Rəfiqə Əziz

Rəfiqə Əziz: "Mənim alt paltarında meydana qaçmaq fikrim yoxdur"

901
(Yenilənib 12:47 13.08.2019)
"Dostlarım oyun bitən kimi məni dövrəyə aldılar ki, yad adamı qucaqlamayım"

Kamal Almuradlı, Sputnik Azərbaycan

BAKI, 13 avqust — Sputnik. Rəfiqə Əziz 1993-cü ildə Bakıda anadan olub. 2011-2015-ci illərdə Azərbaycan Dövlət Mədəniyyət və İncəsənət Universitetinin rejissorluq fakültəsini bitirib. "Lider" TV-də müxbir, redaktor, daha sonra CBC sport kanalında fəaliyyət göstərib. Sosial şəbəkələrdə "Qarabağ"ın xanım azarkeşi kimi tanınır. Ağdam klubunun Çempionlar Liqasında növbəti oyunu ərəfəsində Sputnik Azərbaycan Rəfiqə Əzizlə söhbətləşməyi qərar aldı.

- Futbola həvəs nə vaxt yarandı?

- Uşaq vaxtlarımdan futbola böyük həvəsim vardı. Amma ən böyük arzum cüdoçu olmaq idi. Dayımoğlu, qardaşım məşğul olduqları üçün mən də istəyirdim. Anam isə qəti surətdə bunun əleyhinə idi. Çox dəcəl idim. Evdə deyirdilər ki, cüdo ilə məşğul olsan, qarşına çıxanı döyəcəksən. Kök olduğum üçün məni fitnesə qoydular. Həyəcan, adrenalin sevən biri olduğum üçün fitnes çox darıxdırıcı gəlirdi mənə. 6-cı sinifdə məktəbdə qadın futbolu üçün qəbulla bağlı elan verdilər. Bu dəfə də ailəm istəklərimə qarşı çıxdı. Aqressiv idman növlərinə marağım böyük olsa da, məni rəqsə, üzgüçülüyə, aerobikaya, gimnastikaya qoyublar. Amma hamısı da yarımçıq qalıb. Hətta fortepianoya məni döyə-döyə aparıblar. Musiqini sevsəm də, məşğul olmaq heç mənlik deyil. İndi isə arada vaxtım olanda kikboksinqlə məşğul oluram. Anam indi də deyinir ki, qızım, əl çək bu işlərdən.

Rəfiqə Əziz
© Sputnik / Kamal Almuradlı
Rəfiqə Əziz

- Sizi hamı "Qarabağ" azarkeşi kimi tanıyır. Bakıda böyüyüb boya-başa çatan adamda bu sevgi haradan yarandı?

- Həmişə mənə deyirlər ki, bakılısan, amma "Qarabağ"a azarkeşlik edirsən. Mən hələ uşaq ikən yerli çempionata baxırdım. Zaur Tağızadənin, Georgi Adamiyanın, Mahir Şükürovun, Rəşad Sadıqovun oyunlarını maraqla izləmişəm. Xatırlayıram, atamla stadiona getmişdik. "Neftçi" oynayırdı. Qurban Qurbanov həmin oyunda qol vurmuşdu. Vaxtı ilə Raul Qonsalesə vurulmuşdum. Qurban Qurbanova qarşı da eyni hissləri duyurdum. Məni çox cəlb etmişdi. Televizorda Qurbanovu göstərəndə saxlayırdım həmin kanalda. Mənim üçün Azərbaycan futbolu üç addan ibarətdir: Qurban Qurbanov, Zaur Tağızadə və Rəşad Sadıqov.

Qurban "Qarabağ"a məşqçi kimi gələndən sonra həmkarım Vasif Acalov Avropa kuboklarının oyununa dəvət etdi məni. Klubumuz "Seltik"lə qarşılaşacaqdı. Dəvəti qəbul etdim. Düzdür, həmin oyunu uduzduq, amma mən uşaqlıq dövrümə qayıtdım. Ölmüş duyğularımı oyatdı. Oyun bitəndə mənim gözlərim dolmuşdu. Kövrəlməyim uduzmağa görə deyil, uzun illərdən sonra Tofiq Bəhramov stadionunda olmağım, uşaqlıq duyğularım idi. Bir müddətdən sonra "Qarabağ"ın nəinki Avroliqadakı oyunlarını, ölkə çempionatındakı çıxışlarını da stadiondan izləməyə başladım. CBC Sport kanalında işə düzələndən sonra isə artıq peşəmlə bağlı olaraq mütəmadi stadiona gedirdim. Hətta bir dəfə "Neftçi"-"Qarabağ" oyununda fləş-müsahibə etməli idim. Oyunu texniki zonadan izləyirdim. "Qarabağ" qol vuranda hisslərimi saxlaya bilmədim. Sevincimi bildirdim. Həmkarım Səmra (Səmra Qolasso - red.) mənə yaxınlaşaraq bildirdi ki, hisslərini cilovla. Sonra saytlar bunu əlində bayraq edəcəklər. Oyun 2:1 "Qarabağ"ın qələbəsi ilə bitdi. Oyun uzandığı üçün fləş-müsahibə də olmadı. Amma bir müddət sonra "Qarabağ" – "Düdelanj" oyununda bu mənə qismət oldu. Həmin vaxt Qurban Qurbanov və Qara Qarayevdən müsahibə ala bildim. Həmin an dünyanın ən xoşbəxt adamı idim.

- Bu xoşbəxtliyini "Qarabağ"da bilirlər?

- Qurban Qurbanovu deyə bilmərəm, çünki onunla bir dəfə həmsöhbət olmaq qismətim olub. Kanalımıza qonaq gəlmişdi və mən böyük həvəslə onunla şəkil çəkdirdim. Çox eybəcər düşdüyüm üçün Qurbanla şəklimi heç yerdə paylaşmıram. Amma klubda Rəşad Sadıqov və oranın işçiləri bilirlər.

Rəfiqə Əziz
© Sputnik / Kamal Almuradlı
Rəfiqə Əziz

- Sənə görə, "Qarabağ"ın ən cəzbedici futbolçusu kimdir?

- Çox təəsüf ki, "Qarabağ"da xarici görünüşünə görə mənim zövqümə uyğun futbolçu yoxdur. Amma Qurban Qurbanov birmənalı olaraq zövqümdədir. Oyun baxımından isə məncə, Azərbaycan futbolunun ikonası Rəşad Sadıqovdur. Onu həm də xarakter, liderlik qabiliyyəti olan şəxs kimi dəyərləndirirəm. Son dövrlər zəifləsə də, Qara Qarayevin oyunu da ürəyimcədir. Hal-hazırda isə bəyəndiyim futbolçu Zubirdir.

- Hansı futbolçu ilə dostluq münasibətin var?

- Ad çəkmək istəmirəm. Səbəbini də açıq deyim. Çox təəssüf ki, futbol sferası elədir ki, deyilən hər sözü, atılan hər addımı, hətta paylaşılan şəkli yoza bilərlər. Bu barədə başım çox ağrıyıb. Ona görə dostlarımın adını açıqlamıram.

- Futbolçudan hədiyyə almısan?

- Almışam, amma yenə də deyirəm, ad çəkməyəcəm.

- Bəs sevgili olduğun?

- Hal-hazırda yoxdur. Vaxtı ilə olub.

- Tanınmış futbolçu idi?

- Məsələ ondadır ki, mən futbolçuları tanıyıram. Amma əksər adamlar üzdə olanlardan savayı, heç kimi tanımır.

Rəfiqə Əziz
© Rəfiqə Əzizin şəxsi arxivindən
Rəfiqə Əziz

- Son zamanlar dünyada modellərin futbolla bağlı açıqlamaları artıb. Misalçün, oyun öncəsi deyirlər ki, futbolçu qol vursun, onu öpəcəm.

- Mənim alt partarında meydana qaçmaq fikrim yoxdur. Dəfələrlə belə müsahibələr oxumuşam. Xatırlayıram, Naz Mila demişdi ki, "Qarabağ"da qələbə topunu vuran adamı öpəcəm. Sözünün üstündə durmadı. Çempionlar Liqasında qrupa düşmək üçün son oyun idi. "Qarabağ" keçərsə həştəqi ilə paylaşım edilirdi. Səfər oyunu olduğu üçün matça Bakı Olimpiya stadionunda fan-zonadan baxırdıq. Mən də söz vermişdim ki, yanımda kim olarsa, onu qucaqlayacam. Dostlarım oyun bitən kimi məni dövrəyə aldılar ki, yad adamı qucaqlamayım.

- "Qarabağ" böyük ehtimalla növbəti mərhələyə yüksələrsə, "Ayaks" klubu ilə qarşılaşacaq. Oyundan nə gözləyirsən?

- Sözün düzü, komandadan çox, azarkeşlərin buraya gəlməsini arzulayıram. Çünki bildiyim qədəri ilə çox maraqlı azarkeşlərdir. Etiraf edim ki, ötən mövsüm "Ayaks" gözlənilməz nəticə göstərdi. Baxmayaraq ki, heyətində dəyişiklik olub, şansları 50/50 qiymətləndirirəm. Top yumrudur, hər şey ola bilər. Təbii ki, könül istər, "Qarabağ" qələbə qazansın və qrupa vəsiqə əldə etsin.

901
Teqlər:
UEFA, Çempionlar Liqası, müsahibə, azarkeş, Qarabağ fk
Qarabağ - Makkabi oyunu

"Qarabağ" İsraildə ilk xalını qazandı

36
(Yenilənib 00:38 04.12.2020)
“Qarabağ” qrupda son oyununu dekabrın 10-da keçirəcək. Ağdamlılar İspaniyada “Vilyarreal”ın qonağı olacaqlar

BAKI, 3 dekabr - Sputnik. Azərbaycan çempionu “Qarabağ” avrokuboklarda növbəti oyununu keçirib.

Sputnik Azərbaycan apasport.az-a istinadən bildirir ki, Ağdam təmsilçisi Avropa Liqasının qrup mərhələsinin V turunda meydana çıxıb.

İlk 4 görüşdə uduzduqdan sonra İ qrupunda sonuncu yeri tutduğu rəsmiləşən Qurban Qurbanovun yetirmələri İsrailin “Makkabi” klubu ilə görüşüb. Cari mövsümdə avrokuboklarda son ev matçını keçirən təmsilçimiz Təl-Əviv klubunu da İstanbuldakı “Başakşəhər Fatih Teim” stadionunda qəbul edib.

Baş məşqçi Qurban Qurbanov və əsas heyətin bir sıra üzvləri koronavirusa yoluxduğu üçün qardaş ölkəyə böyük itkilərlə yollanan “Qarabağ” turnirdə ilk xalını qazanıb. Qarşılaşmada hər iki qol ilk 45 dəqiqədə vurulub.

Komandamız hissənin ortalarında qapısında qol görüb. İsrail təmsilçisi penalti ilə hesabı açıb. Ağdamlılar ilk yarı başa çatmamış hesabda tarazlıq yaradıblar. Xayme Romero bərabərlik qoluna imza atıb. 

Qrupun digər oyununda “Sivasspor” Türkiyədə “Vilyareal”ı qəbul edib. İspaniya təmsilçisi 1 qolla səfər qələbəsi qazanıb.

Qeyd edək ki, “Qarabağ” qrupda son oyununu dekabrın 10-da keçirəcək. Ağdamlılar İspaniyada “Vilyarreal”ın qonağı olacaqlar.

Avropa Liqası
Qrup mərhələsi
V tur, İ qrupu
3 dekabr
21:55. “Qarabağ” (Azərbaycan) - “Makkabi” (Təl-Əviv, İsrail) - 1:1
Qollar:  Xayme Romero, 37 - Yonatan Kohen, 22 (pen.)

Baş hakim: Robert Hennessi (İrlandiya)
“Qarabağ”: 1. Şahruddin Məhəmmədəliyev, 81. Kevin Medina, 77. Donald Gerye, 8. Uroş Matiç, 2. Qara Qarayev (k), 19. Filip Ozobiç, 10. Abdullah Zubir, 44. Elvin Cəfərquliyev, 7. Ovusu Kvabena, 9. Xayme Romero, 18. İsmayıl İbrahimli
Ehtiyat oyunçular: 12. Emil Balayev, 94. Ayxan Arazlı, 4. Rahil Məmmədov, 27. Toral Bayramov, 21. Rauf Hüseynli, 29. Zamiq Əliyev 
Məşqçi: Elçin Rəhmanov
“Makkabi”: 19. Daniel Tennenbaum, 30. Maor Kandil, 18. Eytan Tibi, 21. Şeran Yeini (k), 27. Ofir Davidzada, 23. Eyal Qolasa, 42. Dor Perets, 24. Yonatan Kohen, 44. Luis Ernandes, 17. Dan Biton, 9. Nik Blekmen
Ehtiyat oyunçular: 1. Daniel Perets, 3. Matan Baltaksa 11. Tal Ben Haim, 22. Avi Rikan, 25. Amit Qlazer, 29. Eylon Almoq, 39. Eduardo Gerrero, 47. Eden Karzev, 10. Etey Şexter, 6. Dan Qlazer, 31. Şahar Piven, 72. Aleksandar Peşiç
Baş məşqçi: Giorgios Donis

36
Teqlər:
UEFA Avropa Liqası, "Makkabi" FK (Tel-Əviv), Qarabağ FK
Futbolçular, arxiv şəkli

UEFA Azərbaycana qoyduğu qadağanı ləğv elədi

23
(Yenilənib 21:46 03.12.2020)
Qadağa müddətində Azərbaycan yığması Millətlər Liqasının iki matçını ölkə xaricində keçirib, “Qarabağ” isə Avropa Liqasının Türkiyədəki üçüncü ev oyununa bu gün çıxacaq

BAKI, 3 dekabr - Sputnik. Azərbaycan və Ermənistanın beynəlxalq oyunlara ev sahibliyi etməsinə icazə verilib.

Sputnik Azərbaycan apasport.az-a istinadən bildirir ki, bu barədə qərarı UEFA-nın İcraiyyə Komitəsi verib.

Qurum bugünkü iclasında Qarabağdakı hərbi əməliyyatların dayandırılmasını nəzərə alaraq, oktyabrın 20-də tətbiq etdiyi qadağanı aradan qaldırıb. Bu isə o deməkdir ki, milli və klub səviyyəli komandalarımız ev oyunlarını ölkəmizdə keçirə biləcəklər.
Qeyd edək ki, qadağa müddətində Azərbaycan yığması Millətlər Liqasının iki matçını ölkə xaricində keçirib, “Qarabağ” isə Avropa Liqasının Türkiyədəki üçüncü ev oyununa bu gün çıxacaq.

23
Teqlər:
"Qarabağ" FK, milli komanda, futbol, qadağa, Azərbaycan, UEFA
Sputnik Beynəlxalq İnformasiya Agentliyinin loqosu, arxiv şəkli

"Bu, "Sputnik Latviya"ya qarşı ilk qərəz deyil" - Azərbaycanlı media eksperti

0
(Yenilənib 22:03 04.12.2020)
"Azadlıq radiosunun yayımının bloklanması pislənir, amma "Russia Today"-in yayımına məhdudiyyətə heç bir reaksiya verilmir"

Zülfiyyə Quluyeva, Sputnik Azərbaycan

BAKI, 4 dekabr — Sputnik. Latviya Dövlət Təhlükəsizlik xidməti dekabrın 3-də Riqadakı "Sputnik" bürosunun əməkdaşlarına, eləcə də "Baltnews" portalının jurnalistlərinə və digər rusdilli media nümayəndələrinə Latviya Cinayət Məcəlləsinin 84-cü maddəsi ilə – Avropa Şurasının sanksiya rejimini pozma – ittiham irəli sürüb. Jurnalistlər saxlanılıb, dindirilib, axtarışa məruz qalıb və onlar haqqında cinayət işi qaldırılıb. Sputnik Azərbaycan ölkənin tanınmış media ekspertlərinin bu məsələyə münasibət bildirib.

Jurnalistlərin Həmkarlar İttifaqının sədri Müşfiq Ələsgərli Sputnik Azərbaycan-a açıqlamasında bildirib ki, bu hadisələr  jurnalistika prinsipi baxımından həqiqətən də yolverilməzdir: "Bu "Sputnik Latviya"ya qarşı olan ilk hadisə deyil. Çox uzun müddət dünyada belə kampaniyalar aparılırdı ki, Azadlıq radiosunun və digər beynəlxalq KİV-lərin fəaliyyəti bloklanır. Amma məsələ ondadır ki, Avropa ölkələrində, hətta ABŞ-ın özündə bu prinsiplər çox pozulur. Bunlardan qabaq, "Russia Today"-in yayımı bloklanmadı. Pribaltika ölkələrində onların yayımına məhdudiyyət qoyulub. Hələ o vaxt bu məsələ qalxanda bildirilirdi ki, Azadlıq radiosunun yayımının bloklanması pislənir, amma "Russia Today" yayımına məhdudiyyətə heç bir reaksiya verilmir. Çox təəssüf ki, söz azadlığı prinsipləri çox vaxt elə onu yaradan ölkələr tərəfindən pozulur. Müasir mediada baş verən ifadə azadlığı pozuntularının çoxu elə qərb dövlətlərinin özündən gəlir. O cümlədən, Avropa və ATƏT məkanından. Əvvəllər biz danışırdıq ki, bu ikili standartlar əsasən Azərbaycana qarşıdır. Amma son dövrlər görürük ki, bunların özlərinin ifadə azadlığına qarşı münasibətlərində çox ciddi dəyişikliklər var. Məsələn, elə bir neçə gün öncə Fransada baş verən toqquşmalarda media azadlığını götürək. Qlobal təhlükəsizlik haqqında qəbul olunan qanunun bir nömrəli hədəfi medianın azadlığının məhdudlaşdırılmasıdır. Beynəlxalq təşkilatlar tərəfindən belə bir ifadə işlədildi ki, artıq ATƏT-in, Avropa Şurasının ən aparıcı dövlətlərindən olan Fransa kimi ölkə söz azadlığının durumuna görə Somali və Sudanın vəziyyətinə düşüb. Söz və ifadə azadlığına ikili yanaşma var. Bu cür yanaşmalar Qərb dəyərləri haqqında danışanların özünü şübhə altına salır. Media azadlığının qanunvericilik nöqteyi nəzərindən məhdudlaşdırılması, ikili yanaşma jurnalistlərin təhdid olunması ilə bağlı ciddi faktlar ortaya çıxır. "Sputnik Latviya"ya qarşı baş verən hadisələr də kəskin şəkildə qınanılmalı, media, ifadə azadlığına qarşı addım kimi dəyərləndirilməlidir. Mən xarici KİV-lərin, onların əməkdaşlarının fəaliyyətinə baltikyanı dövlətlərdə yaradılmış bu maneəni və təhdidi kəskin qınayıram".

Qeyd edək ki, Rusiya Xarici İşlər Nazirliyi Latviya hakimiyyət orqanlarının "Baltnews" portalı və "Sputnik Latviya"nın rusdilli jurnalistlərinə qarşı hərəkətlərini sərt şəkildə qınayıb. Bildirilib ki, "Latviya Dövlət Təhlükəsizlik Xidmətinin dekabrın 3-də Riqadakı "Sputnik" bürosunun əməkdaşlarına və rusdilli jurnalistlərə qarşı həyata keçirdiyi aqressiv hərəkətləri demokratik cəmiyyətin təməl prinsiplərinin – media və ifadə azadlıqlarının pozulmasının bariz nümunəsi kimi qiymətləndiririlir: "Bu məhdudiyyətlər şəxsi xarakter daşıyır və şəxsən "Rossia Seqodnya" BİA-nın baş direktoru Dmitri Kiselyovla əlaqəlidir, media holdinqin bütün əməkdaşlarına şamil edilə bilməz. Bütün bu uydurma ittihamların, heç şübhəsiz, rusofobiyanın təsiri ilə həyata keçirilən cəzalandırma tədbiri olduğu aydındır. Məsələ ATƏT Nazirlər Şurasında qaldırılacaq", – deyə məlumatda bildirilir. Nazirlik ümid etdiyini bildirir ki, ATƏT-in yeni Media Azadlığı Nümayəndəsi baş verənləri görməzdən gəlməyəcək və Latviyaya qarşı "bu cür hücumların qəbuledilməzliyi", "söz azadlığını təmin edilməsi üçün beynəlxalq öhdəliklərin yerinə yetirilməsinin zəruriliyi" əsasında təzyiq göstərəcək. "Avropa Şurasından da adekvat reaksiya gözləyirik", – deyə məlumatda bildirilir.

Xatırladaq ki, keçən il Estoniyada da analoji hadisə müşahidə olunmuşdu.

0
Teqlər:
Həbs, jurnalistlər, Sputnik Latviya