Fransanın Avropa məsələləri üzrə dövlət katibi Harlem Desir Azərbaycanın təhsil naziri Mikayıl Cabbarovla müzakirələr aparır

Azərbaycan-Fransa Universitetinə qəbul şərtləri necə olacaq?

140
(Yenilənib 16:33 27.04.2016)
Fransa tərəfindən bu layihədə tərəfdaş universitet Strasburq Universiteti, Azərbaycan tərəfdən isə Dövlət Neft və Sənaye Universitetidir. Sentyabrda fəaliyyətə başlaması nəzərdə tutulan universitetdə, əsasən kimya fənni tədris olunacaq.

BAKI, 27 apr — Sputnik. Azərbaycan-Fransa Universiteti bu ilin sentyabrında fəaliyyətə başlaya bilər. Sputnik xəbər verir ki, dünən paytaxt Bakıda yerləşən Fransız liseyində olan, Fransanın Avropa məsələləri üzrə dövlət katibi Harlem Desir, Azərbaycanın təhsil naziri Mikayıl Cabbarovla bu barədə müzakirələr aparıb.

Fransız liseyində baş tutan görüşdən sonra mətbuata açıqlama verən təhsil naziri Mikayıl Cabbarov deyib ki, bu gün əməkdaşlığın növbəti mərhələsi kimi Azərbaycan-Fransa Universiteti layihəsinin həyata keçirilməsi müzakirə olunur: "Qarşımızda duran əsas məqsəd odur ki, bu ali təhsil müəssisəsi 2016-cı il sentyabrın 15-dən fəaliyyətə başlasın".

M.Cabbarov əlavə edib ki, Fransa tərəfindən bu layihədə tərəfdaş universitet Strasburq Universiteti, Azərbaycan tərəfdən isə Dövlət Neft və Sənaye Universitetidir: "Bu fəaliyyət artıq bir ildən çoxdur ki, həyata keçirilir. Hazırda Fransa tərəfindən növbəti mərhələ üzrə addımları özündə əks etdirən sənəd layihəsi təqdim olunub".

Öz növbəsində fransalı nazir Harlem Desir, jurnalistlərə açıqlamasında deyib ki, sentyabrda fəaliyyətə başlaması nəzərdə tutulan universitetdə, əsasən kimya fənni tədris olunacaq və dərslər fransız və Azərbaycan dillərində keçiriləcək.

Bəs həmin universitetə qəbul şərtləri necə olacaq? Dərslərin keçirilməsi üçün Fransadan müəllim heyəti dəvət ediləcəkmi? Tələbələrimiz kimya fənnini fransız dilində necə qavrayacaqlar?

Təhsil Nazirliyinin mətbuat xidmətinin rəhbəri Cəsarət Valehov Sputnik-ə açıqlamasında deyib ki, qəbulun necə və hansı şərtlərlə olacağı haqda may ayında ictimaiyyətə geniş məlumat veriləcək: "Hələlik bununla bağlı işlər gedir və proses yekunlaşmaq üzrədir. Fənnlərin tədris olunması üçün Fransadan müəllim heyəti də dəvət olunacaq".

Yeni yaradılmış Dövlət İmtahan Mərkəzinin (DİM) funksiyasını icra edən Tələbə Qəbulu üzrə Dövlət Komissiyasının (TQDK) mətbuat xidmətindən isə bildirdilər ki, hələlik onlarda yeni universitetin fəaliyyətə başlayacağı ilə bağlı məlumat yoxdur: "Biz özümüz də həmin xəbəri mətbuatdan eşitdik. Bizə hər hansı formada məlumat daxil olmayıb. Yəqin ki, yaxın vaxtlarda məsələ tam aydın olar və biz də ictimaiyyətə geniş açıqlama verərik".

140
Teqlər:
Fransız liseyi, Azərbaycan-Fransa Universiteti, Mikayıl Cabbarov, Fransanın dövlət katibi Harlem Desir, Avropa
Əlaqədar
Azərbaycanlı fotoqraf Fransada 2 qızıl medalla mükafatlandırıldı
Azərbaycan təhsilində yeni dövr başlayır
Ekspertlər: Təhsildə yeni strukturu daha əvvəl qurmaq lazım idi
Xaricdə təhsil kimlər üçün ləğv olundu?
Rayon təhsil şöbələrinin ləğvi nə vaxta qaldı?
Fiziki məhdudiyyətli uşaqlar UNEC-in təhsil imkanları ilə tanış olublar
 Pandemiya zamanı imtahan, arxiv şəkli

DİM kolleclərlə bağlı abituriyentlərə müraciət etdi

5
(Yenilənib 12:20 14.08.2020)
İmtahanlar təsviri sənət, musiqi sənəti və teatr, kino və xoreoqrafiya sənəti istiqamətləri üzrə keçiriləcək. Ümumilikdə 15 Yaradıcılıq Qabiliyyətinin Yoxlanılması Komissiyası (YQYK) təşkil ediləcək

BAKI, 14 avqust — Sputnik. Dövlət İmtahan Mərkəzi 9 illik orta təhsil bazasında kolleclərin xüsusi qabiliyyət tələb edən ixtisaslarına qəbul olmaq istəyən abituriyentlərə müraciət edib. Bu barədə Sputnik Azərbaycan-a DİM-dən məlumat verilib.

Bildirilib ki, abituriyentlər "qabiliyyət imtahanına buraxılış vərəqəsi"ni çap edə bilərlər.

Dövlət İmtahan Mərkəzi tərəfindən 17-21 və 24 avqust tarixlərində 2020/2021-ci tədris ili üçün ümumi orta təhsil bazasında orta ixtisas təhsili müəssisələrinin xüsusi qabiliyyət tələb edən ixtisaslarına qəbul olmaq üçün qeydiyyatdan keçmiş abituriyentlərin qabiliyyət imtahanları keçiriləcək.

İmtahanlar təsviri sənət, musiqi sənəti və teatr, kino və xoreoqrafiya sənəti istiqamətləri üzrə keçiriləcək. Ümumilikdə 15 Yaradıcılıq Qabiliyyətinin Yoxlanılması Komissiyası (YQYK) təşkil ediləcək. 8 komissiya üzrə qabiliyyət imtahanları ilk dəfə olaraq onlayn keçiriləcək.

İmtahanlar Bakı, Naxçıvan, Gəncə və Bərdə şəhərlərində 7 binada təşkil ediləcək.

Abituriyentlər 14-18 avqust 2020-ci il tarixlərində DİM-in saytından "qabiliyyət imtahanına buraxılış vərəqəsi"ni çap edə bilərlər.

Qabiliyyət imtahanları təsviri sənət istiqaməti ilə başladığına görə bu istiqamət üzrə imtahan verən abituriyentlərə buraxılış vərəqələrini avqustun 16-na qədər çap etmək tövsiyə olunur.

İştirakçılar imtahana tibbi maska ilə gəlməli və onlardan düzgün (burun, ağız və çənə nahiyəsini tam örtməklə) istifadə etməlidirlər. Maskanı çıxarmaq qadağandır və bütün proses (buraxılış rejimi, imtahan müddəti, imtahan binasının tərk edilməsi) boyu istifadə olunmalıdır.

Xatırladaq ki, kütləviliyin və təmas hallarının qarşısının alınması məqsədilə imtahan iştirakçıları üçün imtahan binasına müxtəlif daxilolma vaxtları müəyyən edilib və imtahan iştirakçısının buraxılış vərəqəsində həmin vaxt göstərilib. Ona görə də imtahan binasına buraxılış vərəqəsində qeyd olunan vaxtda gəlmək lazımdır.

Abituriyentlər imtahana aşağıdakı sənədləri gətirməlidirlər:

- qabiliyyət imtahanına buraxılış vərəqəsini;

- Sağlamlıq haqqında bəyannaməni (buraxılış vərəqi ilə birlikdə çap edirsiniz və imzalayırsınız);

- şəxsiyyəti təsdiq edən sənədin əslini:

a) Azərbaycan Respublikasının vətəndaşları (16 yaşı tamam olmayan iştirakçılar da daxil olmaqla) şəxsiyyət vəsiqəsini;

b) əcnəbilər və vətəndaşlığı olmayan şəxslər Dövlət Miqrasiya Xidməti tərəfindən verilmiş icazə vəsiqələrini, qaçqın statusu almış xarici vətəndaşlar və onların ailə üzvləri isə qaçqın vəsiqələrini;

- Şəxsiyyət vəsiqəsində şəkli olmayan iştirakçılar digər sənədlərlə yanaşı, təhsil müəssisəsi tərəfindən verilmiş və fotoşəkilləri yapışdırılmış arayışı (arayışa iştirakçının 3x4sm ölçülü şəkli yapışdırılır və şəkil möhürlə təsdiqlənir).

İmtahana buraxılış vərəqəsi abituriyentin özündə saxlanıldığı, sağlamlıq haqqında bəyannamə isə imtahan nəzarətçisinə təhvil verildiyi üçün hər iki sənəd ayrıca vərəqdə çap olunmalıdır.

142, 143, 342-ci komissiyaları (xoreoqrafiya və rəqs müəllimliyi) seçən abituriyentlər qabiliyyət imtahanına gələrkən komissiyaya çəkisi, boyu, onurğa sütunu, ürəyi, ağ ciyərləri, görmə qabiliyyəti haqqında tibbi arayış təqdim etməli­ və özləri ilə rəqs paltarı gətirməlidirlər.

Sərtləşdirilmiş xüsusi karantin rejiminin tətbiq olunduğu şəhər və rayonlara giriş-çıxışa məhdudiyyət qoyulduğu üçün imtahan iştirakçıları haqqında məlumat bazası aidiyyəti qurumlara təqdim ediləcək, imtahan iştirakçılarının və ehtiyac olarsa, iştirakçını müşayiət edən bir nəfərin imtahan binasına gedib və imtahandan sonra qayıtmasına icazə veriləcək. İmtahan iştirakçısına "İmtahana buraxılış vərəqəsi" ilə bir yerdə onu müşayiət edəcək 1 nəfər üçün arayış da çap etmək imkanı yaradılıb. Arayış imtahan iştirakçısı tərəfindən doldurulmalı və imza ilə təsdiqlənməlidir. Arayış yoxlama zamanı şəxsiyyət vəsiqəsi ilə birlikdə təqdim edilir və imtahan iştirakçısının özü iştirak etdikdə (imtahan binasının yaxınlığında gözləmək istisna olmaqla) və onun müvafiq sənədləri (şəxsiyyət vəsiqəsi, imtahana buraxılış vərəqəsi) təqdim edildikdə etibarlıdır.

Diqqət! Bir imtahan iştirakçısını birdən artıq şəxs müşayiət edə bilməz.

5
Mirənvər İsmayılzadə

Stereotipləri qıraraq - böyük sözünə baxmamaq azərbaycanlı gəncin həyatını dəyişdi

933
Ötən il Tibb Universitetində təhsilini yarıda qoyub, bu il ali məktəbə qəbul olmaq üçün yenidən imtahanlara qatılan lənkəranlı gənc yüksək nəticə əldə etdi

Rahim Muradov, Sputnik Azərbaycan

BAKI, 12 avqust — Sputnik. O ötən il yüksək balla həkimlik ixtisasına daxil olur, 3-4 ay da Tibb Univeristetinin auditoriyasında oturur. Lakin bu müddətdə anlayır ki, valideynləri onu cərrah görmək istəsələr də, bu sahənin adamı deyil. Bu il ali məktəbə qəbul olmaq üçün yenidən imtahanlara qatılan Lənkəran rayonunun Digah kənd sakini Mirənvər İsmayılzadə birinci mərhələdə 300 bal toplamaqla respublikada yüksək nəticə əldə edib.

Mirnail İsmayılov oğlunun yüksək balla qəbul olunduğu Tibb Universitetini tərk etməsinin onları sevindirmədiyini Sputnik Azərbaycan-a müsahibəsində bildirdi: "Yəni bu, hər adamın başına gələn hadisə deyil. Hər bir valideyn öz övladının ya hüquqşünas, ya yüksək səviyyəli mütəxəssis, xüsusən də həkim olmasını arzu edir. Biz Mirənvəri cərrah kimi görmək istəyirdik. Sən demə, onun başqa bir fikri var imiş. Universiteti tərk etdikdən sonra bütün tənqidi fikirlərə dözdü. Lakin onun növbəti imtahanlarda daha yüksək nəticə əldə edəcəyini vəd verməsini də xatırlamıram. Açığı, belə bir nəticəni gözləmirdim və gecənin bir yarısı xəbəri biləndə yaxşı tərəfdən şok oldum. Bütün valideynlərə belə bir şok olmalarını arzu edirəm. Mirənvərə dərs deyən 10 saylı məktəbin müəllimləri ona qəbul olunmasında dəstək oldular və buna görə onlara, xüsusən də məktəbin direktoruna çox-çox minnətdaram".

© Sputnik / Rahim Muradov
Mirənvər İsmayılzadə atası Mirnail İsmayılovla birgə

Məlumat üçün bildirək ki, Mirənvər İsmayılzadə 2019-cu ildə Lənkəran şəhər 10 saylı tam orta məktəbini bitirdikdən sonra ali məktəblərə qəbul imtahanlarında 652 bal toplayaraq Tibb Universitetinə qəbul olunub. "Müalicə işi" fakültəsində 3-4 ay təhsil aldıqdan sonra öz ərizəsi ilə universitetdən xaric olunmasını istəyib.

Səbəbi isə Mirənvər belə izah edib: "Universitetdə bir müddət təhsil aldıqdan sonra həkimliyin istədiyim peşə olmadığını anladım. Ötən il öyrəndiklərim bu il mənim hazırlaşmağımda çox mühüm rol oynadı. Dərs ilinin əvvəllərində müəyyən qədər hazırlıq kurslarında məşğul oldum. Lakin ilin ikinci yarısında pandemiyaya görə hamı kimi mən də hazırlıqlarıma evdə davam etməli oldum.

Ötən il IV ixtisas qrupunu seçmişdim, bu il isə I ixtisas qrupunu seçdim. Qruplarda fənlər, demək olar, oxşar olduqları üçün hazırlaşdığım dövrlərdə elə də ciddi çətinliklərlə qarşılaşmadım. DİM-in təşkil etdiyi sınaq imtahanlarının, demək olar, hamısında iştirak etdiyim üçün qəbul imtahanlarında qəti həyəcanlanmadım. Abituriyentlərə məsləhətim odur ki, nəzəriyyəni oxuyub bitirdikdən sonra öz biliklərini testlərlə təkmilləşdirə bilərlər. Çünki mən 9-cu sinfə qədər nəzəriyyəni tam oxuyandan sonra X-XI siniflərdə yalnız testlərlə işləyirdim. Mən XI sinifdə oxuyanda, demək olar ki, nəzəriyyə oxumurdum, yalnız testlərlə işləyirdim".

"Qeyd edim ki, atamla anam ingilis dili fənni üzrə müəllimdirlər. Hər iki valideynimin mənim qəbul imtahanlarına hazırlaşmağımda böyük dəstəkləri olub və onlara böyük minnətdarlığımı bildirirəm. Bundan əlavə, bitirdiyim şəhər 10 saylı orta məktəbin direktoru Qadir Axundov müəllimə də dərin təşəkkürümü bildirirəm. Çünki Qadir müəllim imtahanlara hazırlıq prosesində mənə ciddi şəkildə dəstək verib. Mənim bir bacım var, o da dərslərini yaxşı oxuyur, lakin onun hazırlaşdığı ixtisas bloku mənimkindən fərqli olduğu üçün bacıma çox da köməklik göstərə bilmirəm", - Mirənvər əlavə edib.

Beləliklə, qəbul imtahanının birinci mərhələsində maksimum 300 bal toplayan M.İsmayılzadənin hədəfi Bakı Ali Neft Məktəbinin İnformasiya təhlükəsizliyi ixtisasına qəbul olmaqdır. Qeyd edək ki, Mirənvər İsmayılov ötən il Amerika Birləşmiş Ştatlarının univeristetlərinə qəbul imtahanlarında da yüksək nəticə göstərib. Lakin Azərbaycanın Tibb Universitetinə daxil olduğu üçün orada ixtisas seçimində iştirakdan imtina edib.

933
Əlaqədar
Yeni modelə keçidin başlanğıcı: Azərbaycanda pandemiya dövründə təhsil inqilabı
Abituriyentlərə ikinci şans verildi, amma topladıqları bal aşağı olacaq
Bəzi buraxılış imtahanları sentyabrda keçiriləcək – Mühüm yenilik
Mis məftilin üstündə qurulan təhsildən "qızıl" gələcəyi necə gözləyək?
Ekspert: “Pandemiya xaricdə təhsil alanların sayına təsir edib”
COVID-19 infeksiyasına yoluxmuş şəxs təcili yardım avtomobilinə yerləşdirilir

COVID-19 xəstələri həbs edildilər: başqalarını da yoluxdurmaq istəyirmişlər - FOTO

0
(Yenilənib 14:15 14.08.2020)
Xəbərdarlıq edərək bildiririk ki, bu qaydaları pozan və digərlərinin yoluxmasına şərait yaradan şəxslər qanunvericiliklə nəzərdə tutulan qaydada cinayət məsuliyyətinə cəlb olunacaqlar

BAKI, 14 avqust — Sputnik. COVID-19 infeksiyasına yoluxduğunu bilərək özünütəcrid qaydalarına riayət etməyən və ətrafdakı şəxslərə də bu virusun keçməsinə şərait yaradan şəxslər həbs ediliblər.

Sputnik Azərbaycan Daxili İşlər Nazirliyinin məlumatına istinadla xəbər verir ki, polis əməkdaşlarının sanitar-gigiyenik qaydalara riayət etməklə həyata keçirdikləri əməliyyat nəticəsində bu hərəkətlərə yol verən Salyan rayon sakinləri Anar Vəliyev, Məmməd Ağayev, onun oğlu Elvin Ağayev və Kürdəmir rayon sakini Gülöyşə Əhmədovanın olduqları yerlər müəyyən edilib və onlar tutulublar.

© AR Ministry of Internal Affairs
Saxlanılan şəxslər

Faktlarla bağlı saxlanılan şəxslər barəsində Cinayət Məcəlləsinin 139-1.1-ci (epidemiya əleyhinə rejimin, sanitariya-gigiyena və ya karantin rejimlərinin pozulması) maddəsi ilə cinayət işi başlanılıb. Saxlanılan şəxslərdən Anar Vəliyev və Elvin Ağayev barəsində məhkəmənin qərarı ilə həbs qətimkan tədbiri seçilib.

© AR Ministry of Internal Affairs
Saxlanılan şəxs Elvin Ağayev

Daxili İşlər Nazirliyi hazırda COVID-19 virusundan müəlicə alan və həkim nəzarətində olan şəxslərdən özünütəcrid qaydalarına ciddi əməl etmələrini tələb edir. Xəbərdarlıq edərək bildiririk ki, bu qaydaları pozan və digərlərinin yoluxmasına şərait yaradan şəxslər qanunvericiliklə nəzərdə tutulan qaydada cinayət məsuliyyətinə cəlb olunacaqlar.

0
Mövzu:
Azərbaycan karantində: nikbinlər, bədbinlər, xeyirxahlar və ixtiraçılar
Əlaqədar
Qaydanı ikinci dəfə pozan COVID xəstəsini bu dəfə evə buraxmadılar
Əvvəllər yeyib-içənləri tuturdular, indi onun şəklini paylaşanları
Bu dəfə restoranın adı da kömək eləmədi, tapdılar, cərimələdilər
Xəstə şəxs Bakını tərk etmək istəyəndə saxlanıldı
İcazəsiz Qusara istirahətə gələn 18 nəfər cərimələnib