İmtahana hazırlaşan abituriyent

Halbuki onlardan böyük gözləntilərimiz vardı...

264
(Yenilənib 17:34 10.01.2018)
Yüksək bal toplayan abituriyentlərin əksəriyyəti sonra niyə uğurlu nəticə göstərmir?

Təranə Xudabaxşiyeva, Sputnik Azərbaycan

BAKI, 10 yanvar — Sputnik. Həmişə universitetə yüksək balla daxil olan abituriyentlərdən yüksək nəticə gözləyirlər. Hər kəs onları gələcəyin peşəkar mütəxəssisləri sırasında görür. Amma heç də həmişə belə olmur.

Son zamanlar müşahidələr göstərir ki, müəllimlərin işə qəbulu, dövlət qulluğuna qəbul və s. imtahanlarda iştirak edib ən yüksək nəticə əldə etmiş şəxslər ali məktəblərə qəbul imtahanlarında 400-600 arası bal toplayıblar. 600-dan çox bal toplayıb universitetə qəbul olanlar isə işə qəbul imtahanlarında birincilərlə müqayisədə az bal toplayırlar.

Maraqlıdır, bu hal hansı səbəblərdən meydana çıxır? Sputnik Azərbaycan məsələnin səbəblərini araşdırıb.

Təhsil eksperti Kamran Əsədov deyir ki, işə qəbul imtahanlarında iştirak edənlər arasında ali məktəblərə 400-600 arası bal yığaraq qəbul olanların göstəriciləri daha yüksəkdir: "DİM tərəfindən 18 dekabrda dövlət qulluğuna qəbul olunmaq üçün keçirilən imtahanda iştirak üçün qeydiyyatdan keçmiş 3040 şəxs arasında ali məktəblərə 401-500 balla qəbul olan 676 nəfər olub. Onların da 292 nəfəri müvəffəqiyyət əldə edib. Bu da imtahanda iştirak edənlərin 43.2 faizini təşkil edir".

"Bundan başqa, ali məktəblərə 501-600 balla qəbul olmuş 468 nəfər dövlət qulluğuna qəbul olmaq üçün qeydiyyatdan keçib. Onlardan da 256 nəfəri uğur qazanıb. Bu da 54.7 faiz nəticə əldə etmək deməkdir" — Əsədov qeyd edir.

Ekspertin sözlərinə görə, ali məktəblərə 601-700 arası bal toplayaraq qəbul olunmuş məzunlardan da 166 nəfəri dövlət qulluğuna qəbul olmaq üçün qeydiyyatdan keçib: "Onlardan da 113 nəfəri müvəffəqiyyət qazanıb".

K.Əsədov deyir ki, aşağı bal toplayan abituriyentlərin nəticələri isə acınacaqlıdır: "Belə ki, qəbul imtahanlarında 101-200 arası bal toplayan abituriyentlərdən 104 nəfəri dövlət qulluğuna qəbul olunmaq üçün imtahan verib. Onların da cəmi 7 nəfəri uğurlu nəticə əldə edə bilib. Qəbul imtahanlarında 201-300 bal toplayan abituriyentlərdən 531 nəfər dövlət qulluğu imtahanında iştirak edib. Onlardan cəmi 82 nəfəri imtahandan keçə bilib".

"Dövlət qulluğuna imtahanlarda ali məktəbə 301-400 balla qəbul olan 743 nəfər də iştirak edib ki, onlardan da cəmi 215 nəfəri imtahanı uğurla başa vurub. Bu da vəziyyətin artıq nə yerdə olduğunu göstərir" — müsahibimiz vurğulayır.

Dövlət qulluğuna hazırlıq üzrə ekspert İlyas Hüseynov da bildirir ki, 650-dən yuxarı bal toplayan abuturiyentlərin əksəriyyəti təhsil proqramını mənimsəyərək öyrənmir: "Onlar əzbərçiliyə üstünlük verirlər. Ona görə də belə problemlər ortaya çıxır. Test sistemi elə qurulub ki, orada göz yaddaşı, hər hansısa test etmək bacarığı, cavablar arasında nəisə ixtisar edərək nəticəyə gəlmək və daha tez nəticəyə varmaq kimi yollardan istifadə edirlər".

Hüseynovun sözlərinə görə, bu üsullara ən çox repetitor yanına gedən abituriyentlər əl atırlar: "Müəllimlər şagirdlərə qısa yolları öyrətdikləri üçün belə olur. Əzbərçilik sayəsində yüksək bal toplayıb universitetə daxil olurlar. Universitet vaxtı yüksək bal topladıqlarına da arxayın olub oxumurlar. Aşağı bal toplayan abituriyentlər isə kurslara və təlimlərə qoşularaq özlərini daha çox inkişaf etdirirlər. Nəticədə də onlar daha çox uğur qazanmış olurlar".

264
Teqlər:
700, 650, 600, 500, 400, dövlət qulluğu, İlyas Hüseynov, nəticə, bal, Kamran Əsədov, qəbul, faiz, ali məktəb, təhsil, universitet, ekspert, abituriyent
Əlaqədar
Təhsil almaq üçün xaricə üz tutanlar bunun sonrasını da düşünsünlər
Dəyişiklik: Təhsil Nazirliyinə yeni səlahiyyətlər verildi
Məleykə Abbaszadə məktəb təhsilindən narazılığını bildirdi
Təhsil Nazirliyi: Valideynlərin etirazı haqlı çıxarsa...
"Yekaterinburqda yaşayan azərbaycanlı gənclər UNEC-də təhsil almaqda maraqlıdırlar"
Əsədov: “Erkən nikahlar qızların təhsilinə əngəl yaradır”

Dövlət İmtahan Mərkəzi Təhsil Nazirliyi attestatlarla bağlı məlumat yaydılar

11
(Yenilənib 13:12 06.07.2020)
Ali və ya orta ixtisas təhsili müəssisələrinə sənəd vermək istəyənlər isə imtahanlarda iştirak etməlidirlər.

BAKI, 6 iyul — Sputnik. "Məlum olduğu kimi, ölkədə koronavirus (COVID-19) infeksiyasının yayılmasının qarşısının alınması ilə bağlı həyata keçirilən tədbirlər, o cümlədən bəzi şəhər və rayonlarda sərtləşdirilmiş karantin rejimi müddətinin 2020-ci il 20 iyul tarixinədək uzadılması ilə əlaqədar olaraq ölkənin bir sıra regionlarında ümumi təhsil pilləsində şagirdlərin yekun attestasiyası (buraxılış imtahanları) təxirə salınıb".

Sputnik Azərbaycan-ın məlumatına görə, bu barədə Təhsil Nazirliyi və Dövlət İmtahan Mərkəzinin birgə məlumatında deyilir.

Qaydalara əsasən, məzunlara ümumi təhsil haqqında dövlət sənədi yekun attestasiyanın keçirilməsi prosesi başa çatdıqdan sonra təqdim edilir. Lakin mövcud vəziyyət tam orta təhsil səviyyəsini bitirmiş və növbəti pillədə təhsillərini xarici ölkələrdə davam etdirmək niyyətində olan məzunlar üçün bəzi çətinliklər yarada bilər. Belə ki, bu məzunların xarici ölkələrin ali təhsil müəssisələrinə qəbul prosesində iştirakı üçün bir qayda olaraq ümumi təhsil pilləsini bitirmələrini təsdiq edən dövlət nümunəli sənədin (attestatın) təqdim edilməsi tələb olunur. Bəzi xarici ölkələrin təhsil müəssisələrinə tələbə qəbulu prosesinin yaxın dövrdə yekunlaşacağını nəzərə alaraq, məzunlar tərəfindən həmin təhsil müəssisələrinə öz attestatlarının vaxtında təqdim edilməsi vacib şərtlərdən biridir.

Vətəndaşların təhsil almaq hüquqlarını təmin etmək məqsədilə təhsillərini xarici ali təhsil müəssisələrində davam etdirmək niyyətində olan ümumi təhsil pilləsinin məzunlarına müstəsna hal kimi buraxılış imtahanlarında iştirak etmədən attestatların verilməsi qərara alınıb. Bu gündən başlayaraq xarici ali təhsil müəssisələrinə qəbul olunmaq üçün müraciət etmiş məzunlar təhsil aldıqları təhsil müəssisələrinə müraciət edərək attestatlarını ala bilərlər. Həmin şəxslər attestatlarına buraxılış imtahanı qiymətlərinin də yazılmasını istədikləri təqdirdə məzun olduqları məktəbə müraciət edə və sentyabr ayında keçirilməsi nəzərdə tutulan imtahanlarda iştirak edə bilərlər.

Məlumat üçün bildiririk ki, iyunun 10-dan başlayaraq bütün şəhər və rayonlarda (9 illik) və tam (11illik) orta təhsil səviyyəsi üzrə hər həftə 2 dəfə olmaqla buraxılış (qəbul) imtahanları keçirilib, həmin imtahanlarda ümumilikdə dörd həftə ərzində 133338 məzun iştirak edib. Bununla yanaşı, xüsusi karantin rejimi tətbiq edilən bir sıra şəhər və rayonlarda buraxılış (qəbul) imtahanları ölkədə mövcud olan sanitar-epidemioloji vəziyyətdən asılı olaraq təşkil ediləcək və imtahanların tarixləri barədə ictimaiyyətə əlavə olaraq məlumat veriləcək.

Xatırladaq ki, Dövlət İmtahan Mərkəzi və Təhsil Nazirliyinin birgə razılığına əsasən, ictimai sağlamlığın qorunması ilə bağlı həyata keçirilən tədbirlərə uyğun olaraq 9 illik və 11 illik orta təhsil bazasında kolleclərə, eləcə də ali təhsil müəssisələrinə sənəd verməyən şagirdlər buraxılış imtahanlarında iştirak etməyə bilərlər. Qeyd edək ki, sərtləşdirilmiş karantin rejimi tətbiq olunan rayon və şəhərlərdə 11-ci sinif təhsil bazasında imtahan verməli olan, lakin ali və ya orta ixtisas təhsili müəssisələrinə sənəd verməyən şagirdlərin sayı 2785 nəfərdir.

Bu imtahanlarda iştirak etməyən 9 və 11-ci sinif məzunları üçün əlavə qeydiyyat tələb olunmadan sentyabr ayında yenidən buraxılış imtahanlarının təşkil olunması və həmin şəxslərin yekun qiymətləndirilməsinin aparılaraq onlara attestat verilməsi nəzərdə tutulur.

Ali və ya orta ixtisas təhsili müəssisələrinə sənəd vermək istəyənlər isə imtahanlarda iştirak etməlidirlər.

11
Əlaqədar
İmtahanların nəticəsi açıqlandı: Nəticənizi öyrənə bilərsiniz
Qaxda internetsizlik həyatı iflic edib: Tələbələr imtahan verə, şagirdlər dərs keçə bilmir
Abituriyentlərin işi asanlaşdı: qəbul imtahanlarına görə videomühazirələr artıq əlçatandır
"Müəllimlərin işə qəbul imtahanının ləğv edilməsi müzakirə olunmur"- RƏSMİ
Tələbə, arxiv şəkli

Çayxana qədər olmayan təhsilin çətin günü! Bunun fəsadı ağır olacaq

1388
(Yenilənib 21:04 05.07.2020)
Kamran Əsədov deyir ki, hazırlıq kurslarının fəaliyyətinə icazə verilməməsi 10 minlərlə insanın işsiz qalması, şagirdlərin biliklərinin azalması deməkdir.

Nigar İsgəndərova, Sputnik Azərbaycan

BAKI, 5 iyul — Sputnik. Pandemiyanın ən çox təsir etdiyi sahələrdən biri də özəl təhsil sektorudur. Koronavirusun Azərbaycanda yayılmağa başladığı mart ayından bu yana özəl təhsil sektorunun fəaliyyəti demək olar ki, tamamilə iflic olub.

Amma özəl təhsil sektorunun dirçəlməsi üçün müxtəlif çağırışlar da var. Təhsil eksperti Kamran Əsədov da Sputnik Azərbaycan-a açıqlamasında mövcud vəziyyəti qiymətləndirdiyini və təkliflərinin olduğunu bildirib: "Martın 3-dən pandemiya ilə əlaqədar ölkədə bütün tədris prosesi dayandı. Repetitor fəaliyyəti və hazırlıq kurslarının da fəaliyyətinə məhdudiyyət tətbiq edildi. Təhsil Azərbaycanda öz ətrafında 2 milyondan çox şəxsi birləşdirən ən böyük sahədir. Ona görə də, yoluxma dairəsi təhsilin sayəsində daha da çox ola bilərdi. 27 apreldən etibarən isə karantin rejiminin yumşaldılması ilə əlaqədar olaraq bir sıra yumşaldıcı addımlar atılmağa başladı. Lakin bu yumşaldıcı addımlar təhsil sistemindən, xüsusi ilə iqtisadiyyata dəstək verən hazırlıq kurslarından, tədris mərkəzlərindən yan keçdi. Maydan etibarən ölkədə kafe, restoran və iri "Mall"arın fəaliyyətinə icazə verilsə də, tədris müəssisələrinə bu imkanın verilməməsi anlaşılan deyil. Düzdür, 27 apreldən fərdi qaydada repetitor fəaliyyətinə icazə verilib. Amma necə olur ki, 1 müəllim 1 şagird dərs keçəndə virus yoluxur, amma 10-larla adam çayxanada oturanda virus yoluxmur?"

"Artıq ali məktəblərə qəbul üçün buraxılış imtahanları, növbəti aydan qəbul imtahanları başlayır. Amma şagirdlər 3 martdan etibarən tədris prosesindən kənarda qaldıqları üçün bır sıra bilik və bacarıqları unudublar. Birincisi, ölkədə ən problemsiz yerlər tədris mərkəzləridir ki, onlar uşaqlara bilik verir, onların inkişafına xidmət edirlər. Bu gün çayxanalar, restoranlarda daha çox virus yaya bilər, nəinki hazırlıq kursları. Hazırlıq kurslarının fəaliyyətinə icazə verilməməsi 10 minlərlə insanın işsiz qalması, şagirdlərin biliklərinin azalması deməkdir", - deyə K.Əsədov əlavə edib.

Ekspert deyir ki, özəl sektora, xüsusi ilə ölkədə təhsilin inkişafına xüsusi xidmət edən özəl təhsil sektoruna qarşı belə mövqe nümayiş etdirmək olmaz: "Hüquq mühafizə orqanlarını diqqətli olmağa çağırıram. “Gizli fəaliyyət göstərir” kimi təqdim etdiyiniz təhsil mərkəzi narkotik yetişdirmir, qaçaqmalçılıq ilə məşğul olmur. Onlar ölkənin gələcək şəxsiyyətlərinə bilik, savad verirlər. Nazirlər Kabinetinə müraciət edərək bildirmək istəyirəm ki, çayxanalar, restoranlara aid edilən fəaliyyət icazəsini hazırlıq kursları, tədris mərkəzlərinə də şamil etsinlər. Ölkəni təhsilsiz qoymaq olmaz. Bunun təhsil üçün ağır fəsadları olacaq".

1388
Saytda qeydiyyat

Şəxslərin müraciətləri əsasında icazələrin aktivləşdirilməsi davam edir

0
Xüsusi karantin rejimi tətbiq edilən dövrdə fəaliyyətinə icazə verilən, lakin "icaze.e-gov.az" portalında qeydiyyatdan keçə bilməyən sahibkarlıq subyektləri onlayn kargüzarlıq vasitəsilə Dövlət Vergi Xidmətinə müraciət edə bilərlər

BAKI, 7 iyul — Sputnik. Nazirlər Kabinetinin 2020-ci il 19 iyun tarixli 208 nömrəli Qərarı ilə fəaliyyətinə icazə verilən sahələr üzrə hüquqi və fiziki şəxslərin müraciətləri əsasında icazələrin aktivləşdirilməsi davam edir.

İqtisadiyyat Nazirliyi yanında Dövlət Vergi Xidmətinə daxil olan müraciətlər təxirə salınmadan araşdırılır və əsaslı müraciətlər üzrə vergi ödəyicilərinin "icaze.e-gov.az" portalında qeydiyyatdan keçməsinin mümkünlüyü barədə məlumat dərhal Vətəndaşlara Xidmət və Sosial İnnovasiyalar üzrə Dövlət Agentliyinə ("ASAN xidmət"ə) göndərilir. Bu barədə Nazirlikdən Sputnik Azərbaycan-a məlumat verilib.

Aparılmış araşdırmalar nəticəsində əvvəllər icazəsi olmuş, sonradan isə icazələrin verilməsi məhdudlaşdırılmış bir sıra hüquqi və fiziki şəxslərin müraciətləri əsasında onların vergi orqanlarının məlumat bazasında olan fəaliyyət istiqamətləri və təsnifat kodları ilə bağlı məlumatları yenidən dəqiqləşdirilib, uçot baza məlumatları yenidən işlənib, belə işəgötürənlərin və əlavə fəaliyyət istiqamətləri icazə verilən sahələrə daxil olan bir sıra hüquqi və fiziki şəxslərin işçilərinin sayına uyğun olaraq yol verilən limitlər çərçivəsində icazələrin aktivləşdirilməsi həyata keçirilib.

Bununla əlaqədar, hüquqi və fiziki şəxslərdən "icaze.e-gov.az" portalında icazələrinin aktivləşdirilməsini yenidən yoxlaması tövsiyə olunur.

Xüsusi karantin rejimi tətbiq edilən dövrdə fəaliyyətinə icazə verilən, lakin "icaze.e-gov.az" portalında qeydiyyatdan keçə bilməyən sahibkarlıq subyektləri onlayn kargüzarlıq vasitəsilə Dövlət Vergi Xidmətinə müraciət edə bilərlər.

İqtisadiyyat Nazirliyi bir daha bildirir ki, hüquqi və fiziki şəxslərə icazələr Nazirlər Kabinetinin qəbul etdiyi müvafiq qərara əsasən fəaliyyətinə icazə verilən sahələr üzrə aktivləşdirilir, yeni icazələrin alınması ilə bağlı yaranan məsələlərin həlli real vaxt rejimində aparılır və hazırda sistemin aktiv fəaliyyətinin təmin edilməsi üçün Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə birlikdə iş aparılır.

0