Boks əlcəyi

Daha bir boksçumuz Rio Olimpiadasına vəsiqə qazanıb

14
(Yenilənib 23:22 15.04.2016)
Boksçularımız Rio Olimpiya oyunlarına dördüncü lisenziyanı qazanıblar.

BAKI, 15 apr — Sputnik. Azərbaycan yığması Türkiyənin Samsun şəhərində keçirilən boks üzrə Avropa Olimpiya Təsnifat Turnirində ardıcıl dördüncü lisenziyasını qazanıb.

Apasport.az saytının məlumatına görə, Yana Alekseyevna (60 kq), Cavid Çələbiyev (56 kq) və Lorenzo Sotomayorun (64 kq) ardınca Məhəmmədrəsul Məcidov da Rioya vəsiqəyə sahib olub.

+91 kq çəki dərəcəsində gücünü sınayan boksçumuz yarımfinalda Türkiyə təmsilçisi Aliərən Dəmirəzərlə qarşılaşıb. Rəqibi qarşısında çətinlik çəkməyən atletimiz 3:0 (30:27) hesabı ilə qalib gələrək, finala vəsiqə qazanıb. Bu isə həlledici görüşün nəticəsindən asılı olmayaraq, onun Braziliyaya yollanmaq yolunda “yaşıl işıq” yandırıb.

Final döyüşləri sabah keçiriləcək.

Qeyd edək ki, bununla da Braziliyada keçiriləcək Yay Olimpiya Oyunlarına lisenziyalarımızın sayı 38-ə, Rioya yollanacaq idmançılarımızın sayı isə 39-a çatıb.

Məcidovdan öncə Olqa İsmayılova, Maksim Averin (hər ikisi velosiped idmanı), Maksim Şemberev (üzgüçülük), Patimat Abakarova (49 kq), Fəridə Əzizova (67 kq), Milad Beigi Harçeqani (80 kq), Radik İsayev (hamısı taekvondo, +80 kq), Oleq Stepko (idman gimnastikası), Marina Durunda (bədii gimnastika), Nazim Babayev (üçtəkanla tullanma), Hayle İbrahimov (5000 m), Anna Skidan (hər üçü atletika, çəkicatma), İnna Osipenko-Radomskaya (kayak, 500 m və 200 m), Valentin Demyanenko (kanoe, 200 m), Aleksandr Aleksandrov — Boris Yotov (akademik avarçəkmə, 200 m), Yuri Meqliç (kanoe-slalom), Yana Alekseyevna (60 kq), Elvin Məmişzadə (52 kq), Cavid Çələbiyev (56 kq), Albert Səlimov (60 kq), Lorenzo Sotomoyor (64 kq), Pərviz Bağırov (hamısı boks, 69 kq), Elvin Mürsəliyev (75 kq), Sabah Şəriəti (130 kq), Rövşən Bayramov (59 kq), Saman Təhmasibi (hamısı yunan-Roma güləşi, 85 kq), Mariya Stadnik (48 kq), Anjela Doroqan (53 kq), Yuliya Ratkeviç (qadın güləşi, 58 kq), Toğrul Əsgərov (65 kq), Məhəmmədhacı Xatiyev (86 kq), Xetaq Qazyumov (97 kq) və Camaləddin Məhəmmədov (sərbəst güləş, 125 kq) Olimpiadada iştirak hüququ qazanıb. Bununla yanaşı, kişilərdən ibarət ağırlıqqaldırma millimiz 4 vəsiqəyə sahib olub.

14
Zelim Kotsoyev, arxiv şəkli

Zelim Kotsoyev: “Azərbaycan vətəndaşlığı almaq istəyirəm, qız axtarıram”

13
(Yenilənib 01:16 15.04.2021)
“Böyük dəbilqə” seriyasından olan turnirin qalibi Antalyadakı uğurundan danışıb, Olimpiya Oyunları və şəxsi həyatı ilə bağlı planlarını bölüşüb.

BAKI, 15 aprel – Sputnik, Teymur Tuşiyev. Türkiyənin Antalya şəhərində “Böyük dəbilqə” seriyasından olan turnirdə qalibiyyəti Azərbaycanın 22 yaşlı osetin əsilli cüdoçusu Zelim Kotsoyev üçün hələlik ən böyük nailiyyətidir. Turnirdə o, Yaponiyadan olan dünya çempionu Aaron Volfa qalib gəlib.

Sputnik Azərbaycan-a müsahibəsində Kotsoyev Türkiyədəki qələbəsindən, azərbaycanlı cüdoçu Elmar Qasımovla rəqabətindən, Tokiodakı Olimpiya Oyunlarından və Azərbaycan vətəndaşlığı almaq istəyindən danışıb.

- Bu sizin “Böyük dəbilqə” seriyasından olan turnirdə ilk qələbənizdir. Çox dəyərlidir, yəqin.  

- Doğrudan, bu, mənim “Böyük dəbilqə”də ilk qələbəm idi. Əvvəllər ikinci-üçüncü yerləri tuturdum, həmişə nəsə çatmırdı. Qran-Pri də qazanmışam, amma “Böyük dəbilqə”də ilk dəfə uddum.

Ola bilər ki, əvvəllər hansısa fəndləri tam məşq etməmişəm, ya da cavan olmuşam. Bu dəfə isə finaldan öncə özümə dedim ki, artıq uduzmaq olmaz, buradan qızıl medalla dönməliyəm.

- Finaldakı rəqibiniz də güclü idi. Yaponiyanı təmsil edən dünya çempionu...

- Bəli, Aaron Volf çox güclü rəqibdir, iki dəfə ona uduzmuşam. Ancaq mən bu dəfə yaxşı hazırlaşmışdım, məşqçilərim məni görüşə əla kökləmişdilər.

Prinsipcə, bütün rəqiblərim titullu olublar. Məsələn, ilk rəqibim Olimpiya Oyunlarının mükafatçısı, Fransadan olan Avropa çempionu  Sirill Mare idi. Həmin görüşün vaxtından əvvəl bitməsinə rəğmən, ağır idi.

Sonra güclü xorvat Komriç, daha sonra elə də rahat olmayan avstraliyalı Taqaki vardı. Hesab edirəm ki, psixoloji cəhətdən daha yaxşı köklənənlər qələbə qazanırdılar.

Bu dəfə, hər şeydən əlavə, Daşkənddə təlim-məşq toplanışında yaxşı işlədik, nəticəsini də gördük.

- Azərbaycan yığmasında 100 kq-dək çəkidə uzun müddət 2016-cı il Olimpiadasının gümüş mükafatçısı Elmar Qasımov lider idi. İndi siz onu “kölgədə qoydunuz”.

- Elmarla münasibətlərimiz yaxşıdır, o, yaxşı oğlandır, daim ünsiyyətdəyik. Tatamidən qıraqda  qardaşıq. Ancaq tatamidə rəqibik. Bizimki sırf idman rəqabətidir, bu, hər ikimizi daha güclü edir.

Азербайджанский дзюдоист Зелим Коцоев, фото из архива
Azərbaycan cüdoçusu Zelim Kotsoyev

Yəqin, həmin gün bəxtim gətirib. Son vaxtlar Elmar əvvəlki kimi uğurla çıxış etmir. Bəlkə, yaşı öz sözünü deyir, ya da psixoloji cəhətdən yorğunluq var. Baxmayaraq ki, məşqlərdə çox çalışır, son zamanlar nəsə bəxti gətirmir.

- Yəni sizi artıq Azərbaycan yığmasının 100 kq-dək çəkidə birinci nömrəsi adlandırmaq olar?

- Antalyadakı turnirdən sonra bizim aramızdakı fərq min xala qədər artdı. Biz çoxdan Olimpiya Oyunlarına düşmə zonasındayıq, ancaq orada ikimizdən birimiz çıxış edə bilər.

Hələ iki il əvvəl onunla sözləşmişdik: oturub hansı turnirlərdə çıxış edəcəyimizi yazdıq. Razılaşdıq ki, reytinqdə kim yuxarıda olsa, Olimpiadaya da o gedəcək. Elmardan min xal qabağa düşdüyümə görə demək olar ki, Tokioya mən gedəcəm.

- O zaman artıq Olimpiadaya köklənirsiniz?

- Hə, bütün fikrim-zikrim Tokiodadır, özümü daim Olimpiya Oyunlarına kökləyirəm. Bu, uşaqlıq arzumdur, uşaqlıqdan da ona doğru gedirəm. Tokioya ancaq qızıl medal ardınca uçacam, Oyunlaradək bütün turnirlər – balaca addımlardır.

- Antalyada Yaponiya təmsilçisi Volfa qalib gəldiniz, Tokioda isə yerli cüdoçular bütün qızıl medallara sahiblənməyə çalışacaqlar.

- Onlar, yəqin, indi məni öyrənməyə, mənə qarşı hazırlaşmağa, köklənməyə başlayacaqlar. Mənim istəyim daha güclüdür, hələ artıracam da.

Deyə bilərəm ki, Tokioya gedib hamını mat qoymaq üçün mənim yaxşılaşdırılmış versiyam hazırdır. Üstəlik, yaşım da bunun üçün idealdır, özüm də hiss edirəm ki, artıq mənim vaxtım yetişib.

Bizim məşqçilər korpusumuz güclənib, yeni fəndlər hazırlayır, çox işləyirik. Ancaq irəliyədir hədəfimiz.

- Milliyyətcə osetinsiniz, Azərbaycan yığmasına necə düşdünüz?

- 2015-ci ildə Ukrayna millisinin kadetlər qrupunun tərkibində gənclər arasında Avropa çempionatını qazandım. Sonra isə Azərbaycan yığmasına gəldim. Burada mənim yerlilərim də çıxış edirdilər. Məsələn, dostum Xetaq Qazyumov (sərbəst güləş üzrə üçqat Olimpiya mükafatçısı – red.) Azərbaycanın necə gözəl ölkə olduğu, zəhmətin necə qiymətləndirilməsi və burada çox gözəl insanların yaşadığı haqda danışırdı. O qədər Azərbaycanı təriflədi ki, 2015-ci ildə Azərbaycana köçməyə qərar verdim, indiyədək də bu qərarımdan razıyam.

- Sizi Azərbaycan idmanında osetin ənənələrinin davamçısı adlandırmaq olar.

- (gülümsəyir)  Birmənalı şəkildə hə. Nümunə götürəcəyim adamlar var. Xetaqın uğurlarını davam etdirməyə çalışacam. Əsas odur ki, məni bu ölkədə sevirlər, mən də onu sevirəm. Burada çox adam mənə inanır, onların ümidlərini qırmaq istəmirəm. İstəyirəm ki, onlar mənim qələbələrimə sevinsinlər, Azərbaycanın bayrağını qaldıraraq bu ölkəni dünyada tanıtmağı arzulayıram.

- Azərbaycanda gəzməyi xoşladığınız yerlər var?

- Həftədə bir neçə dəfə Bakı bulvarını gəzirəm. Buranı çox sevirəm, bulvarda gəzintidən hədsiz zövq alıram. Torqovıya çıxışa qədər gəzirəm. Axşamlar ora lap əla olur, rahat hiss edirsən. Köhnə şəhəri gəzməyi də xoşlayıram.

- Xetaq Qazyumov karyerasını bitirdikddən sonra vətəninə qayıtdı. Onun kimi edəcəksiniz?

- Son iki ildə daim Azərbaycandayam. Heç evimizə də getmirəm. Ailəmi də Bakıya gətirmək fikrindəyəm, onları buna yavaş-yavaş hazırlayıram. Burada qalıb vətəndaşlıq almaq istəyirəm. Bura xoşuma gəlir, bu ölkəni sevirəm.

- Evli deyilsiniz?

- Hələ evlənməmişəm. Qız axtarıram.

- Azərbaycanlı qızlar arasında?  

- Hə, hə (gülümsəyir). Azərbaycan mentaliteti mənə yaxındır. Ona görə də fikirləşirəm ki, yerli qızlardan biri ilə evlənim. Görək, necə alınacaq. Hələ heç kimi bəyənə bilməmişəm, bütün vaxtımı idmana, məşqlərə sərf edirəm. Olimpiadadan sonra bu barədə ciddi fikirləşəcəm.

- Koronavirusa yoluxmuşdunuz, necə keçirdiniz xəstəliyi?

- Çox pis. Ağciyərlərimin 55%-i zədələnmişdi. Bir ay xəstəxanada oksigen balonu ilə yaşadım, iki həftədən çox qızdırmam oldu, qırx dərəcəyə yaxın. Həddən artıq arıqladım, uzun müddət də özümə gəlməyə çalışdım. Uşaq kimi təzədən yeriməyi öyrəndim. Allaha şükür, qayıda bildim, “Böyük dəbilqə”də də qazandım.

13
Teqlər:
müsahibə, idman, cüdo
Bakıda gimnastika üzrə üç irimiqyaslı yarışı

Dünya çempionatı kubokunun Bakıda keçirilməsinə icazə verilib

25
(Yenilənib 13:48 14.04.2021)
Cari ilin may ayında keçirilməsi nəzərdə tutulmuş hər üç yarış Azərbaycanda qəbul olunmuş karantin normalarına riayət olunmaqla təşkil olunacaq

BAKI, 14 aprel — Sputnik. Teymur Tuşiyev. Azərbaycan Respublikasının Nazirlər Kabineti cari ilin may ayında Bakıda gimnastika üzrə üç irimiqyaslı yarışın keçirilməsinə razılıq verib. Sputnik Azərbaycan Milli Gimnastika Federasiyasına istinadən xəbər verir ki, hər üç yarışın tamaşaçılarsız keçirilməsi şərt kimi irəli sürülüb.

Beləliklə, may ayının 7-9-da Milli Gimnastika Arenasında bədii gimnastika üzrə Dünya kuboku keçiriləcək. Bu turnir Tokio olimpiadasına seçmə yarış xarakteri daşıyır.

Bundan əlavə, may ayının 21-23-də elə həmin arenada müxtəlif yaş qruplarında idman aerobikası üzrə yarışlar təşkil olunacaq.

Mayın 27-29-da isə Bakıda idman aerobikası üzrə dünya çempionatı keçiriləcək.

Qeyd edək ki, adı çəkilən yarışların hələ ötən il keçirilməsi nəzərdə tutulurdu. Lakin koronavirus pandemiyası üzündən həmin yarışlar təxirə salınaraq 2021-ci ilə keçirilib.

Hər üç yarışma koronavirus pandemiyası zamanı tətbiq olunan sanitar-epidemioloji normalara riayət olunmaqla və boş tribunalar şəraitində keçiriləcək.

25
AstraZeneca peyvəndi, arxiv şəkli

Angela Merkel "AstraZeneca" ilə vaksinasiya olunacaq

0
Kansler prosedurun vacibliyini vurğulayaq bildirib ki, bəşəriyyət yalnız bu yolla pandemiyanın qarşısını ala bilər.

BAKI, 16 aprel — Sputnik. Almaniya Kansleri Angela Merkel cümə günü, aprel ayının 16-da "AstraZeneca" peyvəndi ilə vaksinasiya olunacaq. Bu barədə "Welt" nəşri məlumat yayıb.

Qeyd edək ki, Merkel bir qədər bundan əvvəl koronavirus infeksiyasına qarşı "AstraZeneca" preparatı ilə vaksinasiyaya hazır olduğunu, ancaq növbəsini gözlədiyini bildirmişdi.

Kansler bu prosedurun vacibliyini də vurğulayaq bildirib ki, bəşəriyyət yalnız bu yolla pandemiyanın qarşısını ala bilər.

Xatırladaq ki, Avropa Dərman Agentliyi "AstraZeneca"-nın qanda laxtalanmaya səbəb olduğunu rəsmi şəkildə təsdiqləyib. Agentliyin səlahiyyətli nümayəndəsi Marko Kavaleri İtaliya mətbuatına bu barədə açıqlama verib. "Məncə, artıq bunu söyləyə bilərik: açıq-aşkar qan laxtalanması ilə peyvənd arasında əlaqə var", – deyə o bildirib.

Maraqlıdır ki, Avropa Dərman Agentliyinin direktoru Emer Kuk isə bu barədə açıqlama verərək bildirmişdi ki, "AstraZeneca" peyvəndi tamamilə təhlükəsizdir: "Bu, çox effektli və təhlükəsiz peyvənddir. Peyvəndin insanları koronavirusdan qoruması ilə bağlı faydaları ehtimal olunan risklərindən daha çoxdur".

Bir müddət bundan əvvəl bir sıra ölkələr, o cümlədən, Danimarka, İsveç, Almaniya, Fransa və İtaliya sözügedən preparatla vaksinasiya prosesinə ara verib. Daha sonra Danimarka "AstraZeneca"-nın peyvəndinin tətbiqini tamamilə dayandırıb.

0