UEFA Millətlər Liqasının qrup mərhələsi çərçivəsində Monteneqro - Azərbaycan oyunu

Azərbaycan millisi Monteneqroya qələbə qazandırdı

33
(Yenilənib 23:05 10.10.2020)
Podqoritsa şəhər stadionunda keçirilmiş qarşılaşma meydan sahiblərinin qələbəsi ilə yekunlaşıb - 1:0.

BAKI, 10 oktyabr — Sputnik. Azərbaycan yığması UEFA Millətlər Liqasında IV tur matçına çıxıb.

Sputnik Azərbaycan Report-a istinadla xəbər verir ki, millimizin rəqibi Monteneqro millisi olub. Podqoritsa şəhər stadionunda keçirilmiş qarşılaşma meydan sahiblərinin qələbəsi ilə yekunlaşıb - 1:0. Yeganə qolu kapitan Stevan Yovetiç 9-cu dəqiqədə vurub.

Azərbaycan yığması bu oyuna da 5 müdafiəçi ilə çıxıb. Qapıçı Emil Balayevin önündə soldan sağa doğru Abbas Hüseynov, Anton Krivotsyuk, Bədavi Hüseynov, Bəhlul Mustafazadə və kapitan Maksim Medvedev yer alıb.

Yarımmüdafiədə Qara Qarayev, Elvin Camalov və Namik Ələskərov qərarlaşıbsa, debüt edən mərkəz hücumçusu Əli Qurbaniyə onun "Sumqayıt"dakı komanda yoldaşı Rəhim Sadıxov dəstək olub.

Görüş kifayət qədər sönük məcrada keçib. Xüsusən passiv təsir bağışlayan Azərbaycan millisi qapısında erkən qol görüb. 9-cu dəqiqədə Bəhlul Mustafazədə riskə yol vermədən topu qapı xəttindən çıxarıb. Künc zərbəsindən sonra Yovetiç qapı qarşısına qaldırılmış topa başla dəqiq zərbə endirib.

Qonaq komanda ilk yarıda rəqib qapısı qarşısında cəmi iki təhlükəli vəziyyət yarada bilib. İlk epizodda Medvedevin topu vurarkən, ayağından zərbə alaraq, zədələnib. Epizodun davamında topu qəbul edən Qara Qarayev onu qapının yanından vurub. Ən real qol epizodunu isə 40-cı dəqiqədə cinah asmasından sonra Əli Qurbani boşa verib. Qurbaninin baş zərbəsi qapıdan aralı keçib.

İkinci hissəyə baş məşqçi Canni De Byazi əvəzləmə ilə başlayıb. Medvedev kapitan sarğısını Qarayevə, yerini isə Azər Salahlıya verib. 60-cı dəqiqədə isə daha 3 əvəzləmə gerçəkləşib. Qurbanini Ramil Şeydayev, Sadıxovu Rəhman Hacıyev, Qarayevi isə Coşqun Diniyev əvəzləyib. Kapitan sarğısı isə ilk yarıda sarı vərəqə alaraq, Kiprlə qarşıdakı görüş üçün cəzalı duruma düşən Bədavi Hüseynova keçib.

Bu dəyişikliklərdən sonra Azərbaycan millisi qısa müddətli də olsa, fəallaşıb və sürətli hücumlara cəhdlər edib. Lakin qısa müddət sonra Monteneqro yığması oyuna nəzarəti özünə qaytarıb. 71-ci dəqiqədə cəmi 30 saniyə əvvəl meydana daxil olmuş "Zirə"nin sabiq legioneri İqor İvanoviç əvvəlcə Mustafazadənin müdafiədə, sonra isə Balayevin qapıda səhvlərindən sonra fərqlənib.

Bununla da qonaq komandanın müqavimət qüvvəsi tükənib. Meydan sahibləri isə ardıcıl 3-cü matçında qol buraxmadan qələbə qazanaraq, xalını 9-a çatdırıb və inamla liderliyini davam etdirib. C Liqasında 1-ci qrupun digər matçında isə Lüksemburq Kiprə eyni hesabla qalib gələrək, 6 xalla ikinci pillədə qərarlaşıb. Azərbaycan 3 xalla 3-cü yerdə gedirsə, xalı olmayan Kipr sonuncudur.

33
Güləş, arxiv şəkli

Fransa Güləş Federasiyası loqoda bayrağımızın olmamasına görə üzr istədi

23
(Yenilənib 11:47 14.01.2021)
Azərbaycan Güləş Federasiyasının mətbuat katibi Sərxan Musayev səsləndirilən narazılıqlara aydınlıq gətirib.

BAKI, 14 yanvar — Sputnik. Fransanın Nitsa şəhərində keçiriləcək güləş üzrə Qran-pri turnirinin təşkilatçıları Azərbaycan bayrağının yarışın loqosunda yer almamasına görə üzr istəyib.

Bu barədə "Report"a Azərbaycan Güləş Federasiyasının Mətbuat katibi Sərxan Musalı məlumat verib.

O bildirib ki, məsələ ilə bağlı dərhal Fransa Güləş Federasiyası ilə əlaqə saxlayıblar: "Onlar qeyd etdilər ki, üzrlü hesab edin, bu, daha əvvəl hazırlanmış loqodur və burada bəzi yarış iştirakçılarının bayraqları yoxdur. Loqoda daha əvvəl bu yarışda olan ölkələrin bayraqları həkk olunub. Buna görə nəzərə alınmayıb. Loqoda elə ölkələrin bayraqları var ki, bu yarışda iştirak etmirlər. Həmin loqo 2020-ci ildə də istifadə edilib. Sadəcə, diqqətsizlik olub və bizə üzürxahlıq etdilər. Təşkilatçılıqla bağlı problem belə ola bilərdi ki, yarış nəkanında bayrağımız olmazdı. Amma bununla bağlı problem olmayacaq".

Federasiya rəsmisi təşkilatçılar tərəfindən heç bir soyuq münasibət görmədiklərini sözlərinə əlavə edib: "Mənfi nəsə hiss etməmişik. Ümumiyyətlə, problem olsaydı, bizim komandalara viza verməz, iştiraklarına problem yaradardılar. Arxivə də nəzər saldıq, Dünya Güləş Birliyinin saytında 2014-cü ildən sonrakı yarışları görmək mümkündür. 2019-cu ilə qədər bu yarış Qran-pri statusu almayıb. 2019, 2020 və 2021-ci illərdə artıq Qran-pri statusu ilə təşkil edilib. Yəni, həmin vaxta qədər ciddi yarış hesab edilmirdi. 2019-cu ilə qədər yalnız qadın və sərbəst güləşçilər arasında keçirilib. 2020 və 2021-ci illərdə isə güləşin hər üç növü proqrama daxil edilib. Biz 2020-ci ildə ilk dəfə bu yarışa qatılmışıq. Həmin vaxt yunan-Roma güləşi üzrə yığma komanda iştirak edib. Bu il isə həm yunan-Roma, həm də sərbəst güləşçilərimiz mübarizə aparacaq. Artıq təşkilatçılar bu çatışmazlığı aradan qaldırıblar və loqoya Azərbaycan bayrağını da yerləşdiriblər".

Qeyd edək ki, Qran-pri 15 - 17 yanvarda olacaq.

23
Bakı Olimpiya Stadionu, arxiv şəkli

"UEFA-2020" ilə bağlı vergidən azadolmanın müddəti artırıldı

10
Qeyd edək ki, Azərbaycan həmçinin, 2020-ci ildə futbol üzrə Avropa çempionatının oyunlarına da ev sahibliyi etməli idi.

BAKI, 12 yanvar - Sputnik. Prezident İlham Əliyev Vergi Məcəlləsinə və “Gömrük tarifi haqqında” qanuna dəyişiklikləri təsdiqləyib.

Sputnik Azərbaycan xəbər verir ki, dəyişikliklər "UEFA-2020" futbol çempionatı ilə bağlı vergidən azadolmanın müddətinin daha 1 il uzadılmasını nəzərdə tutur.

Sənəddə deyilir ki, Avropa Futbol Assosiasiyaları Birliyinin (UEFA) İcraiyyə Komitəsi ötən il Avropa Liqasının final oyununun Bakı Olimpiya Stadionunda keçirilməsi haqqında qərar qəbul edilib.

Qeyd edək ki, Azərbaycan həmçinin, 2020-ci ildə futbol üzrə Avropa çempionatının oyunlarına da ev sahibliyi etməli idi. Hazırda bütün dünyada yeni növ koronavirusun (COVID-19) yayılması ictimai-siyasi, sosial-iqtisadi həyatın bütün sahələrinə təsir etdiyi kimi, idman sahəsindən də yan keçməyib, o cümlədən böyük idman oyunlarının keçirilməsi təxirə salınıb.

Bildirilib ki, bu səbəbdən futbol üzrə Avropa çempionatının 2020-ci ildə keçirilməsi nəzərdə tutulan oyunlarının 2021-ci ildə Bakıda keçirilməsi nəzərdə tutulur. Bununla əlaqədar, “Vergi Məcəlləsində dəyişiklik edilməsi haqqında” 9 aprel 2019-cu il tarixli və “Gömrük tarifi haqqında” qanunda dəyişiklik edilməsi barədə” 9 aprel 2019-cu il tarixli qanunların qüvvədə olma müddətinin 1 avqust 2021-ci il tarixinə qədər uzadılması nəzərdə tutulur.

Həmin qanunlarla Azərbaycanda keçirilən UEFA 2019 Avropa Liqasının final oyunu və UEFA 2020 Futbol çempionatının oyunları ilə əlaqədar bir çox vergi növləri üzrə - gəlir vergisindən, mənfəət vergisindən, ƏDV-dən, aksizli mallara görə aksizdən, habelə gömrük rüsumlarından azadolmalar nəzərdə tutulub.

10
Bakıda günəşli hava, arxiv şəkli

Bu hava axırımıza çıxacaq - ekspertlərdən bədbin proqnoz

0
(Yenilənib 22:17 18.01.2021)
Umayra Tağıyevanın sözlərinə görə, soyuq hava cərəyanları ölkəyə daxil olmur, buna görə də havanın temperaturu çoxillik normadan 2 dərəcəyədək yüksəkdir.

İradə Cəlilova, Sputnik Azərbaycan

BAKI, 18 yanvar — Sputnik. "Yanvar ayının ilk günlərindən hava çox xoş keçir, mülayimdir. Külək müşahidə olunmur". Bu barədə Milli Hidrometeorologiya Xidmətinin rəisi Umayra Tağıyeva danışıb. O qeyd edib ki, soyuq hava cərəyanları ölkəyə daxil olmur, buna görə də havanın temperaturu çoxillik normadan 2 dərəcəyədək yüksəkdir.

Onun sözlərinə görə, son onilliklərdə iqlimdə istiləşmə gedir.

Belə ki, istiləşmə ölkə ərazisində qeyri-bərabər şəkildə paylanır. Bəzi bölgələrdə göstəricilər daha yüksəkdir, məsələn, 1. 4 dərəcə. Bəzi bölgələrdə 0.8 dərəcə, amma istiləşmə prosesi müşahidə olunur.

İqlimin istiləşməsi nəticəsində qış aylarında şaxtalı günlərin sayı əhəmiyyətli dərəcədə azalıb: "Azalma varsa, yağıntılar artıq qar şəklində deyil, yağış şəklində düşür. Yağıntıların da miqdarında azalma qeydə alınır. Bu problem nəinki Azərbaycanda, bir çox ölkələrdə baş verir. Bu da iqlim dəyişmələrinin təzahürləridir".

Ekoloq Vaqif Əliyevin Sputnik Azərbaycan-a açıqlamasında bildirib ki, iqlim dəyişmələri landşaft qurşaqlarının sərhədlərinin yuxarı irəliləməsinə, isti və mülayim qurşaqların sahəsinin genişlənməsinə, soyuq qurşaqlarının sahəsinin isə azalmasına gətirib çıxarır.

Mütəxəssis qeyd edib ki, dünya üzrə iqlim dəyişmələrinə nəzarət üçün Kiota protokolunun müddəti bitsə də, hələ ki, arzu edilən nəticə əldə edilməyib: "Halhazırda bu protokolun ardınca İqlim Dəyişmələrinə dair Paris çərçivə Konvensiyası bu işi davam etdirir. Bu konvensiyada hər bir ölkə istixana qazlarının emissiyasını azaltmaq üzrə öhtəçilik götürür. Azərbaycan da baza ili kimi 1990 ili seçərək 2030 ilədək istixana effektli qazların emissiyasını 35% azaltmağı hədəf götürüb"

Onun sözlərinə görə, iqlim dəyişmələri havaların istiləşməsi ilə nəticələnir Bu səbəbdən adaptasiya tədbirlərinin görülməsi çox önəmlidir.

İqlim dəyişikliklərinin yaratdığı problemləriu aradan qaldırmaq üçün quraqlığa davamlı yeni bitki növlərinin becərilməsi, əkin sahələri və su hövzələri boyunca su qoruyucu və tarla qoruyucu zolaqların salınması, suvarmada damcılı və yağış suvarma texnologiyalarının tətbiqi, su anbarlarının tikilməsi, sel və daşqınlara qarşı qoruyucu bəndlərin tikilməsi və s. qoruyucu tədbirər görülməlidir.

V. Əliyev vurğulayıb ki, iqlim dəyişikliyi illərlə baş verən bir prosesdir. Məsələn illərlə qar yağmır, külək olmur və birdən qar yağmağa, külək əsməyə başlayır: " Məsələn Abşeron yarımadasında külək, günəş, rütubət var. Burada günəşli günlərin sayı daha azdır və quru hava şəraiti daha çox olur."

Həkim terapevt Xatirə Əhmədovanın sözlərinə görə, havaların anomal keçməsi müxtəlif xəstəliklərin yayılmasına, xüsusilə də soyuqdəyməz adlanan hala gətirib çıxarır.

Buna səbəb isə insanların bədən tempraturlarını tənzimləyə bilməmələri ilə əlaqədardır.

Onun sözlərinə görə, bədən tempraturu tez-tez dəyişdiyinə görə, immunitet zəifləyir. İmmunitet zəiflədiyi zaman xəstəliklərə yoluxma asanlaşır.

" Belə havalarda insan özünü halsız, yuxusuz, iştahsız hiss edir. Bu uzun müddət davam edəndə immunitet zəifləyir və xəstəliyə tutulma riski artır"-deyən həkim belə havalarda havaya uyğun geyinməyi məsləhət görür.

Həkim əlavə edib ki, pandemiyada dönəmi olduğu üçün insanlar sağlamlıqları ilə daha diqqətli davranmalıdır.

"Qidalanmaya, geyim tərzinə xüsusi diqqət yetirilməlidir. Qalın və ya nazik geyinmək olmaz. Özünüzü havaya uyğunlaşdırın. Qidalara gəldikdə isə, vitaminlərlə zəngin qidalara meyvə-tərəvəzə üstünlük verin. Məsələn qaraciyər, yumurta, balıq, banan, portağal və s. qidalara rasionunuzda daha çox yer ayırın.

Mütəxəssislərə görə, anomal hava şəraitində daha çox tərləmədən qorunmaq lazımdır. Çünki bədən tərli ikən, soyuqlama daha tez baş verir.

0