Rusiya, Fransa və Aİ bayrağı, arxiv şəkli

Tanqo iki adam üçündür: Rusiya Avropa İttifaqı ilə yollarını ayırır

43
(Yenilənib 18:34 19.02.2021)
Başqa sözlə, Sergey Lavrov avropalıları başa salmaq istədi ki, Rusiya artıq başıqapazlı uşaq rolunu oynamaqdan bezib. Tanqo iki nəfərlik rəqsdir. Zorla gözəllik olmaz.

BAKI, 19 fevral — Sputnik, Pavel Danilin. Son günlər bütün dünya Rusiyanın xarici işlər naziri Sergey Lavrovun sensasiyalı bəyanatını müzakirə edir. Nazirdən Rusiyanın Avropa İttifaqı (Aİ) ilə münasibətləri kəsib-kəsməyəcəyini soruşanda şəmimi şəkildə cavab verdi: "Biz artıq buna hazırıq. Əgər bir dəfə də iqtisadiyyatımıza risk yaradan hər hansı bir sahədə, o cümlədən ən həssas sferalarda sanksiyaların çoxaldığını görsək, o zaman, bəli". Lavrovun sözlərinə görə, Rusiya "dünyadan təcrid olunmaq istəmir, amma buna hazır olmalıdır. "Sülh istəyirsinizsə, müharibəyə hazır olun", - deyə diplomat bildirib. Rusiyanın Aİ ilə münasibətlərini kəsməyə hazırlaşması beynəlxalq aləmdə ən əsas xəbərlərdən birinə çevrilib.

Əlbəttə ki, Finlandiya xarici işlər naziri Pekka Haavisto ilə danışıqlardan bir neçə gün sonra Lavrov Rusiyanın mövqeyinə aydınlıq gətirdi və dedi: "Problemləri müzakirə etməyə hazırıq. Rusiyanın maraqlarına cavab verdiyi halda həm iqlim dəyişikliyi, həm də ətraf mühit məsələləri ilə bağlı qarşılıqlı münasibətdə oluruq. Ancaq bu əlaqənin karkası Brüsselin təşəbbüsü ilə şüurlu şəkildə dağıdıldı".

Bununla yanaşı, Lavrov Aİ-nin Xarici İşlər və Təhlükəsizlik Siyasəti üzrə Yüksək Nümayəndəsi Cozep Borrellin Moskvadan qayıtdıqdan sonra heç də dostyana olmayan açıqlamalar verdiyini də xatırladıb. Borrell, xüsusilə də, Rusiyanın ümidləri doğrultmadığını, müasir demokratiyaya çevrilə bilmədiyini və sürətlə Avropadan uzaqlaşdığını vurğulamışdı.

Əslində, Lavrovun da qeyd etdiyi kimi, hər şey tam əksinədir: Brüssel tərəfdaşlıq və əməkdaşlıq müqaviləsi əsasında mövcud olan bütün mexanizmləri bir-birinin ardınca məhv etdi. Bura ildə iki dəfə keçirilən sammitlər, Rusiya hökumətinin Avropa komissarları və Avropa Komissiyasının rəhbərləri ilə görüşləri, ümumi məkan yaratmaq barədə dörd layihə, 20-dən çox sahə üzrə dialoq, Rusiya xarici işlər naziri ilə Aİ-nin yüksək nümayəndəsinin qatıldığı Tərəfdaşlıq və Əməkdaşlıq Şurasının illik iclasları daxildir.

Başqa sözlə, Sergey Lavrov avropalıları başa salmaq istədi ki, Rusiya artıq başıqapazlı uşaq rolunu oynamaqdan bezib. Tanqo iki nəfərlik rəqsdir. Zorla gözəllik olmaz. Rusiya Xarici İşlər Nazirliyi rəhbərinin haqlı olaraq qeyd etdiyi kimi, normal təmasları faktiki olaraq dayandırmaq təşəbbüsü Rusiyadan deyil, Aİ-nin özündən gəlib. Eyni zamanda, rus diplomatlarla Avropa bürokratları arasındakı seyrək təmaslar nəticəsində belə qarşılıqlı anlaşma əldə etmək mümkün olmur. Əvəzində Rusiyanın ünvanına yeni təhdidlər səsləndirilir və növbəti sanksiya paketi ilə şantaj edilir. Cozep Borrellin yuxarıda qeyd olunan Moskva səfərindən sonra da belə oldu. Borrell Brüsselə çatar-çatmaz Rusiyanı ən ağır günahlarda ittiham edərək dərhal Moskvaya qarşı yeni sanksiyalar tətbiq etməyə çağırdı. Adama deyərlər ki, bəs niyə gəlmişdin?

Aİ, Rusiya və Almaniya bayrağı, arxiv şəkli
© Sputnik / Sergey Guneev

Aydın məsələdir ki, bu formatda dialoqu davam etdirməmək daha yaxşıdır. Artıq Moskva rəsmi şəkildə elan etdi ki, Aİ-ni müzakirələr apara biləcəyi tərəfdaş kimi qəbul etmir. Etibarlı tərəfdaş kimi də görmür. Və nəhayət, Avropa İttifaqı ilə əldə olunan hər hansı bir razılaşma ona Brüssel tərəfindən əməl olunacağına təminat vermir. Əgər avropalı məmurlar nə isə vəd edirlərsə və hətta öz öhdəliklərini kağız üzərində rəsmiləşdirirlərsə, bu heç də o demək deyil ki, onlar üzərinə götürdükləri işi real şəkildə yerinə yetirəcəklər.

Avropalı bürokratların sözü əslində onun yazıldığı kağızdan belə dəyərsizdir. Bunu Ukraynanın keçmiş prezidenti Viktor Yanukoviç də gözəl bilir. O, 2014-cü ilin fevral ayının 21-də "Avromeydan" liderləri ilə "Ukraynada siyasi böhranın nizamlanması haqqında razılaşma" imzaladı. Bir sıra yüksək səviyyəli Avropa məmurları da bu razılaşmanın qarantı kimi çıxış etdilər. Yeri gəlmişkən, həmin vaxt Rusiya təmsilçisi sənədi imzalamaqdan imtina etmişdi. Və haqlı çıxdı, çünki Avropa İttifaqının zəmanəti elə kağız üzərində də qaldı: bu razılaşmadan cəmi bir neçə gün sonra qiyamçı kütlə Ukrayna prezidentinin iqamətgahını tutdu, ölkə konstitusiyasına zidd olaraq Ali Radada müxalifət Yanukoviçi hakimiyyətdən kənarlaşdırdı, prezident özü isə ölkədən qaçmalı oldu. Varşava, Berlin və Brüssel də baş verənləri izləyib çəpik çaldı. Heç buna görə üzr istəyən də olmadı. Hamı özünü elə göstərdi ki, guya ortada heç bir zəmanət-filan olmayıb. Bu, siyasi fırıldaqçılıq deyil, bəs nədir?

Daha bir vacib məqam da var. Rusiyanın xarici işlər naziri müasir dünyanın ən yaxşı diplomatlarından biridir, buna görə də onun ağzından çıxan hər bir söz əhəmiyyət daşıyır. Çünki bizim nazir sözləri seçməyi yaxşı bacarır. Odur ki, yalnız söylənilənlərin ümumi məğzini deyil, hər bir nüansı yaxşı analiz etmək lazımdır.

Məsələn, elə bir faktı götürək: Lavrov Avropa ilə deyil, Avropa İttifaqı ilə münasibətləri kəsməkdən bəhs edib. Rusiyanın elə ən mühüm mesajı da bundan ibarətdir. Biz bu iki anlayışı – Avropa bürokratiyası ilə bu qitənin ayrı-ayrı ölkələrini bir-birindən fərqləndiririk. Aİ – etibarlı, adekvat, güvənilən tərəfdaş deyil və Rusiya onunla əməkdaşlıqdan imtina etmək istəyir. Ayrı-ayrı Avropa ölkələrinə gəlincə, Moskva qətiyyən onlarla münasibətini kəsmək fikrində deyil. Hətta mövcud sanksiyalar şəraitində belə ölkələrimiz arasında Almaniya ilə olduğu kimi, hər iki dövlətin xeyrinə pis-yaxşı ortaq layihələr həyata keçirilir.

Borrell kimi Avropa məmurları da Aİ-yə daxil olan ölkələrin maraqları deyil, Vaşinqtonun israrlı istəkləri ilə üst-üstə düşən korporativ maraqları əsasında hərəkət edir. Bu səbəbdən də ittifaqa üzv olan ayrı-ayrı dövlətlərin maraqlarına zidd siyasi xətt yürüdürlər.

Söhbət yalnız Fransa, Almaniya, İtaliya kimi iri oyunçulardan getmir, əlbəttə ki, bu üç ölkə Aİ-nin rusofob mövqeyinə görə digərlərindən daha çox şey itirir. Eyni zamanda, Brüsseldəki məmurlar öz maaşlarını bu ölkələrin vergiləri hesabına aldıqlarına görə qətiyyən narahat deyillər.

Sergey Lavrovun açıqlamalarına qayıtsaq, qeyd etmək lazımdır ki, Rusiya Avropa ilə münasibətlərində arabanın beşinci təkəri rolunu oynayan, bizim üçün çox mənasız və hətta ziyanlı Avropa qurumları ilə əlaqələrini kəsməyə qərar verdi.

Vaxtilə amerikalı diplomat Henri Kissincer sonradan çox məşhur olan bir sual vermişdi: "Avropa ilə danışmaq üçün kimə zəng etməliyəm". Kissincer bununla ABŞ üçün hər hansı bir vacib məsələnin Avropa səviyyəsində həll edilə bilməyəcəyini nəzərdə tuturdu. London, Berlin və ya Parislə ayrıca danışmalı olacağıq.

İllər keçdi və hazırkı vəziyyət göstərir ki, geostrateji miqyasda hər hansı bir ciddi dəyişiklik baş verməyib. London bu yaxınlarda "millətlər ailəsini" tərk etdi. Berlin və Paris isə ittifaqın "sağmal inəkləri" roluna getdikcə daha çox məcbur edilir. Və məhz belə bir zamanda Rusiya bütün dünyaya Avropa İttifaqının institutları və bürokratları ilə münasibətlərin səmərəsiz və mənasız olduğunu bəyan etdi. Almaniya və ya Fransa ilə ayrıca danışmaq daha yaxşıdır. Bu danışıqlar hər zaman xoş ovqatda keçməyə bilər, amma daha faydalı olacağı dəqiqdir: çünki qarşılıqlı maraqlar və mümkün kompromis nöqtələri bəllidir. Bundan sonra Rusiya Brüsseli kənarda qoyaraq birbaşa bu ölkələrlə ünsiyyət quracaq, çünki vahid Avropa açıq-aşkar heç kimin ümidlərini doğrultmadı.

43
Teqlər:
Sergey Lavrov, Avropa İttifaqı, Rusiya
Məhəmməd Bin Salman, şahzadə, arxiv şəkli

ABŞ ərəbləri cəzalandırmaq qərarına gəlib: Rusiya İran bundan qazanacaq?

18
(Yenilənib 21:40 02.03.2021)
Vaşinqton Səudiyyə Ərəbistanına sərt yanaşsa, avtomatik olaraq İranın əlinə oynamış olacaq. ABŞ Qaşıqçının qətlinin arxasında duranları cəzalandırmaq üçün buna getməyəcək.

BAKI, 2 mart — Sputnik, Sofya Melnuçuk, Qaliya İbrahimova. Səudiyyə Ərəbistanını ABŞ-la münasibətdə ağır dövr gözləyir. ABŞ kəşfiyyatı 2018-ci ildə öldürülən jurnalist Camal Qaşıqçının qətli ilə bağlı hesabat yayımlayandan sonra Ağ Ev yeni strategiyasını açıqladı: amerikalılar Yəməndəki müharibənin başa çatması və insan haqlarına hörmət olunmasında təkid edirlər. Vaşinqtonun bu məsələdə nə qədər uzağa gedə biləcəyi və Ər-Riyadın buna necə reaksiya verəcəyi barədə – RİA Novosti-nin növbəti məqaləsində.

Sanksiyaya məruz qalmayan şahzadə

Gözlənildiyi kimi, yeni açıqlamalar Amerika səlahiyyətlilərinin cümə günü elan etdikləri bəyanatlara bir növ əlavə oldu. ABŞ Dövlət Departamentinin rəhbəri Entoni Blinken Qaşıqçının öldürülməsi ilə bağlı 76 Səudiyyə Ərəbistanı vətəndaşına qarşı viza məhdudiyyəti tətbiq olunacağını bildirdi. Fərdi sanksiyalar Səudiyyə Ərəbsitanı Ümumi Kəşfiyyat Xidmətinin rəhbəri Əhməd əl-Əsiriyə də şamil olunacaq.

Kəşfiyyat Xidmətinin hesabatında bildirilir ki, Səudiyyə Ərəbistanı hakimiyyətini tənqid edən "Vashinqton Post" qəzetinin yazarından intiqam alınmasında vəliəhd Məhəmməd bin Salmanın da əli olub. Belə ki, jurnalisti məhz onun razılığı ilə Səudiyyə Ərəbistanının İstanbuldakı konsulluğuna girdiyi vaxt qaçıraraq daha sonra hissələrə parçalayıblar və indiyə kimi cəsədinin qalıqlarını görən olmayıb. Krallığın Xarici İşlər Nazirliyi ittihamları qəti şəkildə rədd edir. Buna baxmayaraq, vəliəhdə qarşı fərdi sanksiya tətbiq olunmayıb. Halbuki yeni prezident Co Bayden seçkiqabağı debatlarda Ər-Riyadla haqq-hesabı çürütməyə söz vermişdi. Və bu, bir sıra suallar doğurur.

"Fikrimcə, bütün ölkə ilə münasibətlərin bir insanla münasibətlərdən daha prioritet olduğunu anlamaq lazımdır", – Blinken məsələyə belə münasibət bildirmişdi. Onun sözlərinə görə, rəhbərlik Səudiyyə Ərəbistanı ilə münasibətlərini yenidən gözdən keçirir, ancaq bu əlaqələr hələ də əhəmiyyətini itirməyib və ABŞ-ın marağındadır. "Biz krallığın müdafiəsinə tərəfdarıq", – deyə Blinken əlavə edərək bildirib ki, məqsəd Ər-Riyadla münasibətlərin ABŞ-ın dövlət maraqlarına cavab verməsidir.

Dövlət katibi vurğulayıb: Ər-Riyadın amerikalılardan aldığı yardımların və Səudiyyə Ərəbistanının husilər hərəkatına qarşı prezident Əbu Rabu Mansur Hadinin hökumətini dəstəklədiyi Yəməndəki vəziyyətin fərqinə varması Ağ Ev üçün vacibdir. Başqa sözlə, Vaşinqton, Amerika silahlarından üçüncü ölkələrin döyüş meydanında istifadə edilməyəcəyinə əmin olmaq istəyir.

Hücum müdafiəsi

İki dövlət arasındakı münasibətlərin mərkəzində krallığın müdafiəsini təmin etmək öhdəliyi müqabilində Amerikanın neftə çıxış əldə etməsi dayanır. Səudiyyə Ərəbistanı ABŞ silahlarının ən böyük müştərisidir. Bu əməkdaşlıq hər iki tərəfin strateji maraqlarını təmin edir. Ancaq dəyərlər məsələsində - demokratiya və insan haqlarının qorunması ilə bağlı yanaşmalar bir-birindən fərqlənir.

Bu fikir ayrılığı Barak Obamanın hakimiyyət illərində özünü daha çox büruzə verirdi. Donald Trampın Ağ Evə gəlişi ilə münasibətlər istiləşdi. Bununla belə, Tramp hakimiyyətə gəlməmişdən qabaq nəinki ərəb tərəfdaşına bir o qədər də rəğbət bəsləmir, hətta ABŞ-ın "ərəb terroristlərinə kömək etmək niyyətində olmadığını" bəyan etmişdi. Ancaq sonradan necə oldusa, Trump ilk rəsmi ziyarətini Ər-Riyada etdi və onun səlahiyyət müddətinin sonunda ABŞ Dövlət Departamenti husiləri terror təşkilatı kimi tanıdı. Keçmiş prezident vəliəhdlə yaxın münasibətlərini, əsasən, kürəkəni və xüsusi müşaviri Cared Kuşner vasitəsi ilə davam etdirirdi. Qaşıqçının qətlinə dair hesabat isə Tramp administrasiya dövründə hazır olsa da, dərc edilməmişdi.

"Tramp, Vaşinqtonun öhdəliklərini azaltmaq üçün müttəfiqlərə investisiya yatırmağa arxalanırdı. Səudiyyə Ərəbistanı da daxil olmaqla, bütün tərəfdaşlar daha da çox silah almalı və bölgələrdə baş verənlər üçün məsuliyyət daşımalı idilər", – deyə Qabaqcıl Amerika Araşdırmaları Mərkəzinin direktoru Maksim Suçkov izah edir. Onun sözlərinə görə, buna cavab olaraq ABŞ hərbi- siyasi himayədarlığı təmin edir və müttəfiqlər üçün vacib təşəbbüslərə yaşıl işıq yandırırdı.

"Trampın əleyhdarları indi nə deyirlər desinlər, vaxtilə hər iki tərəf də bu münasibətlər formulunu qəbul etmişdi. Qaşıqçı öldürüləndən sonra isə Demokratlar bu məsələyə görə Respublikaçıları tənqid hücumuna məruz qoydular. Onları Səudiyyə Ərəbistanında insan haqlarının pozulmasına məhəl qoymamaqda, Yəməndəki qəddar əməliyytalara diqqət yetirməməkdə günahlandırdılar. Prezidentin kürəkəni Kuşner ilə vəliəhd şahzadə arasında yaranan "isti münasibətlər"ə görə respublikaçıları qınadılar", – deyə Suçkov əlavə edir.

Demokratlara görə, bütün bunlar Məhəmməd bin Salmanda Vaşinqtonla hər hansı bir məsələni pulla həll edə biləcəyinə dair inam hissi formalaşdırıb.

Yeni administrasiyanın dövründə siyasi kursun dəyişməsi gözlənilirdi və artıq ilk addımlar atılıb. Bayden silah ixracatı da daxil olmaqla Yəməndəki hücum əməliyyatlarına dəstəyin artıq başa çatdığını bəyan etdi. Bildirdi ki, bu qərar 290 milyon dollarlıq üç min ədəd GBU-39 yüksək dəqiqlikli bomba və 478 milyon dollarlıq yeddi min Paveway IV bombasına da aiddir. Vaşinqton Yəmən münaqişəsini diplomatiya yolu ilə həll edəcəyini açıqladı. Bundan başqa, husilər fevral ayından etibarən terror qruplarının siyahısından çıxarıldı.

Yeni dövrə

Buna baxmayaraq, ekspertlərin fikrincə, iki ölkə arasındakı münasibətlərin tamamilə yenidən qurulacağını söyləmək olmaz. Yaxın Şərq üzrə mütəxəssis Aleksey Xlebnikov da bu fikri dəstəkləyir. Onun sözlərinə görə, iki ölkənin qarşılıqlı münasibətlərində strateji baxımdan heç bir dəyişiklik baş verməyəcək.

Rusiya Beynəlxalq Məsələlər Şurasının Yaxın Şərq layihələri üzrə meneceri Ruslan Məmmədov da onunla həmfikirdir: "Münasibətlərdə düzəliş etməyə çoxdan ehtiyac var. Hələ Obamanın dövründən bəri amerikalılar energetika sahəsində xeyli irəlilədilər, dünyada neft istehsalında birinci yerə çıxdılar və Səudiyyə Ərəbistanına daha az ehtiyac duymağa başladılar. Yeni rəhbərlikdəki bəzi insanların ABŞ-ın xarici siyasətinə fərqli yanaşması var. Söhbət xarici siyasət məsələlərinin yenidən balanslaşdırılmasından gedir".

Məmmədov bölgələrarası dinamikada çox şeyin İranın nüvə anlaşmasından asılı olduğunu vurğulayır. Ər-Riyad ABŞ-ın Tehranla münasibətlərdə əsas tərəfdaşlarından biridir. Odur ki, Vaşinqton Səudiyyə Ərəbistanına sərt yanaşsa, avtomatik olaraq İranın əlinə oynamış olacaq. Və ABŞ Qaşıqçının qətlinin arxasında duranları cəzalandırmaq üçün buna getməyəcək.

Xlebnikov isə bildirir ki, son on ildə bölgədə bir sıra mühüm hadisə baş verib: "Tunis və Misirdəki üsyanlar, nəticədə Amerikanın Qahirəyə hərbi yardımını dayandırılması, nəhayət, İranla bağlanmış müqavilə".

Politoloqun fikrincə, bütün bunlar "Səudiyyə Ərəbistanı da daxil olmaqla krallıqları diplomatik portfellərini şaxələndirməyə, Rusiya və Çin kimi digər böyük dövlətlərlə əlaqələri gücləndirməyə məcbur edib".

Moskva Ər-Riyada silah da satır: ilk silah partiyasının tədarükünə 2017-ci il müqaviləsi çərçivəsində 2019-cu ildə başlanılıb. Həmin vaxt krallıq Rusiya ilə TOS-1A kompleksi, "Kornet-EM" tank əleyhinə sistem, AGS-30 qumbaraatanları və Kalaşnikov AK-103 avtomatlarının alınması, eləcə də yerli istehsalın təşkili barədə memorandum imzalamışdı. 2021-ci ilin əvvəllərində isə Səudiyyə Ərəbistanının Rusiyadan həm S-400 zenit raket kompleksləri, həm də Su-35 qırıcıları ala biləcəyi açıqlandı.

Məmmədov isə belə hesab edir ki, ölkələrin neft bazarındakı siyasətlərini əlaqələndirmələri də vacibdir: "Ər-Riyadın Moskva ilə münasibətlərində OPEC + sövdələşməsinin təsirini nəzərə almaq vacibdir. Bu hər iki tərəfin də qazanmasına imkan verdi. Çox praqmatik yanaşmadır, hamı fayda götürür - sən mənim üçün, mən də sənin üçün".

Onun sözlərinə görə Vladimir Putinin Səudiyyə Ərəbistanına və ya Kral Salmanın Rusiyaya səfərlərinə çox vaxt Vaşinqtonla oyunun bir aləti kimi yanaşılır.

Məmmədov belə hesab edir ki, krallıq Amerikaya bölgədə problem yaratmağa qadirdir. Ancaq hamı yaxşı bilir ki, ABŞ Ər-Riyad üçün son dərəcə əhəmiyyətlidir və bu cür manevrlər yalnız diqqət cəlb etməyin bir yoludur. Səudiyyə Ərəbistanında belə hesab edirlər ki, onların ABŞ-la münasibətləri hazırda Ağ Evdə kimin olmasından asılı deyil, çünki iki ölkənin qarşılıqlı münasibətləri fundamental xarakter daşıyır, on illər ərzində formalaşıb və hər cür dəyişikliyə tab gətirə bilər.

On illik əməkdaşlıq çox şeyə təsir edib: Səudiyyə Ərəbistanın demək olar ki, bütün elitası ABŞ-da təhsil alıb, ərəb rialı dollardan asılı vəziyyətdədir və hərbçilərin silahlandırılması və yetişdirilməsində Amerika təcrübəsinə əsaslanılır. Bütün bunları dəyişdirmək üçün uzun illər lazım gələ bilər. Buna görə xarici siyasət təmaslarının şaxələndirilməsi çox güman ki, yeni çoxqütblü dünyanın tələblərinə cavab verən taktiki gedişdən başqa bir şey deyil.

18
Erməni hərbçiləri, arxiv şəkli

Rusiyalı hərbi ekspert: "Ermənistan Qarabağ müharibəsi zamanı hərbi cinayət törədib"

66
(Yenilənib 14:29 02.03.2021)
Ermənistan tərəfindən Azərbaycana raket zərbələri vurulan zaman yaradılan uçuş tapşırıqlarının hərbi obyektləri deyil, məhz şəhərləri vurması nəzərdə tutulurdu

Eldar Tanrıverdiyev, Sputnik Azərbaycan

BAKI, 2 mart — Sputnik. Ermənistan Qarabağ müharibəsi zamanı raket sistemlərindən Azərbaycan şəhərlərini vurmaq üçün istifadə edib. Beynəlxalq hüquq baxımından bu, hərbi cinayətdir. Sputnik Azərbaycan xəbər verir ki, bunu "Natsionalnaya oborona" jurnalının baş redaktoru, hərbi ekspert İqor Korotçenko "Sputnik"də canlı yayım zamanı bildirib.

"Çoxları deyirlər ki, müharibə zamanı bu və ya digər tərəf bir-birlərinin mülki obyektlərini vurub. Lakin burada çox önəmli nüans var. Əməliyyatlar döyüş zonasında gedən zaman vəziyyətdən asılı olaraq bu və ya digər silah sisteminin tətbiq edilməsi barədə qərar hərbi hissə və bölüyün komandiri tərəfindən verilir. Ona görə də bu vaxt döyüş əməliyyatları zonasında mülki obyektlərin vurulmasını istisna etmək olmaz", - deyə Koretçenko qeyd edib.

Rusiyalı ekspert vurğulayıb ki, raket sistemlərinə, xüsusilə operativ-taktiki sistemlərinə gəldikdə isə bunun üçün ölkə rəhbərliyinin razılığı lazımdır: "Bundan sonra hərbçilər uçuş tapşırığını hazırlayırlar. Bu uçuş tapşırığı raketin kompüterinə daxil edilir, hazırlıq görülür və raket buraxılır. Buna görə də Ermənistan tərəfindən Azərbaycana raket zərbələri vurulan zaman yaradılan uçuş tapşırıqlarının hərbi obyektləri deyil, məhz şəhərləri vurması nəzərdə tutulurdu. Nəzərə alsaq ki, müasir raket kompleksi hədəfə dəydiyi zaman böyük dağıntılara səbəb olur, Azərbaycanın iki şəhərinə Ermənistanın operativ taktiki raketlərlə hücum etməsi müharibə cinayətidir. Bu aksiyaların heç bir bəraəti ola bilməz".

66
Teqlər:
cinayət, hərbi, Ermənistan, Azərbaycanlı, Qarabağ, Sputnik, müsahibə, İqor Korotçenko
 Azərbaycanda koronavirus infeksiyasına qarşı vaksinasiya

Azərbaycanda vaksinasiya olunanların sayı açqılandı

0
Hazırkı dövrədək ölkəmizdə koronavirus infeksiyasına qarşı 313,582 nəfər peyvəndlənmə prosesində iştirak edib.

BAKI, 3 mart — Sputnik. Martın 2-də Azərbaycanda yeni koronavirus (COVID-19) infeksiyasına qarşı 20,903 nəfər vaksinasiya olunub.

Nazirlər Kabineti yanında Operativ Qərargahdan Sputnik Azərbaycan-a verilən məlumata görə, hazırkı dövrədək ölkəmizdə koronavirus infeksiyasına qarşı 313,582 nəfər peyvəndlənmə prosesində iştirak edib. Vaksinasiya Respublikamızın bütün rayonlarında uğurla davam etdirilir.

0