Smartfonda sosial şəbəkə tətbiqlərinin loqosu, arxiv şəkli

Sosial media hesabları niyə silinir?

68
(Yenilənib 09:53 14.11.2020)
Sadiq Fərzəlibəyin sözlərinə görə, "Facebook" ədalətli davransa və əgər həmin postda təhqir varsa, bir şikayətlə də bağlana bilər.

Şahpəri Abbasova, Sputnik Azərbaycan

BAKI, 14 noyabr — Sputnik. Son günlər "Facebook", "Twitter" və bəzi sosial media hesabları, o cümlədən səhifələrin silinməsi bir çox insanların narahatlığına səbəb olub. "Amerikasayağı Bakı" səhifəsinin və son günlər bütün sosial platforma reytinqlərinin ilk üçlüyündə yer alan "#DontbelieveArmenia" həştəqinin yaradıcısı Sadiq Fərzəlibəy bu suallara aydınlıq gətirib:

"Sosial şəbəkədə aktivəm. 2009-cu ildə ilk dəfə profilimi açmışam. "Facebook"dan başqa "Twitter"də də aktiv olmuşam. "Twitter" səhifəmi 2011-ci ildə açmışam. Həmin ildə "Youtube" səhifəmi də açdım. Digərlərində də aktiv olmuşam. Bu vaxta qədər qazandıqlarımdan bəhrələnirəm. "Amerikansayağı Bakı" səhifəsini 2015-ci ildə açmışdım. Məqsəd Azərbaycanın bölgələrini çəkib oranı xarici ölkələrə bənzətmək idi".

"Niyə məhz "Amerikansayağı Bakı"?"sualına müsahibimizin cavabı belə oldu: "Tutaq ki, Neftçilərdə haranısa çəkirdim, üstündə bir az işləyirdim, yazırdım ki, bura Avropanın hansısa şəhərindəki küçə deyil, bura Neftçilərdir. Mənim bu ideyamı sonralar ermənilər də oğurlamışdılar. Müharibə vaxtı düşündüm ki, əlimdəki imkandan yararlanım. Niyə də bu gücümüzü beynəlxalq arenada istifadə etməyək?"

© Sputnik / Murad Orujov
Sadiq Fərzəlibəy

Fərzəlibəyin sözlərinə görə, digər səhifə adminlərinə müraciət edəndə xoş qarşılamayıblar. Deyiblər, "biz xəbər paylaşmaq istəyirik".

"Mən dedim insanları düzgün istiqamətə yönləndirmək lazımdır ki, bir uğurumuz olsun. Amma sonradan gec də olsa qoşuldular. Komanda kimi fəaliyyət göstərdik. Amma son günlər gündəm mövzuların çox olması ilə bağlı tək fəaliyyət göstərirəm. Tək fəaliyyət göstərəndə daha sürətli olur. Çünki, komanda şəklində işləyəndə digər adminlərin də qərarını gözləyirsən. Bu da gecikmələrə səbəb olur", - o, bildirib.

Həmsöhbətimiz ona bu yolda dəstək olan insanlardan da danışıb: "Mənə çox dəstək olurlar. Şou-biznes nümayəndələrindən tutmuş, rəsmi şəxslərə qədər. Öz peşəsinin peşəkarı olan insanlar mənə çox kömək elədi. Nazirliklərin demək olar ki, hamısından zəng gəlib, mənə təşəkkür edirlər, yanımda olduqlarını söyləyirlər. Bundan başqa, "ASAN Xidmət" də mənə kömək edir. Zəng edib dedilər ki, arxanızdayıq. Onlar adlarının açıqlanmasını istəmirlər, mən onları "gizli qəhramanlar" adlandırıram".

S.Fərzəlibəy "#DontbelieveArmenia" həştəqinin yaranmasından bəhs edərkən deyib: "Tutaq ki, hansısa dünya ulduzu ermənilərə dəstək yönümlü post paylaşıb. Biz istəyirik ki, onlara çatdıraq ki, onlar bundan xəbərsizdilər. Kreativ posterlər hazırlanırdı. Biz də o posterləri paylaşırdıq. "Görünməyən qəhrəmanlar"ımız həddindən artıqdır. Mən onları izləyə bilmirəm. Əvvəllər ayrı-ayrı şəxslər təkbaşına vuruşurdular. Mənim səhifəm bu gücləri birləşdirdi. Əvvəllər həştəq yaradırdılar, heç biri trendə düşmürdü. Mən ilk dəfə #DontBelieveArmenia həştəqi yaratdım. Dedim heç olmasa dünya trendinə düşək. Sonradan məlumat aldım ki, #Karabakhisazerbaijan həştəqi trendə düşüb bir neçə dəfə. Bizim səhifənin sayəsində 400000-dən çox insan "Twitter"də yer alıb. Bu, "Twitter" üçün böyük rəqəmdir".

© Sputnik / Murad Orujov
Sadiq Fərzəlibəy

"Əvvəllər Azərbaycanda "Twitter" istifadəçisi çox az idi. Son dönəmlərdə artdı, xüsusən İlham Əliyevin tvitlərindən xəbərdar olmaq üçün o səhifəyə üzv oldular. #DontBelieveArmenia" həştəqi yaranandan hardasa bir həftə sonra bir milyon yarım tvit atılmışdı. Beləliklə, biz trendə düşdük. Həmin həştəq dünya xəbər saytlarına çıxdı. Orada səhifənin adını da yazmışdılar. Xəbər başlığında belə yazılmışdı ki, "Azərbaycan və Ermənistan virtual cəbhədə də vuruşurlar". Həmin həştəqlərlə biz Kardi B-yə də baş çəkdik. Kardi B üzr istədi. Üzr istəyəndən sonra ermənilər hücum etməyə başladı ona. Hətta 4-5 tvit atdı ayrı-ayrı. Xatırlayırsınınzsa, Elton Con da ermənilərə dəstək yönümlü paylaşım etmişdi. Həqiqətləri çatdırdıq, həmin statusu sildi. Düzdü üzr istəmədi, amma statusu yumşaltdı. Post paylaşdı ki, "hər iki tərəfdən itkilərin olmasını istəmərəm". Bəlkə də onlar heç Azərbaycanın yerini bilmirlər. Bəzi şou-biznes nümayəndələrinin təsdiq olunmuş səhifələri bizə çox kömək olub" deyə müsahibimiz əlavə edib.

Son vaxtlar ən çox verilən suallardan biri də "Twitter" səhifələrinin bağlanması ilə bağlıdır. Bəs bunun səbəbi nədir?

"Bizimkilər ilk dəfə "Twitter"-ə hücum edəndə 8000 profili blok elədi. Bunun səbəbi o idi ki, profillər yeni açılıb. Birdən birə xeyli tvit atdılar, bəyənmə oldu. "Twitter"in süni intelektləri də elə başa düşür ki, bu insanlar insan deyil, "bot"lardır. Bir qrup bloklanma oldu həmin sosial şəbəkədə. Dediyim məsələ "Facebook"-a da aiddir. Biz kütləvi şəkildə "kopya"lanmış rəylərdən istifadə etdik. Həmin rəylər çox olduqca "Facebook" onu "spam" kimi qəbul etdi və əksər səhifələr bloklandı. Hətta həmin səhifələri araşdırmışdılar, "bot" adlandırmışdılar".

S.Fərzəlibəyin dediyinə görə, məşhur bir xarici sayt bununla bağlı araşdırma aparıb. Dediyinə görə, həmin saytda çalışanlardan biri də erməni idi: "Onlar demişdilər ki, "biz bilmirik bu insandır, yoxsa "bot"dur. Aktivlik "bot" aktivliyidir. Əlavə etmişdilər ki, bunu edən kompüter və ya "bot" deyil, bu, insandır". Digər bloklanma isə onunla bağlıdır ki, bizim insanlar emosionaldırlar, bəzən özlərini cilovlaya bilmirlər, orada ermənilərin rəylərinə təhqir yazırlar. Düşünürəm ki, əsas səbəb odur. Amma qəribə bir alqoritma var bu məsələdə. Söysəniz belə, bir hərfi yazmaya bilərsiniz, deyəcəyiniz sözü 2 başlı da yaza bilərsiniz. Bu zaman bloklanmayacaqlar. Ermənilər bu işdə də hiyləgərdirlər. Onlar təhqir edəndə də "smaylik"lərdən istifadə edirlər. Onlar sözlərdən istifadə etmədiklərinə görə alqoritma onu blok eləmir".

© Sputnik / Murad Orujov
Sadiq Fərzəlibəy

"Amma bəzən yazmışıq ki, "Azərbaycan güclü dövlətdir" yazmışıq, bizi blok edib. Amma maraqlıdır ki, ermənilər təhqir də yazdıqları halda onların səhifələri blok olunmur. Bunun da səbəbini araşdırdıq. Səbəb isə "Facebook"da işləyən ermənidir. Bizim bölgəyə ermənilər baxır. Bizi təhqir edən neçə erməni səhifəsini şikayət etməyimə rəğmən, şikayətimiz qeydə alınmadı. Cavab gəldi ki, heç bir qayda pozuntusu yoxdur".

Həmsöhbətimiz əlavə edib ki, tutaq ki, bir postu şikayət etmisinizsə, həmin posta gülüş, ürək "smaylik"i atılıbsa, həmin post silinməyəcək: "Əgər bir statusda əsəbi "smaylik"i çox olarsa və həmin post şikayət olunarsa, post silinə bilər. Əsəbi "smaylik"in çox olduğu postu yoxlayırlar, görək doğrudan da həmin post insanları əsəbləşdirir. Amma rəsmi olaraq heç yerdə belə bir qanun yoxdur".

Müsahibimizin sözlərinə görə, "Facebook" ədalətli davransa və əgər həmin postda təhqir varsa, 1 şikayətlə də bağlana bilər:

"İndiki situasiyanı çıxsaq, 1 şikayətlə də bağlana bilər. Nöqtə-vergül məsələsi aktivliyə kömək edir. Tutaq ki, özünün 1 statusuna 10-15 bəyənmə gəlirdisə, siz nöqtə-vergül istəyəndə həmin insanlar sizə rəy yazdığı üçün, statusunuza baxdığı üçün "Facebook" alqoritması sizi ona yaxın hiss edir. Beləliklə növbəti dəfə sizin postlarınızı daha çox insanın lövhəsində göstərməyə başlayacaq. Nöqtə-vergül səhifənizin aktivliyinə kömək edir. Həmin aktivlik də səhifənin bağlanmağının qarşısını az-çox ala bilər".
© Sputnik / Murad Orujov
Sadiq Fərzəlibəy

İnsanları daha çox düşündürən məsələlərdən biri də səhifənin təsdiqlənməsidir. Bəs bu mexanizm necə tənzimlənir?: "Səhifənin təsdiqlənməsi ilk vaxtlar asan idi. Amma zaman keçdikcə sui-istifadələrə görə prosesi çətinləşdirdilər. "Ton forma" yaradıblar, ora müraciət edirsiniz. Ondan sonra təsdiqlənir. 10 nəfər bəyənməsi olan səhifə təsdiqlənmə ala bilər. Tutaq ki, siz bir repersiniz, Azərbaycanda min bəyənməniz var, amma siz "Facebook"-a müraciət edirsiniz, fəaliyyətinizi təqdim edirsiniz, bundan sonra "Facebook" sizə təsdiq verə bilər".

Fərzəlibəy xəbər saytlarının səhifələrinin tez-tez bağlanmasının səbəblərindən danışıb: "Məsələn siz bir xəbər paylaşırsınız, bu xəbər kimlərsə tərəfindən bəyənilmir, bəzən onu şikayət edirlər. Bəzən buna görə bağlanılır. Bəzən də yayılması qadağan olunan görüntülər yayımlana bilər. Tutaq ki, qəza, şiddət tipli video paylaşdığına görə həmin "Facebook" səhifəsinə qadağa qoyula bilər. Başqa bir səbəb də müəllif hüququdur. Ola bilər ki, siz hansısa video və foto paylaşmısınız, amma müəllifi qeyd etməmisiniz. Həmin müəllif şikayət edir, sizə bir dəfə xəbərdarlıq göndərilir ki, bir də belə bir hal yaşansa, səhifə silinə bilər. Siz o xəbərdarlığa məhəl qoymasanız, səhifəniz bağlana bilər".

68
Teqlər:
sosial şəbəkə, sosial media, sosial, Twitter, facebook, Facebook
Работа за компьютером, фото из архива

"Qara cümə"nin "Kiber bazar ertəsi" - bu gün daha çox qorunmalısınız

4
(Yenilənib 15:39 30.11.2020)
Böyük markalar tərəfindən təşkil olunduğu iddia edilən saxta aksiya və anketlərin istifadə edildiyi fırıldaq mənbələrinin də sayı artır.

BAKI, 30 noyabr — Sputnik. Böyük endirim və satış günü olan "Qara Cümə" gününün ardınca "Kiber bazar ertəsi" günü gəlir. Bu gün bu il 30 noyabr tarixinə təsadüf edir. "Kiber bazar ertəsi" günü "Qara Cümə" kimi hər il insanların Yeni il bayramına hazırlaşmağa başladığı bir dövrdə keçirilir. Sputnik Azərbaycan xəbər verir ki, bununla bağlı "Kapersky"nin məlumatına görə, həmin dövrdə markalar yaxşı endirimlər təklif etdikləri və təcavüzkarların gizlənməsini asanlaşdıran çox sayda mesaj göndərdikləri üçün, fişinq və fırıldaqçı hücumların sayı əhəmiyyətli dərəcədə artır:

"Əvvəlki illərin təcrübəsindən də göründüyü kimi, dördüncü rübdə, xüsusilə maliyyə sektorunu hədəf alan fişinq hücumlarının faizi, bütöv il ilə müqayisədə təxminən 10% daha yüksək olub. Fırıldaqçılar bu il də koronavirus mövzusundan aktiv şəkildə istifadə edirlər. Bu il ən geniş yayılan əfsanələrdən biri, guya müəyyən vətəndaş qruplarına görə verilən sosial müavinətlər idi. Təkcə 2020-ci ilin birinci yarısında "Kaspersky" mütəxəssislərinin aşkar etdiyi bu cür saxta mənbələrin sayı keçən ilin ilk altı ayı ilə müqayisədə təxminən beş dəfə çox olub. Təcavüzkarlar adətən uydurma fondlardan maddi yardım, müavinətlər və müxtəlif növ ödəmələr təklif edən xəbərdarlıqları təqlid edirlər".

"Böyük markalar tərəfindən təşkil olunduğu iddia edilən saxta aksiya və anketlərin istifadə edildiyi fırıldaq mənbələrinin də sayı artır. Bunlar istifadəçilərə müəyyən "komissiya" ödənişi qarşılığında böyük pul mükafatlarının vəd olunduğu saxta saytlardır. Bu sxem nəticəsində yalnız kiber cinayətkarlar pul əldə edirlər. 2020-ci ildə fırıldaqçılıq dünya istifadəçiləri üçün getdikcə daha aktual bir təhlükəyə çevrilir: mütəxəssislərimizin fikrincə, bu cür mənbələrin sayı daha da artacaq. İnsanlar getdikcə internetdə daha çox vaxt keçirirlər və kiber cinayətkarlar da bundan istifadə edirlər. Hiylələrini cari xəbər gündəminə uyğunlaşdırır və istifadəçiləri onlara könüllü olaraq pul köçürmək üçün aldadırlar. Son vaxtlar fırıldaqçılar mütəmadi olaraq lotereya və aksiyalara olan maraqdan istifadə edirlər. Pulu verməzdən əvvəl, məbləğin miqdarı əhəmiyyətsiz görünsə belə, pul köçürməyinizi tələb edən istənilən təklifdən şübhələnməyinizi tövsiyə edirik," - deyə Kaspersky-nin Azərbaycandakı rəsmi nümayəndəsi Müşviq Məmmədov bildirib.

Fırıldaqçıların tələsinə düşməmək üçün, "Kaspersky" onlayn təhlükəsizliyin əsas qaydalarını xatırladır:

• elektron poçt, messencer və ya sosial şəbəkələrdə şübhəli linklərə daxil olmayın və şübhəli saytlarda reklam banerlərinə klikləməyin;

• ödəniş üçün məlumat daxil etməzdən əvvəl ünvan zolağındakı saytın ünvanını diqqətlə yoxlayın;

• onlayn alış-veriş üçün ayrıca bir kart, məsələn, virtual bir kart almaq, içində az miqdarda pul saxlamaq və gündəlik pul çıxarma qoymaq daha yaxşı olar;

• onlayn mağaza naməlum bir mənbədirsə, xüsusi whois (kimdir?) xidmətlərindəki domen məlumatlarını yoxlamaq daha yaxşı olar: tamamilə təzədirsə və fərdi olaraq qeydiyyatdan keçibsə, oradan heç nə almamalısınız;

• fişinq və ya fırıldaqçılıq saytına və ya zərərli reklam banerlərinə girmək cəhdini əngəlləyəcək təhlükəsizlik proqramı quraşdırmaq təhlükəsizlik üçün faydalıdır.

4
Kaspersky Lab şirkətinin loqotipi, arxiv şəkli

Kaspersky gələcəyin proqnozunu verir - hücumlar daha dağıdıcı olacaq

28
(Yenilənib 13:36 25.11.2020)
Ehtimallara görə, müxtəlif ölkələrin hökumətləri konkret bir qrupun bu və ya digər bir hücumda iştirakı barədə daha ciddi bəyanatlar verəcəklər.

BAKI, 25 noyabr — Sputnik. "Kaspersky" şirkətinin mütəxəssisləri 2021-ci ildə mürəkkəb kibertəhdid mənzərəsinin necə dəyişəcəyinə dair proqnozlarını açıqlayıb.

Sputnik Azərbayan şirkətin məlumatına istinadla xəbər verir ki, APT-qruplar tərəfindən digər təcavüzkarların qurban şəbəkəsinə sızmaq üçün resurs satınalmasını əsas və ən təhlükəli tendensiyalarından biri kimi göstəriblər.

Məsələn, 2020-ci ildə fidyə proqramlarının təcavüzkarların adi, yüksək dərəcədə ixtisaslaşdırılmamış zərərli proqramlardan istifadə edərək sistemdə möhkəmlənməsinə yol açan çox sayda hədəf hücumu qeydə alınıb. Əksər hallarda oğurlanmış hesab məlumatları satan Genesis kimi gizli onlayn mağazalarla onlar arasında əlaqə olduğu bildirilir. Mütəxəssislər təcavüzkarların mürəkkəb hədəf kampaniyaları üçün bu cür sxemlərdən istifadəyə davam edəcəklərinə inanır.

Şəbəkədə daha mürəkkəb kiber təhdidlərin quraşdırılmasının qarşısını almaq üçün təşkilatlara hədəfə alınmış hər bir kompyuterdəki bütün zərərli proqramı hərtərəfli yoxlamaq və cavab tədbirləri görmək tövsiyə olunur.

Əlavə olaraq, mütəxəssislər onların fikrincə gələn il üstünlük təşkil edəcək bir sıra tendensiyaları da qeyd ediblər.

Ehtimallara görə, müxtəlif ölkələrin hökumətləri konkret bir qrupun bu və ya digər bir hücumda iştirakı barədə daha ciddi bəyanatlar verəcəklər. Məxfiliyi aradan qaldırılmış alətlərin istifadəsi daha çətin olduğundan kiber silahlar barədə məlumatların dövlət qurumlarının rəsmi kanalları vasitəsilə açıqlanması kiber casusluq kampaniyaları ilə daha fəal şəkildə mübarizə aparmağa imkan verəcək.

Silikon Vadisi şirkətləri hesab məlumatlarının təhdidlərə açıq olmasına görə 2020-ci ildə məhkəmə iddiası ilə üzləşmiş Whatsappı nümunə götürəcək və sistem boşluğundan istifadə edən eksployt brokerlərini daha tez-tez məhkəməyə verəcəklər.

Həmçinin şəbəkə cihazlarına yönəlmiş hədəf hücumlarının sayı artacaq: qlobal məsafədən işləmə tendensiyası nəticəsində, təcavüzkarlar şəbəkə cihazlarının VPN şlüzləri kimi boşluqlarından istifadə etməyə yönələcək və vişinq (etibarlı mənbədən gəlmiş kimi görünən, əslində saxta olan elektron məktub, zəng, mesaj və s.) kimi sosial mühəndislik metodlarından istifadə edərək istifadəçi məlumatlarını toplayacaqlar.

Bundan əlavə fidiyə təhdidlərinin də artacağı qeyd edilir. Geniş potensial qurban kütləsinə malik təsadüfi, sistemsiz hücumları, təcavüzkar tərəfindən müəyyən bir təşkilatın məlumatlarını şifrələndiyi və ondan böyük məbləğdə fidyə tələb edildiyi hədəf hücumları əvəzləyəcək. Onlar bu cür əməliyyatlar üçün mürəkkəb, bahalı alətlər hazırlayacaqlar.

"Kaspersky" hesab edir ki, hücumlar daha dağıdıcı olacaq. Həyatımız getdikcə texnologiyadan və internet əlaqələrindən asılı olduğuna görə onların səthi də genişlənir.

Şirkəyətin proqnozuna görə, 5G texnologiyasındakı boşluqların istismarı da artacaq. O, nə qədər populyarlaşsa, təcavüzkarlar ondakı boşluqları daha aktiv şəkildə axtaracaqlar.

Bundan əlavə, mürəkkəb kiber kampaniyalar pandemiyadan qazanc götürməyə və onlardan hədəf sistemlərinə sızmaq üçün istifadə etməyə davam edəcək, çünki COVID-19 gələn il də qlobal səviyyədə insanların həyatını təsir edəcək.

"Dünya çox tez dəyişir və sabah nə baş verəcəyindən əmin olmaq mümkün deyil. Şahidi olduğumuz və təhdid mənzərəsinə təsir edən dəyişikliklərin miqdarı və mürəkkəbliyi müxtəlif ssenarilərə səbəb ola bilər. Dünyada bütün mürəkkəb kiber hücumları hərtərəfli qavrayacaq bir mütəxəssis qrupu yoxdur, amma əvvəlki təcrübəmizin də göstərdiyi kimi, bir çox mürəkkəb təhdidləri qabaqcadan görə və nəticədə onlara qarşı daha yaxşı hazırlaşa bilərik. Təcavüzkarların taktikalarını və metodlarını öyrənməyə, öyrəndiklərimizi bölüşməyə və aşkarlanan hədəf hücumlarının nəticələrini qiymətləndirməyə davam edəcəyik", - deyə "Kaspersky"nin Qlobal Təhdid Araşdırmaları və Təhlili Mərkəzi rəhbərinin müavini Sergey Novikov bildirib.

28
Teqlər:
kiberhücum, kiber, Silikon Vadisi, silikon, My Kaspersky, Kasperski Laboratoriyası, Kaspersky Safe Kids

Topçu Vüsal məsələsində son nöqtə qoyuldu - "Məqsədimiz..."

3
"Az-Granata" MMC-nin PR meneceri: "Bu şəkilin seçilməsində məqsəd Azərbaycan Ordusunun mərdliyini, cəsarətini nümayiş etdirmək idi".

Zülfiyyə Quluyeva, Sputnik Azərbaycan

BAKI, 30 noyabr — Sputnik. Vətən müharibəsinin qəhrəmanlarından olan topçu Vüsal Şahkərimovu məşhurlaşdıran fotonun spirtli içki şüşəsinin üzərinə vurulması sosial şəbəkələrdə birmənalı qarşılanmayıb. İctimaiyyətdə qəhrəman topçunun şəklinin spirtli içki şüşəsində əks olunması geniş narazılığa səbəb olub. Əsgərin atası İslam Şahkərimov bildirib ki, şərab istehsalçılarına şifahi şəkildə razılıq verib: "Bir az əvvəl həmin adamlar yenə mənə zəng etmişdilər. Dedilər ki, Vüsal özü bu məsələyə nə deyir, əsas odur. Mən də belə düşünürəm ki, razılıq verməklə səhv etmişəm. Görürəm ki, camaatdan da xeyli narazılıq var. Elə az əvvəl Vüsalla da danışdım. Dedi ki, fotomun içki şüşəsinin üstünə vurulmasına etiraz edirəm".

"Az-Granata" MMC-nin PR meneceri Ülvi Günəşli Sputnik Azərbaycan-a açıqlamasında bildirib ki, artıq topçu Vüsal Şahkərimovla bağlı məsələ bağlanıb: "Qeyd edim ki, üzərində topçu Vüsal Şahkərimovun şəkli olan spirtli içki istehsala verilməmişdi. Sadəcə olaraq bu barədə məlumat paylaşılmışdı. "Az-Granata" MMC Vüsalın valideyni ilə danışaraq həm şifahi, həmçinin də rəsmi razılığını almışdı. Sadəcə olaraq bu məsələdə ictimaiyyətin fikrini nəzərə aldıq. Həmçinin topçumuz özü də şəklinin spirtli içki şüşəsində olmasına razı olmayıb. Biz də bütün bunları nəzərə alaraq bu məsələni qapatdıq".

Ü.Günəşli iddia edir ki, əslində bu məsələdə şirkətin məqsədi tamamilə başqa olub: "Bizim fikrimiz ictimaiyyətə düzgün çatdırılmadı. Şirkətimiz Vüsalın şəklinin vurulduğu kitabların çapına da sponsorluq etmək niyyətində idi. Bizim qədim tarixi adları daşıyan məhsullarımız var. Həmin məhsullar gələn qonaqlara təqdim edildikdə tariximizlə bağlı məlumatlar da verilir. Bizim üzərində topçu olan spirtli içkini bir dəfə istehsal etmək fikrimiz vardı. Bu şəkilin seçilməsində məqsəd Azərbaycan Ordusunun mərdliyini, cəsarətini nümayiş etdirmək idi".

Qeyd edək ki, əslən Xaçmaz rayonundan olan 19 yaşlı topçu Vüsal Şahkərimov Vətən müharibəsinin minlərlə qəhrəmanından biridir.

3