* AZƏRBAYCAN *
Məktəblilər, arxiv şəkli

"Babalı Sərvərin boynuna" - valideynlər niyə iltizam imzalamalıdırlar?

1757
(Yenilənib 12:07 24.09.2020)
"Təhsil haqqında qanunda icbari təhsil hüququ var. Şagirdin icbari təhsil hüququ təmin edilməlidir. Tutaq ki, xəstələnib evdə qalan şagirdin evində internetə əlçatanlıq yoxdur. Onun heç teledərsləri izləməsi üçün televizoru da yoxdur".

Zülfiyyə Quluyeva, Sputnik Azərbaycan

BAKI, 24 sentyabr — Sputnik. Artıq ötən həftədən etibarən övladı məktəbə gedən valideynlər məktəblərə iltizam imzalamaq üçün dəvət olunurlar. Şagirdlərin "WhatsApp" qruplarına sinif rəhbərləri tərəfindən iltizam formaları göndərilir və bu sənədi imzalayaraq sinif rəhbərinə təqdim etmək tapşırılır. Valideynlərin Sputnik Azərbaycan-a verdikləri məlumata görə, paytaxtda əksər valideynlər artıq bu sənədi doldurduqdan sonra imza ataraq sinif rəhbərinə veriblər.

Gülnar Səfərova adlı valideyn Sputnik Azərbaycan-a açıqlamasında bildirib ki, iltizamı hansı səbəbdən imzalaması tam olaraq ona aydın olmasa da, sinif müəllimi bütün valideynlərə bu sənədi imzalayaraq təhvil vermələrini tapşırıb: "Bizə müəllim bildirdi ki, iltizam ona görə imzalanır ki, kim uşağını məktəbə göndərməsə, uşaq gələcəkdə summativlərdə iştirak etməsə, ona qiymət yazılmayacaq. Bizə deyilən budur".

Sputnik Azərbaycan ölkədə yeni tədris ilində valideynlərə imzaladılan iltizamın hansı məqsəd daşıdığını, bunun valideyn və məktəbin üzərinə hansı məsuliyyət qoyduğunu araşdırıb.

Əlaqə saxladığımız 49 saylı İntellekt məktəb-liseydən Sputnik Azərbaycan-a bildirdilər ki, virus riskindən qorxaraq övladlarını məktəbə göndərməyə ehtiyat edən valideynlər məktəb rəhbərliyinə, yaxud da sinif rəhbərinə yaxınlaşaraq xüsusi iltizam formasına qol çəkməlidirlər:

"Hansı valideyn uşağını mövcud vəziyyətlə bağlı məktəbə gəlməsindən imtina edirsə, onlar virtual məktəbdən istifadə edə bilərlər. Eyni zamanda evdə keçiriləcək distant təhsildən istifadə edə bilərlər. Valideyn bu formanı imzalamaqla öz öhdəliklərini təsdiqləmiş olur. Öhdəliklərdə şagirdlərin virtual dərslərdə iştirakına, teledərslərə baxmasına, müəllim tərəfindən verilən tapşırıqları vaxtlı-vaxtında yerinə yetirməsinə, məktəbdə müntəzəm keçiriləcək kiçik və böyük summativ qiymətləndirmələrdə iştirakına təminat verilir. Öhdəliklərə əməl edilməsə, bu cür şagirdlərin biliyi qiymətləndirilməyəcək və onlar sinifdə qalmaq təhlükəsi ilə üzləşəcəklər".

Təhsil üzrə ekspert Kamran Əsədov Sputnik Azərbaycan-a açıqlamasında bildirib ki, bu sənədin  imzaladılması ilə bütün məsuliyyətin valideynlərin üzərinə qoyulması yolverilməzdir.

K.Əsədovun sözlərinə görə, iltizamın imzalanması ilə bağlı proses ilk dəfə Dövlət İmtahan Mərkəzi (DİM) tərəfindən həyata keçirilib: "DİM-in tövsiyəsi ilə imtahan iştirakçıları imtahana gedərkən bəyannamə imzalamışdılar ki, mən və ailə üzvlərim virusa yoluxmamışam və yaxın 15 gündə təmasda olduğum insanlardan heç birində virus yoxdur. Bu, çox uğurlu addım idi. Nəticədə imtahanlar zamanı şagirdlər arasında yoluxma olmadı. Amma Təhsil Nazirliyi Dövlət İmtahan Mərkəzindən fərqli olaraq bunu pərakəndə formada həyata keçirir. Tutaq ki, məktəbə gedən şagird sağlamdır. Amma orada tədrisi aparan şəxs tərəfindən virusa yoluxma ola bilər. Bu zaman da məsuliyyətin valideynin üzərinə qoyulması yolverilməzdir".

K.Əsədov deyir ki, valideynlərə iltizamın imzaladılması qanunvericilikdə nəzərdə tutulmayıb: "Bu sənədin imzaladılması sadəcə tövsiyə xarakterlidir ki, sabah heç kəs heç kəsi günahlandırmasın. Çox təəssüf ki, Təhsil Nazirliyi bu məsələyə birtərəfli yanaşıb. Alternativ təhsillə təmin olunma mərkəzi var. Bir tərəfdən tələb edirlər ki, xəstə uşaq dərsə gəlməsin. Digər tərəfdən isə icbari təhsili tam təşkil edə bilmirlər. Təhsil haqqında qanunda isə icbari təhsil hüququ var. Şagirdin icbari təhsil hüququ təmin edilməlidir. Tutaq ki, xəstələnib evdə qalan şagirdin evində internetə əlçatanlıq yoxdur. Onun heç teledərsləri izləməsi üçün televizoru da yoxdur. Bu zaman necə olacaq? Həmin şagirdin icbari təhsil hüququ necə təmin olunacaq? Çox təəssüf ki, bu məsələdə Təhsil Nazirliyi öz məsuliyyətlərini valideynin üzərinə atmağa çalışır".

Ekspert deyir ki, şagird məktəbə gedirsə, valideyn bu iltizamı imzalamalıdır:

"Amma o sənəddə məktəbin üzərinə düşən məsuliyyət əks olunmayıb. Şagird virusa məktəbdə də yoluxa bilər. Bəlkə, məktəbdə müəllim, yaxud direktor xəstədir. Axı onlar hər hansı iltizam imzalamadan məktəbə buraxılırlar. Amma Təhsil Nazirliyi valideynlərə iltizam imzaladır. Onsuz da təhsilin yükü valideynlərin üzərindədir. Valideynlər övladlarının bilik əldə etməsi, daha yaxşı nəticə göstərməsi üçün repetitora müraciət edirlər. İndi bu iltizam sənədi ilə daha bir məsuliyyət valideynlərin üzərinə yükləndi".

Təhsil Nazirliyinin mətbuat katibi Cəsarət Valehov isə Sputnik Azərbaycan-a açıqlamasında bildirib ki, məktəblər tərəfindən valideynlərə iltizamın imzaladılması Təhsil Nazirliyinin müvafiq təlimatıdır: "Şagird əyani təhsili seçirsə, onun  keyfiyyətli təhsil alması üçün məsuliyyəti məktəb daşıyır. Amma uşaq məktəbə getmirsə, bu zaman onun virtual şəkildə keçirilən dərslərə qoşularaq lazımi bilik əldə edəcəyinə valideyn məsuliyyət götürür".

C.Valehovun sözlərinə görə, valideynlər iltizam formasına imza atdıqda şagirdin keçirilən summativlərdə iştirak edəcəyini və onun biliyinin məktəb tərəfindən qiymətləndiriləcəyini nəzərə almalı, öz övladlarının dərs proqramını mənimsəməsinə nəzarət etməlidirlər.

İltizam sənədində qeyd edilir ki, valideynlər pandemiya dövründə məktəbli övladlarında və ya digər ailə üzvlərində tənəffüs yolları şikayətləri, qızdırma, öskürək, nəfəs darlığı, ishal, COVID-19 xəstəliyi ilə bağlı hər-hansı şikayətlər olduqda, övladını məktəbə gətirməməsi və bu vəziyyətlə bağlı məktəb rəhbərliyinə məlumat verməlidir. Özündə və ya yaxınlarında xəstəlik simptomları olan təhsilalanların müəyyən olunmuş dövr ərzində məktəbdə keçirilən əyani dərslərə gəlməməsi barədə bütün təhsilalanların valideynləri (qanuni nümayəndələri) ilə iltizam forması imzalanır. Həmçinin valideyn pandemiya dövründə övladının ümumi təhsil müəssisəsinə gəlməsini onun səhhəti üçün təhlükəli hesab etdiyi halda onun teledərslərə baxmasını, virtual dərslərdə iştirakını, müəllimləri tərəfindən verilmiş tapşırıqların vaxtında yerinə yetirməsini və eləcə də müstəqil öyrənməsini təmin edəcəyi barədə yazılı öhdəlik götürür.

1757
Teqlər:
Təhsil Nazirliyi, imza, iltizam, valideynlər, valideyn, məktəb, karantin, təhsil
Əlaqədar
Heç yenisindən özümüzü qoruya bilmirik, köhnəsi də özünü yetirib
Gələn aydan məktəblərlə bağlı təhlükə daha da böyüyəcək
Təki oxumağa istək olsun: "Virtual məktəb"ə direktorlar da nəzarət edəcək
Nazirlikdən dərsliklərdə erməni bayrağı iddiasına cavab
Ölkədə təhsil böhranı yaşanır, internet problemi isə hələ də həllini tapmayıb
İmtahan, arxiv şəkli

Tərsinə fenomen: iki məktəb niyə hər kəsi məyus edib?

3026
Bakıda iki məktəbin heç bir məzunu ali məktəbə qəbul ola bilməyib. Sputnik Azərbaycan bunun səbəbini araşdırıb.

 

BAKI, 24 iyun — Sputnik. Bakıda iki orta ümumtəhsil müəssisəsindən ötən tədris ilində ali məktəbə bir məzun belə qəbul ola bilməyib. Dövlət İmtahan Mərkəzinin yaydığı xəbərə görə, bunlar 185 saylı və 105 saylı tam orta məktəblərdir. Bu məlumat sosial platformadakı təhsil qruplarında da geniş müzakirəyə və tənqidə səbəb olub. Sosial şəbəkə istifadəçiləri həmin məktəblərin rəhbərliyini və pedaqoji heyətini yaxşı təhsil verməməkdə günahlandıraraq tənqid ediblər.

Sputnik Azərbaycan ötən il ali məktəbə bir məzunu belə qəbul ola bilməyən məktəblərlə əlaqə saxlayaraq bunun səbəbini araşdırıb.

Xəzər rayonu, Qala qəsəbəsində yerləşən 185 saylı orta məktəbdən Sputnik Azərbaycan-a bildirdilər ki, məktəbin direktoru Esmira Rzaquliyeva məzuniyyətdə olduğundan bu suala cavab verə bilmir. Amma özünü məktəbin müəllimi kimi təqdim edən şəxs ötən il məzunların heç birinin ali məktəbə qəbul ola bilməməsinin səbəbini şagird sayının az olması ilə izah etdi. O bildirdi ki, əvvəlki illərdə məktəbin ali təhsil ocaqlarına qəbul imtahanlarında yüksək bal toplayaraq fərqlənən məzunları olub. Amma son illər məzun sayı azaldığından, ali məktəblərə qəbulla bağlı bu cür mənzərə yaranıb.

Ələtin Şıxlar massivində yerləşən 105 saylı məktəbin direktor əvəzi Mənsim Hacıyev isə Sputnik Azərbaycan-a açıqlamasında bildirib ki, ötən il məktəbin 11 məzunu olub. Onlardan üç nəfəri ali məktəbə sənəd verib. Bir məzun ödənişli universitetə qəbul olduğundan oxumaqdan imtina edib:

"Yerdə qalan yaxşı oxuyan şagirdlərimiz isə 9-cu sinifdən kolleclərə qəbul olublar. Amma əvvəlki illərdə ali məktəblərə qəbul olan şagirdlərimiz olub. Bu il 12 məzunumuz var. Onlardan 5 nəfəri ali məktəbə sənəd verib. Bizim məktəbin 2016-cı ildən bu tərəfə 105 bal toplayan məzunları olub. Bu rəqəm artmaqda davam edir. Fənn olimpiadalarında bizim dörd şagirdimiz yarımfinala çıxıb. Ümumilikdə məktəbdə məzun sayı azdır. Məzun sinifləri tək-təkdir. Növbəti ildən paralel siniflərdə məzun sayı artacaq. Ümid edirik ki, ali məktəbə qəbul olan məzunlarımız olacaq. Məktəbdə dərs deyən eyni müəllimlərdir. Buna görə birmənalı olaraq məktəbi günahkar çıxartmaq düzgün deyil", - deyə M.Hacıyev bildirib.

Qeyd edək ki, 2018-ci ildə keçirilən qəbul imtahanlarında Bakı şəhəri 140 saylı tam orta məktəbin bir abituriyenti belə, ali təhsil müəssisəsinə qəbul ola bilməmişdi.

Eləcə də oxuyun:

  • Təhsil Nazirliyi "Məzun günü" ilə bağlı qərar verib

  • "Azərbaycan dili" fənni üzrə ikinci imtahan keçiriləcək

  • Yüksək bal toplayan abituriyentlərlə bağlı statistik göstəricilər açıqlanıb

3026
Azərbaycan Respublikasının Təhsil Nazirliyinin binası, arxiv şəkli

Təhsil Nazirliyi "Məzun günü" ilə bağlı qərar verib

3546
(Yenilənib 16:06 24.06.2021)
Ali və orta ixtisas təhsili müəssisələrindən "Məzun günü"nün keçirilməsinə razılıq verilməsi ilə bağlı çoxsaylı müraciətlər daxil olur

BAKI, 24 iyun — Sputnik. Təhsil Nazirliyi ali və orta ixtisas təhsili müəssisələrində "Məzun günü"nün keçirilməsinə münasibət bildirib.

Nazirlikdən Sputnik Azərbaycan-a bildirilib ki, ali və orta ixtisas təhsili müəssisələrindən məzun gününün keçirilməsinə razılıq verilməsi ilə bağlı çoxsaylı müraciətlər daxil olur.

Qeyd olunub ki, ölkədəki sanitar-epidemioloji vəziyyət nəzərə alınaraq ali və orta ixtisas təhsili müəssisələri tərəfindən açıq havada, 100 nəfərdən çox olmamaq şərti ilə və Nazirlər Kabinetinin Operativ Qərargahının müvafiq tələbləri gözlənilməklə "Məzun günləri" təşkil edilə bilər.

Təlimat

Xatırladaq ki, Nazirlər Kabineti yanında Operativ Qərargahın razılığını nəzərə alaraq cari tədris ili üzrə "Son zəng" tədbirinin 14 iyun 2021-ci il tarixində müəyyən qaydalara əməl edilməklə təşkil edilməsinə icazə verilib.

Təlimatda deyilirdi:

- Tədbirin ümumi təhsil müəssisəsinin həyətyanı ərazisində sosial məsafə gözlənilməklə açıq hava şəraitində 1 (bir) saatdan artıq olmamaqla keçirilməsi;

- Yalnız ümumi təhsil müəssisəsinin 11-ci sinif şagirdlərinin, məktəb rəhbərliyinin və məhdud sayda müəllimin iştirakı ilə keçirilməsi;

- 11-ci sinif şagirdlərinin sayı 100 (bir yüz) nəfərdən çox olan ümumi təhsil müəssisələrində iki mərhələdə günün müxtəlif vaxtlarında keçirilməsi.

- Tədbirin qapalı məkanlarda (akt zalları, idman zalları, sinif otaqları, məktəbin foyesi və s.) təşkil edilməsinə və tədbirdə valideynlərin iştirakına icazə verilmir.

Yuxarıda qeyd edilənləri nəzərə alaraq, "Son zəng" tədbirinin keçirilməsinə nəzarət ümumi təhsil müəssisəsinin rəhbərliyinə tapşırılır.

Eləcə də oxuyun:

  • Əlvida uşaqlıq! Azərbaycanlı məzunlar məktəblərlə vidalaşır

  • Məşhurlar və onların məzun günü - FOTOLENT

3546
Teqlər:
qərar, Təhsil Nazirliyi, məzun günü
İnsan kölgəsi, arxiv şəkli

Günün kriminal mənzərəsi: Minalar, narkotiklər, qətllər dələduzluq

0
Daxili İşlər nazirliyi və Baş Prokurorluq bu gün ölkə ərazisində baş vermiş kriminal hadisələr və açılan cinayət işləri barədə məlumat yayıb.

BAKI, 24 iyun — Sputnik. İyunun 23-də ölkəmizdə kriminal hadisəsiz keçməyib. Sputnik Azərbaycan günün kriminal xronikasını təqdim edir:

Xocavənd rayonunda yollara basdırılmış minalar polis əməkdaşları tərəfindən aşkar edilib. Xocavənd Rayon Polis Şöbəsinin əməkdaşları rayon ərazisində xidməti fəaliyyətlərini yerinə yetirərərkən kəndlərarası yollarda quraşdırılmış Ermənistan istehsalı olan tank əleyhinə minalar aşkar ediblər.

DİN-in Mətbuat Xidmətinin Bərdə regional qrupundan verilən məlumata görə, iyunun 23-də Xocavənd RPŞ-nin əməkdaşları xidməti ərazidə nəzarət-profilaktik tədbirlər keçirərkən Ağcakənd kəndinə gedən yolda basdırılmış 2 ədəd tank əleyhinə mina aşkar ediblər. Dərhal bu barədə Minatəmizləmə Agentliyinin əməkdaşlarına məlumat verilib.

Agentliyin əməkdaşları tərəfindən əraziyə baxış keçirilən zaman daha 3 ədəd tank əleyhinə mina aşkar edilib. Aşkar edilmiş 5 mina zərərsizləşdirilib. İyunun 24-də rayon ərazisində baş vermiş yanğın ilə əlaqədar Xocavənd RPŞ-nin əməkdaşları hadisə baş verən yerə gedərkən Düdükçü-Edilli kənd yolunda daha 2 ədəd tank əleyhinə mina aşkar ediblər. Bu barədə Minatəmizləmə Agentliyinin əməkdaşlarına məlumat verilib. Minaların ərazidən götürülməsi istiqamətində tədbirlər davam etdirilir.

Ağcabədi sakininin cəbbəxanası

Ağcabədi sakinindən isə silah-sursat götürülüb. Ağcabədi Rayon Polis Şöbəsinin əməkdaşları tərəfindən qanunsuz saxlanılan odlu silah-sursatın aşkar edilməsi istiqamətində əməliyyat tədbiri keçirilib. DİN-in Mətbuat Xidmətinin Bərdə regional qrupundan verilən məlumata görə, bu barədə Ağcabədi RPŞ-yə məlumat daxil olub.

Polis əməkdaşlarının bu istiqamətdə keçirdikləri əməliyyat-axtarış tədbirləri nəticəsində rayonun Avşar kənd sakini Elyaz Qədimov saxlanılıb. Onun şəhər ərazisində yerləşən yaşadığı evə baxış keçirilən zaman 1 ədəd "TT" markalı tapança, həmin silaha məxsus 2 ədəd sandıqça və 5 ədəd patron aşkar edilərək götürülüb. Faktla bağlı Ağcabədi RPŞ-də araşdırmalar davam etdirilir.

Ev deyil, narkotiklər yuvasıdır

DİN-in Mətbuat Xidmətinin Şirvan regional qrupundan verilən məlumata görə, isə Hacıqabul Rayon Polis Şöbəsinin əməkdaşları tərəfindən həyata keçirilən əməliyyat tədbirləri nəticəsində narkotik vasitələrin qanunsuz dövriyyəsi və kultivasiyası ilə məşğul olmaqda şübhəli bilinən şəhər sakini Əli Əlhəsənov saxlanılıb.

Şöbə əməkdaşları tərəfindən ona məxsus fərdi yaşayış evinə keçirilən baxış zamanı oradan təmiz çəkisi 140 qram olan qurudulmuş marixuana, eləcə də həyətyanı sahədən xüsusi aqrotexniki qaydada qulluq edilərək yetişdirilmiş 9 ədəd çətənə kolu aşkarlanaraq götürülüb. Faktla bağlı Hacıqabul Rayon Polis Şöbəsində araşdırmalar aparılır.

Qonşu qadını öldürmək

Sumqayıt Şəhər Prokurorluğundan verilən məlumata görə, iyunun 23-ü saat 23 radələrində 1972-ci il təvəllüdlü Sevil Abdullayevanın H.Z.Tağıyev qəsəbəsi ərazisində ölməsi barədə şəhər prokurorluğuna məlumat daxil olub.

Aparılmış ilkin araşdırmalarla zərərçəkmişin qonşusu 1993-cü il təvəllüdlü Ağabəy Atabalayev tərəfindən şəxsi münasibətlər zəminində aralarında yaranmış münaqişə zamanı Sevil Abdullayevaya çoxsaylı bıçaq xəsarətləri yetirərək qəsdən öldürməsinə əsaslı şübhələr müəyyən edilib.

Faktla bağlı Sumqayıt şəhər prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Ağabəy Atabalayev şübhəli şəxs qismində tutularaq istintaqa cəlb edilib. Hazırda cinayət işi üzrə istintaq davam etdirilir.

Lənkəranda qətl

Lənkəran rayon prokurorluğunun məlumatına görə, iyunun 23-ü saat 22 radələrində Lənkəran rayonu Havzava kənd sakinləri Elmar Fərəcov və Amil Mirzəzadənin ölmələri barədə rayon prokurorluğuna məlumat daxil olub. Aparılmış ilkin araşdırmalarla zərərçəkmişlərin qohumu Seymur Şiriyevin şəxsi münasibətlər zəminində aralarında yaranmış münaqişə zamanı Elmar Fərəcov və Amil Mirzəzadəyə odlu silahdan atəş açmaqla onları qəsdən öldürməsinə əsaslı şübhələr müəyyən edilib.

Faktla bağlı Lənkəran rayon prokurorluğunda Cinayət Məcəlləsinin 120.2.7-ci (iki və ya daha çox şəxsi qəsdən öldürmə) maddəsi ilə cinayət işi başlanılıb. Hazırda cinayəti törətmiş şəxsin müəyyən edilərək tutulub istintaqa cəlb edilməsi istiqamətində intensiv və zəruri istintaq hərəkətləri və əməliyyat-axtarış tədbirləri davam etdirilir.

Satış təmsilçisi pulları hara edib?

Baş Prokurorluqdan bildirilib ki, "Bolluq LTD" MMC-nin Şirvan şəhər filialında yol verilmiş qanunsuzluqlarla bağlı daxil olmuş müraciət əsasında rayon prokurorluğunda araşdırma aparılıb. Aparılmış araşdırma zamanı MMC-nin satış təmsilçisi vəzifəsində işləmiş Gündüz Həsənli tərəfindən 2020-ci il noyabrın 01-dən 2021-ci il aprelin 19-dək olan dövrə 69 müştəri üzrə mədaxil və məxaricə dair həyata keçirilmiş əməliyyatlarda 15 min 400 manat məbləğində çatışmazlıq aşkar edilib.

Qeyd edilən faktla bağlı Cinayət Məcəlləsinin 179.2.3 və 179.2.4-cü (mənimsəmə-şəxs tərəfindən öz qulluq mövqeyindən istifadə etməklə xeyli miqdarda ziyan vurmaqla törədildikdə) maddələri ilə cinayət işi başlanılıb. Hazırda cinayətin təfərrüatlarının araşdırılması və təqsirli şəxsin (şəxslərin) məsuliyyətə cəlb edilməsi istiqamətində zəruri istintaq tədbirləri davam etdirilir.

"Avropada işədüzəltmə" adı ilə pul toplamaq

Baş Prokurorluğun "İnstagram" sosial şəbəkəsindəki səhifəsində sual-cavab adlı sessiya (#prokurorluqlasualcavab) keçirilərkən ayrı-ayrı şəxslər tərəfindən Klara Cəfərovanın Avropada işə düzəltmək adı ilə onlardan və digər şəxslərdən müxtəlif məbləğlərdə pul alaraq dələduzluq etməsi barədə müraciətlər daxil olub. Müəyyən edilib ki, bir qrup şəxsin "Poseidon Talents Consulting" MMC-nin direktoru Klara Cəfərova tərəfindən xarici ölkələrə göndərilməsi, təyyarə biletlərinin alınması, viza və sığorta sənədlərlə təmin edilməsi adı ilə vəzifə səlahiyyətlərindən sui-istifadə edərək ümumi 10 epizod üzrə müxtəlif məbləğlərdə pul alaraq dələduzluq etməsi faktına görə Xətai rayon prokurorluğunda Cinayət Məcəlləsinin müvafiq maddələri ilə cinayət işi başlanıb.

İyunun 19-da Klara Cəfərova həmin Məcəllənin 178.2 (dələduzluq) və 308.1-ci (vəzifə səlahiyyətlərindən sui-istifadə) maddələri ilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib. Qeyd olunan cinayət işi üzrə ibtidai istintaq yekunlaşdırılaraq, iş materialları ilə tanış etmə həyata keçirilir. Qısa müddət ərzində cinayət işinin məhkəməyə göndərilməsi nəzərdə tutulub. Eyni zamanda bildirilirki, digər 14 zərərçəkmiş şəxsin Klara Cəfərovanın qanunsuz hərəkətlərinə dair müraciətləri ilə bağlı daha bir cinayət işi ayrılmaqla, hazırda zəruri istintaq hərəkətləri həyata keçirilir.

0