi.

Beləliklə, bu şəbəkənin də taleyi uğurlu olmadı və tezliklə bağlandı. Pol Devison isə necə deyərlər, şələ-küləsini qoltuğuna vurub "Pinterest"-də işləməyə getdi. Ta ki 2020-ci ildə köhnə dostu Roqan Setlə "Clubhouse" yaradana kimi orada çalışdı.

Devisondan fərqli olaraq Setin şəxsi biznesini qurmaq cəhdi daha uğurlu alınmışdı: 2014-cü ildə mobil tətbiq və sosial media inkişaf studiyası olan "Memry Labs"-ı yaratdı. "Memry Labs" bir xeyli məşhurlaşandan sonra kifayət qədər yüksək məbləğə "OpenDoor" internet şirkətinə satıldı.

"Clubhouse"-un yaradıcıları canlı ünsiyyətə daha çox diqqət ayırıblar: sosial şəbəkə "otaq"lardan və "klub"lardan ibarətdir. Maraqları üst-üstə düşən insanlar bu otaqlarda "görüşüb" söhbət edə bilərlər. Ancaq bir şərtlə: yalnız səsli və real vaxt rejimində ünsiyyətə icazə verilir. Səs yazısını qeydə almaq qadağandır. Clubhouse-da qeydiyyatdan keçmiş hər bir istifadəçi müəyyən mövzu üzrə hamıya açıq olan söhbət "otağı" yarada bilər. Bundan dərhal sonra onun bütün abunəçilərinə söhbətə qoşulmaq üçün bildiriş gedir. Sonrakı addım, necə deyərlər, abunəçilərin abunəçilərinin də söhbətə qoşulmasından ibarətdir və beləliklə, şəbəkə genişlənir.

Söhbətdə iştirak edən bütün insanlar spikerlərə və dinləyicilərə bölünür, hərçənd, hamının "əl qaldırmaqla" spiker olmaq, çıxış edənlərə sual vermək imkanı var. Hər bir istifadəçi "otaq"larda üç dəfə diskussiya təşkil edəndən sonra öz daimi "klub"unu yarada bilər. Ancaq bu klubun qeydiyyatdan keçməsini "Clubhouse"-un moderatorları təsdiqləməlidirlər.

Sosial şəbəkələrdəki bütün "otaq"lar açıq, məxfi və yaxud da yalnız müəyyən bir klubun üzvlərinə əlçatan ola bilər.

Şəbəkənin mənfi xüsusiyyətləri sırasında isə hələlik yalnız "Apple" istifadəçiləri üçün nəzərdə tutulması və Android əməliyyat sistemi tərəfindən dəstəklənməməsi, yaradılan hesabın silinmə imkanının olmaması qeyd edilir.

48
Twitter şirkətinin loqosu, arxiv şəkli

Twitter-in qurucusu ilk tvitini hərraca çıxarıb

99
(Yenilənib 23:52 06.03.2021)
İlk tviti almaq hüququ uğrunda əsas mübarizə “Bridge Oracle” şirkətinin icraçı direktoru Hakan Estavi ilə çinli sahibkar, “Tron” kriptovalyutasının qurucusu Castin San arasında gedir.

BAKI, 7 mart - Sputnik. Twitter sosial şəbəkəsinin qurucusu Cek Dorsinin ilk tviti Valuables auksionunda hərraca çıxarılıb.

“Report”un məlumatına görə, şənbə günü səhərədək ilk tivitin qiyməti 2 milyon ABŞ dolları olub.

Dorsi ilk tvitini 2006-cı ilin 21 mart tarixində paylaşıb.

İlk tviti almaq hüququ uğrunda əsas mübarizə “Bridge Oracle” şirkətinin icraçı direktoru Hakan Estavi ilə çinli sahibkar, “Tron” kriptovalyutasının qurucusu Castin San arasında gedir.

99
Səmada dron, arxiv şəkli

Azərbaycan səmasında tezliklə xüsusi təyinatlı uçuş aparatları peyda olacaq - VİDEO

59
(Yenilənib 11:55 02.03.2021)
Bu növ xüsusi təyinatlı texniki uçuş aparatlarının işğaldan azad olunmuş ərazilərdə qurulacaq Ağıllı Şəbəkələrdə təşkiledici baza elementi kimi istifadə edilməsi nəzərdə tutulub

BAKI, 2 mart — Sputnik. "Azərişıq" Açıq Səhmdar Cəmiyyəti Ağıllı Şəbəkələr konsepsiyasının həyata keçirilməsində daha bir yenilik edib. Qurumdan Sputnik Azərbaycan-a verilən məlumata görə, söhbət kommunal sektorda ilk dəfə xüsusi təyinatlı uçuş aparatlarının tətbiq edilməsindən gedir.

"Azərişıq"ın Ağıllı Şəbəkələr konsepsiyası tamamilə müasir və innovativ texnologiyaların istifadəsi üzərində qurulub. Bu konsepsiya çərçivəsində, artıq reallaşdırılmış müasir tipli mühafizəli və izolyasiyalı yüksək gərginlikli xətlərinin, 3D-mobil xəritəçilik sisteminin, məsafədən Optik portla elektrik sayğaclarının oxunması və mövcud idarəetmə platformasına inteqrasiya işləri uğurla davam etdirilir.

Rəqəmsal idarəetməyə keçid proqramı istiqamətində aparılan genişmiqyaslı tədbirlər sırasına xüsusi təyinatlı uçuş aparatları ilə Hava Elektrik Veriliş Xətlərinə (HEVX) kompleks və lokal baxış keçirilməsinin təşkili də əlavə edilmək üzrədir. Belə ki, ASC-nin Tədris və İnnovasiyalar Mərkəzində "Şəbəkə qüsurlarının aşkar edilməsində Yüksək texnologiyaların tətbiqi" üzrə təlim-tədris kursuna start verilib. Bu tip pilotsuz uçuş aparatları sadə foto-video çəkilişləri üçün nəzərdə tutulmuş dronlardan xeyli fərqlənir. Bu səbəbdən də onlara Xüsusi Təyinatlı Texniki Uçuş aparatları adı verilib. Belə kameralar 360 dərəcəlik panorama, infraqırmızı spektrdə və temperatur göstəricilərinin vizuallaşdırılması rejimlərində çəkiliş apara bilir. Bundan əlavə, xüsusi yaxınlaşdırma (zoom) funksiyası 25-30 m məsafədən kiçik ölçülü zədələnmələri belə müəyyən etməyə imkan verir.

Ənənəvi üsulla xətlərə texniki baxışın keçirilməsi üzun müddətli və mürəkkəb dispetçer əməliyyatlarının aparılmasını tələb edən bir prosesdir. Burada əlavə işçi heyətin, maşın–mexanizlərin, xüsusi qaldırıcı texnikanın cəlb edilməsi də qaçılmazdır. Nəticədə, elektrik enerjisi verilişində uzunmüddətli fasilələr yaranır, abonent məmnunluğu və xidmət keyfiyyəti göstəriciləri pisləşir. Müasir texnologiyaların tətbiqi ilə bütün bu problemlər aradan qaldırılır, yüksək dəqiqlikli vizual qeydiyyat aparılır, virtual arxivləşdirilir, ən əsası – abonentlərin elektrik enerjisi verilişində fasilələr yaranmır.

Bu növ xüsusi təyinatlı texniki uçuş aparatlarının işğaldan azad olunmuş ərazilərdə qurulacaq Ağıllı Şəbəkələrdə təşkiledici baza elementi kimi istifadə edilməsi nəzərdə tutulub", - deyə qurum bəyan edib.

59
Teqlər:
elektrik xətləri, elektrik naqili, qəza, "Azərişıq" Açıq Səhmdar Cəmiyyəti, dron
Gülsurə İbadova

Kişilərlə yarışa girib: "Beş yüz min manatlıq maşından əvvəl ehtiyat edirdim" - FOTO

0
(Yenilənib 17:00 08.03.2021)
Üç qız, üç oğul anası olan Gülsurə İbadovaya həyat yoldaşı və ailəsi dəstək olur. On yeddi yaşında ailə quran müsahibimiz bildirir ki, həyat yoldaşı indiyədək heç vaxt işdən evə gec gəldiyinə görə ona irad bildirməyib.

Zülfiyyə Quluyeva, Sputnik Azərbaycan

BAKI, 8 mart — Sputnik. Hər gün sübh tezdən yuxudan oyanır. Həyət-bacada işlərini sahmana salıb, tarlaya yollanır. Texnikanın hər tərəfini yoxlayır, sazlığına əmin olandan sonra kombaynı işə salır. Düz otuz ildən çoxdur ki, kombaynçı işləyən pambıqçı-mexanizator Gülsurə İbadovanın günü belə başlayır. 16 yaşından kombayn sürücüsü işləyən bu qadın 60 yaşı olmasına baxmayaraq, bu gün də işinin başındadır. Sputnik Azərbaycan bir çox kişinin bacarmadığı ağır işin ödəsindən ustalıqla gələn zərif cinsin nümayəndəsini oxucularına təqdim edir. 

Sabirabad rayonunun Kürkəndə kəndindən olan Gülsurə İbadova 8-ci sinfi bitirib bir il Texniki Peşə məktəbində təhsil aldıqdan sonra pambıqçılıq sahəsində işə başlayır. Ona köməkçi kimi işləmək tövsiyə olunsa da, G.İbadova Sevil Qazıyevanın başına gələnlərdən sonra buna razı olmur. Özünün dediyinə görə, pambıq sahəsində işə becərmədən başlayır. Sonra ona sürmək üçün traktor verirlər. Elə həmin ilin avqust ayında yeni pambıqdərən kombayn idarə edir. Sovet dövründə qabaqcıl sürücü-mexanik kimi dəfələrlə mükafatlara layiq görülür. Hətta Ulu öndər Heydər Əliyevlə də görüşərək ondan mükafat alır. Həmin illəri xatırlayan Gülsurə İbadova Heydər Əliyevin onun saçına sığal çəkərək tövsiyə verdiyini də unutmayıb: "Mənim uzun saçım vardı. Heydər Əliyev saçıma sığal çəkib mənə dedi ki, pambıq yığanda mütləq saçımı yığım. O mənə Sevil Qazıyevanın başına gələnləri xatırlatdı".

© Photo : Courtesy of Gyulsura Ibadova
Sabirabad rayonunun Kürkəndə kəndindən olan Gülsurə İbadova 8-ci sinfi bitirib

Sovetlər Birliyi dağıldıqdan sonra bir müddət bələdiyyədə çalışan G.İbadova 2019-cu ildən yenidən sevimli peşəsini davam etdirir. Həmsöhbətimiz deyir ki, Şirvan Şəhər Kənd Təsərrüfatı İdarəsi ona rayona gələn yeni kombaynı sürməyi təklif edir. G.İbadova Kənd təsərrüfatı naziri İnam Kərimovla görüşdə bu istəyini səsləndirir. Nazirin tapşırığı ilə ona yeni gətirilən pambıqdərən kombaynı idarə etmək həvalə olunur. G.İbadova nazirin kənd təsərrüfatı sahəsində çalışanlara qayğısından da ağızdolusu danışır.

Yeni pambıqdərən kombaynın sovet dövründəki kombayndan fərqli olduğunu söyləyən G.İbadova çətin olsa da, bu işin də öhdəsindən gəlir:

"Yeni kombaynı idarə etmək üçün sürücülük vəsiqəm köhnə idi. Bu kombaynı sürmək üçün imtahandan keçib 5 kateqoriyalı sürücülük vəsiqəsi aldım. Kombaynı Şirvandan sürüb Sabirabada gətirdim. Əlbəttə ki, bu  texnika müasir olduğundan, sovet dövründəki kombayndan çox fərqlənir. Bu texnikanın 17 ton ağırlığı var. 500 min manat qiyməti olan texnikanı idarə edəndə əvvəlcə ehtiyat edirdim. Hətta iki gün idi işə çıxmışdım ki, kombaynda şlanq partladı.

Yoldaşım çilingər olduğundan mayenin axmaması üçün "salnik" (kipgəc) qoydu. Kombaynı sürüb Məmişlər kəndinə getdim. Oraya çatmışdım, yenə problem yarandı. Texniki dəstək üçün mühəndisə müraciət etdim. O bildirdi ki, xamutu açıb boşaltmaq lazımdır. Bundan sonra  bəzi xırda detalları özüm bağlamağı öyrəndim. Amma sovet kombaynını sıfırdan - mühərrikinə qədər - özüm yığa bilirdim. Bu kombayn bahalı olduğu üçün problem olanda əlimi vurmağa çəkinirəm. Problem yarananda servisə zəng edirik, gəlib həll edir. Amma yeni kombaynlarda hələ ki ciddi problem yaranmayıb".

© Photo : Courtesy of Gyulsura Ibadova
Gülsurə İbadova

Həmsöhbətimiz deyir ki, sovet dövründəki kombaynlarda yerə şeh düşən kimi pambıqdərənin "şpindeli" (oxu) tutulurdu: "Amma yeni kombaynlar şampunla özü yuyub-təmizlədiyi üçün problem yaranmır".

İşinin incəliklərindən danışan G.İbadova bununla belə, şeh olanda pambıq yığımının çətin olduğunu söyləyir: "Sentyabrın sonuna qədər şeh olmur. Biz o vaxtdan səmərəli istifadə edirik. Elə vaxt olub ki, bir həftə evə getməmişəm. Gecə-gündüz pambıq yığmışam. Elə şam yeməyimizi də sahədə yemişik. Yuxusuz işləmək çətin olsa da, pambıq mövsümündə bu əziyyətə qatlaşmalısan. Çünki sentyabrın sonunda bəzən yağışlar yağmağa başlayır. İnsanların əməyi itməsin deyə biz çalışırıq ki, sahələrdə məhsulu yağış yağanadək yığıb qurtaraq".
  • Gülsurə İbadova kollektivlə
    © Photo : Courtesy of Gyulsura Ibadova
  • Heydər Əliyev Gülsurə İbadovaya mükafat verib
    © Photo : Courtesy of Gyulsura Ibadova
  • Gülsurə İbadova
    © Photo : Courtesy of Gyulsura Ibadova
  • Gülsurə İbadova kollektivlə
    © Photo : Courtesy of Gyulsura Ibadova
1 / 4
© Photo : Courtesy of Gyulsura Ibadova
Gülsurə İbadova kollektivlə

Çox məhsul yığımının onların qazancına da təsir etdiyini söyləyən G.İbadova  sentyabrın 13-dən noyabrın sonuna qədər 380 hektardan pambıq yığdığını, 2600 manata qədər pul qazandığını söyləyir: "Pambıq əsasən yayda yığılır. Saat 6-da yuxudan durub, evdə işləri sahmana salıb, "VAZ 2106" ilə "Aqroservis"ə gedirəm. Pambıqdərənin yağına, mühərrikinə baxıb, avtoyuyucuda aparatını  yuyub-təmizləyirəm. Sonra hansı sahəyə göndərirlərsə, oraya gedirəm. Son illər pambıq istehsalında məhsuldarlıq artıb. Elə vaxt olub ki, 80 hektar sahədən 300 ton pambıq yığmışıq. Bir həftə ərzində bu işə üç kombayn cəlb olunub. Məhsulun çoxluğu həm də bizim qazancımıza təsir edir".

© Photo : Courtesy of Gyulsura Ibadova
İbadova 2019-cu ildən yenidən sevimli peşəsini davam etdirir

G.İbadova bildirir ki, pambıq yığımından qazandığı pulu ailəsinə xərcləyir. Üç qız, üç oğul anası olan G.İbadovaya həyat yoldaşı və ailəsi də dəstək olur. On yeddi yaşında ailə quran müsahibimiz bildirir ki, həyat yoldaşı indiyədək heç vaxt işdən evə gec gəldiyinə görə ona irad bildirməyib: "Yoldaşım narşərab zavodunda çilingər işləyirdi.  Qohumluğumuz olsa da sevib ailə qurmuşuq. Hər ikimiz torpağa bağlı, zəhmətsevər insanlarıq. Övladlarımızı da belə tərbiyə etmişik".

G.İbadova 60 yaşında kombayn sürməyin heç də çətin olmadığını söyləyir. Onun sözlərinə görə, əksinə, bu yaşda işləmək  ona zövq verir. "İş adamı gümrah saxlayır. Bəlkə, elə mənim gümrah qalmağımın səbəbi işimdir", - deyir kombaynçı müsahibimiz.

0
Teqlər:
müsahibə, sürücü, pambıq, kombayn, qadın