Azərbaycan-Norveç qarşılaşması

Azərbaycan-Norveç qarşılaşması ilə bağlı rüşvət iddiaları ortaya çıxıb

663
Sosial şəbəkədə, millimizin qələbəsinin pul hesabına əldə olunduğu fikirləri səslənsə də, peşəkarlar bu ehtimalı mümkünsüz sayırlar

BAKI, 10 okt — Sputnik. 2018-ci il Dünya Çempionatının seçmə mərhələsi çərçivəsində milli komandamız Norveç yığmasına qalib gəlib. Millinin bu qələbəsindən sonra sosial şəbəkələrdə müxtəlif müzakirələr açılıb. Əksəriyyət millimizin uğurundan dolayı sevincini ifadə etsə də, bir qisim sosial şəbəkə istifadəçisi AFFA-nın oyunu pulla aldığını iddia edib.

Bəs peşəkarla bu haqda nə düşünürlər? Sputnik bu mövzuya aydınlıq gətirməyə çalışıb.

Samir Əliyev — milli komandanın sabiq oyunçusu: "İstəməzdim, belə söhbətlər olsun. Meydana çıxıb, əziyyət çəkib qələbə qazanan futbolçuların əziyyətini yerə vurmaq düzgün deyil. Fikrimcə, layiqli qələbə qazanıblar. Kənardan nə danışırlar, danışsınlar. Mən belə söhbətlərə inanmıram. Bununla belə, millimizin növbəti mərhələyə keçməsi asan olmayacaq. Qarşıda bizi çətin oyun gözləyir. Çexiya ilə çətin oyun haqqında düşünməliyik. Qazandığımız iki qələbə bizim hələ tam güclü olmağımız anlamına gəlmir".

Arif Əsədov — "Neftçi"nin keçmiş məşqçisi: "Bu cür səviyyələrdə oyunu pulla almaq mümkün deyil. Biz görmüşük ki, futbolda ya qələbə qazanmaq olar, ya da məğlubiyyət. Pulla qələbə qazanmaq mümkün deyil. Burada millimiz əziyyət çəkərək qələbə qazanıb. Ona görə də uğur millimizindir. Biz komandamızı Fransa, Almaniya, İtaliya və digər güclü komandalarla bir tuta bilmərik. Və komandamızdan hər oyunda qələbə gözləmək də düzgün deyil. Ona görə də hər qazanılan qələbə bizim üçün uğurdur. Çexiya ilə qarşılaşmaya gəlincə, düşünmürəm ki, millimiz açıq futbola və ya hücuma üstünlük verəcək".

Rəşad Ergün — Komanda.az saytının baş redaktoru: "Mən Azərbaycan insanının pul gücünə çox şey edəcəyinə inanıram. Azərbaycan çempionatlarında da oyun alveri olub, olur, olacaq da. Amma sırf Norveçlə oyundan danışırıqsa, açığı, AFFA-nın bu oyunun taleyini pul gücünə həll etməsi haqda iddialara qatılmıram. Bu cür oyunlara nəzarəti azərbaycanlılar etmir, yüksək səviyyədə nəzarət olur. Həm də biz milli komandadan danışırıq. O komandadan ki, hər ölkənin futboldakı kimliyi, başqa cür desəm, şəxsiyyət vəsiqəsidir. Norveçlilər öz milli kimliklərini AFFA-nın puluna satarmı? Buna inanmıram. Sadəcə, futbolda belə nəticələr olur. Rəqib daha yaxşı oynayır, amma sən təsadüfi və ya qarşındakının yol verdiyi yeganə ciddi səhv hesabına qol vurub, qələbə qazanırsan. Azərbaycan millisi Norveçlə görüşdə yaxşı futbol göstərmədi, amma qələbə qazandı. Bu, millimizin gücləndiyi anlamına gəlməməlidir. Nə dəyişib ki, millimizdə? Yenə həmin futbolçulardır, yenə ötən seçmə mərhələ sonlarını bərbad keçirən baş məşqçi — Robert Prosineçkidir. Çexiya ilə qarşılaşmadan isə yaxşı nəticə gözləyirəm. Qələbə, hətta heç-heçə də əldə edə bilərik. Bu, futboldur. Amma qələbəni necə əldə edirsən — əsas budur. Mən Azərbaycan millisində böyük ölçüdə nəyinsə dəyişdiyini görmürəm".

663
Teqlər:
Rəşad Ergün, Norveç, dünya çempionatı, Arif Əsədov, AFFA, Samir Əliyev, yığma, komanda, yarış, Azərbaycan, futbol
Əlaqədar
Rövnəq Abdullayev: Komandamızın heç kimdən əskikliyi yoxdur
Milli komandamız 137-ci pillədə qərarlaşıb
Azərbaycan yığması güləş üzrə dünya çempionatını ikinci yerdə başa vurub
Futbol üzrə Azərbaycan yığması seçmə mərhələyə qələbə ilə başlayıb
Azərbaycanın paralimpiya yığması Braziliyadadır
Qalatasaray azarkeşləri, arxiv şəkli

Türkiyənin məşhur klubundan şəhidimizlə bağlı jest

27
(Yenilənib 21:08 24.11.2020)
"Qalatasaray"ın növbəti oyunlarından birində stadionda şəhidimiz Muradın səs yazısı səslənəcək, oyunçular Fərid yazılı forma ilə oyuna çıxacaqlar.

BAKI, 24 noyabr — Sputnik. "Qalatasaray"ın növbəti oyunlarından birində stadionda şəhidimiz Murad Məmmədovun səs yazısı səslənəcək, oyunçular Fərid yazılı forma ilə oyuna çıxacaqlar. Sputnik Azərbaycan-ın məlumatına görə, bu barədə CBC Sportun idman şərhçisi Gündüz Abbaszadə məlumat yayıb. O bildirib ki, şəhidin ailəsi "Qalatasaray"ın oyununa dəvət olunacaq. Klub şəhidimizin məzarını ziyarət edəcək: ""Qalatasaray" prezidentinin köməkçisi Yusuf Günay bir az əvvəl telefon danışığımızda mənə bunları dedi. Fərid və Muradın ailəsinin nömrələrini də istədi. Tapdıq, göndərdik. Bununla yanaşı, Türkiyə TV-lərində bu haqda xəbərlər olacaq. Ümid edirəm, ruhları şaddır!"

Xatırladaq ki, Vətən müharibəsində torpaqlarımızın azad edilməsi uğrunda qəhrəmancasına döyüşərək şəhid olan Fərid Dursunovun son istəklərindən biri azarkeşi olduğu Türkiyənin "Qalatasaray" klubu ilə bağlı olub. Qax rayonundan olan Fərid "Şəhid olsam, məzarıma Azərbaycan bayrağı ilə yanaşı "Qalatasaray"ımın bayrağını da asarsınız", - deyə dostlarından xahiş edib. Şəhidlik zirvəsinə ucalandan sonra isə yoldaşları onun bu istəyini yerinə yetiriblər. Qəhrəmanımızın məzarına üçrəngli Azərbaycan bayrağı ilə yanaşı, "Qalatasaray" bayrağı da asılıb. Eyni zamanda sosial şəbəkələrdə gəncin dostları və digər fəallar məsələ ilə bağlı "Qalatasaray" klubunun rəhbərliyinə məlumat verdiklərini bildiriblər. Qeyd edilib ki, klub rəsmiləri də şəhidin xatirəsini əbədiləşdirmək məqsədilə müəyyən rəsmi addımlar atacaqlarını vurğulayıblar.

27
Teqlər:
bayraq, arzu, Qax, azərbaycanlı, şəhid, "Qalatasaray" futbol klubu, Türkiyə
Azərbaycanlı şahmatçı Teymur Rəcəbov, arxiv şəkli

Teymur Rəcəbov Levon Aronyana qalib gəlib

38
Ağ fiqurlarla oynayan Rəcəbov qələbə qazanıb. Bununla da Teymur 7 oyundan sonra xal hesabını 3,5-ə çatdırıb.

BAKI, 23 noyabr - Sputnik. Onlayn şahmat üzrə “Skilling Open” turniri davam edir.

Apasport.az saytının məlumatına görə, Azərbaycan qrossmeysteri Teymur Rəcəbov VII turda prinsipial qarşılaşmaya çıxıb.

Şahmatçımız ermənistanlı Levon Aronyanla qarşılaşıb. Ağ fiqurlarla oynayan Rəcəbov qələbə qazanıb. Bununla da Teymur 7 oyundan sonra xal hesabını 3,5-ə çatdırıb.

Qeyd edək ki, turnirin əsas mərhələsində 16 şahmatçı bir dövrəlik dairəvi sistemlə mübarizə aparır. Üçgünlük mübarizədən sonra pley-off start götürəcək.

38
Teqlər:
şahmat turniri, Teymur Rəcəbov, qalib, qələbə, şahmat
Azərbaycan hərbçiləri, arxiv şəkli

Müzəffər Ordumuz artıq Kəlbəcərdə!

75
(Yenilənib 01:14 25.11.2020)
Bölmələrimizin bu istiqamətdə hərəkətini təmin etmək məqsədilə mühəndis işləri başa çatdırılıb, qoşunların hərəkət marşrutu üzrə çətin keçilən dağ yolları minalardan təmizlənir və istifadəyə hazır vəziyyətə gətirilir.

BAKI, 25 noyabr - Sputnik. Azərbaycan Respublikası, Rusiya Federasiyası Prezidentləri və Ermənistan Respublikası baş nazirinin imzaladığı üçtərəfli Bəyanata əsasən, Azərbaycan Ordusunun bölmələri noyabrın 25-də Kəlbəcər rayonuna daxil olub.

Sputnik Azərbaycan bildirir ki, məlumatı Azərbaycan Müdafiə Nazirliyi yayıb. Bölmələrimizin bu istiqamətdə hərəkətini təmin etmək məqsədilə mühəndis işləri başa çatdırılıb, qoşunların hərəkət marşrutu üzrə çətin keçilən dağ yolları minalardan təmizlənir və istifadəyə hazır vəziyyətə gətirilir.
Gün ərzində Kəlbəcərdən foto və video materiallar təqdim olunacaq.

75
Teqlər:
Azərbaycan ordusu, Qarabağ, Kəlbəcər rayonu