Bakıdakı Formula 1 yarışları

Formula 1: siyasi, iqtisadi hərbi dividendlər

221
Mütəxəssislərin fikrincə, mötəbər idman yarışının Bakıda keçirilməsi Azərbaycanın dünyadakı nüfuzundan xəbər verir: "Artıq paytaxtımız bu kimi yarışların keçirilməsi üçün ən ideal məkandır"

BAKI, 15 apr — Sputnik. "Danılmaz faktdır ki, hər keçirilən tədbir ölkə siyasətinin inkişafına təkan verən amillərdəndir". Bunu Sputnik-ə açıqlamasında, millət vəkili, Azərbaycan Kikboksinq Federasiyasının prezidenti Adil Əliyev deyib.

Onun sözlərinə görə, ölkəmizdə bir sıra önəmli beynəlxalq idman yarışlarının təşkili onun siyasi-iqtisadi nüfuzundan xəbər verir: "Eyni zamanda, Azərbaycan dövləti bununla da dünyaya sülh mesajını verir. Həmçinin, bu gün Azərbaycan dünyada beynəlxalq yarışların keçirilməsi üçün ən təhlükəsiz ölkə sayılır. Keçirilən tədbirlər də bunu təsdiqləyir. Qarşıda gözlənilən Formula 1 yarışlarının Bakı şəhərində keçirilməsi ölkəmizin beynəlxalq idman arenasında oynadığı rolu ilə əlaqədardır".

"Artıq Bakı şəhəri bu kimi yarışların keçirilməsi üçün ən ideal məkandır. Üstəlik, dünyada ölkəmizə baxış dəyişməkdədir. Çünki, idman özü təbliğat vasitəsidir", —deyə A. Əliyev söyləyib.

Deputat əlavə edib ki, ölkəmizə gələn turistlər və media mənsubları öz ölkələrində Azərbaycan haqqında hansısa məlumat verirlər: "Bu isə, Azərbaycanın tanıdılmasına böyük təsir göstərir".

Hər hansı ölkədə mötəbər yarış keçirilirsə, bu, həmin ölkəyə turist axını gətirir — yəni pul kütləsi. Bəzən isə yarış maraq kəsb etmir və ölkə istədiyi nəticəni əldə edə bilmir. Formula 1 yarışları iqtisadi cəhətdən ölkəyə nə qazandıracaq?

İqtisadçı-ekspert Nicat Hacızadə Sputnik-ə açıqlamasında bildirib ki, istənilən mötəbər idman oyunları keçirilən ölkələrdə məqsəd ümumi inkişafa dəstək verməkdir: "Azərbaycana böyük uğur gətirəcək Formula 1 yarışları Bakını mühüm iqtisadi şəhərə çevirə bilər. Formula 1 yarışlarına olan biletlərin 65 %-dən çoxunun xarici turistlərin payına düşməsi iqtisadi cəhətdən hesablanmış maraqlı addımdır".

"Dünyanın ən elitar idman növlərindən sayılan Formula 1 elitar təbəqənin insanlarını Bakıya gətirəcək. Bu da gələcəkdə iqtisadiyyata xeyir verəcək hər hansı bizneslərin təməlini qoya bilər. Nəzərə alaq ki, Bakı iqtisadi cəhətdən əlverişli şəhərdir", —deyə mütəxəssis vurğulayıb.

Dünyanın 200-dən çox ölkəsində yarışların canlı yayımla efirə gedəcəyini qeyd edən N. Hacızadənin sözlərinə görə, turistlərin gəlişi xarici valyutanın ölkəyə axınına səbəb olacaq: "Bu oyunlar gələcəkdə həm iqtisadi, həm imic cəhətdən böyük uğur gətirə bilər".

"Formula 1 kimi mötəbər bir yarışın Azərbaycanda keçirilməsinin Dağlıq Qarabağ münaqişəsini bizim xeyrimizə həll olunmasına böyük təsiri ola bilər. Belə yarışlara ev sahibliyi etməyimiz bizim dünyəvi bir ölkə olmağımızı hər kəsə sübut edəcək".

Bunu isə, yarışın qazandıracağı hərbi dividendləri Sputnik-ə şərh edən hərbi ekspert Üzeyir Cəfərov səsləndirib. "İstər Avropa oyunları, istər Formula 1 yarışları Azərbaycanın tanınması üçün gözəl imkandır. Və bu yarışlar vasitəsi ilə digər dövlətlərə özümüzü təsdiq etməklə, Qarabağın bizə aid olmasını dünyaya bir daha sübut edə bilərik. Bu, sadəcə bizim uğurumuzdur", —ekspert vurğulayıb.

Onun sözlərinə görə, istənilən beynəlxalq tədbir Azərbaycanın xeyirinədir və hər bir tədbir ölkəmizin həqiqətlərinin dünyaya çatdırılmasında əlavə imkan yaradır: "Yarışa gələn jurnalistlər tək yarışı çəkmir, həm də ayrı-ayrı reportajlar edir və reportajlar vasitəsilə ölkəmizin vəziyyətini dünyaya tanıdırlar. Bu yarış da bizim haqq səsimizin dünyaya çatdırılmasına böyük köməkdir".

221
Teqlər:
dividend, Üzeyir Cəfərov, Nicat Hacızadə, Adil Əliyev, idman, Formula 1
Əlaqədar
Formula 1 Azərbaycanda maliyyə bazarına necə təsir göstərəcək?
Formula-1-in faydası barədə fikirlər haçalandı
Fernando Alonso Formula 1 Avropa Qran Prisinin rəsmi elçisi elan olundu
Formula 1-in akkreditasiya qaydaları açıqlandı
Nazir: Azərbaycan "Formula-1" yarışlarını 5 il məcburi keçirməlidir
"Renault-Nissan" Formula-1-də birincilik uğrunda 3 ildən sonra mübarizə aparacaq
Fəridə Əzizova: Formula 1 ölkəmizin tanınmasına xidmət edəcək
Güləş, arxiv şəkli

Fransa Güləş Federasiyası loqoda bayrağımızın olmamasına görə üzr istədi

21
(Yenilənib 11:47 14.01.2021)
Azərbaycan Güləş Federasiyasının mətbuat katibi Sərxan Musayev səsləndirilən narazılıqlara aydınlıq gətirib.

BAKI, 14 yanvar — Sputnik. Fransanın Nitsa şəhərində keçiriləcək güləş üzrə Qran-pri turnirinin təşkilatçıları Azərbaycan bayrağının yarışın loqosunda yer almamasına görə üzr istəyib.

Bu barədə "Report"a Azərbaycan Güləş Federasiyasının Mətbuat katibi Sərxan Musalı məlumat verib.

O bildirib ki, məsələ ilə bağlı dərhal Fransa Güləş Federasiyası ilə əlaqə saxlayıblar: "Onlar qeyd etdilər ki, üzrlü hesab edin, bu, daha əvvəl hazırlanmış loqodur və burada bəzi yarış iştirakçılarının bayraqları yoxdur. Loqoda daha əvvəl bu yarışda olan ölkələrin bayraqları həkk olunub. Buna görə nəzərə alınmayıb. Loqoda elə ölkələrin bayraqları var ki, bu yarışda iştirak etmirlər. Həmin loqo 2020-ci ildə də istifadə edilib. Sadəcə, diqqətsizlik olub və bizə üzürxahlıq etdilər. Təşkilatçılıqla bağlı problem belə ola bilərdi ki, yarış nəkanında bayrağımız olmazdı. Amma bununla bağlı problem olmayacaq".

Federasiya rəsmisi təşkilatçılar tərəfindən heç bir soyuq münasibət görmədiklərini sözlərinə əlavə edib: "Mənfi nəsə hiss etməmişik. Ümumiyyətlə, problem olsaydı, bizim komandalara viza verməz, iştiraklarına problem yaradardılar. Arxivə də nəzər saldıq, Dünya Güləş Birliyinin saytında 2014-cü ildən sonrakı yarışları görmək mümkündür. 2019-cu ilə qədər bu yarış Qran-pri statusu almayıb. 2019, 2020 və 2021-ci illərdə artıq Qran-pri statusu ilə təşkil edilib. Yəni, həmin vaxta qədər ciddi yarış hesab edilmirdi. 2019-cu ilə qədər yalnız qadın və sərbəst güləşçilər arasında keçirilib. 2020 və 2021-ci illərdə isə güləşin hər üç növü proqrama daxil edilib. Biz 2020-ci ildə ilk dəfə bu yarışa qatılmışıq. Həmin vaxt yunan-Roma güləşi üzrə yığma komanda iştirak edib. Bu il isə həm yunan-Roma, həm də sərbəst güləşçilərimiz mübarizə aparacaq. Artıq təşkilatçılar bu çatışmazlığı aradan qaldırıblar və loqoya Azərbaycan bayrağını da yerləşdiriblər".

Qeyd edək ki, Qran-pri 15 - 17 yanvarda olacaq.

21
Bakı Olimpiya Stadionu, arxiv şəkli

"UEFA-2020" ilə bağlı vergidən azadolmanın müddəti artırıldı

10
Qeyd edək ki, Azərbaycan həmçinin, 2020-ci ildə futbol üzrə Avropa çempionatının oyunlarına da ev sahibliyi etməli idi.

BAKI, 12 yanvar - Sputnik. Prezident İlham Əliyev Vergi Məcəlləsinə və “Gömrük tarifi haqqında” qanuna dəyişiklikləri təsdiqləyib.

Sputnik Azərbaycan xəbər verir ki, dəyişikliklər "UEFA-2020" futbol çempionatı ilə bağlı vergidən azadolmanın müddətinin daha 1 il uzadılmasını nəzərdə tutur.

Sənəddə deyilir ki, Avropa Futbol Assosiasiyaları Birliyinin (UEFA) İcraiyyə Komitəsi ötən il Avropa Liqasının final oyununun Bakı Olimpiya Stadionunda keçirilməsi haqqında qərar qəbul edilib.

Qeyd edək ki, Azərbaycan həmçinin, 2020-ci ildə futbol üzrə Avropa çempionatının oyunlarına da ev sahibliyi etməli idi. Hazırda bütün dünyada yeni növ koronavirusun (COVID-19) yayılması ictimai-siyasi, sosial-iqtisadi həyatın bütün sahələrinə təsir etdiyi kimi, idman sahəsindən də yan keçməyib, o cümlədən böyük idman oyunlarının keçirilməsi təxirə salınıb.

Bildirilib ki, bu səbəbdən futbol üzrə Avropa çempionatının 2020-ci ildə keçirilməsi nəzərdə tutulan oyunlarının 2021-ci ildə Bakıda keçirilməsi nəzərdə tutulur. Bununla əlaqədar, “Vergi Məcəlləsində dəyişiklik edilməsi haqqında” 9 aprel 2019-cu il tarixli və “Gömrük tarifi haqqında” qanunda dəyişiklik edilməsi barədə” 9 aprel 2019-cu il tarixli qanunların qüvvədə olma müddətinin 1 avqust 2021-ci il tarixinə qədər uzadılması nəzərdə tutulur.

Həmin qanunlarla Azərbaycanda keçirilən UEFA 2019 Avropa Liqasının final oyunu və UEFA 2020 Futbol çempionatının oyunları ilə əlaqədar bir çox vergi növləri üzrə - gəlir vergisindən, mənfəət vergisindən, ƏDV-dən, aksizli mallara görə aksizdən, habelə gömrük rüsumlarından azadolmalar nəzərdə tutulub.

10
Hirkan Milli Parkında yanğın

Hirkan Milli Parkında yanğın davam edir - VİDEO

0
(Yenilənib 19:25 17.01.2021)
Yanğınla mübarizəyə Fövqəladə Hallar Nazirliyinin müvafiq qüvvələri, o cümlədən Aviasiya dəstəsinin "BE-200ÇS" tiplı amfibiya təyyarəsi cəlb olunub.

BAKI, 17 yanvar - Sputnik. Astara rayonu ərazisində Hirkan Milli Parkında baş vermiş yanğının söndürülməsi istiqamətində Fövqəladə Hallar Nazirliyi tərəfindən operativ və təxirəsalınmaz tədbirlər davam etdirilir.

Fövqəladə Hallar Nazirliyindən verilən məlumata görə, yanğının söndürülməsinə relyefin mürəkkəbliyi və hava şəraitinin əlverişsizliyi maneə törədir. Bununla belə, yanğının daha geniş sahəyə yayılması və Milli Parka daha böyük ziyan vurmasının qarşısının alınması məqsədilə zəruri tədbirlər həyata keçirilir.

Qeyd edək ki, yanğınla mübarizəyə Fövqəladə Hallar Nazirliyinin müvafiq qüvvələri, o cümlədən Aviasiya dəstəsinin "BE-200ÇS" tiplı amfibiya təyyarəsi cəlb olunub.

Əlavə məlumat veriləcək.

0