Mayk Tayson, arxiv şəkli

Tayson 25 milyonluq müqavilədən imtina elədi

16
(Yenilənib 13:07 23.03.2021)
Boksçular arasında ilk görüş 1996-cı ildə olub. O vaxt Holifild qələbə qazanmışdı. Bir il sonra revanş zamanı Tayson rəqibinin qulağını dişləyib qoparmışdı

BAKI, 24 mart - Sputnik. Boks üzrə keçmiş dünya çempionu Evander Holifildin meneceri Kris Lourens bildirib ki, sabiq mütləq dünya çempionu Mayk Tayson görüş üçün nəzərdə tutulan 25 milyon dollardan imtina edib.

Sputnik Azərbaycan MMA Fighting-ə istinadən bildirir ki, Taysonun köməkçiləri imtinanın səbəbini açıqlamayıblar. 

"Elə bilirdik ki, bu müqavilə artıq imzalanmağa hazırdır. Ancaq Taysonun adamları təkliflərimizi geri çevirdilər. Biz danışıqları vicdanla aparırdıq. Belə görünür ki, vaxt itirmişik", - Lourens deyib. 

Boksçular arasında ilk görüş 1996-cı ildə olub. O vaxt Holifild qələbə qazanmışdı. Bir il sonra revanş zamanı Tayson rəqibinin qulağını dişləyib qoparmışdı. Döyüş dayandırılmış, Taysonu diskvalifikasiya edərək 3 milyon dollar cərimələmişdilər.

Tayson peşəkar karyerasında 58 döyüş keçirmiş, bunların 50-də qələbə qazanmışdı (44-nü nokautla). Mayk iki dəfə uduzub, iki görüşü isə baş tutmamış elan olunub. Ötən ilin noyabrında Tayson yarımağır çəkidə keçmiş mütləq çempion bala Roy Consonla döyüş keçirmişdi. Görüş heç-heçə bitmişdi. 

Holifild isə karyerası ərzində 44 qələbə (29-u nokautla) qazanıb, on dəfə uduzub, iki dəfə heç-heçə edib. Bir oyunu baş tutmamış sayılıb. 2011-ci ilin mayından peşəkar boksda çıxış etməyib.

16
Teqlər:
müqavilə, imtina, milyon dollar, Mayk Tayson
Məhəmməd Salah

Ronaldu, Neymar Salah Ağdam Füzulidə oynamağa dəvət alıblar - VİDEO

29
(Yenilənib 21:00 16.04.2021)
Ağdamın "Qarabağ" klubunun uşaqlardan ibarət komandasının üzvləri Uğur Qurbanlı və Raul Hüseynli dünya futbol ulduzlarından cavab gözləyirlər.

BAKI, 16 aprel — Sputnik, Teymur Tuşiyev. Ağdamın "Qarabağ" klubunun uşaqlardan ibarət komandasının üzvləri dünya futbol ulduzları Kriştianu Ronaldu, Neymar və Mohamməd Salahı Azərbaycanın işğaldan azad olunmuş Ağdam və Füzuli rayonlarında oynamağa dəvət ediblər.

Sputnik Azərbaycan xəbər verir ki, uşaqlardan ibarət U-11 komandasının kapitanı Uğur Qurbanlı və U-10 oyunçusu Raul Hüseynlinin iştirakı ilə çəkilmiş videoçarxda yeniyetmələr öz kumirlərini – Ronaldu (Yuventus), Neymar (PSJ) və Salahı (Liverpul) əslən olduqları Ağdam və Füzuliyə dəvət etmələri əks olunur. Həmin çarx Mediaturk YouTube kanalında yayımlanıb. Hər iki yeniyetmə səbirsizliklə dünya ulduzlarından cavab gözlədiklərini bildirib.

Qeyd edək ki, Ağdamın "Qarabağ" klubu öz uşaq futbolu akademiyasına oyunçular seçməkdə davam edir. Hazırda 2009-2011-ci il təvəllüdlü uşaqların seçimi elan olunub. Seçim Bakıda, Tofiq Bəhramov adına respublika stadionunda keçiriləcək. Seçimdə iştirak etmək istəyənlər klubun rəsmi saytı vasitəsilə ərizə ilə müraciət etməlidirlər.

29
Zelim Kotsoyev, arxiv şəkli

Zelim Kotsoyev: “Azərbaycan vətəndaşlığı almaq istəyirəm, qız axtarıram”

19
(Yenilənib 01:16 15.04.2021)
“Böyük dəbilqə” seriyasından olan turnirin qalibi Antalyadakı uğurundan danışıb, Olimpiya Oyunları və şəxsi həyatı ilə bağlı planlarını bölüşüb.

BAKI, 15 aprel – Sputnik, Teymur Tuşiyev. Türkiyənin Antalya şəhərində “Böyük dəbilqə” seriyasından olan turnirdə qalibiyyəti Azərbaycanın 22 yaşlı osetin əsilli cüdoçusu Zelim Kotsoyev üçün hələlik ən böyük nailiyyətidir. Turnirdə o, Yaponiyadan olan dünya çempionu Aaron Volfa qalib gəlib.

Sputnik Azərbaycan-a müsahibəsində Kotsoyev Türkiyədəki qələbəsindən, azərbaycanlı cüdoçu Elmar Qasımovla rəqabətindən, Tokiodakı Olimpiya Oyunlarından və Azərbaycan vətəndaşlığı almaq istəyindən danışıb.

- Bu sizin “Böyük dəbilqə” seriyasından olan turnirdə ilk qələbənizdir. Çox dəyərlidir, yəqin.  

- Doğrudan, bu, mənim “Böyük dəbilqə”də ilk qələbəm idi. Əvvəllər ikinci-üçüncü yerləri tuturdum, həmişə nəsə çatmırdı. Qran-Pri də qazanmışam, amma “Böyük dəbilqə”də ilk dəfə uddum.

Ola bilər ki, əvvəllər hansısa fəndləri tam məşq etməmişəm, ya da cavan olmuşam. Bu dəfə isə finaldan öncə özümə dedim ki, artıq uduzmaq olmaz, buradan qızıl medalla dönməliyəm.

- Finaldakı rəqibiniz də güclü idi. Yaponiyanı təmsil edən dünya çempionu...

- Bəli, Aaron Volf çox güclü rəqibdir, iki dəfə ona uduzmuşam. Ancaq mən bu dəfə yaxşı hazırlaşmışdım, məşqçilərim məni görüşə əla kökləmişdilər.

Prinsipcə, bütün rəqiblərim titullu olublar. Məsələn, ilk rəqibim Olimpiya Oyunlarının mükafatçısı, Fransadan olan Avropa çempionu  Sirill Mare idi. Həmin görüşün vaxtından əvvəl bitməsinə rəğmən, ağır idi.

Sonra güclü xorvat Komriç, daha sonra elə də rahat olmayan avstraliyalı Taqaki vardı. Hesab edirəm ki, psixoloji cəhətdən daha yaxşı köklənənlər qələbə qazanırdılar.

Bu dəfə, hər şeydən əlavə, Daşkənddə təlim-məşq toplanışında yaxşı işlədik, nəticəsini də gördük.

- Azərbaycan yığmasında 100 kq-dək çəkidə uzun müddət 2016-cı il Olimpiadasının gümüş mükafatçısı Elmar Qasımov lider idi. İndi siz onu “kölgədə qoydunuz”.

- Elmarla münasibətlərimiz yaxşıdır, o, yaxşı oğlandır, daim ünsiyyətdəyik. Tatamidən qıraqda  qardaşıq. Ancaq tatamidə rəqibik. Bizimki sırf idman rəqabətidir, bu, hər ikimizi daha güclü edir.

Азербайджанский дзюдоист Зелим Коцоев, фото из архива
Azərbaycan cüdoçusu Zelim Kotsoyev

Yəqin, həmin gün bəxtim gətirib. Son vaxtlar Elmar əvvəlki kimi uğurla çıxış etmir. Bəlkə, yaşı öz sözünü deyir, ya da psixoloji cəhətdən yorğunluq var. Baxmayaraq ki, məşqlərdə çox çalışır, son zamanlar nəsə bəxti gətirmir.

- Yəni sizi artıq Azərbaycan yığmasının 100 kq-dək çəkidə birinci nömrəsi adlandırmaq olar?

- Antalyadakı turnirdən sonra bizim aramızdakı fərq min xala qədər artdı. Biz çoxdan Olimpiya Oyunlarına düşmə zonasındayıq, ancaq orada ikimizdən birimiz çıxış edə bilər.

Hələ iki il əvvəl onunla sözləşmişdik: oturub hansı turnirlərdə çıxış edəcəyimizi yazdıq. Razılaşdıq ki, reytinqdə kim yuxarıda olsa, Olimpiadaya da o gedəcək. Elmardan min xal qabağa düşdüyümə görə demək olar ki, Tokioya mən gedəcəm.

- O zaman artıq Olimpiadaya köklənirsiniz?

- Hə, bütün fikrim-zikrim Tokiodadır, özümü daim Olimpiya Oyunlarına kökləyirəm. Bu, uşaqlıq arzumdur, uşaqlıqdan da ona doğru gedirəm. Tokioya ancaq qızıl medal ardınca uçacam, Oyunlaradək bütün turnirlər – balaca addımlardır.

- Antalyada Yaponiya təmsilçisi Volfa qalib gəldiniz, Tokioda isə yerli cüdoçular bütün qızıl medallara sahiblənməyə çalışacaqlar.

- Onlar, yəqin, indi məni öyrənməyə, mənə qarşı hazırlaşmağa, köklənməyə başlayacaqlar. Mənim istəyim daha güclüdür, hələ artıracam da.

Deyə bilərəm ki, Tokioya gedib hamını mat qoymaq üçün mənim yaxşılaşdırılmış versiyam hazırdır. Üstəlik, yaşım da bunun üçün idealdır, özüm də hiss edirəm ki, artıq mənim vaxtım yetişib.

Bizim məşqçilər korpusumuz güclənib, yeni fəndlər hazırlayır, çox işləyirik. Ancaq irəliyədir hədəfimiz.

- Milliyyətcə osetinsiniz, Azərbaycan yığmasına necə düşdünüz?

- 2015-ci ildə Ukrayna millisinin kadetlər qrupunun tərkibində gənclər arasında Avropa çempionatını qazandım. Sonra isə Azərbaycan yığmasına gəldim. Burada mənim yerlilərim də çıxış edirdilər. Məsələn, dostum Xetaq Qazyumov (sərbəst güləş üzrə üçqat Olimpiya mükafatçısı – red.) Azərbaycanın necə gözəl ölkə olduğu, zəhmətin necə qiymətləndirilməsi və burada çox gözəl insanların yaşadığı haqda danışırdı. O qədər Azərbaycanı təriflədi ki, 2015-ci ildə Azərbaycana köçməyə qərar verdim, indiyədək də bu qərarımdan razıyam.

- Sizi Azərbaycan idmanında osetin ənənələrinin davamçısı adlandırmaq olar.

- (gülümsəyir)  Birmənalı şəkildə hə. Nümunə götürəcəyim adamlar var. Xetaqın uğurlarını davam etdirməyə çalışacam. Əsas odur ki, məni bu ölkədə sevirlər, mən də onu sevirəm. Burada çox adam mənə inanır, onların ümidlərini qırmaq istəmirəm. İstəyirəm ki, onlar mənim qələbələrimə sevinsinlər, Azərbaycanın bayrağını qaldıraraq bu ölkəni dünyada tanıtmağı arzulayıram.

- Azərbaycanda gəzməyi xoşladığınız yerlər var?

- Həftədə bir neçə dəfə Bakı bulvarını gəzirəm. Buranı çox sevirəm, bulvarda gəzintidən hədsiz zövq alıram. Torqovıya çıxışa qədər gəzirəm. Axşamlar ora lap əla olur, rahat hiss edirsən. Köhnə şəhəri gəzməyi də xoşlayıram.

- Xetaq Qazyumov karyerasını bitirdikddən sonra vətəninə qayıtdı. Onun kimi edəcəksiniz?

- Son iki ildə daim Azərbaycandayam. Heç evimizə də getmirəm. Ailəmi də Bakıya gətirmək fikrindəyəm, onları buna yavaş-yavaş hazırlayıram. Burada qalıb vətəndaşlıq almaq istəyirəm. Bura xoşuma gəlir, bu ölkəni sevirəm.

- Evli deyilsiniz?

- Hələ evlənməmişəm. Qız axtarıram.

- Azərbaycanlı qızlar arasında?  

- Hə, hə (gülümsəyir). Azərbaycan mentaliteti mənə yaxındır. Ona görə də fikirləşirəm ki, yerli qızlardan biri ilə evlənim. Görək, necə alınacaq. Hələ heç kimi bəyənə bilməmişəm, bütün vaxtımı idmana, məşqlərə sərf edirəm. Olimpiadadan sonra bu barədə ciddi fikirləşəcəm.

- Koronavirusa yoluxmuşdunuz, necə keçirdiniz xəstəliyi?

- Çox pis. Ağciyərlərimin 55%-i zədələnmişdi. Bir ay xəstəxanada oksigen balonu ilə yaşadım, iki həftədən çox qızdırmam oldu, qırx dərəcəyə yaxın. Həddən artıq arıqladım, uzun müddət də özümə gəlməyə çalışdım. Uşaq kimi təzədən yeriməyi öyrəndim. Allaha şükür, qayıda bildim, “Böyük dəbilqə”də də qazandım.

19
Teqlər:
müsahibə, idman, cüdo
Qandal, arxiv şəkli

Keçmiş komitə sədri Nazim İbrahimovun qardaşı həbs olundu

0
Hazırda Sahib İbrahimovun digər qanunsuz hərəkətləri barədə daxil olmuş çoxsaylı müraciətlər əsasında intensiv istintaq hərəkətləri aparılır.

BAKI, 17 aprel - Sputnik. Bakı şəhəri Xətai rayon məhkəməsinin "STS" şirkəti, "Sahil-D Kompani" MMC-nin təsisçisi, dələduzluq faktlarına görə əvvəllər məhkum edilmiş İbrahimov Sahib Hüseyn oğlunun yenidən oxşar xarakterli cinayət əməlləri törətməsinə dair xüsusi qərardadı əsasında 2021-ci ilin yanvar ayından başlayaraq Baş prokuror yanında Korrupsiyaya qarşı Mübarizə Baş İdarəsində araşdırma aparılmaqla Azərbaycan Respublikası Cinayət Məcəlləsinin müvafiq maddələri ilə cinayət işi başlanıb.

Bu barədə Azərbaycan Respublikası Baş Prokurorluğunun Mətbuat xidmətindən məlumat verilib.

Eyni zamanda, həmin özəl təşkilatların vəzifəli şəxsləri barəsində kommersiya bankından daxil olmuş materiallar da qeyd edilən cinayət işinə əlavə edilməklə iş üzrə zəruri istintaq hərəkətləri həyata keçirilmişdir.

Cinayət işi üzrə aparılmış istintaq-əməliyyat tədbirləri ilə "STS" şirkəti və "Sahil-D Kompani" MMC-nin təsisçisi Sahib İbrahimovun qeyd edilən təşkilatların digər vəzifəli şəxsləri ilə qabaqcadan əlbir olaraq verdiyi tapşırıqlar əsasında əvvəlcədən vəd edilmiş əmlakı alıcıya vermək niyyəti olmadan tikintisi aparılan binalarda qeyri-yaşayış sahələrinin satılması görüntüsünü yaratmaq məqsədi ilə yalan vəd verərək saxta sənədlərin tərtib edilməsi yolu ilə ayrı-ayrı vaxtlarda vətəndaşdan ümumilikdə 1 milyon 735 min manat məbləğində pul vəsaitini alaraq şəxsi ehtiyaclarına sərf etməsinə, rəsmi sənədlərə bilə-bilə yalan məlumatları daxil etməklə vəzifə saxtakarlığı törətməsinə əsaslı şübhələr müəyyən edilmişdir.

Bundan başqa, Sahib İbrahimovun xidməti vəzifələrinin icrası ilə əlaqədar özü üçün qanunsuz üstünlük əldə etmək məqsədilə fərdi sahibkar kimi tikinti işlərinin aparılması üçün xərclərin ödənilməsi adı ilə kommersiya bankından 300 min manat məbləğində pul vəsaitini ələ keçirib şəxsi ehtiyaclarına sərf edərək təkrarən dələduzluq etməsinə əsaslı şübhələr müəyyən edilmişdir.

İş üzrə toplanmış kifayət qədər sübutlar əsasında, 17 aprel 2021-ci il tarixdə Sahib İbrahimova Cinayət Məcəlləsinin 178.3.2 (külli miqdarda ziyan vurmaqla dələduzluq), 308.2 (ağır nəticələrə səbəb olmaqla vəzifə səlahiyyətlərindən sui-istifadə etmə) və 313-cü (vəzifə saxtakarlığı) maddələri ilə ittiham elan edilmiş, sonuncu istintaq orqanının çağırışlarına gəlmədiyindən və müxtəlif üsullarla ibtidai istintaqın normal gedişinə mane olduğundan məhkəmənin qərarı ilə barəsində həbs qətimkan tədbiri seçilmişdir.

Hazırda Sahib İbrahimovun digər qanunsuz hərəkətləri barədə daxil olmuş çoxsaylı müraciətlər əsasında intensiv istintaq hərəkətləri aparılır.

İstintaqın gedişatı və nəticəsi barədə ictimaiyyətə ətraflı məlumat veriləcək.

Qeyd edək ki, Sahib İbrahimov Diasporla İş üzrə Dövlət Komitəsinin sabiq sədri Nazim İbrahimovun qardaşıdır. Sahib İbrahimov bir müddət ATV şirkətinin prezidenti olub. 

0