Учебный процесс в одной из бакинских школ. Архивное фото

Təhsil Şurası: Tədris həftəsinin artırılmasının təhsilin keyfiyyətinə təsiri yoxdur

65
Ekspertlər tədris həftəsinin artırılmasını Sputnik-ə şərh ediblər.

BAKI, 2 iyun — Sputnik. Tədris həftəsinin artırılmasının ümumiyyətlə təhsilin keyfiyyətinə təsir amili yoxdur. Digər tərəfdən də tədris ilinin axırıdır. Müəllimlər də şagirdlər də yorğundur. Buna psixoloji hazırlıq yoxdur.  

Bunu Azərbaycan Təhsil Şurasının sədri, professor Əjdər Ağayev Sputnik-ə açıqlamasında deyib.

Ekspert hesab edir ki, iki həftənin artırılması iyun ayının hesabına deyil, sentyabrın hesabına etmək lazımdır: “Uzun illərdən bəri bizdə sentyabrın 1-də dərslər başlayıb. Bunun sentyabr ayı hesabına edilməsi təhsilin keyfiyyətinə təsiri ola bilər. Valideynlərin, şagirdlərin, müəllimlərin də əksəriyyətinin təklifi dərs ilinin sentyabrın 1-dən başlanmasına keçirilməsidir. Bu təklifi məqbul hesab edirəm. İyun ayının da iki həftəsi sadəcə olaraq sərbəst hazırlığa verilsin. Gələn ildən bunu tətbiq etməyi faydalı sayıram”. 

Təhsil üzrə ekspert Nabatəli Qulamoğlu Sputnik-ə açıqlamasında deyib  ki, tədris həftəsinin artırılmasının təhsilin keyfiyyətinə müsbət təsiri olacağını düşünmürəm. Qərarın effektivliyinə inanmıram: “Bu il deyək ki, iqlim normal keçdi, hava sərindi, siniflərdə dərs keçmək də mümkündür. Amma növbəti illərdə iyun ayının 1- i ilə 15-i arasında Azərbaycanda dərs keçmək mümkün deyil. Yalnız o vaxt mümkün olar ki, orta məktəblər kondisionerlərlə təmin edilsin və s. Gələcəkdə bunu edə bilsək effekti olacaq”.

Ekspert deyib ki, dərs ilinin sentyabrın 1-də başlaması optimal variantdır.  

Psixoloq Tariyel Faziloğlu Sputnik-ə açıqlamasında deyib ki, tədris həftəsinin artırılmasının şagirdlərə ciddi psixoloji təsirləri var: “Birincisi mayın 31-i ona görə qəbul edilirdi ki, şagirdlərin sinifdə oturması üçün orta istilik dərəcəsinin maksimal həddə çatmaması dönəminə qədər idi. Dünyanın hər yerində dərs müddətində temperatur əsas götürülür. İkincisi temperatur ilə əlaqədar insanda fizioloji, psixoloji dəyişikliklər nəzərə alınır. Faktiki olaraq 2 həftə əlavə dönəmdə nə müəllimlərdə nə də uşaqlarda tədris ilə bağlı heç bir motivasiya olmayacaq. Bu zaman israfıdır”.

Psixoloq deyib ki, şagirdlər standartların üzərindəki istilik dərəcəsində sinifdə oturacaqlarsa, elə sentyabrın 1-dən qoysunlar, mayın 31-də də bitsin. Dərs müddətinin uzadılması ilə bağlı verilən qərardan sonra tədris həftəsinin 32-dən 34-ə qədər artırılması dünyanın inkişaf etmiş ölkələri ilə müqayisədə orta göstəricidir. Çünki bir çox ölkələrdə bu göstərici 38, hətta 40 həftədir. 

Bunu Təhsil Nazirliyinin Təhsilin inkişafı proqramları şöbəsinin müdiri Emin Əmrullayev deyib. 

O bildirib ki, XXI əsrin çağırışlarına cavab vermək üçün Azərbaycanın ümumtəhsil məktəblərində tədrisə çox vaxt ayrılmalıdır. Bu, vətəndaşlar üçün pulsuz xidmətdir. Bir dövlət vətəndaşına 2 həftə artıq təhsil verirsə, burada qəbahətli və ya təşviş doğuracaq bir hal olmamalıdır. Bu kimi dəyişikliklərin nəticələri bir-iki ilə görünmür. Yəni, bir neçə ildən sonra cəmiyyətimiz bu məsələdə hansısa dəyişikliklərin olmasından rahat şəkildə danışa biləcək. Bir il olmasa da, sonrakı müddətdə təhsil alan şagirdlər üçün bu addımın müsbət təsiri olacaq.

Xatırladaq ki, Nazirlər Kabinetinin 2014-cü il 30 oktyabr tarixli 362 nömrəli qərarı ilə "Ümumtəhsil məktəbinin Nümunəvi Nizamnaməsi"ndə edilmiş dəyişikliyə əsasən, ümumtəhsil məktəblərində dərs məşğələləri sentyabrın 15-də başlayıb iyunun 14-də başa çatır. Bu qərar 2014-2015-ci dərs ili başlandıqdan sonra qəbul olunduğundan həmin dəyişiklik 2015-2016-cı dərs ilindən etibarən respublikanın ümumtəhsil məktəblərində tətbiq edilməyə başlanıb. Bununla da dərs ili ərzində tədris həftələrinin sayı artırılaraq orta hesabla 32,8-dən 34,8 həftəyə çatdırılıb. Təhsil Nazirliyi isə dəyişikliyin əsas məqsədinin şagirdlərin təlim yükünün azaldılması, proqram materiallarını səmərəli mənimsəmələri üçün əlverişli təhsil mühitinin yaradılması olduğunu bəyan edib.

65
Məktəbdə dərs prosesi, arxiv şəkli

Məktəb, vaksinasiya, metro borclar: milyon yarım şagirdlə bağlı qərar veriləcək?

64
(Yenilənib 17:13 19.01.2021)
Yanvarın 22-də keçiriləcək brifinqdə təhsil naziri Emin Əmrullayev təhsilin növbəti aylardakı fəaliyyəti ilə bağlı açıqlama verəcək

Zülfiyyə Quluyeva, Sputnik Azərbaycan

BAKI, 19 yanvar — Sputnik. Azərbaycanın COVID-19 əleyhinə vaksinasiyaya başlaması ənənəvi təhsilin bərpasına ümid yaradıb. Bu günlərdə Nazirlər Kabineti yanında Operativ Qərargahın brifinqində çıxış edən Prezidentin köməkçisi Şahmar Mövsümov bildirib ki, peyvənddən sonra məktəblərin açılması ilə bağlı müəyyən addımlar atılacaq. Onun sözlərinə görə, məktəblərdə ənənəvi təhsilin bərpası nəzərdə tutulur.

Sputnik Azərbaycan peyvənddən sonra təhsilin hansı formada bərpa olunacağını araşdırıb.

Təhsil Nazirliyindən Sputnik Azərbaycan-ın sorğusuna verilən cavabda bildirilir ki, yanvarın 22-də keçiriləcək brifinqdə təhsil naziri Emin Əmrullayev təhsilin növbəti aylardakı fəaliyyəti ilə bağlı açıqlama verəcək.

Təhsil üzrə ekspert Kamran Əsədov Sputnik Azərbaycan-a açıqlamasında bildirib ki, COVID-19 əleyhinə vaksinasiyaya cəlb edilən risk qrupunda təhsil işçiləri də var. Təhsil işçilərinin peyvənd olunması isə ənənəvi tədrisin bərpası yönündə atılmış addımdır: "Ölkəmizdə vaksinasiyadan sonra məktəblər hibrid formada, həftədə bir neçə gün olmaqla açıla bilər. Amma düşünürəm ki, ənənəvi dərslərdə iştirak etmə könüllü olmalıdır. Virusa yoluxmadan narahat olanların və səhhətində problem olanların dərslərdə iştirak etməsi məcburi yox, könüllülük prinsipi əsasında təşkil ediləcək".

K.Əsədov deyir ki, məktəblər açılan kimi birinci yarımil üzrə məktəbdaxili qiymətləndirilmənin həyata keçirilməsi mümkün deyil: "Birinci yarımil üzrə məktəbdaxili qiymətləndirilmə həyata keçirilməyəcək. Çünki 1,6 milyon şagirdi qısa müddətdə bu prosesə cəlb etmək mümkün deyil. Birinci yarımil yanvarın 27-də başa çatır. Çox güman ki, şagirdlərin biliyi ikinci yarımilin sonunda qiymətləndiriləcək. Bu isə yekun qiymət olacaq".

Ekspert bildirir ki, ali, orta ixtisas və peşə təhsili müəssisələrinin də qismən və mərhələli şəkildə açılması mümkündür:

"Nəzərə almaq lazımdır ki, 1-ci kurs tələbələri ümumiyyətlə təhsil müəssisələrinə getməyiblər. 4-cü kursların isə pedaqoji, istehsalat təcrübələri var. Eyni zamanda, bəzilərinin akademik borcları yaranıb. Bütün bu problemlər bu semestr həll olmalıdır. 4-cü kurs tələbələrinin diplom işləri, buraxılış işləri var. Onlar magistratura pilləsinə qəbul imtahanı verəcəklər. Ümumiyyətlə, bütün kurslar üzrə tədrisin bərpa edilməsi istiqamətində addım atılması mümkündür".

Tədris bərpa olunsa belə, ekspert orta və ali məktəblərdə yaşı 65-dən yuxarı olan şəxslərin dərslərə buraxılmasının riskli olduğunu söyləyir: "Ənənəvi təhsil bərpa edilərkən yoluxma sayının artmaması üçün metronun fəaliyyəti bərpa edilməlidir. Məktəblərdə azı 1 giriş və 1 çıxış qapıları müəyyən edilməlidir. Şagirdlərin qoruyucu maskadan istifadə etməsi məcburi olmalıdır. Müəllimlər də sanitariya qaydalarına riayət etməli, məktəblərdə mütəmadi olaraq dezinfeksiya işləri aparılmalıdır. Hibrid formada tədris bərpa olunandan sonra dərslərin müddəti azaldıla bilər. Əsas fənlər ənənəvi, digər fənlər onlayn qaydada həyata keçirilməlidir. Xüsusilə ibtidai sinif şagirdlərinə Azərbaycan dili, riyaziyyat və xarici dil fənləri hər gün tədris edilməlidir. Digər fənlər isə onlayn rejimdə keçirilməlidir".

Milli Məclisin Elm və təhsil komitəsinin üzvü Kamilə Əliyeva Sputnik Azərbaycan-a açıqlamasında bildirib ki, ənənəvi təhsilin bərpasına tələsmək olmaz: "Koronavirus yayılan kimi ilk olaraq məktəblər bağlandı. Bu, səbəbsiz deyildi. Çünki təhsil müəssisələri virusun yayılması üçün ən böyük risk məkanları sayılırdı. Ona görə də biz ənənəvi təhsili bərpa etməyə tələsməməliyik. Vaksinasiya hər iki risk qrupu üzrə başa çatdıqdan və müsbət nəticə əldə edildikdən sonra məktəblərdə ənənəvi təhsilə mərhələli şəkildə başlamaq olar. Mənim fikrimcə, məktəblərdə tam ənənəvi təhsilə keçmək düzgün olmaz. Məktəblərdə dərslər hibrid formada təşkil edilməlidir".

Qeyd edək ki, artıq Rusiyada orta məktəblərdə ənənəvi təhsil bərpa olunub. Türkiyədə isə yaxın vaxtlarda təhsilin hibrid formada bərpası nəzərdə tutulur.

64
Teqlər:
Təhsil Nazirliyi, vaksinasiya, karantin, məktəb
Onlayn təhsil, arxiv şəkli

Şagirdlərə bu gün xüsusi dərslər keçiriləcək

11
Dərslərdən əlavə, kitab, foto və rəsm sərgisinin, ədəbi-bədii kompozisiyaların təşkili, konfrans, seminar, mühazirə və "dəyirmi masa"ların da keçirilməsi nəzərdə tutulur

BAKI, 19 yanvar — Sputnik. Yanvarın 19-da təhsil müəssisələrində 20 Yanvar faciəsinin otuz birinci ildönümünə həsr olunmuş xüsusi dərslər keçiriləcək. Təhsil Nazirliyindən Sputnik Azərbaycan-a verilən xəbərə görə, Təhsil nazirinin müvafiq əmri ilə təsdiqlənmiş "20 Yanvar faciəsinin otuz birinci ildönümü ilə bağlı Təhsil Nazirliyinin Tədbirlər Planı"na əsasən tədris olunacaq dərslər onlayn təşkil ediləcək. Tədbirlər Planına əsasən, təhsil müəssisələrində onlayn qaydada 20 Yanvar faciəsinin otuz birinci ildönümünə həsr olunmuş kitab, foto və rəsm sərgisinin, ədəbi-bədii kompozisiyaların təşkili, konfrans, seminar, mühazirə və "dəyirmi masa"ların da keçirilməsi nəzərdə tutulur.

11

İlham Əliyev: "Milli iradəmizin zəfər çaldığı gün - 20 Yanvar"

17
1990-cı il yanvarın 19-dan 20-nə keçən gecə Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə qoşun hissələri Bakıya və Azərbaycanın bir neçə rayonuna yeridilib.

BAKI, 20 yanvar - Sputnik. Prezident İlham Əliyevin "Facebook" səhifəsində 20 Yanvar faciəsinin 31-ci ildönümü ilə əlaqədar paylaşım edilib.

Sputnik Azərbaycan-ın məlumatına görə, paylaşımda deyilir: "Milli iradəmizin zəfər çaldığı gün - 20 Yanvar".

17