Həkimlər

Azərbaycanda uzunömürlülüyün sirləri araşdırılır

50
(Yenilənib 15:59 24.07.2015)
Tibb Universitetindən Sputnik-ə verilən mnəlumatda bildirlir ki, Ukrayna Elmlər Akademiyasının Gerontologiya İnstitutunun direktoru akademik Vladislav Bezrukov və akademiyanın müxbir üzvü Svetlana Kuznetsova ATU-nun rəhbərliyi ilə görüşüblər.

BAKI, 24 iyul — Sputnik. Xarici ölkələrin akademikləri Azərbaycanda uzun ömürlülüyün sirlərini araşdırırlar. Bu məqsədlə ukraynalı alimlər Azərbaycan Tibb Universitetində (ATU) olublar.

Tibb Universitetindən Sputnik-ə verilən mnəlumatda bildirlir ki, Ukrayna Elmlər Akademiyasının Gerontologiya İnstitutunun direktoru akademik Vladislav Bezrukov və akademiyanın müxbir üzvü Svetlana Kuznetsova ATU-nun rəhbərliyi ilə görüşüblər. 

Görüş zamanı qeyd olundu ki, Ukrayna Elmlər Akademiyasının Gerontologiya İnstitutu Azərbaycan Elmlər Akademiyası və Tibb Universiteti ilə birlikdə “Uzunömürlülüyün molekulyar genetik əsaslarının öyrənilməsi” layihəsini icra edir. İki il davam edəcək layihənin əsas məqsədi Azərbaycanda yaşayan uzun ömürlü insanların tibbi göstəricilərinin araşdırılması, biomarkerlərinin tədqiqindən ibarətdir. Bu məqsədlə qonaqlar Azərbaycanın müxtəlif bölgələrinə səfər edərək yaşlı insanlarla görüşlər keçirirlər. 

ATU-nun rektoru, akademik Ə. Əmiraslanov layihənin tibb elmi üçün böyük əhəmiyyət daşıdığını, bu səbəbdənTibb Universiteti əməkdaşlarının da həmin elmi tədqiqatlara qatıldığını bildirdi. Rektor qeyd etdi ki, Azərbaycanın bölgələrində aparılan araşdırmalarda ATU-nun nevropatoloqları, kardioloq və terapevtləri, digər mütəxəssisləri də ukraynalı həmkarları ilə yanaşı iştirak edirlər. 

Layihənin Azərbaycan və Ukrayna arasında tibb elmləri, təhsil və səhiyyə sahəsindəki əlaqələrin inkişafına fayda verəcəyini qeyd edən Ə.Əmiraslanov görüş zamanı Tibb Universiteti haqqında qısa məlumatı da qonaqların diqqətinə çatdırdı. Azərbaycanda tibb və əczaçılıq təhsili verən yeganə müəssisə olan ATU-nun professor-müəllim heyəti, tələbələri, uğur və nailiyyətləri haqqında söz salan akademik Ə.Əmiraslanov həmçinin qeyd etdi ki, hazırda universitet nəzdində dörd klinika fəaliyyət göstərir. Bu klinikaların yaradılması ATU-da təhsil və təcrübənin bir araya gətirilməsi, tədrisin keyfiyyətinin yüksəldilməsi, həmçinin vətəndaşlara yüksək ixtisaslı tibbi yardım səviyyəsinin yaxşılaşdırılmasına xidmət edir. 

Rektor Əhliman Əmiraslanov gələcəkdə Ukrayna Elmlər Akademiyasının Gerontologiya İnstitutu ilə birgə beynəlxalq konfransın təşkili, qarşılıqlı mütəxəssis mübadiləsinin həyata keçirilməsi üçün müqavilə hazırlanmasını da məqbul saydı.

Öz növbəsində, ukraynalı akademiklər V.Bezrukov və S.Kuznetsova da belə bir sazişin imzalanmasını vacib saydıqlarını bildirdilər. Onların fikrincə, qarşılıqlı əməkdaşlıq sazişi iki ölkə arasında münasibətlərin genişlənməsinə, elmi təmasların artırılmasına, ikitərəfli layihələrinçoxalmasına təkan vermiş olacaq. Həmçinin, belə təşəbbüslər iki dost ölkə arasında elmi münasibətlərin daha da dərinləşməsinə gətirib çıxaracaq. 

50
Teqlər:
ATU-nun rektoru, uzun ömürlülüyün sirri, uzun ömürlülüyün sirləri, Ukrayna Elmlər Akademiyası, ATU, Azərbaycan Tibb Universiteti, Əhliman Əmiraslanov, Svetlana Kuznetsova, Vladislav Bezrukov, Azərbaycan
 Pandemiya zamanı imtahan

Bu gün buraxılış imtahanı keçirilir

28
Ehtiyat tədbirləri çərçivəsində imtahan binasına daxil olan iştirakçıların məsafədən ölçə bilən elektron termometrlə bədən hərarətləri yoxlanılacaq, zəruri dezinfeksiyaedici vasitələrdən istifadə olunacaq

BAKI, 15 aprel — Sputnik. Dövlət İmtahan Mərkəzi tərəfindən bu gün tam (11 illik) orta təhsil səviyyəsi üzrə buraxılış imtahanı keçirilir.

DİM-dən Sputnik Azərbaycan-a verilən məlumata görə, imtahanlar saat 11:00-da başlayıb. Buraxılış imtahanında iştirak üçün 8124 şagird qeydiyyata alınıb. Bu gün tam orta təhsil səviyyəsi üzrə buraxılış imtahanı keçirilən şəhər və rayonlar bunlardır: Gəncə şəhərinin Kəpəz rayonu, Ağdam, Hacıqabul, İsmayıllı, Qax, Qazax, Siyəzən, Tərtər, Xızı rayonları, Lənkəran və Şirvan şəhərləri.

Kütləviliyin və təmas hallarının qarşısının alınması məqsədilə imtahan iştirakçıları üçün imtahan binasına müxtəlif daxilolma vaxtları müəyyən edilib və imtahan iştirakçısının buraxılış vərəqəsində həmin vaxt göstərilib. Ona görə də imtahan binasına buraxılış vərəqəsində qeyd olunan vaxtda gəlmək tövsiyə olunub.

"İştirakçılar imtahana tibbi maska ilə gəlməli və onlardan düzgün (burun, ağız və çənə nahiyəsini tam örtməklə) istifadə etməlidirlər. Maskanı çıxarmaq qadağandır və bütün proses (buraxılış rejimi, imtahan müddəti, imtahan binasının tərk edilməsi) boyu istifadə olunmalıdır", - DİM bildirib.

Ehtiyat tədbirləri çərçivəsində imtahan binasına daxil olan iştirakçıların məsafədən ölçə bilən elektron termometrlə bədən hərarətləri yoxlanılıb, zəruri dezinfeksiyaedici vasitələrdən istifadə olunub. İmtahana bədən hərarəti 37°C-dən aşağı olan şəxslər buraxılıb.

Xatırladaq ki, aprelin 15-16-da keçiriləcək imtahan üçün şəhər və rayonlarda ümumilikdə 115 bina və 2001 zal ayrılıb. İmtahanların idarə olunmasına 115 ümumi imtahan rəhbəri, 334 imtahan rəhbəri, 2490 nəzarətçi-müəllim, 230 buraxılışı rejimi əməkdaşı (mühafizə), 115 bina nümayəndəsi ayrılıb.

28

Xaricdə təhsil alanların diplomları niyə tanınmır ekspert açıqlayır

51
(Yenilənib 01:15 15.04.2021)
Təhsil eksperti Kamran Əsədov deyir ki, övladlarının xaricdə təhsil almasını istəyən valideynlər ilk növbədə bu sahənin mütəxəssislərinə müraciət etməlidirlər.
Kamran Əsədov: “Diplomların tanınması üçün müəyyənləşdirilmiş qaydalar var”

Bu ilin I rübü ərzində Azərbaycanda diplomların tanınması üzrə müraciətlərin statistikası açıqlanıb. Ötən dövr ərzində Təhsildə Keyfiyyət Təminatı Agentliyinə 678 müraciət daxil olub.

Təhsil eksperti Kamran Əsədov Sputnik Azərbaycan-a deyir ki, xaricdə təhsil mərkəzləri bir çox hallarda öz kommersiya maraqlarına görə müraciət edənlərin taleyi ilə oynayırlar: “Belə mərkəzlər diplomu tanınmayan, lisenziyasız fəaliyyət göstərən universitetlərə qəbul aparırlar. Azərbaycan tərəfindən diplomların tanınması üçün müəyyənləşdirilmiş qaydalar var. Diplomların tanınmasına səbəb təhsilalanların mövcud parametrlərə uyğun gəlməməsidir. Övladlarının xaricdə təhsil almasını istəyən valideynlər ilk növbədə  bu sahənin mütəxəssislərinə müraciət etməlidirlər. Təəssüf ki, bu işlərlə məşğul olduğunu iddia edən şirkətlər hər il bir ad altında fəaliyyət göstərirlər”.

Kamran Əsədovun geniş şərhinə audiofaylda qulaq asa bilərsiniz

51
Teqlər:
xarici ölkə, Azərbaycan, tanınma, diplom, ali təhsil
İstanbula mənzərə, arxiv şəkli

Türkiyə ilə sərbəst ticarət Azərbaycana vəd edir?

0
(Yenilənib 22:47 18.04.2021)
İqtisadçılar Azərbaycan ilə Türkiyə arasında sərbəst ticarət anlaşmasının olması məsələsinə fərqli yanaşıblar.

Xalid Məmmədov, Sputnik Azərbaycan

BAKI, 18 aprel — Sputnik. Türkiyənin ticarət naziri Ruhsar Pekcan Azərbaycan ilə Türkiyə arasındakı preferensial ticarət sazişi üzrə məhsul siyahısının məhdud olduğunu, iki ölkəyə sərbəst ticarət anlaşmasının uyğun olduğunu söyləyib.

Sputnik Azərbaycan Anadolu agentliyinə istinadla xəbər verir ki, Ruhsar Pekcan deyib: "Hazırda preferensial ticarət sazişi üzrə 150 çeşid məhsul siyahısı üzərində işləyirik. Lakin vahid bazar prinsipləri əsasında Azərbaycan və Türkiyəyə sərbəst ticarət müqaviləsi uyğundur. Hədəfimiz sərbəst ticarət anlaşması olmalı və bu istiqamətdə işlərə başlamalıyıq". 

Ekspertlər Azərbaycan ilə Türkiyə arasında sərbəst ticarət anlaşmasının mümkünlüyü məsələsinə münasibət bildiriblər.

İqtisadçı-ekspert Rəşad Həsənov Sputnik Azərbaycan-a deyib ki, iki ölkə arasında sərbəst ticarət anlaşması olsa, bu, bizim üçün müəyyən üstünlüklər yarada bilər:

"Çünki Azərbaycanın Türkiyəyə ixracı daha çoxdur, nəinki Türkiyədən idxalı. Sərbəst ticarət anlaşması Azərbaycana Türkiyədən idxal edilən məhsulların çeşidinin, bazar iştirakçılarının sayının artmasına, xərclərin azalmasına, məhsulların daha ucuz qiymətə təklif edilməsinə, əhalinin alıcılıq qabiliyyətinin güclənməsinə gətirib çıxarda bilər. Digər tərəfdən, Türkiyə bazarında daha aşağı qiymətə təklif edilməklə Azərbaycan məhsulları üçün rəqabətli üstünlük imkanı yaradır. Bu, bazarın genişləndirilməsi üçün çox vacib amillərdən biridir. Çünki preferensial ticarət sazişində təxminən 10-12 adda azəhəmiyyətli məhsul növləri üzrə güzəştlər nəzərdə tutulub, yəni məhduddur".

"Burada eyni zamanda limit məsələsi də var. Məsələn, preferensial ticarət sazişinə görə, Azərbaycandan Türkiyəyə il ərzində 100 min litr həcmində spirtli içkinin güzəştli idxalı mümkündür. İdxal bundan artıq olarsa, güzəştlər tətbiq edilmir. Bu baxımdan sərbəst ticarət anlaşması tərəflər üçün əlverişli imkanlar yarada bilər", - deyə o qeyd edib.

İqtisadçı bildirib ki, sərbəst ticarət dedikdə, məhsulların limitsiz idxalı, hər hansı bir dempinq, antidempinq alətlərindən istifdə edilməməsi, rüsum və vergi güzəştlərinin verilməsi nəzərdə tutulur: "Lakin hər bir sərbəst ticarət sazişinin öz şərtləri var. Yəni tərəflər arasında sərbəst ticarət sazişinin şərtləri müəyyən edilir və bu şərtlər çərçivəsində ticarət münasibətləri qurulur. Məhsulların idxalında məhdudiyyət tətbiq edilmir və s. Sərbəst ticarətin qısa müddətli dövrdə yerli istehsala mənfi təsiri olsa da, orta və uzun müddətli dövrdə yerli istehsalın rəqabətliliyinin artmasına, daha keyfiyyətli məhsul istehsalına və dolayısı ilə ixrac bazarlarının şaxələndirilməsinə imkanlar yaradacaq".

Azərbaycan Dövlət İqtisad Universitetinin (UNEC) professoru Elşad Məmmədov isə Sputnik Azərbaycan-a deyib ki, Azərbaycan üçün Türkiyə ilə iqtisadi əlaqələrin, ticarət münasibətlərinin liberallaşdırılması sərfəli deyil:

"Əgər tam şəkildə liberallaşdırma olarsa, bu, Azərbaycanın yerli real sektorunun rəqabət qabiliyyətliliyinə mənfi təsir göstərəcək. Türkiyənin kənd təsərrüfatı sektorunun inkişaf göstəricilərinə, onun texnoloji tutumuna baxdıqda ticarətin liberallaşması Azərbaycan bazarında Türkiyə məhsullarının rəqabət üstünlüklərinə gətirib çıxardacaq. Digər tərəfdən, bu gün Türkiyə lirəsi ən dəyişkən valyutalardan biridir. Türkiyə istehsalçıları lirənin zəifləməsindən istifadə edərək rahatlıqla Azərbaycanın daxili bazarında, o cümlədən istehlak bazarında Azərbaycan istehsalçıları ilə rəqabətdə tam üstünlük əldə edəcək. Bu isə ölkəmizin qeyri-neft, o cümlədən qeyri-xammal sektoruna olduqca ciddi zərbə ola bilər".

"Türkiyə ilə ticarətin liberallaşması Azərbaycan iqtisadiyyatı üçün olduqca çətin olacaq. Bu gün biz ilk növbədə idxaldan asılılığın azalmasına, daxili bazarın yerli məhsullarla təmin edilməsinə nail olmalıyıq. Biz daxili bazarın qorunmasına yönəlməliyik. İki ölkə arasında liberal ticarət türkiyəli istehsalçıların maraqlarına cavab verəcək və Azərbaycan istehsalçılarının rəqabət imkanları azalmış olacaq", - deyə professor əlavə edib.

0