BAKI, 4 noyabr — Sputnik. Vaşinqtonun Əsas Futbol Liqasında (MLS) çıxış edən "Di Si Yunayted" klubunun hücumçusu Ueyn Runi vida matçı keçirmək üçün futbol üzrə İngiltərə milli komandasında çıxışını bərpa edəcək.
“Report” xəbər verir ki, 33 yaşlı futbolçu noyabrın 15-də Londonda ABŞ və İngiltərə milli komandaları arasında keçiriləcək yoldaşlıq oyununda iştirak edəcək.
Runi kapitan sarğısında komandanı "Uembli" stadionuna çıxaracaq. Bu görüş onun üçün yığmada 120-ci olacaq.
Runi 2017-ci ilin yayında İngiltərə millisində karyerasını başa vurduğu elan edib. O milli komandada 2003-cü ildə debüt edib və hesabında 53 qolla yığma tarixinin ən yaxşı bombardiridir.
