Tələbələr

Gənclərimizin xarici ölkə sevdasının kökündə nələr varmış - Cazibə qüvvəsi

12260
(Yenilənib 16:00 01.08.2018)
Yaxud gəcnlər hansı səbəbdən ali təhsil üçün Azərbaycan universitetlərində deyil, xarici ölkələrin universitetlərini seçirlər?

Təranə Xudabaxşiyeva, Sputnik Azərbaycan

BAKI, 1 avqust — Sputnik. Son illər Azərbaycanda orta məktəbi bitirən abituriyentlər ali təhsillərini Azərbaycan universitetlərində deyil, xarici dövlətlərin, xüsusilə Türkiyənin ali məktəblərində almağa çalışırlar. Bir hissə də Avropa və Amerika universitetlərinə üstünlük verir.

Maraqlıdır, gənclərimiz hansı səbəbdən ali təhsil üçün Azərbaycan universitetlərində deyil, xarici ölkələrin universitetlərini seçirlər? Xaricdə təhsilin nə kimi üstünlükləri olduğunu düşünürlər?

Sputnik Azərbaycan bu suallara cavab tapmaq məqsədilə sosial şəbəkədə sorğu keçirib. Sorğumuzda iştirak edənlərin cavablarını təqdim edirik:

İsmayıl Əhməd: "1993-2003 illərdə dövlət xətti ilə rəsmi olaraq xaricdə təhsil almışam. Vətənə qayıdandan sonra diplomumu Təhsil Nazirliyində 200 ABŞ dolları verərək təsdiqlədə bildim, əks halda təsdiqləmirdilər. Təhsil Nazirliyi azad təyinat deyib, məsuliyyəti üzərindən atırdı. Nazirlikdən deyirdilər ki, "Qafqaz Müsəlmanları İdarəsi sizi hara göndəribsə, onlar da sizi işlə təmin etsinlər". Məni və mənim kimi 40-dan çox tələbəni belə aldatdılar. Hətta həmin tələbələrin 90%- nin diplomu indiyə qədər təsdiqlənməyib. Xaricdə ilahiyyat fakültəsini seçməyimin səbəbi isə ölkəmizdə ilahiyyat sahəsinin məni nə o vaxt, nə də indi qane etməsidir. Xaricdə oxuyanlara qapıların açıq olmasına gəlincə, boş iddiadır. Rusiyada, Türkiyədə oxuyub gəlmiş və işsiz qalmış onlarla tələbə göstərə bilərəm".

Cabbar Məmmədov: "Xaricdə təhsil alıb gələnlərin üzlərinə iş yerlərinin qapıları açıq olur. Azərbaycanda magistr təhsili alsan belə, faydası olmur və işsiz qalırsan".

Rauf Alagözov: "Xaricdə təhsil nəzəriyyədən çox praktika üzərində qurulur deyə təhsil alan şəxs peşəkar olur və təcrübə keçməsinə ehtiyac qalmır. Bizdə isə təhsil sadəcə nəzəriyyədir deyə diplom alanların çoxu işi kağız üzərində bilir, praktikada icra edə bilmir. Bu da sonradan iş tapmaqda problem yaradır".

Kazım Kazımov: "Xaricdə təhsil almaq ən azından xarici dillərdən birini daha yaxşı öyrənməyə kömək edir. Eyni zamanda, xarici təcrübəyə sahib olmaqdır. Məsələn, mənim böyük oğlumun 10 yaşı var, 4-cü sinifdə oxuyur və ana dilindən başqa 3 dildə sərbəst danışır. Bir sözlə, xaricdə oxumağın üstün cəhətləri çoxdur. Mən Azərbaycanda 8 il təhsil sahəsində işləmişəm. Bizim müəllimlər daha çox savadlıdır, amma təhsil sistemində problem var. Sistemdə elə böyük problem fərqi var ki, o böyük fərq təhsilimizi 19-cu əsirin təhsil səviyyəsində saxlayıb".

Kənan İbrahimli: "Ən başlıca səbəb Azərbaycan universitetlərinin ali təhsil səviyyəsini verə bilməməsidir. Mən Bakıdakı türk liseylərindən birində orta təhsil almışam. Hal-hazırda İstanbul Universitetinin Maliyyə bölümündə təhsil alıram. Mənim kimi bəzi sinif yoldaşlarım da xarici ölkələrə üz tutub. İndi müqayisə edəndə görürük ki, Azərbaycanda təhsil alanlarla bizim aramızda xeyli fərq var. Azərbaycan universitetləri ən yaxşı universitetlər siyahısında yer almır və ya sonlarda yer alır. Təhsil səviyyəsi də ölkədən ölkəyə dəyişir. Türkiyə milləti, mədəniyyəti, dili bizə yaxındır. Türkiyədə də barmaqla sayılacaq yüksək səviyyədə təhsil verən universitet var. Onlardan biri də İstanbul Universitetidir.

Mən 1-ci kursu bitirməyimə baxmayaraq, bir çox akademik nailiyyətlər qazanmışam. Dünya səviyyəli professorlardan iqtisadi biliklər əldə etmişəm. İmtahan verib, Almaniyanın Bremen Universitetindən 1 illik burs qazanmışam. Orada da yüksək nəticə əldə etsəm, təhsilimin qalan hissəsini də Almaniyada davam etdirə bilərəm. Çünki yaxşı oxuyan tələbələri Almaniyada saxlayırlar, onları işlə təmin edirlər. Əgər Almaniyada təhsilimi 1 ildən artıq davam etdirməsəm, İstanbula qayıdıb, Amerika universitetləri üçün imtahan verəcəyəm. Hədəfim Amerika və Koreyada təhsil almaqdır. Azərbaycan universitetlərində isə bu imkanlar yoxdur. Orada yaxşı oxuyanda ən yaxşı halda qırmızı diplom əldə edirsən. Bundan əlavə xaricdə təhsil alanların iş tapma şansı daha yüksəkdir. İstər Azərbaycanda, istər digər dövlətlərdə".

Ruslan Əliyev: "İlk olaraq deyim ki, Azərbaycanda təhsil sistemi pulla satılan kitabdan başlayır və ancaq əzbərləməkdən ibarətdir. Mən Avstraliyada təhsil alıram. Burada təhsil praktika üzərində qurulub. Təhsil zamanı həm öyrənirsən, həm də praktika əldə edirsən. Universitet sənə iş şəraiti yaradır. Azərbaycan təhsili ilə Avstraliya təhsili arasında yerlə-göy qədər fərq var".

Rəsul Məmmədov: "Polşa universitetində təhsil alıram. Bu universiteti seçməkdə məqsədim isə burada təhsil və iş həyatı boyunca aldığım təcrübələri geri döndüyüm zaman ölkəmdə tətbiq edərək, öz təcrübələrimlə vətənimizin inkişafında paya sahib olmaqdır. Polşanı seçməkdə səbəbim isə Avropa ölkələri arasında maddi baxımdan mənə ən uyğun olan ölkə olması idi".

12260
Teqlər:
xarici ölkə, təhsil, universitet, məktəb, gənc, Türkiyə, tələbə, Azərbaycan
Əlaqədar
Nə kitablar var, nə də müəllimlər: Gürcüstanda Azərbaycan dilində təhsil batır
Təhsil naziri gözlənilən əmri verdi
Təhsil Nazirliyi sistemində ciddi problem: Vətəndaşlara çağırış edilir
Tələbələrin təhsil haqları aşağı salındı
Təhsil eksperti abituriyentləri narahat edən məsələyə toxundu
Bakıda məşhur təhsil ocaqlarından biri bağlandı

Dövlət İmtahan Mərkəzi Təhsil Nazirliyi attestatlarla bağlı məlumat yaydılar

11
(Yenilənib 13:12 06.07.2020)
Ali və ya orta ixtisas təhsili müəssisələrinə sənəd vermək istəyənlər isə imtahanlarda iştirak etməlidirlər.

BAKI, 6 iyul — Sputnik. "Məlum olduğu kimi, ölkədə koronavirus (COVID-19) infeksiyasının yayılmasının qarşısının alınması ilə bağlı həyata keçirilən tədbirlər, o cümlədən bəzi şəhər və rayonlarda sərtləşdirilmiş karantin rejimi müddətinin 2020-ci il 20 iyul tarixinədək uzadılması ilə əlaqədar olaraq ölkənin bir sıra regionlarında ümumi təhsil pilləsində şagirdlərin yekun attestasiyası (buraxılış imtahanları) təxirə salınıb".

Sputnik Azərbaycan-ın məlumatına görə, bu barədə Təhsil Nazirliyi və Dövlət İmtahan Mərkəzinin birgə məlumatında deyilir.

Qaydalara əsasən, məzunlara ümumi təhsil haqqında dövlət sənədi yekun attestasiyanın keçirilməsi prosesi başa çatdıqdan sonra təqdim edilir. Lakin mövcud vəziyyət tam orta təhsil səviyyəsini bitirmiş və növbəti pillədə təhsillərini xarici ölkələrdə davam etdirmək niyyətində olan məzunlar üçün bəzi çətinliklər yarada bilər. Belə ki, bu məzunların xarici ölkələrin ali təhsil müəssisələrinə qəbul prosesində iştirakı üçün bir qayda olaraq ümumi təhsil pilləsini bitirmələrini təsdiq edən dövlət nümunəli sənədin (attestatın) təqdim edilməsi tələb olunur. Bəzi xarici ölkələrin təhsil müəssisələrinə tələbə qəbulu prosesinin yaxın dövrdə yekunlaşacağını nəzərə alaraq, məzunlar tərəfindən həmin təhsil müəssisələrinə öz attestatlarının vaxtında təqdim edilməsi vacib şərtlərdən biridir.

Vətəndaşların təhsil almaq hüquqlarını təmin etmək məqsədilə təhsillərini xarici ali təhsil müəssisələrində davam etdirmək niyyətində olan ümumi təhsil pilləsinin məzunlarına müstəsna hal kimi buraxılış imtahanlarında iştirak etmədən attestatların verilməsi qərara alınıb. Bu gündən başlayaraq xarici ali təhsil müəssisələrinə qəbul olunmaq üçün müraciət etmiş məzunlar təhsil aldıqları təhsil müəssisələrinə müraciət edərək attestatlarını ala bilərlər. Həmin şəxslər attestatlarına buraxılış imtahanı qiymətlərinin də yazılmasını istədikləri təqdirdə məzun olduqları məktəbə müraciət edə və sentyabr ayında keçirilməsi nəzərdə tutulan imtahanlarda iştirak edə bilərlər.

Məlumat üçün bildiririk ki, iyunun 10-dan başlayaraq bütün şəhər və rayonlarda (9 illik) və tam (11illik) orta təhsil səviyyəsi üzrə hər həftə 2 dəfə olmaqla buraxılış (qəbul) imtahanları keçirilib, həmin imtahanlarda ümumilikdə dörd həftə ərzində 133338 məzun iştirak edib. Bununla yanaşı, xüsusi karantin rejimi tətbiq edilən bir sıra şəhər və rayonlarda buraxılış (qəbul) imtahanları ölkədə mövcud olan sanitar-epidemioloji vəziyyətdən asılı olaraq təşkil ediləcək və imtahanların tarixləri barədə ictimaiyyətə əlavə olaraq məlumat veriləcək.

Xatırladaq ki, Dövlət İmtahan Mərkəzi və Təhsil Nazirliyinin birgə razılığına əsasən, ictimai sağlamlığın qorunması ilə bağlı həyata keçirilən tədbirlərə uyğun olaraq 9 illik və 11 illik orta təhsil bazasında kolleclərə, eləcə də ali təhsil müəssisələrinə sənəd verməyən şagirdlər buraxılış imtahanlarında iştirak etməyə bilərlər. Qeyd edək ki, sərtləşdirilmiş karantin rejimi tətbiq olunan rayon və şəhərlərdə 11-ci sinif təhsil bazasında imtahan verməli olan, lakin ali və ya orta ixtisas təhsili müəssisələrinə sənəd verməyən şagirdlərin sayı 2785 nəfərdir.

Bu imtahanlarda iştirak etməyən 9 və 11-ci sinif məzunları üçün əlavə qeydiyyat tələb olunmadan sentyabr ayında yenidən buraxılış imtahanlarının təşkil olunması və həmin şəxslərin yekun qiymətləndirilməsinin aparılaraq onlara attestat verilməsi nəzərdə tutulur.

Ali və ya orta ixtisas təhsili müəssisələrinə sənəd vermək istəyənlər isə imtahanlarda iştirak etməlidirlər.

11
Əlaqədar
İmtahanların nəticəsi açıqlandı: Nəticənizi öyrənə bilərsiniz
Qaxda internetsizlik həyatı iflic edib: Tələbələr imtahan verə, şagirdlər dərs keçə bilmir
Abituriyentlərin işi asanlaşdı: qəbul imtahanlarına görə videomühazirələr artıq əlçatandır
"Müəllimlərin işə qəbul imtahanının ləğv edilməsi müzakirə olunmur"- RƏSMİ
Tələbə, arxiv şəkli

Çayxana qədər olmayan təhsilin çətin günü! Bunun fəsadı ağır olacaq

1388
(Yenilənib 21:04 05.07.2020)
Kamran Əsədov deyir ki, hazırlıq kurslarının fəaliyyətinə icazə verilməməsi 10 minlərlə insanın işsiz qalması, şagirdlərin biliklərinin azalması deməkdir.

Nigar İsgəndərova, Sputnik Azərbaycan

BAKI, 5 iyul — Sputnik. Pandemiyanın ən çox təsir etdiyi sahələrdən biri də özəl təhsil sektorudur. Koronavirusun Azərbaycanda yayılmağa başladığı mart ayından bu yana özəl təhsil sektorunun fəaliyyəti demək olar ki, tamamilə iflic olub.

Amma özəl təhsil sektorunun dirçəlməsi üçün müxtəlif çağırışlar da var. Təhsil eksperti Kamran Əsədov da Sputnik Azərbaycan-a açıqlamasında mövcud vəziyyəti qiymətləndirdiyini və təkliflərinin olduğunu bildirib: "Martın 3-dən pandemiya ilə əlaqədar ölkədə bütün tədris prosesi dayandı. Repetitor fəaliyyəti və hazırlıq kurslarının da fəaliyyətinə məhdudiyyət tətbiq edildi. Təhsil Azərbaycanda öz ətrafında 2 milyondan çox şəxsi birləşdirən ən böyük sahədir. Ona görə də, yoluxma dairəsi təhsilin sayəsində daha da çox ola bilərdi. 27 apreldən etibarən isə karantin rejiminin yumşaldılması ilə əlaqədar olaraq bir sıra yumşaldıcı addımlar atılmağa başladı. Lakin bu yumşaldıcı addımlar təhsil sistemindən, xüsusi ilə iqtisadiyyata dəstək verən hazırlıq kurslarından, tədris mərkəzlərindən yan keçdi. Maydan etibarən ölkədə kafe, restoran və iri "Mall"arın fəaliyyətinə icazə verilsə də, tədris müəssisələrinə bu imkanın verilməməsi anlaşılan deyil. Düzdür, 27 apreldən fərdi qaydada repetitor fəaliyyətinə icazə verilib. Amma necə olur ki, 1 müəllim 1 şagird dərs keçəndə virus yoluxur, amma 10-larla adam çayxanada oturanda virus yoluxmur?"

"Artıq ali məktəblərə qəbul üçün buraxılış imtahanları, növbəti aydan qəbul imtahanları başlayır. Amma şagirdlər 3 martdan etibarən tədris prosesindən kənarda qaldıqları üçün bır sıra bilik və bacarıqları unudublar. Birincisi, ölkədə ən problemsiz yerlər tədris mərkəzləridir ki, onlar uşaqlara bilik verir, onların inkişafına xidmət edirlər. Bu gün çayxanalar, restoranlarda daha çox virus yaya bilər, nəinki hazırlıq kursları. Hazırlıq kurslarının fəaliyyətinə icazə verilməməsi 10 minlərlə insanın işsiz qalması, şagirdlərin biliklərinin azalması deməkdir", - deyə K.Əsədov əlavə edib.

Ekspert deyir ki, özəl sektora, xüsusi ilə ölkədə təhsilin inkişafına xüsusi xidmət edən özəl təhsil sektoruna qarşı belə mövqe nümayiş etdirmək olmaz: "Hüquq mühafizə orqanlarını diqqətli olmağa çağırıram. “Gizli fəaliyyət göstərir” kimi təqdim etdiyiniz təhsil mərkəzi narkotik yetişdirmir, qaçaqmalçılıq ilə məşğul olmur. Onlar ölkənin gələcək şəxsiyyətlərinə bilik, savad verirlər. Nazirlər Kabinetinə müraciət edərək bildirmək istəyirəm ki, çayxanalar, restoranlara aid edilən fəaliyyət icazəsini hazırlıq kursları, tədris mərkəzlərinə də şamil etsinlər. Ölkəni təhsilsiz qoymaq olmaz. Bunun təhsil üçün ağır fəsadları olacaq".

1388
Moskvada COVID-19 hospitalı, arxiv şəkli

Rusiyada bir gündə 200-ə yaxın şəxs koronavirusdan öldü

0
Rusiyada pandemiya yayılandan 10494 nəfər COVID-19-dan vəfat edib. Bir sutka ərzində virusdan sağalanların sayı isə 9551 nəfər olub.

BAKI, 7 iyul — Sputnik. Bir sutka ərzində Rusiyada 6358 koronavirusa yeni yoluxma halı aşkarlanıb. Sputnik Azərbaycan Rusiya Operativ Qərargahına istinadən xəbər verir ki, bir gün ərzində qonşu ölkədə 198 nəfər ölüb.

Ümumilikdə, Rusiyada bu xəstəliyə yoluxanların sayı 694230-a çatıb. Rusiyada pandemiya yayılandan 10494 nəfər COVID-19-dan vəfat edib. Bir sutka ərzində virusdan sağalanların sayı isə 9551 nəfər olub. Bununla da bu ölkədə virusdan sağalanların sayı 463880-ə keçib.

Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus dünyanın əksər regionları və ölkələrində yayılıb. Dünyada koronavirus infeksiyasına indiyədək yoluxanların sayı 11,6 milyonu keçib, 538 mindən çox adam isə virus səbəbilə ölüb.

Ümumdünya Səhiyyə Təşkilatı (ÜST) fevralın 11-də infeksiyanın törətdiyi xəstəliyin adını COVID-19 qoyub, martın 11-də isə koronavirusu pandemiya elan edib.

0
Teqlər:
yoluxma, Vəfat, Rusiya, COVID-19, Koronavirus