Uşaq bağçası

Uşaq bağçalarının özəlləşdirilməsi böyük fəsadlara səbəb olacaq

581
Azərbaycanda bağçaların özəlləşdirilməsi təklifi ekspertlərin narazılığına səbəb olub

BAKI, 25 okt — Sputnik. Ötən həftə parlamentin Elm və təhsil komitəsinin iclasında "Məktəbəqədər təhsil haqqında" yeni qanun layihəsi müzakirə olunub. Komitə sədri İsa Həbibbəyli bildirib ki, Azərbaycanda fəaliyyət göstərən özəl uşaq bağçalarında fərqli qiymətlər olur: "Hətta Bakı şəhərində eyni imkanlara malik bağçalarda da fərqli qiymətlər qoyulub. Bu gün bəzi bağçalarda bir uşaq üçün ödəniş haqqı 300, digərində 500 manat təşkil edir. Hətta elə uşaq bağçaları var ki, orada qiymətlər bir az da artıqdır. Bütün bunları nəzərə alaraq, orta qiymət meyarı tapmaq lazımdır. Təbii ki, bunu da həmin uşaq bağçasının imkan və şəraitlərinə görə tənzimləmək olar".

Kamran Əsədov, təhsil üzrə ekspert
© Photo : APA
Kamran Əsədov, təhsil üzrə ekspert

Komitə sədri deyib ki, məktəbəqədər təhsil müəssisələri özəlləşdirilməməlidir: "Lakin özəlləşdirilərsə belə, onların təyinatı dəyişdirilməməlidir. Qanun layihəsinin hazırlıq variantında uşaq bağçalarının özəlləşdirilməməsi qeyd edilib. Amma sonradan aparılan araşdırma nəticəsində məlum oldu ki, bəzi rayonlardakı uşaq bağçalarına maliyyə yardımları ayırmaq bir az çətin olur. Ona görə də məcburən dövlətin tikib istifadəyə verdiyi bir çox bağçaların inkişafı və fəaliyyətini davam etdirməsi üçün, onların özəlləşdirilməsinə ehtiyac var. Bu səbəbdən təyinatı dəyişmədən məktəbəqədər təhsil müəssisələrinin özəlləşdirilməsi mümkün hal hesab edilir".

Qanun layihəsi Milli Məclisin plenar iclasına tövsiyə olunub.

Məsələ ilə əlaqədar təhsil eksperti Kamran Əsədov Sputnik-ə açıqlamasında deyib ki, Azərbaycanda məktəbəqədər təhsil müəssisələrinin özəlləşdirilməsinə heç bir ehtiyac yoxdur: "O sahələrin özəlləşdirilməsinə ehtiyac var ki, onların özəl sektoru yoxdur. Hazırda ölkədə kifayət qədər məktəbəqədər təhsil müəssisələri mövcuddur. Hesab edirəm ki, həmin təhsil müəssisələrinin özəlləşdirilməsinin arxasında bəzi məmurların biznes maraqları dura bilər".

"Sadəcə olaraq onların fəaliyyəti ilə bağlı yeni qanun layihəsi hazırlanmalı və nəzarət gücləndirilməlidir. Bağçalarda tərəqqinin olmasını istəyirlərsə, kadr təminatı məsələlərinə xüsusi diqqət ayrılmalıdır. İlk addım bağçaların icra hakimiyyətlərindən alınıb, yenidən Təhsil Nazirliyinə qaytarılmasıdır. Yaxud onlar üçün ayrıca təşkilatın, qurumun yaradılmasıdır. Çünki, bağçalar təhsilin əsasını təşkil edir. Bağçaları özəlləşdirmək yerinə onlara diqqət və qayğı artırılmalıdır", — K. Əsədov bildirib.

Onun fikrincə, uşaq bağçaları özəlləşsə, tamamilə sıradan çıxacaq: "Bütün ailələrin maddi imkanı yoxdur ki, uşaqlarını bura göndərsinlər. Onsuz da qeyri-rəsmi olaraq valideynlər dövlət bağçalarına ay ərzində 30-50 manat pul verirlər. Bunun maliyyə yükünü azaltmaqdan ötrü minimum və maksimum həddə ödəniş qoymaq olar. Onsuz da dövlət bağçalarında uşaqlara verilən qida plan üzrə deyil. Yəni, əksinə burada yüksək səviyyədə qida nəzərdə tutulsa da, müəyyən aidiyyəti dövlət qurumları və bağça, müəssisə rəhbərliyi tərəfindən böyük əksəriyyəti mənimsənilir. Uşaqların qidalanması çox bərbad vəziyyətdədir. İlk olaraq kadr təminatı ilə ciddi məşğul olmaq lazımdır".

Ekspertin qənaətincə, bağçalar özəlləşərsə, onların yeri iri şirkətlərə satılacaq: "Burada daha çox binalar və s. tikiləcək ki, bu sahənin də məhvinə gətirib çıxardacaq".

Əjdər Ağayev, təhsil eksperti
© Photo : STR
Əjdər Ağayev, təhsil eksperti

Azərbaycan Təhsil Şurasının (ATŞ) sədri, professor Əjdər Ağayev də, dövlət bağçalarının özəlləşdirilməsi məqbul hesab etmir. "Konstitusiyamıza görə, hər bir vətəndaşın təhsil almaq hüququ var və dövlət onu təmin edir. İcbari təhsil qanunumuz var və bu da yerinə yetirilməlidir", — deyə o, Sputnik-ə açıqlamasında bildirib.

Ekspertin fikrincə, sosial bərabərsizliyin çox olduğu indiki şəraitdə bütün dövlət bağçalarının özəlləşdirilməsi fəsadlara səbəb olar: "Ümumiyyətlə, dövlət, təhsil sisteminin bütün mərhələlərində kadr hazırlığını öz nəzarəti və təchizatı ilə öndə tutmalıdır. Hər bir dövlətdə belədir. Kim istəyirsə ki, özəl bağça açsın bu, tamamilə ayrı məsələdir. Amma mövcud dövlət bağçalarını özəlləşdirmək əksəriyyətin mənafeyinə uyğun deyil".

581
Teqlər:
bağça, "Məktəbəqədər təhsil haqqında", Əjdər Ağayev, uşaq baxçası, qanun layihəsi, Kamran Əsədov, parlament
Əlaqədar
Ekspert: Bağçaları söküb yerində göydələnlər, şadlıq sarayları tikdilər
Təhsil Nazirliyi 300-dən artıq uşaq bağçasını satıb
Azərbaycanda ayı uşaq bağçasına hücum edib
Uşaq bağçalarımız müasir standartlara niyə uyğunlaşmır?
Bakıda uşaq bağçası yandı
Teledərs, arxiv mşəkli

Müharibə bitib, problem isə həll olunmayıb - heç pulsuz paket köməyə çatmır

88
(Yenilənib 18:51 16.01.2021)
Cəbhəyanı zonalarda müəllim və şagirdlər üçün pulsuz mobil internet paketləri təqdim olunsa da, onlayn təhsilə qoşulmada problem hələ də qalmaqdadır

Zülfiyyə Quluyeva, Sputnik Azərbaycan

BAKI, 16 yanvar — Sputnik. Azərbaycanda koronavirus pandemiyasına görə ötən ilin mart ayından etibarən ənənəvi təhsil onlayn təhsillə əvəzlənsə də, sentyabr ayında Ermənistan-Azərbaycan arasında başlayan müharibə səbəbindən cəbhəboyu zonalarda məsafədən təhsildə ciddi problemlər yaranıb. Həmin dövrdə cəbhə bölgəsində 1200-dən çox məktəb fəaliyyətini dayandırmışdı. Müəllim və şagirdlər müxtəlif yerlərə yerləşdirildiyindən onlayn təhsilə qoşulmaq imkanını da itirmişdilər. Sputnik Azərbaycan müharibə dövründə cəbhə zonası hesab olunan ərazilərdə şagirdlərin təhsil imkanlarının bərpa edilib-edilmədiyini araşdırıb.

© AR Ministry of Education

Cəbrayıl rayonunun Cocuq Mərcanlı qəsəbə sakini Şahəddin Hüseynov Sputnik Azərbaycan-a açıqlamasında bildirib ki, müharibə dövründə qəsəbə artilleriya atəşinə tutulduğundan sakinlər ətraf rayon və qəsəbələrə köçmək məcburiyyətində qalıblar. Həmin dövrdə onların övladları tamamilə təhsildən kənar qalıblar. Çünki yerləşdirildikləri ərazilərdə bütün müəllim və şagirdlərin internetə çıxışı mümkün olmayıb. Ş.Hüseynov bu günlərdə övladlarının onlayn dərslərə qoşula bildiyini söyləyir. Onun sözlərinə görə, bu isə bütün şagirdləri əhatə etmir. Evləri dağıdılan sakinlər hələ də müxtəlif ərazilərdə yaşadığından onların övladları onlayn dərslərə qoşula bilmirlər.

Problemin qaldığını müharibə dövründə cəbhəyanı ərazi hesab olunan rayonların təhsil şöbəsindən də təsdiqləyirlər. Ağdam Rayon Təhsil şöbəsinin müdiri Mətanət Misirxanova Sputnik Azərbaycan-a açıqlamasında bildirib ki, hər gün distant təhsilə qoşulan şagirdlərin siyahısı hazırlanır. O bildirir ki, Ağdam rayonu üzrə təxminən 56 faizə yaxın şagird onlayn təhsilə cəlb olunub: "Müharibədən sonra müəllimlərlə şagirdlər arasında artıq bir vasitə var. Amma müəyyən qisim şagird hələ də təhsildən, müəllim təmasından kənardadır. Bunlar Ağdam rayonu ərazisindəki Səfərli, Alıbəyli, Ayaqqərvənd qəsəbələrinin şagirdləridir.

Burada yaşayan şagirdlərlə təmas qurmaq mümkün deyil. Çünki bu ərazilərdə telefon xətti yoxdur. Mobil internetdən istifadə etməyə isə maddi baxımdan imkanları çatmır. Amma biz həmin qəsəbələrdə yaşayan şagirdlərlə daima əlaqə qururuq. Məktəb direktorları və sinif rəhbərləri şagirdləri teledərslərə yönəldirlər ki, onlar teledərsləri izləsinlər. Bununla belə, biz nəzərdə tutmuşuq ki, məktəblər açıldıqdan sonra onlayn dərslərə qoşula bilməyən şagirdlər üçün həmin dərslər sıxlaşdırılmış formada keçirilsin. Bunun üçün də əlavə dərs və məşğələ cədvəlləri hazırlanır".

Təhsil Nazirliyi yanında İctimai Şuranın Sədr müavini Nadir İsrafilov da problemin olduğunu təsdiqləyir. O bildirir ki, koronavirus pandemiyası Azərbaycanda ənənəvi təhsilin dayandırılmasına əsas səbəbdir. Amma sentyabr ayında müharibənin başlanması cəbhəboyu ərazilərdə təhlükəsizlik baxımından şagirdlərin onlayn təhsildən də kənarda qalmasına səbəb olub: "Düzdür, bəzi ərazilərdə insanlar evlərinə qayıdıblar, həyat öz axarına düşüb. Şagirdlərlə müəllimlər arasında onlayn əlaqəni qurmaq mümkün olub. Amma müharibə zamanı dinc sakinlərin hədəfə alınması cəbhəyanı zonalarda evlərin və infrastrukturun dağılmasına səbəb oldu. Dağılan evlər bərpa olunmayana qədər o insanların evlərinə qayıtması mümkün deyil. Bu səbəbdən də cəbhə zonasında hələ də onlayn təhsildən kənarda qalan şagirdlər var. Bu zonalarda müəllim və şagirdlər üçün pulsuz mobil internet paketləri təqdim olunsa da, onlayn təhsilə qoşulmada problem hələ də qalmaqdadır. Amma bizim üçün əsas olan insanların təhlükəsizliyi və sağlamlığıdır. Azərbaycanın qazandığı qələbə sayəsində biz bu problemlərin də öhdəsindən gələcəyik".

N.İsrafilov işğaldan azad edilmiş ərazilərimizdə də təhsilin təşkili üçün Təhsil Nazirliyinə təkliflər verildiyini bildirib.

Təhsil Nazirliyindən isə Sputnik Azərbaycan-ın sorğusuna cavab olaraq bildirilib ki, cəbhəyanı bölgələrdə yaşayan şagirdlərin distant dərslərdə iştirakı tədricən genişlənir: "Bununla yanaşı, həmin şagirdlərin artıq rahat şəkildə teledərslərdən yararlanmaq imkanı da var".

Nəqliyyat, Rabitə və Yüksək Texnologiyalar Nazirliyindən isə bildirdilər ki, müharibə dövründə telefon rabitəsinə zərər dəyən ərazilərdə bərpa işləri, demək olar ki, başa çatdırılıb. Telefon xətti olmayan ərazilərə isə telefon xətlərinin çəkilməsi işi mütəmadi olaraq davam etdirilir. 

88
Teqlər:
dərs, onlayn, internet, cəbhəyanı bölgələr, təhsil

Azərbaycanda məktəblər açılacaq

264
(Yenilənib 12:09 16.01.2021)
Nazirlər Kabibeti yanında Operativ Qərargah ölkə ərazisində xüsusi karantin rejimini aprelin 1-dək uzatsa da, yanvarın 18-dən mərhələli şəkildə müəyyən yumşalmalar olacaq

BAKI, 16 yanvar — Sputnik. Məktəblərdə ənənəvi təhsilin bərpası nəzərdə tutulur. Sputnik Azərbaycan-ın məlumatına görə, bunu Nazirlər Kabibeti yanında Operativ Qərargahın brifinqində Prezidentin köməkçisi, Prezident Adminstrasiyasının İqtisadi Məsələlər və innovativ inkişaf siyasəti şöbəsinin müdiri Şahmar Mövsümov bildirib. Ş.Mövsümov deyib ki, detallar barədə növbəti həftə ərzində Təhsil Nazirliyi tərədindən brifinq keçiriləcək: "Bu barədə detalları Təhsil Nazirliyi özü açıqlayacaq. Məktəblərin açılması ilə bağlı müəyyən addımlar atılacaq".

264
Mövzu:
Azərbaycan karantində: nikbinlər, bədbinlər, xeyirxahlar və ixtiraçılar
Hirkan Milli Parkında yanğın

Hirkan Milli Parkında yanğın davam edir - VİDEO

0
(Yenilənib 19:25 17.01.2021)
Yanğınla mübarizəyə Fövqəladə Hallar Nazirliyinin müvafiq qüvvələri, o cümlədən Aviasiya dəstəsinin "BE-200ÇS" tiplı amfibiya təyyarəsi cəlb olunub.

BAKI, 17 yanvar - Sputnik. Astara rayonu ərazisində Hirkan Milli Parkında baş vermiş yanğının söndürülməsi istiqamətində Fövqəladə Hallar Nazirliyi tərəfindən operativ və təxirəsalınmaz tədbirlər davam etdirilir.

Fövqəladə Hallar Nazirliyindən verilən məlumata görə, yanğının söndürülməsinə relyefin mürəkkəbliyi və hava şəraitinin əlverişsizliyi maneə törədir. Bununla belə, yanğının daha geniş sahəyə yayılması və Milli Parka daha böyük ziyan vurmasının qarşısının alınması məqsədilə zəruri tədbirlər həyata keçirilir.

Qeyd edək ki, yanğınla mübarizəyə Fövqəladə Hallar Nazirliyinin müvafiq qüvvələri, o cümlədən Aviasiya dəstəsinin "BE-200ÇS" tiplı amfibiya təyyarəsi cəlb olunub.

Əlavə məlumat veriləcək.

0