Tələbə, arxiv şəkli

Köhnə hamam, köhnə tas: Qanunda var, amma tətbiqi dalana dirənib

612
(Yenilənib 19:42 29.10.2019)
Təhsil eksperti Kamran Əsədov: “Universitetlər distant təhsilə hazırdır, amma tətbiq edə bilmirlər. Çünki Təhsil Nazirliyi distant təhsilə görə verilən diplomu tanımır”

Zülfiyyə Quliyeva, Sputnik Azərbaycan

BAKI, 30 oktyabr — Sputnik. Texnologiyanın kifayət qədər inkişaf etdiyi bir dövrdə həyatımızı artıq distant (məsafədən) təhsilsiz təsəvvürümüz mümkün deyil. Xarici ölkələrdə universitetlər hər il distant təhsil hesabına ali təhsil ocağına minlərlə tələbə cəlb edir. Amma Azərbaycanda 2009-cu ildə qəbul edilmiş "Təhsil haqqında" qanunda ali təhsil alma formalarından biri kimi distant təhsil qəbul edilsə də, indiyə qədər bunun tətbiqi mümkünsüzdür.

Sputnik Azərbaycan ölkəmizin ali təhsil ocaqlarında distant təhsilin tətbiqinə mane olan səbəbləri araşdırıb.

Milli Məclisin Elm və təhsil komitəsinin üzvü, deputat Sona Əliyeva bildirib ki, distant təhsil forması qanunda və Nazirlər Kabinetinin müvafiq qərarında öz əksini tapıb. Amma S.Əliyeva hələlik ölkəmizdə distant təhsilin verilməsi üçün bütün ali təhsil müəssisələrinin tam hazır olmadığını söyləyir. Həmsöhbətimiz deyir ki, söhbət distant təhsilin tətbiqindən yox, keyfiyyətli tətbiqindən gedir: "Bu gün bəzi universitetlər distant təhsil verməyə hazır olsalar da, bu kütləvi xarakter daşımır. Bundan əlavə, distant təhsil məsafədən təhsil olduğundan, bu təhsil formasının keyfiyyətli olması şərtdir. Bunun üçün isə ali məktəblər İKT baxımından tam hazır olmalıdırlar. Həmçinin elektron dərsliklər olmalıdır".

Bilet əvəzinə məktəbli geyimi: Gələcəyimizə niyə güzəşt edə bilmirik?>>

Təhsil üzrə ekspert Kamran Əsədov Sputnik Azərbaycan-a açıqlamasında deyib ki, ölkəmizdə distant təhsilin tətbiq olunmamasının əsas səbəbi distant təhsil mexanizminin hazırlanmamasıdır. Ekspert bildirir ki, Azərbaycanda distant təhsilin mexanizmi işlənib hazırlanmadığından onu təhsilin bir forması kimi qəbul etmək olmaz: "Bu gün bəzi universitetlər distant təhsilə hazırdır. Amma onlar distant təhsili tətbiq edə bilmirlər. Çünki bu gün Təhsil Nazirliyi də distant təhsilə görə verilən diplomu tanımır".

K.Əsədov deyir ki, bu gün xaricdə distant təhsil alıb ölkəmizə gələnlər də eyni aqibəti yaşayır: "Türkiyədə distant təhsil verilsə də, Azərbaycan vətəndaşı olan tələbələr bundan faydalana bilmirlər. Çünki Təhsil Nazirliyi distant təhsillə bağlı diplomların tanınmaması barədə qərarını xaricdə distant təhsilə də şamil edir. Distant təhsilalma forması bizim normativ hüquqi aktlara uyğun deyil".

K.Əsədov bildirir ki, distant təhsil, xaricə gedib təhsil ala bilməyənlər üçün ən əlverişli təhsil formasıdır. Onun sözlərinə görə, məsafədən təhsilin forması olan distant təhsil, işləyən, ailə vəziyyətinə və sağlamlıq imkanlarına görə xaricə təhsil almağa gedə bilməyənlərin xaricdə təhsil almasına imkan yaradır. Amma hələ də ölkəmizdə heç bir universitet distant təhsil vermir.

Sputnik Azərbaycan ölkəmizdəki nüfuzlu ali təhsil müəssisələrində distant təhsilin gecikməsinin səbəbini öyrənib. Bakı Dövlət Universitetinin (BDU) mətbuat katibi Pərvanə İbrahimova səbəbini izah etməsə də, BDU-da distant təhsilin hələlik mümkün olmadığını söyləyib. Digər universitetlərdən isə distant təhsilə hazır olduqlarını desələr də, qərar verilmədiyindən tətbiqinə başlanılmadığını söyləyiblər. 

Araşdırma zamanı məlum oldu ki, Azərbaycan Dövlət İqtisad Universitetində artıq distant təlimlər aparılır. Universitetin Marketinq və Kommunikasiya Departamentinin İctimaiyyətlə Əlaqələr şöbəsinin rəhbəri Elnarə Ömərova Sputnik Azərbaycan-a bildirib ki, UNEC ekstern distant təlimlər aparır. Hətta buna görə sertifikatlar verilir. Onun sözlərinə görə, universitetdə Çin dili distant tədris edilir. Amma ölkə üzrə distant təhsilə başlanılmadığından, UNEC-də distant təhsilin tətbiqi ləngiyir.

Bakı Mühəndislik Universitetinin elmi işlər üzrə prorektoru Elçin Süleymanov da BMU-nun texnoloji infrastruktur cəhətdən distant verilən təhsilə hazır olduğunu deyib. Onun sözlərinə görə, hətta Azərbaycanın təhsil qanunvericiliyində distant təhsillə bağlı qanun tətbiq edilərsə, BMU 10 min tələbəyə distant təhsil verə bilər.

Təhsil Nazirliyindən isə Sputnik Azərbaycan-a bildirdilər ki, hazırda xarici ölkələrdə yalnız əyani və qiyabi təhsil alanların diplomları tanınır. Amma bu formada təhsilalma hələ diplomun tanınması demək deyil. "Qiyabi təhsil alanlar həmin ölkənin ərazisində azı 15 gün, əyani təhsil alanlar isə 90 gün semestr ərzində olmalıdırlar. Əgər onların semestr ərzində təhsil aldıqları müddət bundan az olarsa, həmin diplomların tanınmasından imtina olunur", – deyə Təhsil Nazirliyindən bildiriblər.

612

Qəbul imtahanları başlayır: 13 14 avqusta təyin olunub

14
(Yenilənib 15:21 07.08.2020)
I-IV ixtisas qrupu üzrə sənəd verən abituriyentlərin blok imtahanları (həmçinin II və III ixtisas qrupu üzrə sənəd verənlərin əlavə xarici dil imtahanları ) tarixləri haqqında növbəti həftə məlumat veriləcək.

BAKI, 7 avqust – Sputnik. Dövlət İmtahan Mərkəzi 13 və 14 avqustda keçiriləcək qəbul imtahanlarının ikinci mərhələsinin qrafikini elan edib.

Mərkəzdən Sputnik Azərbaycan-a verilən məlumata görə, imtahanlar pandemiya şəraiti və xüsusi karantin rejimi tələblərinə uyğun olaraq təşkil ediləcək. İmtahanlarda kütləviliyin və təmas hallarının qarşısını almaq məqsədilə hər ixtisas qrupu üzrə imtahan aşağıdakı qrafikə uyğun 2 gün ərzində keçiriləcək.

Bu ilin məzunları bitirdikləri məktəbin yerləşdiyi yerə uyğun imtahan mərkəzində imtahan verirlər. Əvvəlki illərin məzunları isə şəxsi kabinetlərində faktiki yaşadıqları ünvanı qeyd etdikləri halda, yaşadıqları ünvanın aid olduğu yerə uyğun, əks halda, şəxsiyyət vəsiqəsində qeyd olunmuş ünvanın aid olduğu yerə uyğun imtahan mərkəzində imtahan verirlər.

13-14 avqust tarixlərində:

• cari və əvvəlki illərin məzunları üçün II və III ixtisas qrupları üzrə qəbul imtahanları;

• I-IV ixtisas qrupları üzrə:

– ali və ya orta ixtisas təhsili müəssisələrinin müsabiqəsində buraxılış imtahanında verdiyi xarici dildən fərqli dil üzrə iştirak etmək istəyənlər üçün əlavə xarici dil imtahanı;

– qəbul imtahanını buraxılış imtahanında verdiyi dildən fərqli dil üzrə vermək istəyənlər üçün əlavə imtahan (Azərbaycan və ya rus dili) imtahanları keçiriləcək.

I-IV ixtisas qrupu üzrə sənəd verən abituriyentlərin blok imtahanları (həmçinin II və III ixtisas qrupu üzrə sənəd verənlərin əlavə xarici dil imtahanları ) tarixləri haqqında növbəti həftə məlumat veriləcək.

© Photo : REPORT
Cədvəl

Qeyd edək ki, məcburi köçkün rayonlarının məktəblərində təhsil alan şagirdlər bitirdikləri təhsil müəssisəsinin yerləşdiyi rayona müvafiq imtahan mərkəzində imtahan verirlər.

 

- Sərtləşdirilmiş xüsusi karantin rejiminin tətbiq olunduğu şəhər və rayonlara giriş-çıxışa məhdudiyyət qoyulduğu üçün imtahan iştirakçıları haqqında məlumat bazası aidiyyəti qurumlara təqdim ediləcək, imtahan iştirakçılarının və ehtiyac olarsa, iştirakçını müşayiət edən bir nəfərin imtahan binasına gedib və imtahandan sonra qayıtmasına icazə veriləcək. 

İmtahan iştirakçısına “İmtahana buraxılış vərəqəsi” ilə bir yerdə onu müşayiət edəcək 1 nəfər üçün arayış da çap etmək imkanı yaradılıb. Arayış imtahan iştirakçısı tərəfindən doldurulmalı və imza ilə təsdiqlənməlidir. Arayış yoxlama zamanı şəxsiyyət vəsiqəsi ilə birlikdə təqdim edilir və imtahan iştirakçısının özü iştirak etdikdə (imtahan binasının yaxınlığında gözləmək istisna olmaqla) və onun müvafiq sənədləri (şəxsiyyət vəsiqəsi, imtahana buraxılış vərəqəsi) təqdim edildikdə etibarlıdır. Yoxlama zamanı zərurət yarandıqda QR kodundan istifadə olunur.

- İmtahana buraxılış vərəqələri imtahandan 5 gün əvvəl DİM-in saytında yerləşdiriləcək.

- Ali təhsil müəssisələrinə qəbul imtahanının ikinci mərhələsinə hazırlaşan abituriyentlər fənlər üzrə tapşırıq nümunələri ilə “Abituriyent” 1 jurnalında tanış ola bilərlər. Ətraflı məlumat “burada”.

14
Bakı məktəblərin birində tədris prosesi, arxiv şəkli

Hər kəs oxuyacaq - Nazirlik yeni tədris ili məsələsinə aydınlıq gətirdi

851
Ölkədəki sanitar-epidemioloji şəraitdən asılı olmayaraq, 2020-2021-ci tədris ilində bütün təhsilalanların təhsil hüququnun təmin edilməsi məqsədilə müvafiq tədbirlər görülməkdədir

BAKI, 5 avqust — Sputnik. Hazırda Təhsil Nazirliyi 2020-2021-ci tədris ilinə hazırlıq məqsədilə sistemli tədbirlər həyata keçirilir.

Bu barədə Sputnik Azərbaycan-a Təhsil Nazirliyindən məlumat verilib.

Məlumata görə, ümumi təhsil müəssisələrinin I siniflərinə şagirdlərin qəbulu prosesi aparılır, müəllimlərin işə qəbulu imtahanının növbəti həftədən başlanması nəzərdə tutulur, təhsil müəssisələrinin tikintisi və təmiri, tədris resurslarının hazırlanması və digər sahələr üzrə işlər isə davam etdirilir.

Eyni zamanda, Təhsil Nazirliyi tərəfindən pandemiya şəraitində tədris prosesinin təşkili ilə bağlı digər ölkələrin təcrübəsi və beynəlxalq təşkilatların tövsiyələri öyrənilir, ölkəmizin aidiyyatı dövlət qurumları ilə bu istiqamətdə müzakirələr aparılır.

Ölkədəki sanitar-epidemioloji şəraitdən asılı olmayaraq, 2020-2021-ci tədris ilində bütün təhsilalanların təhsil hüququnun təmin edilməsi məqsədilə müvafiq tədbirlər görülməkdədir. Bunun üçün ənənəvi təhsil forması ilə yanaşı, müxtəlif təhsil pillələri üçün bir sıra modellər artıq formalaşdırılıb. Bu istiqamətdə mövcud resurslardan istifadə ilə yanaşı, beynəlxalq təşkilatlarla da əməkdaşlıq həyata keçirilməkdədir.

Tədris prosesinin təşkili ilə bağlı təkliflərin hazırlanması zamanı təhsilalanların yaş qrupları və öyrənmə ehtiyacları, təhsil pillələrinin xüsusiyyətləri, təhsil infrastrukturunun imkanları, ölkənin müxtəlif bölgələrində epidemioloji vəziyyət və ölkədə karantin rejimi ilə bağlı tətbiq edilən məhdudiyyətlər nəzərə alınır. Bununla bağlı mütəmadi olaraq ictimaiyyətə məlumat veriləcək.

851
Hirkan Milli Parkında ayı

Heyvanları qəfəsdə saxlayan restoran sahibi cəzalanıb

0
(Yenilənib 23:56 07.08.2020)
R.Bağırov onu da qeyd edib ki, aparılan araşdırma zamanı heyvanların vaxtlı-vaxtında qidalandığı, onlara baytar nəzarətinin həyata keçirildiyi və saxlanıldığı yerlərin təmizləndiyi müəyyən olunub.

BAKI, 8 avqust — Sputnik. İsmayıllı rayonu "Günəş Park" restoranında heyvanların qəfəsdə saxlanılması ilə bağlı şikayət Dövlət Ekoloji Təhlükəsizlik Xidmətinin əməkdaşları tərəfindən yerində araşdırılıb.

Sputnik Azərbaycan xəbər verir ki, bu barədə xidmətin rəis müavini Ramal Bağırov danışıb.

O bildirib ki, aparılan araşdırma zamanı sözügedən istirahət mərkəzində qəfəslərdə saxlanılan zebra, dovşan, dəvə, meymun, maral, tovuzquşu, qırqovul və dəvəquşunun xaricdən gətirilməsinə dair rəsmi təsdiqedici sənədlərinin olduğu, lakin saxlanılması üçün müvafiq icazə sənədinin olmadığı məlum olub.

"Faktla bağlı istirahət mərkəzinin rəhbəri Sərxan İsgəndərov barəsində akt, protokol tərtib olunub və o, 2000 manat məbləğində cərimə edilib.

Zooloji kolleksiyanın yaradılması məqsədilə icazə sənədinin alınması üçün restoran sahibinə icrası məcburi olan "məcburi göstəriş" verilib".

R.Bağırov onu da qeyd edib ki, aparılan araşdırma zamanı heyvanların vaxtlı-vaxtında qidalandığı, onlara baytar nəzarətinin həyata keçirildiyi və saxlanıldığı yerlərin təmizləndiyi müəyyən olunub.

0