Gülənbər Qasımova - Qadın futbolu üzrə milli komandanın üzvü

“Dəmir” ləqəbli Gülənbər Qasımova: “Məni oğlan bilib, eşq elan edən olub”

11189
(Yenilənib 15:42 03.02.2019)
Gənc futbolçunun ən böyük arzusu isə Rusiyanın komandalarında oynamaqdır

Şahpəri Abbasova, Sputnik Azərbaycan

BAKI, 3 fevral — Sputnik. Gülənbər Qasımova - qadın futbolu üzrə milli komandanın üzvü. 1997-ci ildə Qax rayonunda anadan olub. Uşaq ikən voleybol üzrə qadınlardan ibarət komandada iştirak edən və uğurlar qazanan bu gənc xanımın ürəyi həmişə futbolda olub. O zaman futbol üzrə qadınlardan ibarət komandada oynamaq istəyini valideynlərinə bildirəndə isə etirazla qarşılaşıb.

Xanım futbolçu öz həyat tarixçəsini Sputnik Azərbaycan-a danışır: "6 ildir futboldayam. Eşitdim ki, rayonumuzda qadın futbolu yaranıb, mən də voleyboldan uzaqlaşıb, futbola gəlmək istədim. İstəyimi evdəkilərə bildirəndə israrla, "yox, olmaz" dedilər. Anam deyirdi ki, "qız nədir, futbol nədir? Voleybolda oynayırsan, bu bəsdir".

Gülənbər Qasımova - Qadın futbolu üzrə milli komandanın üzvü
© Gülənbər Qasımovanın şəxsi arxivindən
Gülənbər Qasımova - Qadın futbolu üzrə milli komandanın üzvü

"Niyyətin hara, mənzilin də ora" deyib atalarımız. Elə Gülənbər də öz arzusuna çatır: "Bir gün Əməkdar məşqçi Dilarə Əhmədova anama yaxınlaşıb dedi ki, "eşitmişəm, sənin idmançı qızın var. Onu komandamda görmək istəyirəm". Dilarə xanım anamı o qədər inandırdı ki, anam razılıq verdi və mən futbola gəldim".

Bu arada söhbətimizə Azərbaycanda qadın futbolunun təməlini qoyan ilk qadın, Əməkdar məşqçi Dilarə Əhmədova da qoşulur: "Eşitmişdim ki, Gülənbər adlı qız var, voleybolçudur, amma futbola daha çox meyllidir. Həmin ərəfədə Milli Olimpiya Komitəsinin vitse-prezidenti Xəzər İsayev də Gülənbərlə maraqlanırdı, onu güləşə dəvət edirdi. Mən onların evlərinə getdim, ancaq tapmadım. Bir gün təsadüfən Gülənbəri anası ilə birlikdə dükanda gördüm. Yaxınlaşıb anasına dedim ki, istəyirəm qızınız futbola gəlsin. Gülənbərin gözlərində həmin anda, sanki bir sevinc qığılcımı yarandı. Anası əvvəlcə tərəddüd etsə də, israr etdiyimə görə mənimlə razılaşdı. Beləliklə, Gülənbər mənim komandamın üzvü oldu".

Məşqçisinin dediyinə görə, Gülənbərin voleyboldan çıxması qalmaqala səbəb olub. Hətta buna görə onu təhqir etməkdən belə, çəkinməyiblər. "Həmin vaxt mənə dedilər ki, "o, heç vaxt milliyə düşməyəcək". Bu söz mənə çox pis təsir etdi. Onlara dedim ki, o, milli komandanın üzvü olacaq. O, nəinki milli komandanın üzvü oldu, Azərbaycanda, eləcə də dünyada bir sıra nailiyyətlər əldə etdi".

Gülənbər Qasımovanın medalları
© Sputnik / Shahperi Abbasova
Gülənbər Qasımovanın medalları

Gülənbərə ən çox dəstəyin atasından gəldiyini deyən Əməkdar məşqçi bütün valideynləri, xüsusilə idmana həvəsi olan övladlarına güvənməyi və onlara dəstək olmağa çağırır: "Ona ən çox kömək edən atası olub. Atası mənə zəng edib dedi ki, "qızım sizindir". Bu, məni çox sevindirdi. Yaxşı olar ki, bütün valideynlər Gülənbərin atası kimi öz qızlarına güvənsinlər. Belə olan təqdirdə, Azərbaycanda qadın futbolu daha da inkişaf edə bilər, dünya arenasında da öz sözünü deyə bilər".

"Əslən ispan olan, Azərbaycan yığma komandasının baş məşqçisi Patrisia Gonzales də Gülənbərin oyununu görüb heyranlığını gizlədə bilməmişdi. Mən ona "Dəmir Gülənbər" deyirəm. Həm fiziki olaraq, həm mənən çox güclü qızdır. Neçə ildir futboldadır, hələ bir dəfə də olsun travma almayıb. Bu, çox böyük işdir. Bunu idmançılar yaxşı anlayar. Çox şadam ki, bir gün mən olmayanda davamçım olacaq " - deyə, D.Əhmədova əlavə edir.

Gənc xanımı xarici görünüşünə görə də qınayanlar olub. Onu və komanda yoldaşlarına ləkələməyə çalışıblar: "Komandadakı bəzi qızlar da mənim kimi qısa saçlı idi. Biz birlikdə yarışlara gedirdik, birlikdə qalırdıq. Bu da birmənalı qarşılanmadı. Rayonda futbolçu qızlarla bağlı xoşagəlməz şayiələr yayılmışdı. Hələ də mənə bu məsələ qaranlıq qalıb, bu iyrənc söhbəti niyə yaydıqlarını bilmirəm. Bəlkə də məqsəd komanda arasında nifaq salıb, komandanı dağıtmaq idi. Mənə elə gəlir ki, Qaxda qadın futbolunun ləğvi üçün əvvəlcədən planlaşdırılmış bir oyun idi".

"Sözsüz ki, valideynlərim, xüsusilə də anam çox narahat oldu bu söhbətlərdən. Lakin kimin nə deməsindən asılı olmayaraq, adın doğrudan da təmizdirsə, sənə yüz böhtan atılsa belə, yapışmayacaq! Bu məsələ Dilarə xanımı da narahat edirdi. Amma o da, valideynlərimiz də, bizim səhv addım atmayacağımızdan əmin idilər" – deyə, gənc futbolçu təəssüf hissi ilə danışır.

Gülənbər Qasımovanın medalları
© Sputnik / Shahperi Abbasova
Gülənbər Qasımovanın medalları

Gülənbərin xarici görünüşünə görə onu oğlan bilib, eşq elan edənlər də olub. O, bu hadisəni gülərək xatırlayır: "Uşaqlıqdan indiyə qədər əynimdə idman paltarı olub, saçlarım da qısa. Buna görə məni oğlan hesab edənlər də olub. Bir dəfə bir kəndə qonaq getmişdim. Bir qız yaxınlaşdı. Hiss etdim ki, bu qız məni oğlan bilib. Yaxınlaşdı, adımı soruşdu, dedim ki, adım Nicatdır. Bir neçə saatdan sonra mənə eşq məktubu göndərmişdi".

Fərqli saç düzümü, idman üslubu, kütlənin ona münasibəti futbolçunun ailəsində ara-sıra söz-söhbətlərə səbəb olur: "Anamın iş yerində ona deyirdilər ki, "qızını alan olmayacaq, o nə geyimdir geyinir, o nə saçdır elə?" Anam da o sözlərdən təsirlənib mənə iradlarını bildirirdi. Lakin atam mənim arxamda dururdu. Anama deyirdi ki, "camaatın sözünə görə qızını niyə incidirsən, qoy işi ilə məşğul olsun". Dilarə xanım da anamı başa saldı ki, "futbolçu belə olmalıdır, o uzun saç saxlayıb don geyinə bilməz ki". Bundan sonra anam bir təhər razılaşdı".

"Bir oğlan mənimlə evlənmək istəyirdi. Amma şərt qoydu ki, ya futbol, ya da o. Mən futbolu seçdim. Gələcəkdə ailə quracağım insanın da istəklərimlə razılaşması mütləqdir. Əks təqdirdə razı olmaram. Çünki mən idmansız yaşaya bilmərəm. Özümü idmansız təsəvvür edə bilmirəm. Qadınlara məxsus zinət əşyaları, geyimlər, saç düzümü və s. bunlar mənlik deyil. Özümü dikdabanda təsəvvür edə bilmirəm, gəzməyi də bacarmıram"- deyə həmsöhbətim vurğulayır.

Gülənbər Qasımovanın medalları
© Sputnik / Shahperi Abbasova
Gülənbər Qasımovanın medalları

Bu gün milli komandada yarışan futbolçuların, eləcə də Gülənbər Qasımovanın da təhsilinin olmadığını deyən Dilarə xanım, onların təhsil almasının vacib olduğunu qeyd edir: "AFFA Təhsil Nazirliyi ilə birlikdə işləməlidir, milli komandanın üzvlərinə təhsil alma şansı verməlidirlər. Ümid edirəm ki, gələcəkdə xarici ölkələrdən idmançı gətirilməz, məhz öz qızlarımız yarışlarda iştirak edərlər. Qızlarımın içində ilk dünya çempionatında oynayan Olia Şioşvilini adlı qız var idi. Onun təhsili yoxdur deyə, millidən ayrıldı. Bu, faciədir mənim üçün. Olianın həyatını Gülənbərin də yaşamasını istəmirəm. Ona görə də millinin məşqçiləri, AFFA buna dəstək olmalıdır".

"Yaşanan bu çətinliklərdən sarsıldığınız, futbola gəldiyinizə görə peşman olduğunuz vaxtlar oldumu" sualına həmsöhbətimiz belə cavab verir: "Bir müddət, haradasa bir il millidən kənarda oldum. Heç bir gəlirim yox idi. Həmin dövrlərdə peşman olmuşdum ki, niyə oxumadım, futbol da yoxdur. Özümü başqa işlərdə, peşələrdə görə bilmirəm. Yaxşı ki, milli yarandı və mən komandanın üzvü oldum".

Gənc futbolçunun ən böyük arzusu isə Rusiyanın komandalarında oynamaqdır. Bu, onun əsas hədəflərindən biridir.

11189
Rövşən Binnətli

İdman şərhçisi: “Kim sənə səlahiyyət verib ki, belə bir bəyanat verirsən?!”

74
(Yenilənib 00:51 21.04.2021)
İdman şərhçisi Rövşən Binnətli deyir ki, bu gün dünyaca tanınmış klublar sabahkı aqibətlərini dərketmə gücünü özlərində tapacaqlar
Rövşən Binnətli: “Superliqa futbola qarşı edilmiş böyük bir düşmənçilikdir”

UEFA ilə klublar arasında Avropa Superliqasının yaradılması qalmaqalı davam edir. Qitə futbol qurumu Superliqaya qatılacaq klubları sanksiyalarla hədələsə də, klublar istəyindən əl çəkmək niyyətində deyil.

İdman şərhçisi Rövşən Binnətli Sputnik Azərbaycan-a deyir ki, bu gün Superliqaya qatılmağa razılıq vermiş komandalar tək Avropa qitəsində deyil, həm də dünyanın top komandaları siyahısındadır: “Bu turnirdə iştirak edən klublardan hansılarsa autsayder olacaq. Bu, azarkeşlərin narazılığına gətirib çıxaracaq və sonda klub üçün itkilərlə nəticələnəcək. Ona görə də belə bir liqanın təşkilini futbola xidmət kimi qəbul etmirəm. Düşünürəm ki, bu, futbolda dağıdıcı missiyadır. Bu turnir özlüyündə hər hansı motivasiyaedici xüsusiyyət daşımır və hansısa mərkəzə gedib bağlanmır. Florentino Peres deyir ki, liqada çıxış edən futbolçuların dünya və Avropa çempionatlarında iştiraklarına əngəl olmayacaq. Axı kim sənə bu səlahiyyəti verib ki, belə bir bəyanat verirsən?! Əgər UEFA qərar versə, həmin futbolçular necə iştirak edə bilərlər axı?! Mən düşünürəm ki, bu məsələnin sonunda sağlam düşüncə qalib gələcək. İnanıram ki, bu gün dünyaca tanınmış klublar sabahkı aqibətlərini dərketmə gücünü özlərində tapacaqlar. Mənə görə, bu, futbola qarşı edilmiş böyük bir düşmənçilikdir”.

Rövşən Binnətlinin geniş şərhinə audiofaylda qulaq asa bilərsiniz

74
Teqlər:
klublar, UEFA, futbol
AFFA-nın binası, arxiv şəkli

Bu bəyanat Superliqanı elə "beşikdə" boğa bilər...

28
(Yenilənib 14:09 20.04.2021)
"Mançester Yunayted", "Mançester Siti", "Arsenal", "Liverpul", "Tottenhem" və "Çelsi", "Real" (Madrid), "Barselona", "Atletiko" (Madrid), "Yuventus", "Milan" və "İnter" klubları imzaladıqları müqavilə ilə Super Liqanın yaradıldığını bəyan ediblər.

BAKI, 20 aprel — Sputnik. Azərbaycan Futbol Federasiyaları Assosiasiyası (AFFA) olaraq özündə separatçılığı ehtiva edən istənilən fəaliyyəti şiddətlə qınayırıq. Sputnik Azərbaycan xəbər verir ki, bu barədə AFFA-nın yaydığı məlumatda bildirilir.

"UEFA aprelin 18-də bəyanat yayaraq bildirib ki, İngiltərə Futbol Assosiasiyası və Premyer Liqa, İspaniya Futbol Federasiyası və La Liqa, İtaliya Futbol Federasiyası və Serie A məlumat əldə edib ki, qeyd olunan çempionatlarda çıxış edən bəzi klublar tərəfindən yeni Super Liqanın yaradılmasının elan olunması gözlənilir.

Həmin gün İngiltərənin "Mançester Yunayted", "Mançester Siti", "Arsenal", "Liverpul", "Tottenhem" və "Çelsi", İspaniyanın "Real" (Madrid), "Barselona", "Atletiko" (Madrid), İtaliyanın "Yuventus", "Milan" və "İnter" klubları imzaladıqları müqavilə ilə Avropada yeni turnirin – Super Liqanın yaradıldığını bəyan ediblər.

Azərbaycan Futbol Federasiyaları Assosiasiyası, Peşəkar Futbol Liqası və Azərbaycan Premyer Liqasında iştirak edən klublar FIFA və UEFA tərəfindən tənzimlənən bütün mövcud Nizamnamə və Əsasnamələrə sadiq olduğunu, bütün futbol yarışlarının beynəlxalq səviyyədə tanınan qanunlar çərçivəsində keçirilməsini, futbolda idman prinsiplərinin rəhbər tutulmasını, mövcud vəziyyətdə UEFA ilə həmrəy olduğunu və və UEFA-nı birmənalı şəkildə dəstəklədiyini bildirir. Avropa futbolunun əsas dəyərləri həmrəylik, ədalətli oyun və sosial məsuliyyətdir və bu proses uzun illərdir uğurla davam edir. Bir daha bəyan edirik ki, Azərbaycan Futbol Federasiyaları Assosiasiyası olaraq özündə separatçılığı ehtiva edən istənilən fəaliyyəti şiddətlə qınayırıq", - deyə məlumatda bildirilir.

28
KT, arxiv şəkli

Rusiyada bir gündə 400-ə yaxın adam koronavirusdan öldü

0
(Yenilənib 17:40 21.04.2021)
Rusiyada bu xəstəliyə yoluxanların sayı 4727125-ə çatıb. Rusiyada pandemiya yayılandan 106706 nəfər COVID-19-dan vəfat edib.

BAKI, 21 aprel — Sputnik. Son bir sutka ərzində Rusiyada 8271 koronavirusa yeni yoluxma halı aşkarlanıb. Sputnik Azərbaycan Rusiya Operativ Qərargahına istinadən xəbər verir ki, bir gün ərzində qonşu ölkədə 399 nəfər ölüb.

Ümumilikdə, Rusiyada bu xəstəliyə yoluxanların sayı 4727125-ə çatıb. Rusiyada pandemiya yayılandan 106706 nəfər COVID-19-dan vəfat edib. Ölkədə bu virusdan sağalanların sayı 4352873-ə çatıb.

Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus dünyanın əksər regionları və ölkələrində yayılıb. Dünyada koronavirus infeksiyasına indiyədək yoluxanların sayı 142,9 milyonu keçib, 3 milyondan çox adam isə virus səbəbi ilə ölüb.

Ümumdünya Səhiyyə Təşkilatı (ÜST) fevralın 11-də infeksiyanın törətdiyi xəstəliyin adını COVID-19 qoyub, martın 11-də isə koronavirusu pandemiya elan edib.

0
Teqlər:
Rusiya, Koronavirus, epidemiya, COVID-19