Sinif otağında şagirdlər, arxiv şəkli

Orta təhsilini bitirə bilməyən şəxslər üçün yeni fürsət

119
(Yenilənib 11:29 10.12.2018)
Qeydiyyat və sənəd qəbulu 10-21 dekabr 2018-ci il tarixlərində aparılacaq

BAKI, 10 dekabr — Sputnik. Əvvəlki illərdə ümumi təhsil məktəblərində oxuyub tam orta təhsilini bitirə bilməyən şəxslər üçün eksternat qaydasında imtahanlar keçiriləcək. Bu barədə Sputnik Azərbaycan-a Bakı Şəhəri üzrə Təhsil İdarəsindən (BŞTİ) məlumat verilib.

Məlumata görə, sərbəst (eksternat) təhsilalma formasının tətbiqi müxtəlif səbəblərdən tam orta təhsil səviyyəsini başa vura bilməyən şəxslərə buraxılış imtahanı verərək həmin səviyyə üzrə müvafiq təhsil sənədi almaq üçün şərait yaratmaq məqsədi daşıyır.

BŞTİ rəhbərliyinin əmrinə əsasən, eksternat imtahanları 7-8 yanvar 2019-cu il tarixlərində paytaxtdakı 258 nömrəli tam orta məktəbdə təşkil olunacaq. Qeydiyyat və sənəd qəbulu 10-21 dekabr 2018-ci il tarixlərində (yalnız iş günləri saat 14:00-dan 17:30-dək) BŞTİ-də aparılacaq.

Ərizələri BŞTİ tərəfindən qəbul edilmiş eksternlər 27-28 dekabr 2018-ci il tarixlərində saat 10:00-dan 16:00-dək 258 nömrəli tam orta məktəbdən (şəxsiyyət vəsiqələrini təqdim etməklə) imtahana buraxılış vərəqələrini əldə edə bilərlər.

Eksternat imtahanlarında uğur qazanmış şəxslər tam orta təhsil haqqında sənəd (attestat) almaq üçün Dövlət İmtahan Mərkəzi tərəfindən tam orta təhsil səviyyəsi üzrə keçirilən buraxılış imtahanlarında iştirak etmək hüququna sahib olacaqlar.

119
Teqlər:
qayda, imtahan, təhsil, attestat
Əlaqədar
Ümumi təhsil müəssisələrində buraxılış qaydalarına dəyişiklik edilir
Deputatdan inqilabi təkliflər: 11 illik icbari təhsil, məktəblərə maliyyə azadlığı...
Təhsil İdarəsinin əməkdaşları xəsarət alan şagirdlərə baş çəkdi