Tələbə, arxiv şəkli

Tələbələrimizin "başsız atlı" kabusu: tövsiyə var, təminat yox

108
(Yenilənib 22:16 11.11.2020)
"Bu gün Azərbaycanda formal distant təhsil həyata keçirilir. Bu da əmək bazarında peşəsini bilməyən kadrların məzun olması ilə nəticələnəcək"

Zülfiyyə Quluyeva, Sputnik Azərbaycan

BAKI, 11 noyabr — Sputnik. Ölkəmizdə koronavirus pandemiyası və hərbi vəziyyət səbəbindən təhsilin məsafədən idarəedilməsi ali təhsildə ciddi problemlərə səbəb olub. Xüsusilə bölgələrdə tələbələr internet və distant təhsilə qoşulmaq üçün alətlərin olmaması səbəbindən mühazirələri dinləyə bilmirlər. Qax rayonunun müxtəlif kəndlərində tələbələr məsafədən təhsildə ciddi problem yaşadıqlarını söyləyirlər. Qaxın Qaratala kənd sakini Fərid Məmmədli evlərində internet olmadığı üçün qonşudan dərslərə qoşulur. Amma yenə də distant təhsilə qoşulmağın çox çətin olduğunu, internetin sürətinin zəif olduğunu bildirir.

Bu problem ölkənin müxtəlif bölgələrində yaşanır. Ağcabədi rayonu ərazisində Laçın rayonundan olan məcburi köçkünlər üçün yaradılmış Ağbulaq obasında yaşayan tələbə Şamama Bəxtiyarova pandemiya dövründə onlayn dərslərə qoşula bilmədiyindən hazırda məsafədən təhsil üçün xeyli məsafə qət etməli olub. Bakı Slavyan Universitetinin “İngilis dili-tərcüməçi” ixtisası üzrə 2-ci kurs tələbəsi Şamama bu ilin mart ayının 3-dən etibarən karantin elan olunduğundan öz evlərinə gedib. Həmsöhbətimiz deyir ki, həmin dövrdə yaşadığı obada internet olmadığından onlayn keçirilən dərslərə də qoşula bilməyib. Tələbə yoldaşlarından çox az qismi onlayn dərslərdə iştirak etdiyindən, universitet rəhbərliyi yaranmış vəziyyəti nəzərə alaraq avqust ayınadək imtahanları təxirə salıb. Şamama deyir ki, onlayn təhsilin əsas problemi keçirilən dərslərə təkrar qoşularaq baxmaq, dinləmək imkanının olmamasıdır. Tələbə bu səbəbdən də onlayn dərslərə qoşulmaq üçün bu tədris ilindən babası evinə, Ağcabədidəki Taxtakörpü qəsəbəsinə getdiyini söyləyir. Ş.Bəxtiyarova internetin keyfiyyətinin çox aşağı olmasının distant təhsilə qoşulmada çətinliklər yaratdığını, bəzən kəsilmələr olduğunu da bildirir.

Təhsil üzrə ekspert Kamran Əsədov Sputnik Azərbaycan-a açıqlamasında bildirib ki, orta təhsildə teledərslər və repetitor hazırlığı sayəsində şagirdlər dərs proqramını mənimsəyə bilsələr də, ali təhsildə vəziyyət daha çətindir: "Çox təəssüf ki, Azərbaycan təhsil sistemində distant təhsil nəzərdə tutulsa da, bu sahədə heç bir addım atılmayıb. Mart ayından pandemiya səbəbindən onlayn təhsilə keçid baş tutmasına baxmayaraq, bunun üçün infrastruktur, cihazlar, nə də ki alətlər üçün heç bir iş görülməyib. Halbuki, Təhsil Nazirliyi qeyd olunan müddət ərzində alternativ təhsilalma formalarını müəyyənləşdirməli idi. Həmçinin bunun üçün qanunvericilik bazasını və resursları hazırlamalı idi. Azərbaycanda orta ümümtəhsil məktəblərinin şagirdləri üçün müəyyən qədər məlumat əlçatanlığı var. Ali təhsillə bağlı isə bu fikri söyləyə bilmərik.

Ölkəmizin 54 ali təhsil müəssisəsində 380 fərqli  ixtisas üzrə 185 min tələbə təhsil alır. Eyni ixtisas qruplu tələbələrin sayı azdır. Elə ixtisaslar var ki, onların onlayn tədrisi mümkün deyil. Praktiki, laborator təhsilin vacib olduğu ixtisaslar var. Biz internet və alətlərlə bağlı iki problemi həll etsək də, mühəndis iqtisadiyyatı və sair texniki fənlər üzrə məsafədən təhsil çox çətindir. Bunun üçün təkliflər hazırlasaq da, heç bir iş görülməyb. Azərbaycan təhsil sistemi bu gün başsız atlıya bənzəyir".

K.Əsədov deyir ki, ali məktəblərdə keçirilməyən dərslərin kompensasiyası mümkün deyil: "Hər tədris semestrinin öz proqramı var. Bunun təxirə salınması mümkün deyil. Bu, qanunvericilik aktlarına ziddir.  Birinci semestrdə keçirilməyən dərslər ikinci semestrdə keçirilərsə, tələbələr  ikinci semesterin fənlərini keçə bilməyəcəklər. Bu gün Azərbaycanda formal distant təhsil həyata keçirilir. Bu da əmək bazarında peşəsini bilməyən kadrların məzun olması ilə nəticələnəcək".

Azərbaycan Gənc Alim, Aspirant və Magistrlər Cəmiyyətinin sədri İlqar Orucov Sputnik Azərbaycan-a bildirib ki, internetin sürətində yaranmış məhdudiyyətlər distant təhsillə bağlı qarşıya qoyulan vəzifələrin həyata keçirlməsində problemlər yaradıb: "Amma bunun pandemiya və hərbi vəziyyəti nəzərə alaraq tətbiq olunduğu aydındır. Artıq Ordumuz qələbə qazandı. İnternetin sürətində məhdudiyyətlər aradan qaldırılacaq. Bu narahatlıq başadüşüləndir. Sağlamlıq və təhlükəsizlik təhsildən daha yüksək dəyər olduğundan biz bu problemi anlayışla qarşılamalıyıq. Kompensasiyaya gəldikdə, distant təhsildə proqram mövzularının mənimsəmə səviyyəsi ölçülməlidir. Ənənəvi dərslərdə tələbə məlum saatlarda dərslərdən yararlanırdısa, distant təhsildə bu məhdudiyyət yoxdur. Proqram mövzularından bir ay müddətində geriqalmalar bərpa edilə biləcək. Qış tətili müddətində və yay tətilində müəyyən əvəzləmələr aparıla bilər. Bütün dünyada təhsildə gecikmələr müşahidə olunur. Əsas odur ki, baza və resurslar var. İnanmıram ki, bundan yararlanmaq istəyən tələbələr çətinlik çəksinlər".

İ.Orucov bildirir ki, Azərbaycanda distant təhsilə ali təhsil müəssisələri çox gec başlayıblar. Bu isə öz təsirini bu gün büruzə verir: "Təəssüf ki, bu baxımdan distant təhsil resursları çatışmazlığı yarandı. Ali təhsil müəssisələri bunun üzərində işləməli, elektron formada o resurslara çıxışı əldə etmək imkanı yaradılmalıdır".

Cəmiyyət sədri bildirir ki, bunun üçün Təhsil Nazirliyi bütün zəruri tövsiyələri verib:

"Təhsil Nazirliyi ali təhsil müəssisələrini koordinasiya edən təhsil siyasətini həyata keçirən qurumdur. Nazirliyin də ali təhsil müəssisələrinə tövsiyəsi ondan ibarətdir ki, onlar distant təhsildə qabaqcıl təcrübələrdən istifadə etsinlər. Təhsil Nazirliyi onları bu resurslarla təmin etməli deyil. Bizim tələbələrin böyük qismi ödənişli təhsil alır. Elektron resursların yaradılması ali təhsil müəssisələri tərəfindən təmin edilməlidir".

Təhsil Nazirliyindən isə bildirdilər ki, distant təhsillə bağlı nazirlik tərəfindən ali təhsil müəssisələrinə zəruri tövsiyələr verilib.

Onu da qeyd edək ki, Ermənistan Respublikası tərəfindən törədilən genişmiqyaslı təxribatların, kiberinsidentlərin qarşısının alınması məqsədilə ölkəmizdə internetin verilişinə tətbiq edilmiş müvəqqəti məhdudiyyət, işğaldan azad olunmuş və keçmiş cəbhəyanı ərazilər istisna olmaqla 12 noyabr 2020-ci il tarixində aradan götürüləcək

108
Süni intellekt, arxiv şəkli

Süni intellekt Parkinson xəstəliyini müəyyən edə biləcək

22
(Yenilənib 19:31 25.11.2020)
Alimlər yaratdıqları diaqnostik metodun kompleks bir avadanlıq tələb etmədiyini və yalnız bir dəqiqə vaxt aldığını qeyd ediblər.

BAKI, 25 noyabr — Sputnik. ABŞ-ın Florida Universitetinin alimləri Parkinson xəstəliyini erkən mərhələdə təyin edə bilən, süni zəka sistemi yaradıblar.

Sputnik Azərbaycan xarici mətbuata istinadla xəbər verir ki, Şimali Amerika Radioloji Cəmiyyətinin konfransının materiallarına görə, müayinələr xəstənin göz dibinin şəkli əsasında aparılacaq.

Qeyd edək ki, Parkinson xəstəliyi beyində dopamin istehsal edən neyronların zədələnməsi və ölümü ilə əlaqələndirilir. Bir qayda olaraq, əzaların titrəməsi, məhdud hərəkət və qeyri-sabit yeriş kimi görünən simptomlar başladıqdan sonra aşkar edilir. Yeni tətqiqatlara görə isə, xəstəliyin varlığı daha əvvəl müəyyən edilə bilər. Alimlərin fikrincə, Parkinson xəstəliyi zamanı xəstənin gözündə retinanın kiçik kapilyarlarında anormallıqlar müşahidə edilir.

Süni intellekt həm sağlam insanların, həm də xəstələrin bir neçə yüz fotoşəklini təhlil edib. Araşdırma zamanı müəyyən edilib ki, sistem patoloji dəyişiklik əlamətləri olan şəkilləri müəyyənləşdirə bilir.

Alimlər yaratdıqları diaqnostik metodun kompleks bir avadanlıq tələb etmədiyini və yalnız bir dəqiqə vaxt aldığını qeyd ediblər.

Parkinson xəstəliyinin erkən aşkarlanması və müalicənin erkən başlanması xəstəliyin inkişafını ləngidəcək.

22
Teqlər:
ABŞ, Xəstəlik, Parkinson, süni intellekt, alimlər
Təhsil Nazirliyi yanında Peşə Təhsili üzrə Dövlət Agentliyinin direktor müavini Ceyhun Kərəmov

Zaman dəyişdi, indi hamı ali təhsil deyil, peşə təhsili dalınca qaçacaq - Ceyhun Kərəmov

117
(Yenilənib 15:29 26.11.2020)
Ceyhun Kərəmov: "Biz peşə təhsili səviyyəsini artırmalıyıq ki, həm işəgötürənlərdə, həm də valideyn və şagirdlərdə peşə təhsilinə maraq yaransın".

BAKI, 25 noyabr - Sputnik. Azərbaycanda peşə təhsilinin səviyyəsi, peşə məktəblərinin maddi-texniki bazası, eləcə də əmək bazarında tələb olunan peşələr üzrə kadr hazırlığı cəmiyyəti maraqlandıran əsas məsələlərdəndir. Bəs görəsən Azərbaycanda son illər peşə təhsilinin inkişafı istiqamətində aparılan islahatlar bu sahədə nəyi dəyişib?

Bu mövzuda suallarımızı Təhsil Nazirliyi yanında Peşə Təhsili üzrə Dövlət Agentliyinin direktor müavini Ceyhun Kərəmov cavablandırıb.

- Ceyhun müəllim, gəlin öncə Azərbaycanda peşə təhsili müəssisələri barədə oxucularımıza məlumat çatdıraq. Ölkəmizdə peşə məktəblərinin sayı, maddi-texniki bazası ilə bağlı vəziyyət nə yerdədir?

- Agentliyin tabeliyində 78 peşə təhsili müəssisəsi fəaliyyət göstərir. Onlardan 6-ı fəaliyyətini dayandırıb. Onlar işğal altında olan bölgələrimizdəki peşə təhsili müəssisələridir.Tezliklə bu müəssisələrin fəaliyyətini bərpa edəcəyik.

- Peşə təhsilinin bu gün insanların həyatındakı rolu nə dərəcədə effektlidir?

- Peşə təhsilinin insanların yeni həyata hazırlanmasında rolu çox böyükdür. Hazırda peşə təhsili əhatəlilik baxımından daha da genişlənməlidir. Orta məktəbi bitirən gənclərdə maraq əsasən ali təhsilədir. İqtisadiyyatımız inkişaf etdikcə, yeni sahələr yarandıqca peşə təhsilinə tələbat və maraq da artır. Peşə təhsilinin əmək bazarının tələblərinə daha çevik cavab vermə imkanı var. Bir, iki və üç illik peşə təhsili formaları var. Bu gün istənilən sahədə peşə ehtiyacları məlum olduqda proqramlar hazırlayıb bazara lazımlı kadrları yetişdirmək mümkündür. Bunun üçün bizim bazarda fəaliyyət göstərən şirkətlər Peşə Təhsili üzrə Dövlət Agentliyi ilə əlaqə quraraq öz tələb və ehtiyaclarını bildirə bilərlər. Biz onlarla birlikdə yeni proqramlar hazırlamağa hazırıq. Agentlik  bu ildən başlayaraq yüksək texniki peşə ixtisaları üzrə proqramların icrasına başlayıb.

- Azərbaycanda nə qədər peşə təhsili müəsssisəsi yenidən qurulub, nə qədərinin bərpasına ehtiyac var?

- Bizim qurumun balansında olan peşə tədris müəssisələrinin vəziyyəti eyni deyi. Onlar fərqli infrastruktura, fərqli maddi-texniki bazaya  malikdirlər. Ötən il biz Bakı şəhərində Sənaye və İnnovasiyalar üzrə Peşə Tədris Mərkəzinin açılışını etdik. Bu Mərkəz Azərbaycanla Koreya hökumətlərarası razılaşmaya əsasən yaradılıb. Məktəbin kurikulumu Koreya ekspertlərinin iştirakı ilə hazırlanıb və Azərbaycan bazarının tələblərinə uyğunlaşdırılıb. 2016-cı ildə ölkəmizdə Azərbaycanda peşə təhsili ilə bağlı Strateji Yol Xəritəsi qəbul edilib. Orada əsas priotetlərdən biri də peşə məktəblərinin maddi-texniki bazasının gücləndirilməsi, ölkədə peşə infrastrukturunun yenidən qurulmasıdır.

Hal-hazırda üç peşə məktəbində təmir-tikinti işləri gedir. Cəlilabad, Bərdə və Bakıda peşə məktəblərində yeni infrastruktur qurulur. Növbəti illər üzrə isə üç peşə məktəbi ilə bağlı layihələndirmə işləri aparılır. Bunlar Mingəçevir, Sumqayıt və Lənkəranda peşə məktəbləridir. Bu işlər planlı şəkildə aparılır. Burada söhbət təkcə infrastrukturun qurulmasından yox, yeni ixtisasların və müəllim-pedaqoji heyətin hazırlanmasından da gedir. Bu istiqamətdə də aparılır.

- Bəs bölgələrimizdə peşə təhsili nə səviyyədədir? Bu gün ölkəmizin istənilən bölgəsində peşə təhsilinə əlçatanlıq varmı?

- Coğrafi cəhətdən yanaşsaq, peşə təhsili almaq istəyən vətəndaşın yaşadığı bölgə üzrə peşə təhsili almaq imkanı var.

- Peşə məktəblərinə marağı coğrafi baxımdan bölsək bölgələrdə maraq necədir?

- Bu il peşə məktəblərinə qəbul olunanların 40 faizi Bakı və Bakıətrafı, 60 faizi rayonların payına düşür. Bu, peşə məktəblərinin təklif etdiyi proqramlardan asılıdır. Əsas priotetlərimizdən biri odur ki, ölkəmizin iqtisadi inkişafına uyğun olaraq peşə təhsili qurulsun. Bəzi ənənəvi ixtisaslar var ki, onlara ehtiyac yoxdur. Biz həmin peşələri çıxarıb yeni, əmək bazarında tələb olan ixtisasları salırıq. Agentlik regional səviyyədə hər bir rayonda fəaliyyət göstərən şirkətlərlə əməkdaşlıq qurur.

- Bu gün bazarda hansı peşələrə maraq daha çoxdur? Belə bir araşdırma aparılıbmı?

- Əmək bazarının tələbləri çox dinamikdir. Tez-tez dəyişir. Sabah, yaxud da on ildən sonra hansı ixtisasların lazım olacağı ilə bağlı proqnoz vermək çox çətindir. Amma bu gün İKT üzrə peşə hazırlığına maraq böyükdür. Eləcə də ənənəvi iqtisadi fəaliyyət növlərinə, nəqliyyat vasitələrinin texniki istismarı, mexanika sahəsində kadr hazırlığına tələbat var.

- Peşə məktəblərində maddi-texniki baza ilə yanaşı, pedaqoji heyətin bilik və bacarığı da kadr hazırlığında vacibdir. Bu sahədə vəziyyəti necə qiymətləndirirsiniz? Yəni, Bakıdakı peşə məktəbində çalışan müəllimlə, hansısa rayonda peşə məktəbi müəlliminin bilik və bacarığı arasında fərq varmı?

- İxtisaslı pedaqoq deyərkən həm texniki bilikləri, həm də sənayedə təcrübəsi olan müəllimlər nəzərdə tutulur. Etiraf edək ki, bu gün bütün peşə sistemində olan  müəllimlərin səviyyəsi bərabər deyil. Müəyyən ərazilərdə müəllimlərin bilik-bacarığı daha qənaətbəxşdir. Bakıda bu mənada vəziyyət daha ürəkaçandır. Ölkə üzrə yanaşdıqda, bu istiqamətdə işlərin görülməsinə ehtyac var. Biz çalışmalıyıq ki, müəllimlərin texniki bilikləri ilə yanaşı onların əmək təcrübələri də olsun. Bunun üçün bizim üzərində işlədiyimiz istiqamətlərdən biri sənayedə çalışan peşəkar şəxslərin tədris və təlimə inteqrasiyasıdır.

- Peşə təhsili sahəsində hansı islahatlara ehtiyac var?

- Bir çox yeni istiqamətlər üzrə işlər aparılır. İlk növbədə biz yeni proqramlar təqdim edirik. Yüksək texniki peşə ixtisası alan vətəndaşlar üç illik təhsildən sonra ali təhsilə qəbul olmaq imkanı əldə edirlər. Növbəti ildə daha 6 ixtisas üzrə yüksək texniki peşə istiqamətli proqramlar hazırlayırıq. Burada fərq ondan ibarətdir ki, yüksək peşə dərəcəsi üzrə təhsil alan şəxs fundamental biliklər əldə etdiyindən həm işə başlaya bilər, həmçinin də istəyinə görə ali təhsil ala bilər.

- Azərbaycan peşə təhsilinin inkişafı ilə bağlı hansı ölkənin təcrübəsindən yararlanır?

- Düşünürəm ki, hər hansı ölkənin təcrübəsini olduğu kimi tətbiq etmək uğur gətirməz. Xarici ölkələrin təcrübəsindən yararlandıqda onu mütləq iqtisadiyyatımıza, əmək bazarımıza uyğunlaşdırırıq.  Bir sıra Avropa ölkələrinin təcrübəsini öyrənmişik. Hətta keçmiş sovet ölkələrinin təcrübəsinə də baxmışıq. Bu gün yüksək texniki peşə dünyanın əksər inkişaf etmiş ölkələrində tətbiq edilir. Bu, bizim üçün yenilikdir. Sırf beynəlxalq təcrübədə bu araşdırılır. Bizim Koreya ilə əməkdaşlığımız sayəsində sırf sənaye və innovasiyalar üzrə peşə məktəbi yaratdıq. Koreya dünyanın ən qabaqcıl sənaye ölkələrindən biridir. Bu proqramı bitirən tələbələr əmək bazarına daha çevik inteqrasiya oluna, işlə təmin oluna bilirlər. Artıq biz bunun nəticəsini görürük.

- Peşə təhsili müəssisələrinə qəbul hansı qaydada aparılır?

- Artıq peşə təhsili məktəblərinə qəbul elektron formada aparılır. Bu il peşə təhsili sahəsində də müəllimlərin işə qəbulunu onlayn keçirdik. COVID-19 pandemiyası ilə bağlı peşə təhsilini onlayn və teledərslərlə həyata keçiririk.

- Ümumiyyətlə ölkəmizdə son dövrlər peşə təhsilinə maraq nə səviyyədədir? Bu il peşə məktəblərinə qəbul rəqəmlərində müsbətə doğru dəyişiklik varmı?

- Ötən illə müqayisədə bu il müraciətlərin sayı 30 faizi artıb. 20 minə yaxın müraciət olub ki, onlardan 15 min nəfəri tələbə adını qazanıb.

- Peşə təhsili ilə bağlı qarşıda hansı planlar var?

- Biz qısa müddətli kurslar, təlimlər təşkil etmək niyyətindəyik. Bir çox xidmət sahələrinə kadrların hazırlanması üçün təlimlərə başlayacağıq. Bu, iş axtaran şəxslərin təlim keçərək işə qəbuluna imkan yaradacaq.

- Peşə təhsili ilə bağlı bu qədər islahatlar aparılmasına baxmayaraq, hələ də peşə məktəbləri cəmiyyətimizdə populyarlıq qazana bilməyib. Bu gün sorğu keçirsək, görərik ki, həm gənclərimizin, həmçinin də valideynlərin çoxu öz övladının peşə təhsili almasının yox, ali məktəbə qəbul olmasının arzusundadır. Agentlik peşə təhsilinin təbliği istiqamətində bir iş görürmü?

- Tamamilə doğru vurğuladınız ki, bizim fəaliyyətimizin əsas protetlərindən biri məhz budur. Bu istiqamətdə iş bir neçə şaxəli aparılır. Əməkdaşlarımız həm Agentlikdə, həm də məktəblərdə görüşlər keçirərək peşə təhsili barədə onları məlumatlandırır. Bundan başqa, gənclərin aktiv olduğu sosial platformalar üzərindən peşə təhsilinin vacibliyi təbliğ edilir. Bizim diqqət ayırdığımız daha bir məsələ orta məktəblərdə peşə təmayüllü siniflərin açılmasıdır. Bununla məktəblərdə şagirdlər başa düşürlər ki, peşə nədir. Beləcə onlarda peşə təhsilinə maraq yaranır. Ancaq işlər bununla bitmir. Sözsüz ki, biz peşə təhsili səviyyəsini artırmalıyıq ki, həm işəgötürənlərdə, həm də valideyn və şagirdlərdə peşə təhsilinə maraq yaransın. Bu istiqamətdə də Təhsil Nazirliyi yanında Peşə Təhsili üzrə Dövlət Agentliyinin rəhbərliyi başda olmaqla hamımız səylə çalışırıq.

P.s. Bu müsahibə "Qadın Lideriliyi Uğrunda" İctimai Birliyinin Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə həyata keçirdiyi "Yuxarı sinif şagirdləri və ali təhsil almaq imkanı olmayan gənclər arasında peşə təhsilinin təbliği" layihəsi çərçivəsində hazırlanıb.

117
Teqlər:
Strateji Yol Xəritəsi, Cənubi Koreya, Koreya, Azərbaycan Təhsil Nazirliyi, Təhsil Nazirliyi, Texniki Peşə Məktəbi, peşə təhsili, peşə
PPX avtomobili, arxiv şəkli

Bakı sakini küçədə qətlə yetirilib

0
Hazırda prokurorluq və polis əməkdaşları tərəfindən cinayəti törətmiş şəxs və ya şəxslərin müəyyən edilərək tutulub istintaqa cəlb edilməsi istiqamətində intensiv və zəruri istintaq hərəkətləri və əməliyyat-axtarış tədbirləri davam etdirilir.

BAKI, 27 noyabr — Sputnik. Noyabrın 25-də saat 21 radələrində Xətai rayonu ərazisində İntizam İsmayılovun aldığı bədən xəsarətləri nəticəsində xəstəxanada ölməsi barədə Xətai rayon prokurorluğuna məlumat daxil olub.

Sputnik Azərbaycan Baş Prokurorluğun məlumatına istinadla xəbər verir ki, dərhal prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib.

Faktla bağlı Xətai rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanmış, müvafiq ekspertizalar təyin edilib.

İstintaqla hadisənin zərərçəkmişin yaşadığı evin yaxınlığında naməlum şəxs və ya şəxslər tərəfindən aralarında yaranmış münaqişə zamanı törədilməsinə əsaslı şübhələr müəyyən edilib.

Hazırda prokurorluq və polis əməkdaşları tərəfindən cinayəti törətmiş şəxs və ya şəxslərin müəyyən edilərək tutulub istintaqa cəlb edilməsi istiqamətində intensiv və zəruri istintaq hərəkətləri və əməliyyat-axtarış tədbirləri davam etdirilir.

0
Teqlər:
cinayət, istintaq, Bakı, qətl, Xətai rayonu, Xətai