Futbol üzrə Avropa Liqası çərçivəsində keçirilən Sevilya - Qarabağ matçı

Mütəxəssislər "Qarabağ"ı dəyərləndirdilər: "Taleyimiz təkcə öz əlimizdə deyil"

31
(Yenilənib 16:30 28.11.2019)
"Qarabağ"ın bu qarşılaşmadan xalla ayrılması "Sevilya"nın oyuna barmaqarası münasibəti fonunda mümkün olar

Kamal Almuradlı, Sputnik Azərbaycan

BAKI, 28 noyabr — Sputnik. Bu gün Avropa Liqasının qrup mərhələsinin 5-ci turunda "Qarabağ" İspaniyada "Sevilya" klubu ilə qarşılaşacaq. Sputnik Azərbaycan xəbər verir ki, Qurban Qurbanovun komandası üçün vacib qarşılaşma 00:00-da start götürəcək.

Sputnik Azərbaycan azarkeşlərin son ümid oyunu öncəsi mütəxəssislərin fikrini öyrənib.

İlkin Xəlilov (ATV-nin idman aparıcısı, redaktor): "Qarabağ"ın qarşısında "davam ya tamam" sualının qoyulduğu həlledici oyunlardan biridir. Məğlubiyyət və APOEL-in Lüksemburqda mümkün qələbəsi bizim üçün pley-off xəyallarının bitməsi deməkdir. Ona görə də, "Qarabağ"lı futbolçuların bu oyuna bir savaş kimi çıxacağını düşünürəm. "Qarabağ" öz-özünü belə çətin vəziyyətə saldı, indi də özü "məngənə"dən çıxmalıdır. Məncə, axşamkı matç bir az da bəxtimiz gətirərsə, heç-heçə bitəcək”.

Natiq Muxtarlı (İdman jurnalisti): "Sevilya" ilə qarşılaşmada "Qarabağ"dan asılı olan heç nə yoxdur. Səviyyə fərqi o qədər aşkardır ki, "Qarabağ"dan oyun planında nəsə gözləmək yersizdir. Bu qarşılaşmanın nəticəsi "Sevilya"nın oyuna münasibətindən asılıdır. Çərçivəni ispanlar yaradacaqlar. "Qarabağ" ispanların imkan yaradacaqları çərçivə daxilində oynayacaq, özü nəyisə diktə edə bilməyəcək. "Qarabağ"ın bu qarşılaşmadan xalla ayrılması "Sevilya"nın oyuna barmaqarası münasibəti fonunda mümkün olar. Bu səviyyəli komandalarda "ikinci heyət" anlayışı olmur. Belə klublarda ehtiyatda qalan futbolçu meydanda olandan zəif deyil. Və özünü göstərmək üçün məqam axtarır. Bütün bu amilləri nəzərə alaraq, "Qarabağ"ın "Sevilya" qarşında heç bir şansının olmadığını düşünürəm".

Ramiz Mirzəzadə (İdman Azərbaycan, şərhçi): “Bu il APOEL ilə 4 dəfə qarşılaşmaq imkanı olan “Qarabağ” bu rəqiblə bacarmadı. İndi çətin Sevilya səfərindən ən azı xalla qayıtmaq lazımdır. Ramon Sançes Pisxuanda bunu bacarsaq, sonuncu turda da ümidlərimiz davam edəcək. Biz həm də "Dudelanj" komandasının da APOEL ilə oyundan qələbə ilə ayrılmasını arzulamalıyıq. Yəni bax belə bir qarışıq durum yaranıb. 

Taleyimiz təkcə öz əlimizdə deyil. Amma razılaşaq ki, artıq uzun müddətdir Avroliqaya rahatlıqla vəsiqə qazanan Qarabağ üçün ən əlverişli qrup bu mövsümkü idi. Əgər təmsilçimiz bu qrupdan çıxa bilməsə günahı yalnız özündə axtarmalı olacaq. İnanaq və ümid edək ki, Qarabağ Sevilya səfərində uğurlu nəticə qazanaraq bütün azarkeşləri sevindirəcək”.

Sənan Şəfizadə (ATV-nin idman aparıcısı): "Sevilya" əsas futbolçuları olmadan belə, güclü rəqibdir. Məqsədlərinə nail olsalar belə, doğma meydanda qələbə uğrunda mübarizə aparacaq. Bu oyun həm də ölkə idmanının təbliğatı baxımından önəmlidir. Bütün İspaniya mediası matçı diqqətlə izləyəcək. "Qarabağ" gücünü toplayaraq yaxşı oynasa, Bakıya xalsız qayıtmayacağıq. İspaniyadan 1 xalla qayıtmaq realdır. Sadəcə səhv etməmək lazımdır. Bu oyun "Qarabağ" üçün bəlkə də son şansdır”.

Qeyd edək ki, A qrupunda mübarizə aparan "Qarabağ" 4 xalla 3-cü pillədə qərarlaşıb.

31
Теймур Раджабов, Шахрияр Мамедьяров и Рауф Мамедов, фото из архива

Dünya şöhrətli zəngilanlı şahmatçı: "Sevincimin həddi-hüdudu yoxdur"

32
Türkan Məmmədyarova: "Çox heyiflər olsun ki, Zəngilan qaçqını olaraq dünyasını dəyişən nənəm və elə bu il vəfat edən əmim bu günü görmədi".

BAKI, 20 oktyabr — Sputnik. "Nəhayət ki, Zəngilan şəhərində yenidən Azərbaycan bayrağı dalğalandı".

Sputnik Azərbaycan Apasport-a istinadla xəbər verir ki, bu sözləri Azərbaycan yığmasının şahmatçısı Şəhriyar Məmmədyarov deyib.

35 yaşlı qrossmeyster Azərbaycan Ordusunun Zəngilan şəhərinin və daha bir neçə kəndinin işğaldan azad etməsinə münasibət bildirib. Əslən Zəngilandan olan milli üzvü feysbuk səhifəsi vasitəsilə sevincini bölüşüb:

"Sevincimin həddi-hüdudu yoxdur. Təşəkkür edirik, Ali Baş Komandanımız, təşəkkür edirik, Azərbaycan əsgəri! Qarabağ Azərbaycanın olub, Qarabağ Azərbaycandır və həmişə Qarabağ Azərbaycanın olacaq!"

Şəhriyarın sevincinə bacısı Türkan Məmmədyarova da şərik olub. Yığmamızın əsas simalarından sayılan xanım şahmatçı hər iki valideyninin zəngilanlı olduğunu xüsusi vurğulayıb: "Zəngilan işğaldan azad olundu, sevincimizin həddi yoxdur. Mən Zəngilanı çox az xatırladığım halda (işğal olunanda 4 yaşım var idi) sevinc göz yaşlarım sel kimi axdısa, orada həyatları keçənlərin sevincini təsəvvür edə bilmirəm. Çox heyiflər olsun ki, Zəngilan qaçqını olaraq dünyasını dəyişən nənəm və elə bu il vəfat edən əmim bu günü görmədi. Allah bütün şəhidlərimizə rəhmət eləsin..."

Qeyd edək ki, Azərbaycan Respublikasının Prezidenti İlham Əliyev bu gün xalqa müraciətində Füzuli rayonu (Dördçinar, Kürdlər, Yuxarı Əbdürrəhmanlı, Qarğabazar, Aşağı Veysəlli, Yuxarı Aybasanlı kəndləri), Cəbrayıl rayonu (Sarafşa, Həsənqaydı, Fuğanlı, İmambağı, Daş Veysəlli, Ağtəpə, Yarəhmədli kəndləri), Xocavənd rayonu (Ağcakənd, Mülküdərə, Daşbaşı, Günəşli, Çinarlı kəndləri) və Zəngilan rayonunun (Havalı, Zərnəli, Məmmədbəyli, Həkəri, Şərifan, Muğanlı kəndləri və Zəngilan şəhəri) işğaldan azad edilmiş yaşayış məntəqələrinin adlarını açıqlayıb.

32
Əlaqədar
Şəhriyar Məmmədyarov onlayn turnirin mükafatçısı oldu
Ali Baş Komandan: Zəngilan bizimdir!
İşğaldan azad edilmiş Zəngilan şəhərində Azərbaycan bayrağı dalğalanır - VİDEO
Şəhriyar Məmmədyarov: Ananda qalib gəldiyimi biləndə, məndən pul almadılar
Rinat Rəhimxanovun rəhbərlik etdiyi alpinistlər qrupu Bazardüzünə yürüş edib

Alpinistlər hərbçilərimizə dəstək məqsədilə Azərbaycanın ən yüksək zirvəsinə qalxıblar

30
(Yenilənib 20:02 14.10.2020)
Azərbaycan çempionu, buzadırmanma üzrə yarışların beynəlxalq mükafatçısı Rinat Rəhimxanovun rəhbərlik etdiyi alpinistlər qrupu Bazardüzünə yürüş ediblər.

BAKI, 14 oktyabr — Sputnik, Kəmalə Əliyeva. Azərbaycanlı və xarici həvəskar alpinistlər Ermənistan tərəfindən işğal olunmuş Azərbaycan torpaqlarının azad edilməsi üzrə əks-hücum əməliyyatını həyata keçirən Azərbaycan Silahlı Qüvvələrinə dəstək məqsədilə "Explore Mountains" Bakı dağ klubunun təcrübəli bələdçilərinin rəhbərliyi altında Azərbaycanın ən yüksək zirvəsinə — Bazardüzünə yürüş ediblər.

Sputnik Azərbaycan xəbər verir ki, klubun nümayəndələri sosial şəbəkədəki səhifələrində zirvəyə qalxarkən çəkilmiş fotoları yerləşdiriblər.

View this post on Instagram

A post shared by Explore Mountains (@exploremountains_net) on

Qrup 14 nəfərdən ibarət olub. Onlardan üçü Fransa və Ukraynanı, qalanları isə Azərbaycanı, o cümlədən ölkənin Fövqəladə Hallar Nazirliyini təmsil ediblər. Qrupa dağaqalxma və buzaqalxma üzrə Azərbaycan çempionu, buzaqalxma üzrə yarışların beynəlxalq mükafatçısı Rinat Rəhimxanov rəhbərlik edib.

Alpinistlər 4466 metr hündürlüyə qalxıb, orada Azərbaycan bayrağını yüksəldib və Azərbaycan Ordusunun qəhrəmanlarının əks olunduğu tablonu nümayiş etdiriblər.

Yürüş Ermənistan tərəfindən işğal olunmuş Azərbaycan ərazilərinin azad edilməsi üzrə əks-hücum əməliyyatını həyata keçirən Azərbaycan hərbçilərinə dəstək məqsədilə, eləcə də Vətən uğrunda həlak olmuş şəhidlərin xatirəsini yad etmək üçün keçirilib.

30
Elektrik yarımstansiyası, arxiv şəkli

Azərbaycanda yeni istilik elektrik stansiyalarının tikilməsinə ehtiyac yaranıb

0
(Yenilənib 00:22 21.10.2020)
"Koronavirus (COVID-19) pandemiyasının qlobal energetika sektorunda enerjiyə tələbatın azalması ilə müşayiət olunan təsirləri bu il ölkəmizin elektrik enerjisi ilə bağlı göstəricilərini qismən azaldıb".

BAKI, 21 oktyabr — Sputnik. "Koronavirus (COVID-19) pandemiyasının qlobal energetika sektorunda enerjiyə tələbatın azalması ilə müşayiət olunan təsirləri bu il ölkəmizin elektrik enerjisi ilə bağlı göstəricilərini qismən azaldıb".

Sputnik Azərbaycan xəbər verir ki, bunu Energetika naziri Pərviz Şahbazov 20 oktyabr - Azərbaycan energetiklərinin peşə bayramı günü münasibətilə rəsmi mətbuatda dərc etdirdiyi məqalədə bildirib.

Onun sözlərinə görə, bu ilin 9 ayı ərzində elektrik enerjisinin istehsalı ötən ilin müvafiq dövrü ilə müqayisədə 0,8% azalaraq, 19,4 milyard kVt·st təşkil edib.

P.Şahbazov bildirib ki, qarşıdakı illərdə isə elektrik enerjisinə tələbat və istehsal həcmləri ilə bağlı dinamikada əhəmiyyətli dərəcədə artım gözlənilir:

"2025-ci ilə qədər ölkəmizdə elektrik enerjisinə tələbatın 25,5 milyard kVt·st-a qədər artacağı, ixrac da nəzərə alınmaqla elektrik enerjisi istehsalının isə ötən ilə nisbətən 15% artımla 30 milyard kVt·st-a çatacağı proqnozlaşdırılır. Bu istehsal həcmlərinin bir qismi ötən il istismara verilmiş, qoyuluş gücü 409 МVt olan "Şimal-2" elektrik stansiyası, bu il təməli qoyulmuş və 2022-ci ildə istifadəyə verilməsi planlaşdırılan 385 МVt gücündə "Qobu" elektrik stansiyası hesabına əldə ediləcək".

Nazirin fikrincə, həmçinin bu prosesdə "Azərenerji" ASC-nin istehsal güclərinin optimallaşdırılması və bərpası nəticəsində yenidən istismara cəlb edilən 1300 MVt imkan gücündən istifadə ediləcək: "Eyni zamanda, təhlillər göstərir ki, tələbatın tam qarşılanması üçün yeni istilik elektrik stansiyalarının tikilməsinə də ehtiyac var".

0