Auditoriyada tələbələr

Hökumətdən təqdirəlayiq qərar: Təhsilimizdə köklü dəyişiklik baş verəcək

3080
(Yenilənib 17:08 05.03.2018)
"Ali təhsil müəssisələrində ixtisasların əksəriyyəti Sovet dönəmindən qalanlardır"

Xalid Məmmədov, Sputnik Azərbaycan

BAKI, 5 mart — Sputnik. Azərbaycanda magistratura səviyyəsi üzrə yeni ixtisaslar yaradılıb. Nazirlər Kabineti "Ali təhsilin magistratura səviyyəsi üzrə ixtisasların (ixtisaslaşmaların) Təsnifatı"nda dəyişikliklər edib. Qərara əsasən, ali təhsilin magistratura səviyyəsi üzrə "Humanitar və sosial ixtisaslar qrupu" bölməsində "İnzibati hüquq, inzibati proses, iqtisadi və maliyyə hüququ", "Tibbi hüquq", " Əqli mülkiyyət hüququ", " Əmək hüququ: sosial təminat hüququ", " İdman hüququ" və "Turizm hüququ", "Mədəniyyət və incəsənət ixtisasları qrupu" bölməsində "Musiqi texnologiyaları" ixtisasları və s. yaradılıb.

Эксперт в области образования Кямран Асадов
© Sputnik / Murad Orujov
Эксперт в области образования Кямран Асадов

Məsələ ilə bağlı təhsil eksperti Kamran Əsədov Sputnik Azərbaycan-a açıqlamasında deyib ki, hazırda Azərbaycanda ali təhsil müəssisələrində mövcud olan ixtisasların əksəriyyəti Sovet dönəmindən qalanlardır: "Ölkəmiz müstəqilliyini bərpa etdikdən sonra Azərbaycan təhsili, iqtisadiyyatı, mədəniyyəti dünya arenasına, o cümlədən Avropaya çıxmağa başlayıb. Təəssüf olsun ki, hələ də dünya standartlarına cavab verməyən ixtisaslar üzrə kadr hazırlığı həyata keçirilir. Bunlar daha çox humanitar, sosial və iqtisadi sahələr üzrədir".

Ekspertin sözlərinə görə, hazırda bir çox inkişaf etmiş ölkələrdə əmək bazarında ciddi şəkildə ehtiyac duyulan elə ixtisaslar var ki, Azərbaycanda o ixtisaslara hazırlıq həyata keçirilmir: "Bizdə hüquqşünas dedikdə, standart bir hüquq istiqaməti mövcuddur. Ayrıca bu və ya digər sahələr üzrə mülki hüquq, cinayət hüququ, tibbi hüquq və digər sahələr üzrə ixtisaslaşmış kadrlar yoxdur. Bu, eynilə digər sahələrə də aiddir. Ona görə də hesab edirəm ki, ilk növbədə Azərbaycanda dünya standartlarına cavab verən və əmək bazarının ehtiyacı olduğu kadrların hazırlığı həyata keçirilməlidir".

K.Əsədov vurğulayıb ki, Azərbaycanda 54 universitetin heç birində dünya standartına cavab verən kadr hazırlığı aparılmır: "Bu, iqtisadiyyat sahəsinə də, tibb sahəsinə də aiddir. Məsələn, bizdə ənənəvi olaraq ümumi stomatologiyadır. Amma dünyada bu, fərqlidir. Uşaq stomatologiyası, yaşlı stomatologiyası var. Və yaxud biz mühasib buraxırıq, amma, hələ də hansı sahə üzrə mühasib hazırlayırıq, onu bilmirik. Amma ixtisaslaşmış kadr olduqda, daha yaxşı mütəxəssis hazırlanır və nəticədə o sahədə olan problemlər aradan qalxır".

"Ona görə də hesab edirəm ki, Nazirlər Kabineti tərəfindən elan edilmiş yeni ixtisaslar kifayət qədər vaxtında atılmış bir addımdır. Düşünürəm ki, zaman-zaman, əsasən turizm, iqtisadiyyatın bu və ya digər sahələri ilə bağlı yeni ixtisaslara ehtiyac var", — deyə Əsədov bildirib.

Həmsöhbətimizin fikrincə, təkcə yeni ixtisasları yaratmaqla iş bitmir: "Resurslar, yəni dərsliklər, tədris materialları formalaşmalıdır. Yeni yaradılmış ixtisaslar üzrə dərs deyəcək kadrlarımız da yoxdur. Bizə elə gəlir ki, iqtisadiyyatı bilən iqtisadiyyatın bütün sahələri üzrə dərs deyə bilər. Bu, belə deyil. Məsələn, bizdə tarix müəllimi tarixin bütün dövrlərindən mühazirə deyə bilir. Amma inkişaf etmiş ölkələrdə, dünya reytinqli universitetlərdə isə, hər müəllim bir dövr, sahə üzrə mütəxəssisdir. Yeni yaradılmış resurslarda ənənəvi materiallardan istifadə olunmamalıdır. Dünya təcrübəsi əsas götürülməlidir".

Əsədovun qənaətincə, hazırda ölkəmizdə ali təhsil müəssisələrinin hazırladığı 60 faiz ixtisaslara artıq əmək bazarında ehtiyac yoxdur: "Hazırda dünyada 40-dan çox ixtisas (robot texnologiya, nanotexnologiya və s.) var ki, hələ də bizdə bu sahələr üzrə kadr hazırlığı həyata keçirilmir. Bu 40-dan çox ixtisasa bizdə ehtiyac var. Amma kadr hazırlığı həyata keçirilmir. Düşünürəm ki, Nazirlər Kabineti növbəti illərdə məhz bunu da nəzərə alacaq".

Эксперт в области образования Малахат Муршудли
© Sputnik / Murad Orujov
Эксперт в области образования Малахат Муршудли

Təhsil eksperti Məlahət Mürşüdlü isə Sputnik Azərbaycan-a açıqlamasında deyib ki, sözügedən ixtisaslara Avropada gələcəyin ixtisasları deyilir: "Avropada artıq 15-20 ildir ki, bu ixtisaslara yiyələnib, onun tədrisi ilə məşğuldurlar. Əgər bu gün bizdə bu ixtisaslara tələbat yoxdursa, yaxın 2-3 ildə həmin ixtisaslara da tələbat olacaq. Əmək bazarı bu ixtisaslar üzrə kadr axtarışında olacaq".

Maddi-texniki bazanın təminatına gəlincə, ekspert deyib ki, ixtisasların elan edilməsi ilə bərabər olaraq bu məsələlər üzərində də iş getməlidir: "Xüsusi komissiyalar yaradılmalı, beynəlxalq təcrübə öyrənilməli və Azərbaycan ictimai həyatına adaptasiya edilərək bizim əmək bazarının tələbatına uyğun dərslik və proqramlar hazırlanmalıdır".

Qeyd edək ki, Nazirlər Kabinetinin qərarına əsasən, eyni zamanda "İqtisadiyyat və idarəetmə ixtisasları qrupu" bölməsində "Davamlı inkişafın siyasi idarə edilməsi", "Davamlı inkişafda insan potensialı", "Davamlı inkişafın planlaşdırılması", "Davamlı insan inkişafı" və "Davamlı inkişafda təbii ehtiyatların idarə edilməsi", "Təbiət ixtisasları qrupu" bölməsində "Kosmologiya"," Səhiyyə, rifah və xidmət ixtisasları qrupu" bölməsində "Gənclərlə iş" ixtisasları yaradılıb.

3080
Teqlər:
dünya təcrübəsi, Sovet dönəmi, sahə, ixtisas, Sputnik Azərbaycan, Kamran Əsədov, Məlahət Mürşüdlü, təhsil, magistratura, ekspert, Azərbaycan
Əlaqədar
Dünyanın ən gəlirli peşələri - Bu ixtisasları seçin
Jurnalistika ixtisasına qəbul olmaq istəyənlər üçün qabiliyyət imtahanı keçirilir
Yeni ali təhsil ixtisasları yaradıldı
Ali və orta ixtisas təhsili müəssisələrinə tələbə qəbulu elan edilib

Təhsil naziri: "Öyrənmə motivasiya arasında çox böyük əlaqə var"

8
Emin Əmrullayev: "Mövcud problemlərin şagirdin biliyində geriləmə və ya irəliləməyə səbəb olması ilə bağlı müəyyən ölçmələr aparmaq lazımdır".

BAKI, 22 yanvar - Sputnik. Təhsil naziri Emin Əmrullayev pandemiya ilə əlaqədar şagirdlərin dərslərində bəzi geriləmələrin olması ilə bağlı səsləndirilən fikirlərə münasibət bildirib.

Xəzər Televiziyasında yayımlanan “Vaxt gəldi” proqramında nazir övladlarından birinin 1-ci sinfə getdiyini, digərinin isə məktəbəqədər yaşda olduğunu deyib. O, distant təhsilin problemlərindən bəhs edərkən deyib:  

“Distant təhsil və teledərslər öz-özlüyündə izləmə baxımından maraqlı prosesdir. Eyni zamanda bu, çox çağırışlı məsələdir, o mənada ki, problemlidir. Belə ki, avadanlıqdan istifadə və ya müxtəlif problemlər meydana çıxır. Misal olaraq, hava soyuq olanda işıqlar sönə bilər. Bunu uşağa izah etmək məsələsi var. Odur ki, mövcud problemlərin şagirdin biliyində geriləmə və ya irəliləməyə səbəb olması ilə bağlı müəyyən ölçmələr aparmaq lazımdır”.

Nazir ibtidai siniflərdə şagirdlərin sosial-psixoloji, sosial-emosional inkişafına fokuslaşmalı olduğumuzu da qeyd edib:

“Biz emosiyalara və ya hansısa gümanlara yox, faktlara, ölçmələrə, elmə inanmalıyıq. Hazırda bununla bağlı planlar var və bunlardan biri də şagirdlərin biliyinin qiymətləndirilməsinin aparılmasıdır. Təbii, şagirdlər də dərsə qayıtmalıdır ki, biz bunu edə bilək. Yaxud başqa formatlar da düşünə bilərik. İnandığım budur ki, fokuslanmalı olduğumuz məsələ, xüsusilə də ibtidai sinifdə şagirdlərin sosial-psixoloji, sosial-emosional inkişafıdır. Mənə görə məktəb insanın sosial emosional inkişafını irəli aparan yer olmalıdır. Çünki öyrənmə və motivasiya arasında çox böyük əlaqə var”.

8
Teqlər:
Azərbaycanın təhsil naziri, təhsil naziri, Emin Əmrullayev

Təhsil naziri şikayətləndi: Fikirlərim təhrif edilib, elə demək istəmirdim

53
(Yenilənib 23:16 22.01.2021)
Emin Əmrullayev: "Məqsədli öyrənmə ilə bağlı mətbuatda təhrif olunan fikirləri o mənada demişdim ki, valideyn övladını bir neçə yerə hazırlığa göndərir, amma bunun məqsədi barədə övladı ilə çox az söhbət edir".

BAKI, 22 yanvar - Sputnik. "Öyrənmək məqsədli olmalıdır. Əgər valideyn övladı üçün hansısa öyrənmək imkanı yaratmaq istəyirsə, öyrənmənin məqsədlərini izah etməlidir. Bu həmçinin müəllim üçün də önəmlidir".

Sputnik Azərbaycan xəbər verir ki, bunu Təhsil naziri Emin Əmrullayev Xəzər Televiziyasında yayımlanan “Vaxt gəldi” proqramında çıxışı zamanı deyib.

Nazir bildirib ki, tədris prosesin məqsədi öyrənən adama məlum deyilsə, onun motivasiyası yoxdursa, yəqin ki, öyrənmə baş vermir:

"Məqsədli öyrənmə ilə bağlı mətbuatda təhrif olunan fikirləri o mənada demişdim ki, valideyn övladını bir neçə yerə hazırlığa göndərir, amma bunun məqsədi barədə övladı ilə çox az söhbət edir. Uşaq da başa düşmür ki, hazırlığa və ya məktəbə nə üçün gedir. O, bunun niyəsini başa düşmürsə, ehtimal ki, öyrənmənin keyfiyyəti aşağı düşür".

"Mən bunu demək istəyirdim. Təəssüf, fikrim elə təqdim edildi ki, guya öyrənmək olmaz demişəm. Demək istədiyim odur ki, məqsədli öyrənmək başqa şeydir”, - deyə nazir əlavə edib.

53
Teqlər:
Emin Əmrullayev, Azərbaycanın təhsil naziri, təhsil naziri

Yanvarın 25-nə qədər ölkədə ictimai nəqliyyat işləməyəcək

0
(Yenilənib 00:11 23.01.2021)
Nazirlər Kabineti yanında Operativ Qərargahın qərarına əsasən, bütün ölkə ərazisində şənbə və bazar günləri ictimai nəqliyyatın fəaliyyəti dayandırılır.

BAKI, 23 yanvar - Sputnik. Bu gündən yanvarın 25-i saat 06:00-dək bütün ölkə ərazisində ictimai nəqliyyatın fəaliyyəti dayandırılıb.

Sputnik Azərbaycan-ın məlumatına görə, Nazirlər Kabineti yanında Operativ Qərargahın qərarına əsasən, bütün ölkə ərazisində şənbə və bazar günləri ictimai nəqliyyatın fəaliyyəti dayandırılır.

Bununla əlaqədar 23 yanvar saat 00:00-dan 25 yanvar saat 06:00-dək ölkə ərazisində ictimai nəqliyyat fəaliyyət göstərməyəcək.

Qeyd edək ki, Bakı metropolitenində də sərnişindaşıma dayandırılıb.

0