Moskvada miqrantlar, arxiv şəkli

Deportasiyanın bir addımlığında: Rusiya qeyri-leqal miqrantlar problemini necə həll edir?

27
(Yenilənib 10:14 28.05.2021)
İyunun ortalarında Rusiya ərazisində qalmasını qanuniləşdirməmiş əcnəbilərin ölkədən çıxarılmasına qoyulmuş moratoriumun müddəti başa çatır. Bəs Mərkəzi Asiya ölkələrindən olan miqrantlar lazımi sənədlərin hazırlanmasında hansı çətinliklərlə qarşılaşırlar?

BAKI, 28 may — Sputnik, Danara Kurmanova, Nikita Çikunov. Miqrantlar üçün "koronavirus amnistiyasının" vaxtı artıq bitmək üzrədir. Rusiya hökuməti xatırladır: Rusiya federasiyası ərazisində qeyri-qanuni yaşayan MDB ölkələri vətəndaşları pandemiya ilə bağlı olaraq ölkədən çıxarılmaya qoyulmuş moratorium çərçivəsində iyunun 15-nə qədər burada olmalarını qanuniləşdirməlidirlər. Əks halda, onlar deportasiya olunacaqlar.

Sputnik-in müxbirləri qanunsuz miqrantların hüquq-mühafizə orqanlarına nə dərəcədə fəal müraciət etmələrini və sənədləri təqdim edərkən hansı çətinliklərlə qarşılaşdıqlarını araşdırıblar.

Heç kim qanunu pozmaq istəmir

Daxili İşlər Nazirliyinin (DİN) məlumatlarına görə, əgər pandemiyadan əvvəl Rusiyada 11 milyon miqrant var idisə, 2020-ci ilin sonuna qədər onların sayı 6 milyon nəfərə düşüb. Lakin heç də hamının ölkədə müvəqqəti yaşamaq üçün icazəsi və bunu təsdiq edən sənədi olmayıb. DİN-in statistik məlumatlarına görə, əmək fəaliyyəti üçün patenti (Rusiya ərazisinə daxil olmaq üçün viza tələb olunmayan şəxslər üçün sənəd) 1,3 milyon əcnəbi əldə edib. 85 min nəfər isə iş icazəsi alıb (Rusiyanın viza rejimi qüvvədə olan ölkələrin vətəndaşları üçün). Daha 508 min miqrant isə Avrasiya İqtisadi Əməkdaşlıq (AİƏ) təşkilatına üzv olan ölkələrin vətəndaşları olub ki, onlar da Rusiyada bu səbəbdən əmək və ya mülki-hüquqi müqavilələr əsasında olublar.

Yerdə qalan 4 milyon nəfərdən çox insan isə DİN-də qeydiyyatda deyil. Lakin onların da heç də hamısı qanunsuz miqrant deyil – statistik məlumatların toplanması zamanı yaşamaq icazəsini və hər hansı digər sənədləri rəsmiləşdirməklə məşğul olduqları üçün onlar hesabata daxil edilməyib. Buna baxmayaraq, qanunsuz miqrantların sayı yenə də kifayət qədər böyükdür. Məsələn, cari ilin aprel ayının məlumatlarına görə, təqribən 200 min Özbəkistan vətəndaşı Rusiyada qanunsuz olaraq yaşayıb.

Rusiyanın miqrasiya qurumları və Beynəlxalq Miqrasiya Xidməti (BMX) iyunun 15-nə qədər rəqəmlərin minimuma enəcəyinə ümid edir. BMX-nin Moskva bürosunun direktoru Abdusattor Esoyev hesab edir ki, Rusiya prezidentinin əcnəbilərin ölkədə yaşaması şərtləri və qaydalarına dair moratoriumun tətbiqi barədə fərmanı bir çox miqrantları vəziyyətdən çıxarıb.

"Bu fərman olmasaydı, insanlar qeyri-leqal vəziyyətə düşəcəkdilər. Heç kim qanunu pozmaq istəmir. İnsanları qeyri-leqal miqrant olmağa vadar edən şəraitdir", - deyə o mayın 26-da "Rossiya Seqodnya" beynəlxalq multimedia mətbuat mərkəzində keçirilən "Rusiya və müasir dövrün miqrasiya çağırışları" adlı konfransda bildirib.

Tərcümə çətinlikləri

Rusiya DİN Miqrasiya Baş İdarəsinin rəis müavini Dmitri Demidonkonun sözlərinə görə, moratoriumun tətbiqinə rəğmən miqrantlar yenə də ən son anda uçota durur.

"Miqrantların böyük əksəriyyəti iri şəhərlərdə yaşayırlar və hazırda Moskva, Moskvayanı və Sankt-Peterburq əcnəbilərin kütləvi şəkildə miqrasiya xidmətlərinə axını ilə qarşılaşır, - deyə o, Sputnik-ə müsahibəsində bildirib.

"Çünki iyunun 15-i yaxınlaşır, bizdə isə, həmişə olduğu kimi, insanlar fərman çıxandan il yarım ərzində öz məsələlərini həll etməyə çalışmırdılar. İndi isə müraciətlərin sayı dəfələrlə artıb. Lakin biz bu gərginliyin öhdəsindən gəlməyə çalışırıq. Bu, o qədər də çətinlik yaratmır. Əsas axın səhər saatlarında olur, nahardan sonra isə daha heç kim olmur. Burada, düşünürəm ki, izahat işinə ehtiyac var", - deyə Demidenko bildirib.

BMX-də DİN nümayəndəsinin fikri ilə razılaşırlar.

Esoyevin sözlərinə görə, qeyri-leqal statusuna əsasən ölkəyə ilk dəfə gələnlər və hələ normal uyğunlaşmağa macal tapmayanlar düşür.

"Çünki ölkəyə ilk dəfə gələn şəxs üçün hər şey təzə olur, çətin olur. İnsanlar hara və necə müraciət etməli olduqlarını bilmirlər", - deyə büro rəhbəri bildirib.

Esoyevin qənaətinə görə, bu məsələdə məlumat boşluğunu doldurmaq mümkündür. Bu məsələdə miqrantlara həmyerli təşkilatları və işəgötürənlər kömək edə bilərlər.

"İstənilən insan üçün cəmiyyətin bir parçası olmaq zəruridir. Nə üçün müxtəlif ölkələrdə miqrantlar anklavlar yaradır? Onlar üçün özlərini rahat hiss edəcəkləri yerlər lazımdır. Özbəkistan, Qırğızıstan və Tacikistandan olan miqrantlar üçün bir qədər asandır. Çünki onlar əsasən rus dilini bilirlər. Lakin bəzi insanlar üçün dil baryeri var, bu isə qeyri-leqal statusuna təhrik edən amildir. Odur ki yerli əhalini bu işə cəlb etmək lazımdır ki, miqrantlar cəmiyyətə qoşulsunlar. Bu işdə də həmyerli təşkilatları birləşdirici halqaya çevrilir – onlar miqrantlara bəzi məlumatları izah edirlər", - deyə Esoyev bildirib.

Biletləri ucuzlaşdırmaq lazımdır

Daha bir problem isə bir çox miqrantların Vətənə qayıtmaq istəyidir.

"Əvvəlcə insanlar Rusiyada qalmaqdan qorxurdular, çünki yaxınlarını görmək istəyirdilər. Axı heç kim koronavirusun nə dərəcədə təhlükəli olduğunu bilmirdi. Lakin reyslər ləğv olunurdu. Hətta Özbəkistan və Tacikistanın çarter reysləri təşkil etməsinə rəğmən, biletlər çox baha idi və heç də hamı onları ala bilmirdi. Yaranmış vəziyyət bir çox miqrantları sərhədləri piyada keçmək cəhdinə sövq edirdi və nəticədə insanlar sərhədyanı zonalarda ilişib qalırdılar", - deyə Esoyev bildirib.

Daha sonra BMX təmsilçisi bildirib ki, sonradan miqrantların çoxu Vətənə gedə bilib.

"Bu, bizim Rusiya, Qazaxıstan, Qırğızıstan, Özbəkistan hökümətləri ilə əlaqələndirilmiş işimiz sayəsində mümkün oldu. Ölkələr bizə yardım edirdi, təşkilatımız pulsuz avtobuslar təşkil etməyə müvəffəq oldu ki, onların vasitəsilə də miqrantlar evə yollandılar. Biletlər isə indi də bahadır. Biz indi də kömək etməyə çalışırıq. Məsələn, ölkələrin səfirlikləri kiminsə ciddi xəstə olması ilə bağlı müraciət etdikdə", - deyə büro rəhbəri qeyd edib.

Təyyarə biletləri isə bəzi miqrant kateqoriyaları üçün hələ də əlçatan deyil. "Aviasales" servisinin məlumatlarına görə, Özbəkistandan Rusiyaya biletlər son bir il ərzində 55% bahalaşıb. Tacikistan hökuməti yanında Mülki Aviasiya Agentliyi isə tariflərin yüksək olması səbəbindən Rusiyanın "S7" və "Nordvind" aviaşirkətlərinin çarter reyslərini ümumiyyətlə dayandırıb. Belə ki, biletlərin qiyməti demək olar ki, $1,6 minə çatırdı.

Tacikistan və Rusiya arasında hava əlaqələrində yaranmış çətinliklər XİN rəhbəri Sergey Lavrovla da müzakirə olunub.

"Biz mümkün qədər tezliklə hava əlaqəsinin tezliyini və mütəmadiliyini bərpa etmək, o cümlədən Rusiyada təhsil alan bütün tacikistanlı tələbələrin qaytarılması üçün çalışırıq. Bu isə praktiki olaraq 20 min nəfər deməkdir", - deyə nazir bildirib.

Rəqəmlər böyüyür

Bununla eyni vaxtda Rusiyada əmək miqrantlarının çatışmazlığı hiss olunur – inşaat sahəsində bu rəqəm artıq 40-50%-ə çatıb. Cəzaların İcrası Federal Agentliyinin (CİFA) rəhbəri Aleksandr Kalaşnikov hətta miqrantların əvəzinə məhkumların əməyindən istifadə etməyi təklif edib. İlin əvvəlindən bəri Rusiyada əmək miqrantlarının işə cəlb olunması ilə bağlı yeni qayda qüvvəyə minməsinə baxmayaraq, ölkəyə ilin əvvəlindən bəri gəlmiş yeni əcnəbi-işçilərin sayı minlərlə ölçülür. Məsələn, mayın əvvəlindən bəri "Rusiyada iş" təşkilati portalı vasitəsilə Özbəkistandan Rusiyaya cəmi 187 özbəkistanlı gedib.

BMX rəsmisi Esoyevin sözlərinə görə, ümumiyyətlə, proses hələ ki, təzə başlayıb və pandemiya dövründə miqrantlarla işə dair proqramlarda müsbət bir cəhət var – bu, rəqəmsallaşmanın sürətlənməsidir.

"Biz miqrasiya siyasətində islahatları görürük. Bu gün isə islahatlar olan yerdə rəqəmsallaşma məsələsi ortaya çıxır. Rəqəmsallaşma miqrantların həyatını asanlaşdırır: rəqəmsal yolla pul köçürmələrinin həcmi artıb, başqa xidmətlər də inkişaf edir", - deyə büro rəhbəri fikrini yekunlaşdırıb.

Eləcə də oxuyun:

  • Rusiyada miqrantlara xüsusi rejim tətbiq olunacaq

  • Rusiyada əmək miqrantları məhkumlarla əvəz oluna bilər

  • Rusiya Azərbaycana çağırış etdi - 120 min vətəndaşınızı qaytarmasanız...

  • Avropa ölkələrinə sığınan 18 azərbaycanlı deportasiya edilib

27
Teqlər:
deportasiya, Rusiya, Miqrantlar
Vladimir Putin, arxiv şəkli

Putin ABŞ-la münasibətlər, NATO, Suriya böhranı digər məsələlər barədə

1151
RF lideri Vladimir Putin NBC telekanalına müsahibə verib. Müsahibənin mətni Kremlin saytında dərc olunub.

BAKI, 14 iyun - Sputnik. Rusiya prezidenti Vladimir Putin bəyan edib ki, ABŞ-da RF-Birləşmiş Ştatlar münasibətləri son illər kəskin daxili siyasi mübarizəyə qurban verilib. Bu barədə o, NBC telekanalına müsahibəsində deyib.

"Fikrimcə, Birləşmiş Ştatlarda son illər görülən iş ancaq bu olub ‒ Rusiya-Amerika münasibətləri ABŞ-ın özündə daima kəskin daxili siyasi mübarizəyə qurban verilib", - dövlət başçısı bildirib.

NATO-da söz sahibi kimdir

Müsahibə zamanı NATO ilə bağlı suala cavab verən Rusiya lideri alyansda formal olaraq kollektiv qərar qəbul olunmalı halda, Vaşinqtonun fikrinin prioritet kəsb etdiyini deyib.

"NATO soyuq müharibə dövründə meydana gəlib, lakin bu gün o niyə mövcuddur, çox da aydın deyil... Biz ondan çıxış edirik ki, bu hərbi təşkilatdır, lakin onlar Birləşmiş Ştatların müttəfiqləridir, yəqin ki, vaxtaşırı müttəfiqlərlə görüşmək lazımdır. Lakin mən orada necə bir diskussiya getdiyini təsəvvür edirəm. Aydındır ki, hər şey konsensusla həll olunur, lakin yenə də bir düzgün fikir var, digərləri isə belə desək, çox da düzgün deyillər", - prezident vurğulayıb.

Suriya böhranından çıxış üçün atılacaq addımlar

Putin bəyan edib ki, Suriya üzrə bütün fəaliyyət oradakı vəziyyətin sabitləşdirilməsinə yönəldilməlidir və humanitar yardım təşkil olunmalıdır.

"Bütün bizim məcmu hərəkətlərimiz vəziyyəti sabitləşdirməyə, onu normal məcraya istiqamətləndirməyə yönəldilməlidir. Rusiyanın dəstəyilə Suriya hakimiyyəti ölkə ərazisinin 90 faizdən çoxunda nəzarəti bərpa edib. İndi sadəcə heç bir siyasi kontekstdən asılı olmayaraq  insanlara humanitar yardımı təşkil etmək lazımdır", - dövlət başçısı qeyd edib.

Afroamerikalıların hüquqları və ekstremizm

Rusiya prezidenti ölkəsinin afroamerikalıların öz hüquqları uğrunda mübarizəsini dəstəklədiyini, lakin indi müşahidə olunan istənilən növ ekstremizmə qarşı olduğunu bildirib.

"Biz həmişə afroamerikalıların öz hüquqları uğrunda mübarizəsinə anlayışla yanaşmışıq və bunun müəyyən kökləri, əsasları var. Lakin eyni zamanda, kiminsə hər hansı xeyirxah məqsədlərdən çıxış etməsinə baxmayaraq, əgər bu hansısa əndazəni aşırsa, ekstremizm elementləri alırsa, biz, əlbəttə ki, bunu alqışlaya bilmərik. Və burada bizim buna çox sadə yanaşmamız var: biz afroamerikalıların öz hüquqları uğrunda mübarizəsini dəstəkləyirik, lakin biz indi hərdən təəssüf ki, müşahidə etdiyimiz istənilən ekstremizm növlərinə qarşıyıq", - Putin vurğulayıb.

Müsahibənin geniş mətni ilə Kremlin saytında tanış olmaq mümkündür.

1151
Sputnik V vaksini, arxiv şəkli

Rusiya istehsalı olan "Sputnik V"-nin ilk partiyası Türkiyəyə çatdırılıb

34
Bununla da Çin istehsalı “Sinovac”, Almaniya istehsalı “Biontex” peyvəndindən sonra “Sputnik V” vaksini Türkiyədə kütləvi tətbiq ediləcək üçüncü vaksin olacaq.

BAKI, 14 iyun - Sputnik. Yeni növ koronavirus (COVID-19) infeksiyasına qarşı Rusiya istehsalı “Sputnik V” peyvəndinin ilk partiyası bu gün Türkiyəyə çatdırılıb.

Sputnik Türkiyə xəbər verir ki, “Sputnik V” peyvəndinin ilk partiyasını daşıyan təyyarə Ankara Esenboğa hava limanına enib.

Bununla da Çin istehsalı “Sinovac”, Almaniya istehsalı “Biontex” peyvəndindən sonra “Sputnik V” vaksini Türkiyədə kütləvi tətbiq ediləcək üçüncü vaksin olacaq.

Qeyd edək ki, Türkiyənin səhiyyə naziri Fəxrəddin Qoca iyun ayının sonunadək Türkiyəyə 30 milyon doza “Sputnik V”nin idxal ediləcəyini bildirib. O, hələ aprel ayında Türkiyənin 6 ay ərzində 50 milyon doza "Sputnik V" alacağını demişdi. 

 “Sputnik V”nin Türkiyədə istehsalı üçün də iki ölkə arasında müqavilə imzalanıb.

Türkiyədən Rusiyaya təşəkkür 

Türkiyə səhiyyə naziri Fahrettin Koca may ayında koronavirusla mübarizədə dəstək üçün Rusiyaya təşəkkür edib.

"Rusiyanın "Sputnik V" vaksini hazırlanmağa başlayandan bəri biz onun tədarükü üçün əlaqə qurmuşuq. İndi bu vaksinin tədarükü üçün razılaşma imzalanıb. Mən bu razılaşmaya görə Rusiya hökumətinə təşəkkürümü bildirirəm", - Koca jurnalistlərə deyib. 

O əlavə edib ki, Türkiyə müxtəlif koronavirus vaksinlərindən 270 milyon doza sifariş verib, bu isə ölkə əhalisinin sayından üç dəfə çoxdur. 

Sputnik V vaksini

Fevralın 2-si "The Lancet" elmi jurnalı "Sputnik V" koronavirusa qarşı peyvənd preparatının klinik sınaqlarının üçüncü mərhələsinin nəticələrini dərc edib.

Kliniki sınaqların üçüncü mərhələsində "Sputnik V" yüksək effektivlik, immunogenlik və təhlükəsizlik göstəriciləri nümayiş etdirib.

Həm peyvənd, həm də plasebo vurulmuş 19866 könüllünün analiz təhlilləri göstərir ki, hər iki dozadan sonra peyvəndin effektivliyi 91,6 faiz təşkil edir. Preparat vurulandan sonra yalnız 78 koronavirusa yoluxma hadisəsi öz təsdiqini tapıb.

Tədqiqatın vacib bir hissəsi də 60 yaşdan yuxarı könüllülərin sınaqlarda iştirakı ilə bağlı idi (peyvənd qrupunda ən yaşlı iştirakçının 87, plasebo qrupunda isə 84 yaşı olub). Yaşlılar üçün təhlükəsizlik göstəriciləri yüksək olub. 60 yaşdan yuxarı 2144 könüllü üçün effektivlik 91,8% təşkil edib ki, bu da 18-60 yaş arası könüllülər qrupunda əldə edilən məlumatlardan statistik olaraq fərqlənmir.

Qeyd edək ki, Rusiya Səhiyyə Nazirliyi "Sputnik V" peyvəndini 2020-ci ilin avqust ayında qeydə alıb. Vaksin Rusiyanın Qamaleya adına Epidemiologiya və Mikrobiologiya Elmi Tədqiqat Mərkəzi tərəfindən RBİF-nin dəstəyi ilə işlənib hazırlanıb. Bu, dünyada COVID-19-un profilaktikası üçün ilk qeydiyyata alınmış preparatdır.

34
Kinoteatrda tamaşaçı, arxiv şəkli

Avropa filmləri festivalı fərqli formatda başlayıb

0
(Yenilənib 23:27 14.06.2021)
Festivala çıxarılan filmlərin əksəriyyəti Kann (Oleg", "Fire Will Come", "The Fight"), Toronto, San Sebastian ("Listening"), "Sundance 2020", Sarayevo 2020 ("Acasa, My Home"), Edinburq ("Aurora") beynəlxalq festivallarının qalibidir.

BAKI, 14 iyun — Sputnik. Avropa İttifaqının Azərbaycandakı nümayəndə heyətinin Aİ üzv ölkələri səfirliklərilə birgə təşkil etdiyi Avropa filmlərinin ilk onlayn festivalı iyunun 14-dən 29-dək keçiriləcək.

Sputnik Azərbaycan xəbər verir ki, tədbir çərçivəsində Aİ üzvü 13 ölkənin istehsalı olan 10 film nümayiş etdiriləcək. Bunlar Almaniya, Belçika, Çex Respublikası, Finlandiya, Fransa, İspaniya, Latviya, Litva, Lüksemburq, Macarıstan, Polşa, Rumıniya, Yunanıstandır. Filmlərin çoxu bir neçə ölkənin birgə istehsalıdır.

Festivalın açılış mərasimi onlayn formatda keçirilərək Aİ-nin Azərbaycandakı səfiri Kestutis Yankauskasın nitqilə başlayıb. 2010-cu ildən bu yana hər il keçirdikləri festival çərçivəsində Azərbaycanda artıq 148 film nümayiş etdirildiyini deyən diplomat daha sonra bildirib:

"Bu il festivalımızın ilk dəfə onlayn formatda keçirilməsi Avropa filmlərini həm Bakıda, həm də bütün ölkə boyu azərbaycanlı tamaşaçılara daha da yaxınlaşdıracaq. Film hekayə nəql etmək, hissləri çatdırmaq, fikirlər doğurmaq iqtidarındadır. Biz də bu festival vasitəsilə Avropa mədəniyyətini daha yaxşı tanıtdırmaq, Azərbaycan və Avropa İttifaqı xalqları arasında mədəni anlaşmaya təkan vermək ümidindəyik".

Qeyd edək ki, festivala çıxarılan filmlərin əksəriyyəti Kann (Oleg", "Fire Will Come", "The Fight"), Toronto, San Sebastian ("Listening"), "Sundance 2020", Sarayevo 2020 ("Acasa, My Home"), Edinburq ("Aurora") beynəlxalq festivallarının qalibidir.

0