20 nömrəli məktəbdə tədris prosesi

Olmaması bir dərd, olması başqa: əyani dərs bərpa olunanda şagirdləri gözləyir

101
Müəllimlər bildirirlər ki, ənənəvi təhsil bərpa olunduqdan sonra onlara keçdikləri dərsləri bir də sıxlaşdırılmış şəkildə tədris etmək tapşırılıb. Valideynlər və şagirdlər isə bunun çətinlik törədəcəyindən əmindirlər

Zülfiyyə Quluyeva, Sputnik Azərbaycan

BAKI, 13 yanvar — Sputnik. Yanvar ayının 26-da tədris ilinin birinci yarımili başa çatacaq. Amma hələ də ölkə üzrə şagirdlərin xeyli hissəsi onlayn dərslərə qoşula bilmir. Təhsil Nazirliyi də ümumtəhsil müəssisələrinin şagirdləri üçün təşkil olunan distant dərslərlə bağlı mövcud problemləri açıqlayıb. Nazirlikdən bildirilib ki, dərslərin onlayn qaydada tədrisində şagirdlərin iştirak faizi şəhərlərlə müqayisədə kənd rayonlarında nisbətən aşağıdır: "Səbəb olaraq bəzi ailələrin internetə çıxış imkanlarının məhdudluğunu və dərslərə qoşulmaq üçün müvafiq cihazın olmamasını qeyd edə bilərik. Onlayn dərslərə qoşula bilməyən şagirdlər üçün televiziya kanallarında tədris proqramına uyğun olaraq teledərslərin yayımlanması təmin olunur".

© AR Ministry of Education /

Sputnik Azərbaycan onlayn dərslərdə iştirak edə bilməyən şagirdlərin dərs proqramını hansı formada mənimsəməsinin mümkünlüyünü araşdırıb.

Paytaxtdakı ümumtəhsil müəssisələrində işləyən müəllimlərin Sputnik Azərbaycan-ın əməkdaşına verdiyi məlumata görə, onlayn dərslərə qoşula bilməyən şagirdlərin dərs proqramını mənimsəməsi üçün dərslər ənənəvi qaydada təşkil olunduqdan sonra yenidən sıxlaşdırılmış şəkildə tədris olunacaq: "Bizə bildiriblər ki, ənənəvi təhsil bərpa olunduqdan sonra keçdiyimiz dərsləri bir də sıxlaşdırılmış şəkildə tədris edəcəyik. Çünki onlayn dərslərə qoşula bilməyən xeyli sayda şagird var ki, onlar dərs proqramını mənimsəməyiblər. Nazirliyin keçirdiyi milli qiymətləndirmədə bu üzə çıxıb".

Təhsil Nazirliyinin ictimaiyyətlə əlaqələr şöbəsinin müdiri Cəsarət Valehov isə Sputnik Azərbaycan-a açıqlamasında bildirib ki, dərslərin yenidən sıxlaşdırılmış şəkildə keçiriləcəyi barədə onda konkret məlumat yoxdur:

"Bizdə bununla bağlı hər hansı qərar yoxdur. Təhsil Nazirliyində məktəblərdə aparılmış milli qiymətləndirmə ilə bağlı müzakirələr keçirilir. Bununla bağlı yekun qərar ictimaiyyətə açıqlanacaq".

Təhsil Nazirliyi yanında İctimai Şuranın məsul katibi İlqar Orucov Sputnik Azərbaycan-a açıqlamasında bildirib ki, ucqar kəndlərdə onlayn təhsilə çıxış əldə edə bilməyən şagirdlərin sayı kifayət qədərdir: "Xüsusilə ucqar kəndlərdə internetə çıxış məhduddur. Elə kəndlər var ki, orada onlayn təhsilin yalnız adı var. Elə Təhsil Nazirliyinin milli qiymətləndirmə keçirməsinin səbəbi də bu reallığı üzə çıxartmaq idi. Rayonlarda, kəndlərdə, hətta Bakıda onlayn təhsilə qoşulmaqda çətinlik çəkən şagirdlər var. 

Düzdür, Təhsil Nazirliyi bunu nəzərə alaraq teledərslər keçirdir. Televiziya hər evdə var. Amma proqramın məzmununu mənimsəyə bilməyən şagirdlər üçün dərslərin sıxışdırılmış formada tədris olunması çox yaxşı olardı. Azərbaycanda məktəblərin çoxu 5 günlükdür. Məktəbləri 6 günlük etməklə ənənəvi təhsil bərpa olunduqdan sonra şagirdlərin mənimsəyə bilmədiyi mövzuları onlara yenidən başa salmaq olar. Şagirdlərə dərs proqramını mənimsəmələri üçün şərait yaradılmalıdır. Nəinki orta təhsil, ali təhsil üzrə də bu problemlər mövcuddur. Yay tətilində yay məktəbləri açmaqla proqram mənimsənilməsini təmin etmək mümkündür. Çünki Təhsil Nazirliyi apardığı qiymətləndirməyə əsasən belə qənaətdədir ki, regionlarda onlayn dərslərə qoşulmada xeyli problemlər var".

Təhsil üzrə ekspert Kamran Əsədov da hesab edir ki, onlayn dərslərə şagirdlərin qoşulması tam təmin edilmədiyindən müəyyən fənlər üzrə dərslərin ənənəvi təhsil bərpa olunduqdan sonra yenidən tədrisi vacibdir. Əks halda, fənlərlə mövzu arasında əlaqə qırılacaq, şagirdlər yuxarı siniflərdə keçirilmiş dərsləri heç cür mənimsəyə bilməyəcəklər:

"Birinci problem ondadır ki, pandemiya dövründə tədrisin qaydaları formaları tam formada hazırlanmayıb. Ənənəvi qaydada təhsil necə idisə, onlayn təhsil də elə keçirildi. Məlumdur ki, dərslərin onlayn keçirilməsinə başlanan gündən xeyli sayda şagird dərslərdən kənar qalıb. Ənənəvi təhsil bərpa edildikdən sonra həmin şagirdlərin ikinci yarımildə, yaxud da yuxarı sinifdə keçiriləcək dərsləri mənimsəməsi çox çətin olacaq.

Çünki fənlərlə mövzu arasında əlaqə qırılır. Bu əlaqənin qırılmaması üçün şagird keçirilmiş dərs proqramını mənimsəməlidir. Başqa ölkələrdə də eyni yanaşma var. Dərslərin dərinləşmiş və sürətləndirilmiş tətbiqi bizdə də vacibdir. Azərbaycan da başqa ölkələr kimi kompensasiyaedici tədrisi tətbiq etməlidir. Bunun üçün isə proqram hazırlanmaldır".

K.Əsədov deyir ki, əsas fənlər üzrə dərslərin təkrar keçirilməsi vacibdir: "İbtidai sinifdə şagirdlərin musiqi, həyat bilgisi, texnologiya kimi dərsləri öyrənməməsi o qədər də problem yaratmır. Yuxarı siniflərdə şagirdlər həmin fənlər üzrə bilik və bacarıq əldə edirlər. Amma ana-dili, riyaziyyat, fizika, kimya kimi fənlərdə şagirdin dərs proqramını mənimsəməməsi yuxarı siniflərdə mövzular arasındakı əlaqənin itməsinə səbəb olacaq. Əgər şagird aşağı sinifdə dil qaydalarını anlamayıbsa, yuxarı sinifdə keçirilən proqramı mənimsəyə bilməyəcək. Bunun üçün də əsas fənlər üzrə dərslərin sıxışdırılmış şəkildə yenidən ənənəvi qaydada tədrisi vacibdir".

Ekspert deyir ki, tətillərin ləğv edilməsi hesabına tədris bərpa edildikdən sonra keçirilmiş dərslərin yenidən keçirilməsi müxtəlif formada təşkil edilə bilər.

101
Teqlər:
ekspert, əyani, təhsil
Teledərs, arxiv mşəkli

Müharibə bitib, problem isə həll olunmayıb - heç pulsuz paket köməyə çatmır

101
(Yenilənib 18:51 16.01.2021)
Cəbhəyanı zonalarda müəllim və şagirdlər üçün pulsuz mobil internet paketləri təqdim olunsa da, onlayn təhsilə qoşulmada problem hələ də qalmaqdadır

Zülfiyyə Quluyeva, Sputnik Azərbaycan

BAKI, 16 yanvar — Sputnik. Azərbaycanda koronavirus pandemiyasına görə ötən ilin mart ayından etibarən ənənəvi təhsil onlayn təhsillə əvəzlənsə də, sentyabr ayında Ermənistan-Azərbaycan arasında başlayan müharibə səbəbindən cəbhəboyu zonalarda məsafədən təhsildə ciddi problemlər yaranıb. Həmin dövrdə cəbhə bölgəsində 1200-dən çox məktəb fəaliyyətini dayandırmışdı. Müəllim və şagirdlər müxtəlif yerlərə yerləşdirildiyindən onlayn təhsilə qoşulmaq imkanını da itirmişdilər. Sputnik Azərbaycan müharibə dövründə cəbhə zonası hesab olunan ərazilərdə şagirdlərin təhsil imkanlarının bərpa edilib-edilmədiyini araşdırıb.

© AR Ministry of Education

Cəbrayıl rayonunun Cocuq Mərcanlı qəsəbə sakini Şahəddin Hüseynov Sputnik Azərbaycan-a açıqlamasında bildirib ki, müharibə dövründə qəsəbə artilleriya atəşinə tutulduğundan sakinlər ətraf rayon və qəsəbələrə köçmək məcburiyyətində qalıblar. Həmin dövrdə onların övladları tamamilə təhsildən kənar qalıblar. Çünki yerləşdirildikləri ərazilərdə bütün müəllim və şagirdlərin internetə çıxışı mümkün olmayıb. Ş.Hüseynov bu günlərdə övladlarının onlayn dərslərə qoşula bildiyini söyləyir. Onun sözlərinə görə, bu isə bütün şagirdləri əhatə etmir. Evləri dağıdılan sakinlər hələ də müxtəlif ərazilərdə yaşadığından onların övladları onlayn dərslərə qoşula bilmirlər.

Problemin qaldığını müharibə dövründə cəbhəyanı ərazi hesab olunan rayonların təhsil şöbəsindən də təsdiqləyirlər. Ağdam Rayon Təhsil şöbəsinin müdiri Mətanət Misirxanova Sputnik Azərbaycan-a açıqlamasında bildirib ki, hər gün distant təhsilə qoşulan şagirdlərin siyahısı hazırlanır. O bildirir ki, Ağdam rayonu üzrə təxminən 56 faizə yaxın şagird onlayn təhsilə cəlb olunub: "Müharibədən sonra müəllimlərlə şagirdlər arasında artıq bir vasitə var. Amma müəyyən qisim şagird hələ də təhsildən, müəllim təmasından kənardadır. Bunlar Ağdam rayonu ərazisindəki Səfərli, Alıbəyli, Ayaqqərvənd qəsəbələrinin şagirdləridir.

Burada yaşayan şagirdlərlə təmas qurmaq mümkün deyil. Çünki bu ərazilərdə telefon xətti yoxdur. Mobil internetdən istifadə etməyə isə maddi baxımdan imkanları çatmır. Amma biz həmin qəsəbələrdə yaşayan şagirdlərlə daima əlaqə qururuq. Məktəb direktorları və sinif rəhbərləri şagirdləri teledərslərə yönəldirlər ki, onlar teledərsləri izləsinlər. Bununla belə, biz nəzərdə tutmuşuq ki, məktəblər açıldıqdan sonra onlayn dərslərə qoşula bilməyən şagirdlər üçün həmin dərslər sıxlaşdırılmış formada keçirilsin. Bunun üçün də əlavə dərs və məşğələ cədvəlləri hazırlanır".

Təhsil Nazirliyi yanında İctimai Şuranın Sədr müavini Nadir İsrafilov da problemin olduğunu təsdiqləyir. O bildirir ki, koronavirus pandemiyası Azərbaycanda ənənəvi təhsilin dayandırılmasına əsas səbəbdir. Amma sentyabr ayında müharibənin başlanması cəbhəboyu ərazilərdə təhlükəsizlik baxımından şagirdlərin onlayn təhsildən də kənarda qalmasına səbəb olub: "Düzdür, bəzi ərazilərdə insanlar evlərinə qayıdıblar, həyat öz axarına düşüb. Şagirdlərlə müəllimlər arasında onlayn əlaqəni qurmaq mümkün olub. Amma müharibə zamanı dinc sakinlərin hədəfə alınması cəbhəyanı zonalarda evlərin və infrastrukturun dağılmasına səbəb oldu. Dağılan evlər bərpa olunmayana qədər o insanların evlərinə qayıtması mümkün deyil. Bu səbəbdən də cəbhə zonasında hələ də onlayn təhsildən kənarda qalan şagirdlər var. Bu zonalarda müəllim və şagirdlər üçün pulsuz mobil internet paketləri təqdim olunsa da, onlayn təhsilə qoşulmada problem hələ də qalmaqdadır. Amma bizim üçün əsas olan insanların təhlükəsizliyi və sağlamlığıdır. Azərbaycanın qazandığı qələbə sayəsində biz bu problemlərin də öhdəsindən gələcəyik".

N.İsrafilov işğaldan azad edilmiş ərazilərimizdə də təhsilin təşkili üçün Təhsil Nazirliyinə təkliflər verildiyini bildirib.

Təhsil Nazirliyindən isə Sputnik Azərbaycan-ın sorğusuna cavab olaraq bildirilib ki, cəbhəyanı bölgələrdə yaşayan şagirdlərin distant dərslərdə iştirakı tədricən genişlənir: "Bununla yanaşı, həmin şagirdlərin artıq rahat şəkildə teledərslərdən yararlanmaq imkanı da var".

Nəqliyyat, Rabitə və Yüksək Texnologiyalar Nazirliyindən isə bildirdilər ki, müharibə dövründə telefon rabitəsinə zərər dəyən ərazilərdə bərpa işləri, demək olar ki, başa çatdırılıb. Telefon xətti olmayan ərazilərə isə telefon xətlərinin çəkilməsi işi mütəmadi olaraq davam etdirilir. 

101
Teqlər:
dərs, onlayn, internet, cəbhəyanı bölgələr, təhsil

Azərbaycanda məktəblər açılacaq

298
(Yenilənib 12:09 16.01.2021)
Nazirlər Kabibeti yanında Operativ Qərargah ölkə ərazisində xüsusi karantin rejimini aprelin 1-dək uzatsa da, yanvarın 18-dən mərhələli şəkildə müəyyən yumşalmalar olacaq

BAKI, 16 yanvar — Sputnik. Məktəblərdə ənənəvi təhsilin bərpası nəzərdə tutulur. Sputnik Azərbaycan-ın məlumatına görə, bunu Nazirlər Kabibeti yanında Operativ Qərargahın brifinqində Prezidentin köməkçisi, Prezident Adminstrasiyasının İqtisadi Məsələlər və innovativ inkişaf siyasəti şöbəsinin müdiri Şahmar Mövsümov bildirib. Ş.Mövsümov deyib ki, detallar barədə növbəti həftə ərzində Təhsil Nazirliyi tərədindən brifinq keçiriləcək: "Bu barədə detalları Təhsil Nazirliyi özü açıqlayacaq. Məktəblərin açılması ilə bağlı müəyyən addımlar atılacaq".

298
Mövzu:
Azərbaycan karantində: nikbinlər, bədbinlər, xeyirxahlar və ixtiraçılar
Laçın şəhərinə mənzərə, arxiv şəkli

Laçının gəzməli-görməli yerləri haqqında videoçarx hazırlanıb

0
Videoçarxda Laçının Ağoğlan qəsri, Dəmirovlu pir məbədi, Məlik Əjdər türbəsi, "Kar günbəz" türbəsi, Həmzə Soltan sarayı haqqında məlumatlar təqdim olunur.

BAKI, 18 yanvar — Sputnik. Dövlət Turizm Agentliyi tərəfindən işğaldan azad edilmiş Laçının gəzməli-görməli yerləri haqqında tanıtım videoçarxı hazırlanıb. Bu haqda Dövlət Turizm Agentliyinin sədri Fuad Nağıyev rəsmi "Twitter" səhifəsində etdiyi paylaşımla məlumat verib. "Qədim tarixi abidələrə və gözəl təbiətə malik olan Laçında turizmin inkişafı üçün imkanlar genişdir. Növbəti videoçarxımız düşməndən azad olunan Laçınımızın gəzməli-görməli yerlərinə həsr olunub", - deyə Fuad Nağıyev qeyd edib.

Videoçarxda Laçının gəzməli-görməli yerləri, o cümlədən Qafqaz Albaniyasının mədəni irs nümunlərindən IX əsrə aid bazilika Ağoğlan qəsri və XI əsrə aid edilən Dəmirovlu pir məbədi, Elxanilər dövründə tikildiyi güman edilən Məlik Əjdər türbəsi, XVII əsrə aid edilən və tikintisində Albaniya xristian memarlığının təsiri duyulan "Kar günbəz" türbəsi, 1761-ci ildə tikilməsi haqqında məlumat mövcud olan Həmzə Soltan sarayı, rayonun bir və ikitağlı körpüləri, müxtəlif at və qoç fiqurlarından ibarət daş abidələri haqqında məlumatlar təqdim olunur.

Qeyd edək ki, Agentlik tərəfindən bundan əvvəl erməni işğalından azad edilmiş Qubadlı, Zəngilan, Şuşa və Kəlbəcərin gəzməli-görməli yerləri haqqında videoçarx təqdim olunub. Layihə çərçivəsində digər azad edilmiş torpaqlarımızın da turizm potensialını əks etdirən bu növ video çarxların hazırlanması nəzərdə tutulub.

0