Moskvanın Nikolskaya küçəsi

Sanksiyalar ittifaq dövlətinin yaradılması istiqamətində addımları fəallaşdırıb

17
(Yenilənib 19:31 14.07.2021)
Rusiya-Belarus ittifaq dövlətinin yaradılması barədə müqavilə 1999-cu il dekabrın 8-də Moskvada imzalanıb, 2019-cu ilin dekabrında - sənədin 20 illiyində isə inteqrasiyanın dərinləşdirilməsi barədə proqramın qəbul edilməsi nəzərdə tutulurdu.

BAKI, 14 iyul — Sputnik. Qərbin sanksiyaları, habelə ötən ilin avqustunda keçirilən prezident seçkilərindən sonrakı hadisələr Rusiya-Belarus ittifaq dövlətinin yaradılması istiqamətində addımları fəallaşdırıb. Belə açıqlama ilə Belarus dövlət universitetinin fəlsəfə və sosial elmlər fakültəsinin dekanı Vadim Qiqin çıxış edib.

"Düşünürəm ki, əgər biz sanksiyalardan və Belarusda baş verən siyasi böhranın ittifaq dövlətinin yaradılmasına təsirindən danışırıqsa, bunların çox güclü təkan rolu oynadığını deyə bilərik. Belarus ətrafında baş verən siyasi böhran ittifaqın yaradılması işini bir qədər tərpətdi, bir çox prosesləri fəallaşdırdı, təkcə iqtisadiyyatdan deyil, həmçinin birgə çağırış və təhlükələrdən, təhlükəsizlik problemlərindən, ümumi ideologiyadan danışmağa vadar etdi", - deyə ekspert "İttifaq dövləti çərçivəsində iş: nəticələr və perspektivlər" mövzusunda Moskva-Minsk video-körpüsü zamanı bildirib.

Onun sözlərinə görə, "Belarusdakı böhrana cəlb olunmuş və hazırda sanksiyalar tətbiq edən qüvvələrin qarşısında duran vəzifələrdən biri elə həmin ittifaq dövlətinin dağıdılması idi".

"Biz başa düşməliyik ki, xarici oyunçuların bu mərhələdə əsas məqsədləri Rusiya ilə Belarusu bir-birindən ayırmaq idi. Həm də bu, avqustun 9-da başlanan çoxpilləli, mürəkkəb bir oyun idi. Oyun bundan əvvəl başlamışdı. Rusiya-Belarus əlaqələrinin zəifləməsi, ittifaqın qurulması işinin pozulması Belarusda formalaşmış siyasi sistemin dağıdılması üçün vacib ön şərtlərdən biri idi", - deyə siyasətçi bildirib.

O hesab edir ki, "Belarusda alternativ komandanın hakimiyyətə gələcəyi təqdirdə biz heç bir ittifaq dövlətindən danışmayacaqdıq, son illər inteqrasiya istiqamətində əldə olunmuş nailiyyətlərin demontajından danışacaqdıq".

Qiqin hesab edir ki, Qərbin həm Rusiya, həm də Belarus üzərinə sanksiyalarla təzyiqinin güclənəcəyini nəzərdə tutmaq lazım gəlir.

"Özü də Qərb siyasətçilərinin hesabat, plan və bəyanatlarında İttifaq dövləti bir subyekt kimi məhz bu böhran şəraitində aşkara çıxmağa başlamışdı. Həmin vaxta qədər onlar ümumiyyətlə ittifaq dövlətinin olmasını görmək istəmirdilər", - deyə ekspert bildirib.

Rusiya-Belarus ittifaq dövlətinin yaradılması barədə müqavilə 1999-cu il dekabrın 8-də Moskvada imzalanıb, 2019-cu ilin dekabrında - sənədin 20 illiyində isə inteqrasiyanın dərinləşdirilməsi barədə proqramın qəbul edilməsi nəzərdə tutulurdu. Təkliflərin hazırlanması üçün işçi qrup yaradılmışdı, ümumilikdə tərəflər 30-a qədər müxtəlif sahələrə dair yol xəritələri layihələrini işləyib hazırlamışdılar. Lakin tərəflər həmin proqramı hələ də qəbul etməyiblər.

2020-ci ilin avqustun 9-da keçirilmiş və Lukaşenkonun 80,1% səs toplayaraq altıncı dəfə qalib olduğu seçkilərdən sonra müxalifətin kütləvi etiraz aksiyaları başladı ki, onların da qarşısını almaq üçün güc strukturları həmçinin xüsusi vasitələr və texnikadan istifadə ediblər. Belarus DTK-sı fevralın 11-də ölkədə vəziyyətin sabitləşdiyini bildirib, etirazlar demək olar ki, olmayıb. Belarusda bir sıra müxalifət liderlərinə qarşı cinayət işləri, o cümlədən hakimiyyəti ələ keçirməyə çağırış, ekstremist təşkilatın yaradılması, hakimiyyəti qanunsuz yolla ələ keçirmək üçün əlbir olma, terror aktının həyata keçirilməsinə bağlı işlər qaldırılıb.

Aprelin 17-də Lukaşenko ona və ailə üzvlərinə qarşı sui-qəsd hazırlayan şəxslərdən ibarət qrupun saxlandığını bildirib. Prezidentin məlumatına görə, bu işdə ABŞ xüsusi xidmət orqanlarının əli var.

17
Azərbaycan və Türkiyə hərbçiləri Karsda QIŞ-21 təlim zamanı

Peskov Azərbaycan Türkiyənin müştərək ordu yaratması barədə söhbətlər haqqında

20
Rusiya prezidentinin mətbuat katibi deyib ki, Türkiyə və ya Azərbaycan prezidentlərinin bu barədə hər hansı fikri məlum deyil.

BAKI, 29 iyul — Sputnik. Kreml ümid edir ki, Azərbaycan və Türkiyə arasında münasibətlərin inkişafı bölgədə sabitliyə zərər vurmayacaq. Sputnik Azərbaycan Rusiya mediasına istinadən xəbər verir ki, bunu Rusiya prezidentinin mətbuat katibi Dmitri Peskov deyib.

Bir müddət əvvəl Türkiyə parlamentinin rəhbəri Mustafa Şəntop bildirib ki, Türkiyə ilə Azərbaycan müştərək türk ordusu yaratmaq barədə danışıqlar aparırlar.

Belə bir layihəyə Kremlin münasibəti və həmin layihənin Rusiya və onun müttəfiqləri üçün potensial təhlükə olub-olmayacağı barədə suala cavabında Peskov bildirib: "Təbii ki, Azərbaycan və Türkiyə ikitərəfli münasibətləri inkişaf etdirirlər. Bu yenə də, onların suveren işləridir. Vacib olan odur ki, bu, bölgədə sabitlik ab-havasına və hadisələrin proqnozlaşdırıla bilən olmasına zərər vurmasın. Bununla bağlı bizim həm türkiyəli, həm də azərbaycanlı tərəfdaşlarla mütəmadi əlaqələrimiz var".

Rusiya prezidentinin mətbuat katibi onu da deyib ki, bu ölkələrin icra hakimiyyətlərinin – Türkiyə və ya Azərbaycan prezidentlərinin bu barədə hər hansı fikirləri məlum deyil.

Həmçinin oxuyun:

* Moskva Azərbaycanın NATO təlimlərinə qatılmasına münasibət bildirdi

* Kreml Paşinyanın sərhədə Rusiya hərbçilərini yerləşdirmək təklifinə reaksiya verdi

20
Agile Spirit 2021 təlimi

Moskva Azərbaycanın NATO təlimlərinə qatılmasına münasibət bildirdi

747
(Yenilənib 18:44 29.07.2021)
Putinin sözçüsü deyib ki, onlar üçün vacib olan bu cür təlimlərin ssenarilərinin Rusiyaya münasibətdə hansısa pərdələnmiş hərəkətləri nəzərdə tutmamasıdır.

BAKI, 29 iyul — Sputnik. Kremldə hesab edirlər ki, NATO-nun Gürcüstandakı təlimləri diqqətlə izlənilməli olan mövzudur. Belə bir açıqlama ilə Rusiya prezidentinin mətbuat katibi Dmitri Peskov çıxış edib.

"Bu, bir daha sübut edir ki, NATO özünün hərbi infrastrukturu ilə bizim sərhədlərimiz ətrafındadır, özü də təkcə sərhədlər ətrafında deyil, bilavasitə sərhədlərimizdədir. Bu, əlbəttə, bizim tərəfimizdən diqqətlə izlənməli mövzudur", - deyə Peskov bildirib.

"NATO-nun Rusiya sərhədlərinə yaxınlaşması onu özünün təhlükəsizliyinin təmin olunması üçün tədbirlər görməyə vadar edir", - deyə o vurğulayıb.

"Bu barədə həm prezident, həm müdafiə naziri, həm də nümayəndələrimiz ən yüksək səviyyələrdə danışıblar", - deyə Peskov əlavə edib.

Prezidentin mətbuat katibi onu da deyib ki, Kreml NATO təlimlərinin ssenarisinin Rusiya əleyhinə pərdələnmiş hərəkətlər anlamana gəlməməsinin vacib olduğunu hesab edir.

Çərşənbə axşamı Gürcüstanda 15 ölkədən, o cümlədən Azərbaycandan olan 2,5 min hərbi qulluqçunun iştirakı ilə NATO-nun çoxmillətli Agile Spirit təlimləri başlanıb.

"Azərbaycan suveren dövlətdir, biz Azərbaycanla münasibətlərimizə dəyər veririk. Bu, tərəfdaş münasibətlərdir, münasibətlərin gələcək də inkişaf etdirilməsi üçün siyasi iradə var. Əlbəttə, bizim üçün vacibdir ki, bu cür təlimlərin ssenariləri bizim ölkəmizə münasibətdə... hansısa pərdələnmiş hərəkətləri nəzərdə tutmasın", - deyə Peskov Azərbaycanın bu təlimlərində iştirakına Kremlin münasibəti barədə suala cavab olaraq bildirib.

O, əlavə edib ki, "təlimlərin ssenariləri NATO-da, Alyansda tərtib olunur. Alyans isə əsas rəqib qismində kimi gördüyünü gizlətmir".

11:20

Müdafiə Nazirliyi NATO-nun Gürcüstandakı təlimlərinə qatılan hərbiçilərin sayını açıqladı

Azərbaycandan Gürcüstanda NATO-nun təlimlərində iştirak edəcək hərbiçilərin sayı bəlli olub.

Bu barədə Sputnik Azərbaycan-a Müdafiə Nazirliyinin mətbuat xidmətinin rəhbəri, polkovnik Vaqif Dərgahlı məlumat verib. Onun sözlərinə görə, NATO-nun Gürcüstanda keçirdiyi hərbi təlimlərdə Azərbaycandan iki nəfər hərbiçi müşahidəçi qismində iştirak edəcək.

Dərgahlı Azərbaycan tərəfindən təlimlərə qatılan hərbiçilərin sayının belə az olmasını qabaqcadan nəzərdə tutulan planla izah edib. 

Qeyd edək ki, Gürcüstanda ABŞ-la birgə "Agile Spirit 2021" ("Çevik ruh") çoxmillətli hərbi təlimlər bu gündən start götürüb. İyulun 26-da başlanan təlimlər avqustun 6-dək davam edəcək.

ABŞ ordusunun Mətbuat xidmətinin məlumatına əsasən, hərbi manevrlərdə 15 müttəfiq və tərəfdaş ölkə - Gürcüstan, Estoniya, Almaniya, Latviya, Litva, Polşa, Rumıniya, İspaniya, Türkiyə, Ukrayna, Böyük Britaniya, ABŞ, Kanada, İtaliya və Azərbaycandan 2500-ə yaxın hərbi heyət iştirak edir.

Təlimlərin keçirilməsində məqsəd ABŞ, Gürcüstan, müttəfiqlər və regional tərəfdaşların hərbi qüvvələrinin hazırlığının və qarşılıqlı fəaliyyət səviyyəsinin yüksəldilməsidir.

"Agile Spirit 2021" təlimləri komanda-qərargah, çöl şəraitində keçiriləcək və batalyonlar səviyyəsində atış tapşırıqları icra olunacaq. Təlimlərdə iştirak edəcək ABŞ texnikası artıq Gürcüstandadır.

Məlumat üçün bildirək ki, "Agile Spirit" hərbi təlimləri Gürcüstanda 2011-ci ildən etibarən ABŞ və NATO ilə əməkdaşlıq çərçivəsində hər il keçirilir.

Həmçinin oxuyun:

* Gürcüstanda Agile Spirit 2021 təlimləri: hədəflər və vasitələr

* Zakir Həsənov NATO-nun Quru Qoşunları Komandanlığının Qərargah rəisi ilə görüşüb

* Rusiyanın Xəzər, Baltik və Şimal donanmalarının gəmiləri Qara dənizə nə üçün göndərilib

* Pentaqonun Defender Europe manevrləri və NATO-nun Baltops təlimləri – kimə qarşı?

747
Bakıda vəziyyət, arxiv şəkli

Avtomobillərin arxa şüşəsinə şüarların vurulması qanunsuzdur

0
(Yenilənib 20:03 29.07.2021)
Avtomobillər arxa şüşələrinə şüarların yazılması, fotoların vurulması digər sürücülərin diqqətini yayındıra bilər

BAKI, 29 iyul — Sputnik. Baş Dövlət Yol Polisi İdarəsi (BDYPİ) nəqliyyat vasitələrinin arxa şüşələrinə müxtəlif məzmunlu şüarların yazılması ilə bağlı məlumat yayıb. Sputnik Azərbaycan-a bu barədə BDYPİ-dən məlumat daxil olub.

Məlumatda qeyd edilir ki, son vaxtlar avtomobil yollarında bəzi sürücülərin digər yol hərəkəti iştirakçılarının diqqətini cəlb etmək və ya nəyisə reklam etmək məqsədilə nəqliyyat vasitələrinin arxa şüşələrinə müxtəlif məzmunlu şüarlar yazmaları yaxud fotolar vurma halları müşahidə olunur. Bu isə bəzən etik normalara zidd olmaqla bərabər yol-nəqliyyat hadisələrinin baş verməsinə də səbəb olan amillərdəndir: "Belə ki, nəqliyyat vasitələrinin arxa şüşələrində əks etdirilən bu cür faktlar avtomobillərin estetik görünüşünə xələl gətirmək, insanlar arasında pis fikirlər formalaşdırmaqla yanaşı, hərəkətdə olan avtomobil sürücülərinin istər-istəməz marağını kəsb edir, fotolara baxmağa, yazılanları oxumağa çalışırlar ki, bu səbəbdən diqqətləri yoldan yayınır və nəticədə qarşıdakı nəqliyyat vasitəsinə, piyadaya və ya hər hansı maneəyə toxunaraq qəza törədirlər".

Baş Dövlət Yol Polisi İdarəsi bu kimi halların qarşısının alınması məqsədilə avtomobil sahiblərinə və sürücülərə müraciət edərək nəqliyyat vasitələrində əgər bu cür yazılar, fotolar varsa, onların çıxarılmasını xahiş edir və bildirilir ki, belə nəqliyyat vasitələri dayandırılaraq müvafiq tədbirlər görüləcəkdir.

Qeyd edək ki, bir neçə gün öncə də, avtomobilin arxa şüşəsinə yazı yazan daha bir sürücü saxlanılıb. “Facebook” sosial şəbəkəsində yayılan görüntülərdən sonra Baş Dövlət Yol Polisi İdarəsi tərəfindən həmin sürücünün saxlanılması barədə Ekoloji nəzarət bölüyünə tapşırıq verilib. Avtomobil saxlanılan zaman məlum olub ki, sürücü konstruksiyaya ciddi dəyişiklik edib.

İdarənin şöbə rəisi polis polkovnik-leytenantı Namidan Piriyev Avtosfer.az-a açıqlamasında bildirib ki, 90-PY-043 qeydiyyat nişanlı “Khazar” markalı  avtomobilin sürücüsü  Əlizadə İlahi Qəhrəman oğlu saxlanılan zaman avtomobilə baxış keçirilib. Məlum olub ki, sürücü avtomobilin asqı sisteminə ciddi dəyişiklik edərək arxasını aşağı salıb, eyni zamanda sürücünün görünüş dairəsinə düşən şüşələrə plyonka çəkib. Polis əməkdaşlarının qanuni tələbinə qəsdən tabe olmadığına görə sürücü barəsində İnzibati Xətalar Məcəlləsinin 342.2.3, 342.2.4 və 535-ci maddələri ilə protokol tərtib edilərək barəsində toplanmış materiallar Binəqədi rayon Məhkəməsinə göndərilib.

Şəxs Binəqədi rayon Məhkəməsinin qərarı ilə Əlizadə İlahi Qəhrəman oğlu 15 gün müddətinə inzibati qaydada həbs olunub.

0