Auditoriyada tələbələr, arxiv şəkli

Hansı tələbələrə maaş veriləcək?

3771
(Yenilənib 01:33 12.09.2017)
"Dünya təcrübəsində əmək bazarının ən az 25-30 faizi məhz peşə təhsil müəssisələrinin məzunları təşkil edir, Azərbaycanda isə bu, hətta, 1 faiz həcmində belə deyil"

Xalid Məmmədov, Sputnik Azərbaycan

BAKI, 11 sentyabr — Sputnik. Azərbaycanda yeni hazırlanan "Peşə təhsili haqqında" qanun layihəsində peşə-ixtisas məktəblərində təhsil alan tələbələrə təqaüd və təcrübə keçdiyi müddətdə maaş verilməsi də nəzərdə tutulub. Ötən həftə Peşə Təhsili üzrə Dövlət Agentliyinin peşə təhsili müəssisələrinin idarə edilməsi və monitorinq şöbəsinin müdiri Amil Əlili bildirib ki, qanun layihəsinin parlamentin payız sessiyasında müzakirə ediləcəyi gözlənilir.

Onun sözlərinə görə, "Peşə təhsili haqqında" qanun layihəsi hazırlanarkən beynəlxalq təcrübə əsas götürülüb: "İndiyədək Azərbaycanda belə bir qanun olmayıb. Yəni peşə təhsilinin tarixində ilk dəfədir ki, qanun layihəsi hazırlanır və onun formalaşdırılmasında həm yerli, həm də beynəlxalq təcrübədən istifadə edilib".

Kamran Əsədov
© Sputnik / Murad Orujov
Kamran Əsədov

A.Əlilinin dediyinə əsasən, peşə təhsili sahəsində bir çox təcrübəni araşdıran İşçi Qrup bu qənaətə gəlib ki, bir çox ölkədə olduğu kimi, Azərbaycanda da peşə təhsili dövlət, özəl, bələdiyyə mülkiyyəti formasında inkişaf edir və bu variant məqbul hesab olunub.

Məsələ ilə bağlı təhsil eksperti Kamran Əsədov Sputnik Azərbaycan-a açıqlamasında, əsas problemlərdən birinin əmək bazarında ixtisaslı kadrların çatışmaması olduğunu deyib: "Azərbaycanda fəaliyyət göstərən 54 ali təhsil müəssisəsi bir çox hallarda birbaşa təhsil, pedaqoji yönümlü ixtisaslar və yaxud da istehsalatın aşağı səviyyəsi üçün kadr hazırlığını həyata keçirə bilmir. Azərbaycan müstəqilliyini bərpa etdikdən sonra uzun müddət ərzində ölkədə fəaliyyət göstərən 107 peşə məktəbinin 4-ü istisna olmaqla 100-dən çox peşə məktəbi yalnız sənəd üzərində fəaliyyət göstərib. Və onlar istehsalata, əmək bazarına kadr buraxa bilmirdilər".

"Amma dünya təcrübəsində əmək bazarının ən az 25-30 faizi məhz peşə təhsil müəssisələrinin məzunları təşkil edir. Azərbaycanda isə bu, hətta, 1 faiz həcmində belə deyil" — ekspert bildirib.

Onun qənaətincə, peşə məktəbində çalışanlara təqaüdlərin və çalışdıqları işə görə onlara əmək haqlarının müəyyən edilməsi bu sahəyə gənclərin cəlb olunmasına müsbət təsir edəcək: "Bu gün Azərbaycanda peşə məktəblərində təhsil alanların sayı 15 minə yaxınlaşır. Bu, kifayət qədər ciddi rəqəmdir. Dövlət başçısı tərəfindən ötən il peşə agentliyi də yaradılıb və bundan sonra maddi-texniki bazası bərbad vəziyyətdə olan peşə məktəblərində inqilabi dəyişikliklər həyata keçirilməyə başlanılıb".

K. Əsədovun sözlərinə görə, gənclərin 4 il ərzində ali təhsil alıb vaxt itirməyindənsə, birbaşa 6 ay, 1 ildə əmək bazarına lazım olan kadr kimi yetişməsi daha müsbət addım olar: "Hazırda Azərbaycanda 160 minə yaxın tələbə təhsil alır. Onların heç də hamısı ali təhsillərini başa vurduqdan sonra işlə təmin olunmur. Və öz ixtisaslarından fərqli sahələrdə çalışmağa başlayırlar. Lakin peşə məktəblərində meyl edən şəxslər birbaşa qısa zamanda ixtisasları üzrə peşəkar kadr kimi yetişib işlə təmin olunmaları müsbət haldır".

"Qanun layihəsinə görə, heç də bütün peşə məktəblərində təhsil alan tələbələr əmək haqqı almayacaqlar. Birbaşa ixtisası üzrə istehsalatda çalışanlar gördükləri işin müqabilində əmək haqqı alacaqlar. Məsələn, kimlərsə rəngsazlıq üzrə peşə təhsili alırsa, müəyyən şirkətlər həmin tələbələri öz işlərinə cəlb edən zaman gördükləri işin müqabilində onlara əmək haqqı müəyyən edəcəklər" — həmsöhbətimiz vurğulayıb.

Bununla belə, onun qənaətincə, bu, heç də o demək deyil ki, peşə məktəblərində təhsil alanların hamısı əmək haqqı ilə təmin olunacaqlar: "Orada yalnız birbaşa istehsalat ilə məşğul olanlar və əmək fəaliyyəti göstərənlər üçün nəzərdə tutulub".

Mütəxəssis, peşə məktəblərinin birbaşa əmək bazarı üçün kadr hazırladığına diqqət çəkib: "Məsələn, Cənubi Koreyada belə bir konsepsiya mövcuddur. Hər hansı bir şirkət, korporasiya biznes layihəsi həyata keçirəcəksə, 1 il öncə peşə məktəblərinə həmin sahələr üzrə kadr hazırlanması üçün sifariş verir. Və korporasiyalar həmin şəxsləri təhsil aldıqları müddətdə işə cəlb edirlər. Bu zaman onlara əmək haqqı verilir".

Əjdər Ağayev, təhsil eksperti
© Photo : STR
Əjdər Ağayev, təhsil eksperti

"Bu qanun layihəsinin həyata keçirilməsi Azərbaycan gənclərinin vaxt itkisinə yol vermədən birbaşa peşə məktəblərinə meyillənməsinə gətirib çıxardacaq. Həm təqaüdlərin, həm də müəyyən peşə sahələri üzrə məşğul olan tələbələrə əmək haqqının verilməsi gənclərin bu sahəyə meyllənməsinə gətirib çıxaracaq. Onların işlə təmin edilməsi yüksək səviyyədə olacaq. Məsələn, zərgərlik, aşpazlıq ixtisası üzrə təhsil alanlar işlə təmin ediləcəklər. Təhsil aldığı müddətdə işlə təmin edilib əmək haqqı alacaqlar. Bu qanun layihəsinin tətbiqi töhfəsini verəcək" — Əsədov vurğulayıb.

Azərbaycan Təhsil Şurasının sədri, professor Əjdər Ağayev də Sputnik Azərbaycan-a açıqlamasında deyib ki, yeni qanun layihəsi tələbələrə təqaüdün verilməsi, ümumiyyətlə, onların təcrübə müddətində istehsalat fəaliyyətlərinə görə əmək haqqın verilməsi ilk növbədə abituriyentlərin peşə məktəblərinə marağının artmasına yönəlib: "Azərbaycanda peşə məktəblərinə maraq həmişə zəif olub. Əgər əmək haqqı, təqaüd varsa, peşə məktəblərində öz yerini tapan gənclərin sayı çox olacaq. Təhsil alan gənc zəhmətinin nəticəsini elə oradaca əmək haqqı almaqla görəcək. Bu əmək haqqı onun yaşayışına təsir edəcək".

"Digər tərəfdən, peşəsinə mükəmməl yiyələnməsinə təsir göstərəcək. Peşə təhsili ilə əlaqədar islahatlar və qanundakı yeni yanaşma, dəyişikliklər faydalıdır" — Ə. Ağayev əlavə edib.

3771
Teqlər:
Amil Əlili, "Peşə təhsili haqqında" qanun layihəsi, Əjdər Ağayev, Sputnik Azərbaycan, Kamran Əsədov, peşə, təhsil, ekspert, tələbə, Azərbaycan
Əlaqədar
Vəliyeva: “Təhsil ümumxalq işidir”
Təhsil Nazirliyindən valideynlərə çağırış
Təhsil ekspertindən xəbərdarlıq: bataqlıqdan qurtulun
Millət vəkili təhsil haqlarına görə naziri topa tutdu
Azərbaycan təhsilində inqilabi dəyişiklik
Teledərs, arxiv mşəkli

Müharibə bitib, problem isə həll olunmayıb - heç pulsuz paket köməyə çatmır

88
(Yenilənib 18:51 16.01.2021)
Cəbhəyanı zonalarda müəllim və şagirdlər üçün pulsuz mobil internet paketləri təqdim olunsa da, onlayn təhsilə qoşulmada problem hələ də qalmaqdadır

Zülfiyyə Quluyeva, Sputnik Azərbaycan

BAKI, 16 yanvar — Sputnik. Azərbaycanda koronavirus pandemiyasına görə ötən ilin mart ayından etibarən ənənəvi təhsil onlayn təhsillə əvəzlənsə də, sentyabr ayında Ermənistan-Azərbaycan arasında başlayan müharibə səbəbindən cəbhəboyu zonalarda məsafədən təhsildə ciddi problemlər yaranıb. Həmin dövrdə cəbhə bölgəsində 1200-dən çox məktəb fəaliyyətini dayandırmışdı. Müəllim və şagirdlər müxtəlif yerlərə yerləşdirildiyindən onlayn təhsilə qoşulmaq imkanını da itirmişdilər. Sputnik Azərbaycan müharibə dövründə cəbhə zonası hesab olunan ərazilərdə şagirdlərin təhsil imkanlarının bərpa edilib-edilmədiyini araşdırıb.

© AR Ministry of Education

Cəbrayıl rayonunun Cocuq Mərcanlı qəsəbə sakini Şahəddin Hüseynov Sputnik Azərbaycan-a açıqlamasında bildirib ki, müharibə dövründə qəsəbə artilleriya atəşinə tutulduğundan sakinlər ətraf rayon və qəsəbələrə köçmək məcburiyyətində qalıblar. Həmin dövrdə onların övladları tamamilə təhsildən kənar qalıblar. Çünki yerləşdirildikləri ərazilərdə bütün müəllim və şagirdlərin internetə çıxışı mümkün olmayıb. Ş.Hüseynov bu günlərdə övladlarının onlayn dərslərə qoşula bildiyini söyləyir. Onun sözlərinə görə, bu isə bütün şagirdləri əhatə etmir. Evləri dağıdılan sakinlər hələ də müxtəlif ərazilərdə yaşadığından onların övladları onlayn dərslərə qoşula bilmirlər.

Problemin qaldığını müharibə dövründə cəbhəyanı ərazi hesab olunan rayonların təhsil şöbəsindən də təsdiqləyirlər. Ağdam Rayon Təhsil şöbəsinin müdiri Mətanət Misirxanova Sputnik Azərbaycan-a açıqlamasında bildirib ki, hər gün distant təhsilə qoşulan şagirdlərin siyahısı hazırlanır. O bildirir ki, Ağdam rayonu üzrə təxminən 56 faizə yaxın şagird onlayn təhsilə cəlb olunub: "Müharibədən sonra müəllimlərlə şagirdlər arasında artıq bir vasitə var. Amma müəyyən qisim şagird hələ də təhsildən, müəllim təmasından kənardadır. Bunlar Ağdam rayonu ərazisindəki Səfərli, Alıbəyli, Ayaqqərvənd qəsəbələrinin şagirdləridir.

Burada yaşayan şagirdlərlə təmas qurmaq mümkün deyil. Çünki bu ərazilərdə telefon xətti yoxdur. Mobil internetdən istifadə etməyə isə maddi baxımdan imkanları çatmır. Amma biz həmin qəsəbələrdə yaşayan şagirdlərlə daima əlaqə qururuq. Məktəb direktorları və sinif rəhbərləri şagirdləri teledərslərə yönəldirlər ki, onlar teledərsləri izləsinlər. Bununla belə, biz nəzərdə tutmuşuq ki, məktəblər açıldıqdan sonra onlayn dərslərə qoşula bilməyən şagirdlər üçün həmin dərslər sıxlaşdırılmış formada keçirilsin. Bunun üçün də əlavə dərs və məşğələ cədvəlləri hazırlanır".

Təhsil Nazirliyi yanında İctimai Şuranın Sədr müavini Nadir İsrafilov da problemin olduğunu təsdiqləyir. O bildirir ki, koronavirus pandemiyası Azərbaycanda ənənəvi təhsilin dayandırılmasına əsas səbəbdir. Amma sentyabr ayında müharibənin başlanması cəbhəboyu ərazilərdə təhlükəsizlik baxımından şagirdlərin onlayn təhsildən də kənarda qalmasına səbəb olub: "Düzdür, bəzi ərazilərdə insanlar evlərinə qayıdıblar, həyat öz axarına düşüb. Şagirdlərlə müəllimlər arasında onlayn əlaqəni qurmaq mümkün olub. Amma müharibə zamanı dinc sakinlərin hədəfə alınması cəbhəyanı zonalarda evlərin və infrastrukturun dağılmasına səbəb oldu. Dağılan evlər bərpa olunmayana qədər o insanların evlərinə qayıtması mümkün deyil. Bu səbəbdən də cəbhə zonasında hələ də onlayn təhsildən kənarda qalan şagirdlər var. Bu zonalarda müəllim və şagirdlər üçün pulsuz mobil internet paketləri təqdim olunsa da, onlayn təhsilə qoşulmada problem hələ də qalmaqdadır. Amma bizim üçün əsas olan insanların təhlükəsizliyi və sağlamlığıdır. Azərbaycanın qazandığı qələbə sayəsində biz bu problemlərin də öhdəsindən gələcəyik".

N.İsrafilov işğaldan azad edilmiş ərazilərimizdə də təhsilin təşkili üçün Təhsil Nazirliyinə təkliflər verildiyini bildirib.

Təhsil Nazirliyindən isə Sputnik Azərbaycan-ın sorğusuna cavab olaraq bildirilib ki, cəbhəyanı bölgələrdə yaşayan şagirdlərin distant dərslərdə iştirakı tədricən genişlənir: "Bununla yanaşı, həmin şagirdlərin artıq rahat şəkildə teledərslərdən yararlanmaq imkanı da var".

Nəqliyyat, Rabitə və Yüksək Texnologiyalar Nazirliyindən isə bildirdilər ki, müharibə dövründə telefon rabitəsinə zərər dəyən ərazilərdə bərpa işləri, demək olar ki, başa çatdırılıb. Telefon xətti olmayan ərazilərə isə telefon xətlərinin çəkilməsi işi mütəmadi olaraq davam etdirilir. 

88
Teqlər:
dərs, onlayn, internet, cəbhəyanı bölgələr, təhsil

Azərbaycanda məktəblər açılacaq

271
(Yenilənib 12:09 16.01.2021)
Nazirlər Kabibeti yanında Operativ Qərargah ölkə ərazisində xüsusi karantin rejimini aprelin 1-dək uzatsa da, yanvarın 18-dən mərhələli şəkildə müəyyən yumşalmalar olacaq

BAKI, 16 yanvar — Sputnik. Məktəblərdə ənənəvi təhsilin bərpası nəzərdə tutulur. Sputnik Azərbaycan-ın məlumatına görə, bunu Nazirlər Kabibeti yanında Operativ Qərargahın brifinqində Prezidentin köməkçisi, Prezident Adminstrasiyasının İqtisadi Məsələlər və innovativ inkişaf siyasəti şöbəsinin müdiri Şahmar Mövsümov bildirib. Ş.Mövsümov deyib ki, detallar barədə növbəti həftə ərzində Təhsil Nazirliyi tərədindən brifinq keçiriləcək: "Bu barədə detalları Təhsil Nazirliyi özü açıqlayacaq. Məktəblərin açılması ilə bağlı müəyyən addımlar atılacaq".

271
Mövzu:
Azərbaycan karantində: nikbinlər, bədbinlər, xeyirxahlar və ixtiraçılar
Самолет Бе-200, фото из архива

Hirkan Milli Parkında yanğın davam edir - VİDEO

0
(Yenilənib 19:37 17.01.2021)
Yanğınla mübarizəyə Fövqəladə Hallar Nazirliyinin müvafiq qüvvələri, o cümlədən Aviasiya dəstəsinin "BE-200ÇS" tiplı amfibiya təyyarəsi cəlb olunub.

BAKI, 17 yanvar - Sputnik. Astara rayonu ərazisində Hirkan Milli Parkında baş vermiş yanğının söndürülməsi istiqamətində Fövqəladə Hallar Nazirliyi tərəfindən operativ və təxirəsalınmaz tədbirlər davam etdirilir.

Fövqəladə Hallar Nazirliyindən verilən məlumata görə, yanğının söndürülməsinə relyefin mürəkkəbliyi və hava şəraitinin əlverişsizliyi maneə törədir. Bununla belə, yanğının daha geniş sahəyə yayılması və Milli Parka daha böyük ziyan vurmasının qarşısının alınması məqsədilə zəruri tədbirlər həyata keçirilir.

Qeyd edək ki, yanğınla mübarizəyə Fövqəladə Hallar Nazirliyinin müvafiq qüvvələri, o cümlədən Aviasiya dəstəsinin "BE-200ÇS" tiplı amfibiya təyyarəsi də cəlb olunub.

Əlavə məlumat veriləcək.

0