Azərbaycan yığmasının azərkeşi

Görəcəyimiz sadəcə oyun olmayacaq - "Qarabağ" - APOEL qarşılaşmasına fərqli baxış

1198
(Yenilənib 16:04 24.10.2019)
Bu qarşılaşmada məhz psixoloji cəhətdən hazır olan komanda qalib gələcək. 30 min azarkeşin dəstəyi ilə qələbə qazanmaq üçün komandanın yaxşı şansı var.

Kamal Almuradlı, Sputnik Azərbaycan

BAKI, 24 oktyabr — Sputnik. Bu gün Avropa Liqasının qrup mərhələsində 3-cü turunda "Qarabağ" Tofiq Bəhramov adına Respublika stadionunda Kiprin APOEL klubu ilə qarşılaşacaq. Sputnik Azərbaycan xəbər verir ki, Qurban Qurbanovun komandası üçün vacib qarşılaşma 20:55-də start götürəcək. "Köhlən atlar" qrup mərhələsində üstünlük əldə etmək üçün tarixi şans yaranıb. Azarkeşlərin səbrsizliklə gözlədiyi oyun öncəsi mütəxəssislərin fikrini öyrəndik.

Qol.az saytının baş redaktoru Aydın Bağırov hər hansı proqnoz verməyə çətinlik çəkib: "Bu komandalar hazırkı mövsümdə iki dəfə qarşılaşdıqlarına görə bir-birlərini yaxşı tanıyırlar. Böyük hesablı nəticə gözləmirəm. Gərgin bir matç olacağını düşünürəm".

İdman jurnalisti Natiq Muxtarlının fikrincə, APOEL-lə qarşılaşma qrupda "Qarabağ" üçün ən vacib oyundur və bu oyunda qazanılacaq qələbə, böyük ehtimalla, "Qarabağ"ın qrupdan çıxmasını təmin edəcək: "Üstəlik, APOEL-in qrupdan çıxma şansı demək olar ki, itəcək. Bu da səfər qarşılaşmasında "Qarabağ" üçün əlavə üstünlük sayılacaq. Deməli, oyun hər iki komanda üçün həyati əhəmiyyətlidir. Buna görə də, həm "Qarabağ"ın, həm də APOEL-in təzyiq altında olacağı şəksizdir".

Muxtarlı düşünür ki, hər iki komanda ehtiyatlı oyuna üstünlük verəcək, rəqibin səhvini gözləyəcək və oyuna təkcə taktiki və fiziki baxımdan yox, psixoloji baxımdan da hazır olmaq lazımdır: "Hesab edirəm ki, bu qarşılaşmada məhz psixoloji cəhətdən hazır olan komanda qalib gələcək. Bütün hallarda, "Qarabağ" rəqibi qarşısında üstün durumdadır. "Köhlən atlar"ın 3 xalı varsa, rəqib xalsızdır. Yəni bu qarşılaşmada xal, "Qarabağ"dan çox, APOEL-ə lazımdır. Üstəlik, "Qarabağ"ın daha bir "silah"ı – azarkeşləri də olacaq. Ona görə, tam ehtiyatlı olmalı, rəqibi açıq oynamağa vadar etməliyik. Qoy əvvəlcə onlar qapalı futboldan imtina etsinlər. Belə olacağı təqdirdə, "Qarabağ"ın işi asan olacaq. Kiprlilər açıq futbola üstünlük versələr, yəni "Qarabağ"ın futbolçuları üçün meydanda boş zonaları çox saxlasalar, onda məğlubiyyətləri qaçılmazdır".

CBC Sport kanalının idman şərhçisi Rüstəm Əfsərli "Qarabağ"ın qrupdan çıxmaq üçün çox gözəl şansının olduğuna əmindir. Onun sözlərinə görə, bu şans həm "Qarabağ"ın Lüksemburqdakı qələbəsi , həm də "Düdelanj"ın Kiprdəki qələbəsi sayəsində yaranıb: "Dərindən analiz etsək görərik ki, "Qarabağ"ı APOEL-lə oyunlarda məğlub olmamaq da qane edir. APOEL-lə xal fərqini saxlamaq lazımdır. Çünki düşünmürəm ki, "Sevilya" ilə matçlarda "Düdelanj" xal toplaya biləcək. Maksimum 1 xal qazana bilər ki, bu da fantastikaya bənzər bir iş olar. Fikirləşirəm ki, "Qarabağ" qələbəyə oynayacaq. Çox irəli gedəcəyini, ehtiyatsız oynayacağını düşünmürəm. Komanda öz anını gözləyəcək. Ustalıq səviyyəsinə görə "Qarabağ" rəqibindən heç də geri qalmır. Hətta bəzi məqamlarda üstəliyir. 30 min azarkeşin dəstəyi ilə qələbə qazanmaq üçün komandanın yaxşı şansı var. Proqnoz kimi "Qarabağ"ın qələbə qazanacağını deyə bilərəm".

İdman jurnalisti Anar Xanlarov deyir ki, bugünkü oyun hər iki komanda üçün çox vacibdir: "Rəqibin itiriləcək bir şeyi yoxdur. APOEL ilk iki oyunda məğlub olub və bugünkü oyunu da uduzsalar, onlar üçün böyük ölçüdə hər şey bitəcək. "Qarabağ" isə qələbə qazandığı təqdirdə, mənə görə qrupdan çıxmaq məsələsini 90 faiz həll edəcək. Komandamızın əlinə çox gözəl şans düşüb və ümid edirəm ki, "Qarabağ" bu dəfə bu şansı qaçırmayacaq. Proqnozum isə "Qarabağ"ın 1:0-lıq qələbəsidir".

"İdman TV"-dən Orxan Sübhan Azərbaycanda futbolla maraqlanan, maraqlanmayan hər kəs çoxdan bu matçın, daha doğrusu "Qarabağ" - APOEL qarşılaşmasının intizarında olduğuna bildirıb: "Çünki Kipr təmsilçisi Çempionlar Liqasının pley-off mərhələsinə məhz "Qarabağı" mübarizədən kənarlaşdırmaqla yüksəlmişdi. Bakıdakı acı məğlubiyyəti hələ də heç birimiz yaddaşımızdan silə bilmirik. Revanş almaq üçün əlimizə yaxşı fürsət düşüb. İnanıram ki, Qarabağ klubunun futbolçuları həmin məğlubiyyətdən dərs çıxarıblar və bu gün üzümüzü güldürəcəklər. Revanşdan əlavə həm də qrup mərhələsini aşmaq üçün bu matçın əhəmiyyəti böyükdür".

"İdman TV"-nin aparıcısı İsmayıl Abdullayev oyun barədə inamlı danışır: "Bəllidir ki, Çempionlar Liqasının 3-cü təsnifat mərhələsindən “APOEL”lə heyfimiz qalıb. Bu dəfə vəziyyət fərqlidir. “Qarabağ”ın 80 faiz qələbə qazanacağını düşünürəm. “Qarabağ”da hər şey qaydasındadır. Hətta zədəli Mahir Emreli və Xayme də komandaya geri dönüb. Stadion bu gün tam dolacaq. Təbii ki. bu da əlavə stimuldur. Bir məsələni də nəzərə alaq ki, “Qarabağ” Azərbaycan futbolu adına ilk dəfə olaraq qrup mərhələsini adlamaq üçün ideal şans əldə edib. Qrup püşkatmasının nəticələri bəlli olanda da bildirmişdim ki, “Qarabağ” üçün bu qədər ideal şans olmayıb. Ən əsası bu gün 3 xal qazanmaqdır".

1198
Şəhriyar Məmmədyarov, arxiv şəkli

Azərbaycan millisi Türkiyəni onlayn matçda darmadağın edir

839
(Yenilənib 18:31 10.08.2020)
Azərbaycan yığmasının tərkibindəki ən uğurlu şahmatçılar - dörd mümkün xaldan üçünü yığan Şəhriyar Məmmədyarov və Gülnar Məmmədovadır

BAKI, 10 avqust — Sputnik, Teymur Tuşiyev. Azərbaycan şahmat yığması Türkiyə komandasına qarşı onlayn yoldaşlıq oyununda rəqibləri darmadağın etməkdədir. 

Sputnik Azərbaycan-ın məlumatına görə, hər iki komanda ümumi hesabda altı matç keçirəcək. Vaxt hər bir gedişdən sonra 5 saniyə əlavə olmaqla 15 dəqiqə təşkil edir.

Dörd oyundan sonra Azərbaycan şahmatçıları 16,5:7,5 hesabı ilə irəlidədirlər. Oynanılan dörd oyundan yalnız dördüncü oyun sülh yolu ilə yekunlaşıb (3:3), qalan görüşlərdə Azərbaycan yığması 4,5:1,5, 4:2 və 5:1 hesabı ilə qələbə qazanıb.

Hələlik Azərbaycan yığmasının tərkibində ən uğurlu oyunçular Şəhriyar Məmmədyarov və Gülnar Məmmədovadır. Onlar dörd partiyanın hamısında oynayıblar və hərəsində üç xal qazanıblar.

Günay Məmmədzadə əvəzedicisiz oynayıb, lakin onun aktivində 2,5 xal var. Türkiyə yığmasının heyətində isə hələlik ən yaxşı nəticəni dörd partiyada iki xal toplayan Draqan Solak göstərib.

Bu gün Azərbaycan və Türkiyə yığmaları daha iki oyun oynayacaq. Nəzəri baxımdan Türkiyə şahmatçıları Azərbaycan yığmasına çata bilərlər, lakin komandaların sinfindəki fərqi nəzərə alsaq, qalan iki turda bu, mümkün deyil.

839
Əlaqədar
Karantin dövrünün idmançıları: Video hazırlayan kim, xarici dil öyrənən kim...
Oyunçu aparsın - Karantin zamanı populyarlaşan oyunlar
Karantindir, nə olsun? Azərbaycanda 15 minlik mükafatı olan rəsmi yarış başlanır
Məhəmmədrəsul Məcidov, arxiv şəkli

Azərbaycanlı idmançı dünya boksunun əfsanəsini döyüşə çağırır

1265
(Yenilənib 17:21 09.08.2020)
Azərbaycanlı peşəkar boksçu hazırkı dünya çempionu Entoni Coşua ilə mübarizə aparmaq arzusundadır. Lakin onunla görüşdən əvvəl titul uğrunda beş döyüş keçirməlidir.

Teymur Tuşiyev, Sputnik Azərbaycan

BAKI, 9 avqust — Sputnik. Azərbaycanlı peşəkar boksçu Məhəmmədrəsul Məcidov Moskva yaxınlığında avqustun 22-də britaniyalı Dilian Uaytla döyüşəcək məşhur rusiyalı boksçu Aleksandr Povetkinlə iki həftəlik təlim-məşq toplanışı keçirib. Sputnik Azərbaycan-la müsahibəsində Məcidov Povetkinlə birgə məşqlərdən və gələcək planlarından danışıb.

- Povetkinlə məşq keçmək ideyası necə yarandı?

- Biz bilirdik ki, Povetkin avqustun 22-də Dilian Uaytla mübarizə aparmalıdır və onun sparrinq-tərəfdaşlara ehtiyacı olacaq. Mən öz menecerimə təklif etdim ki, onun nümayəndələri ilə birgə təlim-məşqlər keçirilməsi barədə danışıq aparsın. Nəticədə razılığa gəlmək mümkün oldu.

Şübhəsiz ki, belə təcrübəli boksçu, Olimpiya çempionu ilə məşqlərim mənə böyük fayda gətirib, mən ondan çox faydalı şeylər götürmüşəm. O da həmçinin mənimlə məşq etdiyi üçün çox minnətdardır, çünki mənim iştirakımla olan sparrinq onun üçün də faydalı olub.

- Sparrinqlər necə keçdi?

- Biz birlikdə yaxşı işlədik. Əsasən, mən ona Dilian Uaytla döyüşə hazırlaşmağa kömək edirdim, ona görə də onun travma almaması üçün maksimum səy göstərirdim.

- Povetkinin qarşıdakı döyüşdəki şansını necə qiymətləndirirsiniz?

- Onun yaxşı qələbə şansı var. O, çox təcrübəli boksçudur və bu, ona kömək etməlidir. Əlbəttə, rəqib də hədiyyə deyil, amma hamımız bilirik ki, Saşa fiziki və mənəvi cəhətdən çox güclüdür, tez-tez xarakter döyüşlərini qazanır.

- Siz onunla eyni çəki kateqoriyasında çıxış edirsiniz. Onunla döyüş keçirmək barədə heç düşünməmisiniz?

- Onunla döyüşmək mənim üçün hələ maraqlı deyil. Povetkinin yanında bir çox digər boksçular var ki, mən onları məğlub etməliyəm. Həm də məni onunla dostluq münasibətləri bağlayır. Birlikdə sparrinq edən döyüşçülərin çoxu adətən bir-biri ilə rəsmi döyüşlər keçirmirlər. Povetkin yolumun üstündə dayanmır, mənə nəyəsə nail olmaq üçün ona qalib gəlmək lazım deyil. Mənə qalxmağa imkan verəcək digər boksçularla görüşlər keçirmək daha vacibdir.

- Kimləri məğlub etmək istərdiniz?

- İlk növbədə, hazırkı dünya çempionu Entoni Coşuanı. Deyim ki, o da mənimlə mübarizə aparmaq istəyir. Amma onunla döyüşə çıxmazdan qabaq mən titul uğrunda beş döyüş keçirməliyəm. Bu, bir çox amillərdən asılıdır. Həm də dünya çempionunun reqlamentinə görə, mütləq titulun müdafiəsi həyata keçirilməlidir.

Bundan başqa, mənə Povetkinin rəqibi - britaniyalı Uaytla döyüşmək maraqlı olardı. Böyük hesabla götürsək, kiminlə döyüşməyimin mənim üçün fərqi yoxdur. Peşəkar boksda zirvəyə çatmaq üçün istənilən rəqiblə mübarizə aparmağa hazıram. Ən yaxşıları ilə bokslaşmaq istəyirəm.

- Sizin növbəti döyüşünüzlə bağlı məsələlər aydınlaşıbmı?

- Hələlik bu barədə dəqiq məlumat yoxdur. Məsələ bundadır ki, hazırda koronavirus pandemiyası səbəbindən tamaşaçıların boks şoularını ziyarət etməsi qadağandır. Həm də axşam döyüşlərinin sayı azaldılıb. Buna görə boks axşamlarının iştirakçıları sırasına düşmək üçün rəqabət artıb.

Mənim növbəti döyüşüm sentyabr ayının ortalarında və ya sonunda keçirilə bilər. Ancaq payızın ilk günlərində də rinqə çıxa bilərəm. Hətta indi də istənilən döyüşə hazıram. Amma koronavirus səbəbindən hələ heç bir aydınlıq yoxdur, çünki bir çox ölkələrin sərhədləri bağlıdır. Bundan əlavə, tezliklə vizaları yeniləmək üçün Azərbaycana gəlmək lazımdır.

1265
Mehdiabad qəsəbəsində antisanitariya

Bakıda bələdiyyənin əməkdaşı cərimə edildi

0
(Yenilənib 23:33 11.08.2020)
Mehdiabad Bələdiyyəsinin əməkdaşı Z.Yarışov və Bakı şəhər sakini K.Əhmədov barəsində protokollar tərtib edilib. Z.Yarışov 3.000, K.Əhmədov isə 600 manat məbləğində cərimələniblər.

BAKI, 11 avqust — Sputnik. Daxili İşlər Nazirliyinin Baş İctimai Təhlükəsizlik İdarəsi Ekologiya və Təbii Sərvətlər Nazirliyinin müvafiq qurumları ilə birgə sanitariya-gigiyena qaydalarının pozulması hallarının qarşısının alınması məqsədilə reydlər keçiriblər.

Sputnik Azərbaycan Daxili İşlər Nazirliyinin məlumatına istinadla xəbər verir ki, avqustun 6-da keçirilən reydlər zamanı Abşeron rayonunun Mehdiabad qəsəbəsində yerləşən "Şok Market"in yaxınlığında və Binəqədi rayonu Binəqədi gölü ərazisində məişət tullantılarının qalaqlanması və yandırılması faktları aşkar edilib.

İnzibati Xətalar Məcəlləsinin 271-ci (sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi) maddəsinin tələblərini pozduqlarına görə Mehdiabad Bələdiyyəsinin əməkdaşı, qəsəbə sakini Z.Yarışov və Bakı şəhər sakini K.Əhmədov barəsində protokollar tərtib edilib. Z.Yarışov 3.000, K.Əhmədov isə 600 manat məbləğində cərimələniblər.

Bu istiqamətdə tədbirlər davam etdirilir.

0