Reynaldo Silva

“Qarabağ”ın əfsanəsi geri qayıtdı, amma oyununa ciddi şübhələr var

5860
(Yenilənib 20:42 19.12.2018)
"Reynaldo əvvəlki müqavilədən daha aşağı qiymətə oynamağa razı olub"

Təranə Xudabaxşiyeva, Sputnik Azərbaycan

BAKI, 19 dekabr — Sputnik. "Qarabağ" klubu 2019-cu il öncəsi ilk transferini reallaşdırıb. Belə ki, klubunun azarkeşlərinə və futbol camesinə heç də yad olmayan braziliyalı futbolçu Reynaldo Silva iki illik fasilədən sonra yenidən "Qarabağ"ın formasını geyinəcək. Silva ilə müqavilənin imzalanması isə hər kəsin marağına səbəb olub.

Sputnik Azərbaycan-ın əməkdaşı idman mütəxəssislərindən yeni transferin kluba nə kimi uğurlar gətirəcəyini soruşub.

"Qarabağ" FK-nın mətbuat xidmətinin rəhbəri Nurlan İbrahimov braziliyalı futbolçu Reynaldo Silvanın kluba yenidən geri dönməsi məsələsinə aydınlıq gətirib: "Reynaldo Silva 22-23 yaşı olanda "Qarabağ"a transfer olub və 4 il klubun formasını geyinib. Etiraf etməliyik ki, Reynaldo karyerasının ən yaxşı vaxtlarını bizim klubda keçirib. Hətta 21 qolla komandanın bombardiri olub. Biz istənilən futbolçu ilə yollarımızı ayıranda xoş münasibətlə ayrılırıq. 2016-cı ildə kluba dəyişiklik lazım olduğundan Reynaldo ilə də qarşılıqlı anlaşma yolu ilə yollarımızı ayırmışdıq".

"O, istər Azərbaycan, istər xarici mətbuatda həmişə "Qarabağ" klubu haqqında xoş sözlər deyib. Reynaldonun Qazaxıstanın "Aktobe" klubu ilə müqaviləsi bu il bitdi və o, sərbəst futbolçu oldu. O, noyabrda Azərbaycana dəvət olunmuşdu. Jurnalistlərə açıqlamasında yenə də "Qarabağ" haqqında xoş sözlər demişdi. Bundan sonra biz də onu geri qaytarmaq fikrinə düşdük. Keçmiş yaxşı futbolçumuzu yenidən kluba qəbul etdik və şərtlər uyğun gəldi, müqavilə imzaladıq" – deyə klubun sözçüsü əlavə edib.

N.İbarhimov müqavilənin şərtlərindən də söz açıb: "Reynaldo ilə iki il yarıma qədər müqavilə bağlanılıb. Müqavilənin zamanı gedişatdan asılı olacaq. İki tərəfdən biri narazı olarsa, müqaviləyə daha tez xitam verilə bilər. Qeyd edim ki, Reynaldo əvvəlki müqavilədən daha aşağı qiymətə oynamağa razı olub. Onun indiki məqsədi pul yox, əvvəlki formasını qazanıb, yenə də "Qarabağ" azarkeşlərini sevindirməkdir. Hətta Reynaldo klubun digər üzvlərindən daha tez məşqlərə start verəcək".

Reynaldonun bu gün əvvəlki formada olmaması da medianın diqqətindən yayınmayıb. N.İbrahimov bu barədə deyilənlərə də münasibət bildirib: "Reynaldonun uğur qazanacağına inandığımız üçün yenidən klubumuza dəvət etmişik. O, komandamızı tanıyır. Bəli, etiraf etməliyik ki, əvvəlki formada deyil, amma onun necə nəticə verəcəyini zamanla görə biləcəyik".

Yeni transferlə bağlı "Komanda" saytının baş redaktoru Rəşad Ergün də münasibətini öyrəndik. O, Reynaldonun "Qarabağ"a qaytarılmasını müsbət qiymətləndirdi: "Avropa Liqasının qrup oyunları göstərdi ki, İnnosent Emeqara və Con Delarjın transferi "Qarabağ"a heç nə qazandırmadı. Komanda qrup mərhələsində qol vurmaq baxımından ciddi sıxıntı yaşadı. Bu baxımdan Reynaldonun geri dönüşünü müsbət saymaq olar".

"Braziliyalı hücumçu "Qarabağ"ı yaxşı tanıyır və uyğunlaşmaq problemi də yoxdur. Reynaldo ilə bağlı narahatedici məqam onun zədəyə meylli olmasıdır. Amma düşünürəm ki, hətta bu məqam da, onun Emeqara və Delarjdan daha faydalı olmasına əngəl yaratmayacaq. "Qarabağ" yəqin ki, Emeqara və Delarjı yola salacaq" – deyə, Ergün əlavə edib.

Qarabağ klubunun azarkeşi Rəfiqə Əzizin isə Reynaldodan hazırda heç bir böyük gözləntisi yoxdur: "Son illər Reynaldonun göstərdiyi oyun və həyat tərzindən, üstəlik yaşını da nəzərə alsaq, bilirəm ki, komandada əvvəlki effekti yarada bilməyəcək. Amma sevinirəm, çünki Rey bizə doğma addır. Bir çox uğurlarda pay sahibidir. "Qarabağ" onu həmişə ailəsinin bir üzvü kimi qəbul edib. Ümid edirəm ki, tezliklə yenidən heyətə, məşqçiyə, buradakı rejimə alışar və bol-bol qol vurar".

Qeyd edək ki, Reynaldo Silva Premyer Liqada 87 oyun keçirib, 43 qol vurub. Futbolçu, ümumilikdə, "Qarabağ" klubunda keçirdiyi 134 oyunda 61 qol vurmağı bacarıb. Avrokuboklarda 11 qol vuraraq Azərbaycan klubları üçün bombardir futbolçu kimi rekorda imza atıb. Qarabağ klubunda oynadığı zaman 3 dəfə Azərbaycan çempionu adını qazanıb. 2013-14 illərdə isə 22 qolla Premyer Liqanın bombardiri olub.

5860
Teqlər:
futbol, Qarabağ, Reynaldo
Əlaqədar
Reynaldo yenidən "Qarabağ"da
Azərbaycan millisinin yarımmüdafiəçisi Qara Qarayev, arxiv şəkli

Qara Qarayev: "Kəndimin işğaldan azad olunmasını sözlə ifadə edə bilmirəm"

149
(Yenilənib 22:47 27.09.2020)
Azərbaycan millisinin də üzvü olan Qara Qarayev Horadiz kəndində doğulub. Kənd onun 1 yaşı olarkən - 1993-cü ildə işğal edilib.

BAKI, 27 sentyabr - Sputnik. "Bu, həyatımın ən unudulmaz günüdür. Valideynlərimin, nəslimin doğma kəndinə qayıdacağı xəbəri mənim üçün çox önəmli bir hadisədir. Doğma kəndimin düşmənlərdən azad edilməsini sözlərlə ifadə edə bilmirəm".

Sputnik Azərbaycan "Report"a istinadən xəbər verir ki, bu fikirləri "Qarabağ"ın futbolçusu Qara Qarayev Füzulinin Horadiz kəndinin işğaldan azad olunması ilə bağlı danışarkən deyib.

28 yaşlı yarımmüdafiəçi həsrətində olduğu torpaqlara ayaq basacağı günü səbirsizliklə gözlədiyini bildirib: "İnanıram ki, bu, son deyil. Tezlikdə Qarabağda, Şuşada Azərbaycan bayrağı dalğalanacaq. Ordumuzla, xalqımızla qürur duyuram. Bu gün birlik, bərabərlik günüdür. Allah sizi qorusun, Azərbaycan əsgəri"!

Qeyd edək ki, Azərbaycan millisinin də üzvü olan Qara Qarayev Horadiz kəndində doğulub. Kənd onun 1 yaşı olarkən - 1993-cü ildə işğal edilib.

149
Teqlər:
Qarabağ FK, Qara Qarayev, Horadiz, Cəbrayıl, erməni təxribatı, Azərbaycan Ordusu, Dağlıq Qarabağ münaqişəsi, Dağlıq Qarabağ
Əlaqədar
Azərbaycan Odusunun uğurlu əməliyyatı nəticəsində bir sıra kəndlərimiz azad edilib
Azərbaycan Ordusu daha bir kəndi erməni işğalından azad edib
MN: Ermənistanın Ağdərə istiqamətindəki komandanlığına təslim olmaq təklif edilib
Ordumuz Ermənistanın hərbi texnikalarını belə məhv edir – VİDEO
Ermənistan təxribatı nəticəsində bir ailənin 5 üzvü həlak olub
Ermənistan ordusunun mərmiləri Tərtərdə evləri viran etdi - FOTO
Ermənistan ordusunun silah-sursat anbarı məhv edilib - VİDEO
 Mario Balotelli, arxiv şəkli

Məşhur futbolçu evlənməyə hazırlaşır

7
(Yenilənib 14:43 26.09.2020)
Məşhur futbolçu 1 aydır ki, münasibətdə olduğu model və "Instagram" fenomeni Alessia Messina ilə ailə qurmağa hazırlaşır.

BAKI, 26 sentyabr — Sputnik. İtaliyalı tanınmış qaradərili futbolçu ailə qurmağa hazırlaşır.

Sputnik Azərbaycan-ın Türkiyə mediasına istinadən xəbərinə görə, İtaliyanın ən çox gündəmdə olan futbolçusu Mario Balotelli evlilik hazırlıqlarına başlayıb. Məşhur hücumçu 1 aydır ki, münasibətdə olduğu model və "İnstagram" fenomeni Alessia Messina ilə ailə qurmağa hazırlaşır.

Qeyd edək ki, məşhur cütlük artıq nişanlanıb.

 

7
Məktəbdə tədris prosesi

Hərbi vəziyyətdə təhsilə necə davam edəcəyik - Nazirlik aydınlıq gətirir

36
Cəbhə bölgəsində yerləşən 444 məktəbdə hərbi əməliyyatlar səbəbindən həftəlik dərs cədvəllərinə dəyişiklik edilib.

Zülfiyyə Quluyeva, Sputnik Azərbaycan

BAKI, 28 sentyabr — Sputnik. Bu gün saat 00:00-dan etibarən Azərbaycan ərazisində hərbi vəziyyət elan edilib. Qanunvericilikdə hərbi vəziyyət dövründə bir sıra tədbirlərin həyata keçirilməsi nəzərdə tutula bilər. Bu tədbirlər sırasına rabitədən istifadə üçün xüsusi qaydalara riayət olunması, telekommunikasiya şəbəkə, qurğu və obyektlərinin, poçt obyektlərinin fəaliyyətinin sabitliyinin təmin olunmasına nəzarətin gücləndirilməsi və təhsil müəssisələrinin iş rejiminin dəyişdirilməsi, yaxud fəaliyyətinin dayandırılması da daxildir. Qeyd edək ki, bu tədris ilindən koronavirus pandemiyasına görə, ali təhsil müəssisələrində tədris tamamilə onlayn, orta təhsil müəssisələrində isə hibrid təşkil olunur. Ermənistan silahlı qüvvələrinin Azərbaycanın yaşayış məntəqələrini və hərbi mövqelərini atəşə tutması nəticəsində bu hücumların qarşısının alınması məqsədilə Azərbaycan Ordusunun əks-hücum əməliyyatlarına başlaması ilə əlaqədar artıq dünəndən etibarən Nəqliyyat, Rabitə və Yüksək Texnologiyalar Nazirliyi ölkə üzrə internetin verilməsində məhdudiyyətlər tətbiq edir. Nazirliyin yaydığı məlumatda qeyd olunur ki, Azərbaycan vətəndaşlarının münaqişə vəziyyətində internetlə bağlı yarana biləcək məhdudiyyətlər səbəbindən anlayış göstərəcəklərinə ümid edilir. Sputnik Azərbaycan belə bir şəraitdə onlayn dərslərin necə davam etdiriləcəyini, mövcud problemdən çıxış yollarını arayıb.

Təhsil Nazirliyi yanında İçtimai Şuranın sədri, professor Şahlar Əsgərov Sputnik Azərbaycan-a açıqlamasında bildirib ki, hazırda ölkəmiz müharibə şəraitindədir, amma bununla belə təhsil unudulmamalıdır: "Müəyyən dəyərlər sistemi var. Bu dəyərlərdən biri də təhsildir. Amma sağlamlıq tamamilə başqa bir dəyərdir. Sağlamlıq təhsildən öndə durur. Pandemiya və müharibə şəraiti müvəqqətidir. Əminəm ki, biz bu iki müharibədən qalib çıxacağıq. Düzdür, bu gün internetə məhdudiyyətlərin tətbiq edilməsi təhsilimizin onlayn da olsa davam etdirilməsini əngəlləyir. Təhsilimizdə bir sınma dövrü müşahidə olunur. Amma bu çox müvəqqətidir. Həmçinin də nəzərə alaq ki, boş bir məsələyə görə sınmır. Torpaqlarımızın bütövlüyü naminə sınır, axsayır. Əminəm ki, Azərbaycanın təhsil ictimaiyyəti, Azərbaycan müəllimi bu çətin dövrü də arxada qoyacaq. Təbii ki, belə bir vəziyyətdə dərslərin onlayn davam etdirilməsi mümkün deyil. Ona görə də, şagirdlər ancaq televiziyalardan "Dərs vaxtı"nı izləyə bilərlər. Qeyd edim ki, teledərslər Təhsil Nazirliyi tərəfindən məhz internetin olmadığı şərait üçün yayımlanır. "Teledərslər"in şagirdlərə istiqamətverici təsiri var. Ona görə də, hazırda çıxış yolu televiziyadan yayımlanan dərsləri izləməkdir. Amma bununla belə, müəllimlər də öz şagirdləri ilə əlaqə 

saxlamalı, dərsdə başa düşməyən məqamları onlara izah etməlidirlər. Demək olar ki, hazırda təhsilin davam etməsi üçün yeganə çıxış yolu budur".

Təhsil Nazirliyindən isə Sputnik Azərbaycan-a bildiriblər ki, şagirdlərimizin hazırkı vəziyyətdə "Mədəniyyət" və "ARB Günəş" televiziya kanalları vasitəsilə yayımlanan və bütün fənləri əhatə edən teledərsləri izləməyi tövsiyə olunur: "Ötən gündən başlayaraq təcavüzkar Ermənistanın silahlı qüvvələri Azərbaycana qarşı növbəti hərbi təxribata başlayıb və xüsusilə də mülki əhalinin sıx yaşadığı əraziləri ağır silahlardan atəşə tutub. Ermənistan silahlı qüvvələrinin yaşayış məntəqələrimizi və sosial obyektləri atəşə tutması nəticəsində mülki əhali arasında itkilərimiz olub, çoxsaylı evlərə və mülki obyektlərə, o cümlədən cəbhə bölgəsində yerləşən təhsil müəssisələrinə ciddi ziyan dəyib. Bu, həmin ərazilərdə yerləşən təhsil müəssisələrində tədris prosesinə də öz təsirini göstərib. Belə ki, cəbhə bölgəsində yerləşən 444 məktəbdə hərbi əməliyyatlar səbəbindən həftəlik dərs cədvəllərinə dəyişiklik edilib. Cəbhə bölgəsində olan ümumi təhsil müəssisələri istisna olmaqla digər təhsil müəssisələrimizdə əyani formada dərslər uyğunlaşdırılmış cədvəl üzrə davam etdirilir. Distant (məsafədən) dərslərə gəldikdə isə, ölkə üzrə internetin verilməsində məhdudiyyətlərin tətbiq edilməsi səbəbindən mümkün fasilələrin olmasını anlayışla qarşılamağınızı xahiş edirik. Şagirdlərimizin hazırkı vəziyyətdə "Mədəniyyət" və "Arb Günəş" televiziya kanalları vasitəsilə yayımlanan və bütün fənləri əhatə edən teledərsləri izləməyi tövsiyə olunur. Cəbhə bölgəsindən gələn qələbə xəbərləri münasibətilə xalqımızı təbrik edir, igid Azərbaycan əsgərinə "Zəfər sənindir!" deyirik".

Məlumat üçün bildirək ki, "Dərs vaxtı"na ekran qarşısında baxa bilməyənlər keçirilmiş dərsləri Təhsil Nazirliyinin rəsmi "Youtube" kanalı ilə yanaşı, "Facebook" səhifəsindən, videodərslər portalından (https://video.edu.az/), eyni zamanda "Təhsil" televiziyasının "Facebook" səhifəsindən izləmək imkanı əldə edə bilərlər.

Xatırladaq ki, Ermənistan Respublikasının silahlı qüvvələrinin beynəlxalq hüquq normalarını kobud surətdə pozaraq, müxtəlif növ silahlardan, o cümlədən ağır artilleriyadan istifadə etməklə bir neçə istiqamətdən Azərbaycan Respublikasının yaşayış məntəqələrini və hərbi mövqelərini atəşə tutması, nəticədə mülki şəxslər və hərbiçilər arasında ölən və yaralananların olması, bu hücumların qarşısının alınması məqsədilə Azərbaycan Ordusunun əks-hücum əməliyyatlarına başlaması nəzərə alınaraq, sentyabrın 28-də saat 00:00-dan etibarən Azərbaycan ərazisində hərbi vəziyyət elan edilib.

36