BAKI, 7 yanvar — Sputnik. ABŞ-da baş verən hadisələr göstərir ki, ölkədə demokratik təsisatlar işini davam etdirir, lakin hazırkı prezident Donald Trampa qarşı mübarizədə nəzərəçarpacaq dərəcədə qərəz var.

Sputnik Azərbaycan RİA Novosti-yə istinadla xəbər verir ki, bu sözləri Rusiya Liberal Demokrat Partiyasının lideri Vladimir Jirinovski Telegram-kanalında yazıb.

Onun sözlərinə görə, bu qərəzin formalaşmasında vitse-prezident Mayk Pensin rolu böyükdür:

"Əgər Tramp Pensin xoşuna gəlmirdisə, niyə onunla seçkiyə gedirdi? Sonra da vəziyyətin dəyişdiyini görən kimi Trampdan üz döndərdi". 

Siyasətçi belə hesab edir ki, Trampın öz tərəfdarlarını seçkinin nəticəsinin saxtalaşdırılmasına qarşı mübarizəyə çağırmaq əvəzinə Kapitoliyə hücuma səsləməsi səhv addım idi. Bundan başqa, RLDP sədri belə hesab edir ki, Tramp hələ də hökumətə təsir etmək gücünə sahibdir. Belə ki, vaxtilə ölkənin müdafiə naziri olmuş on şəxs hazırkı prezidentin tərəfində olduqlarını bəyan edib.

Qeyd edək ki, yanvarın 6-da Vaşinqtonda ABŞ-ın hazırkı prezidenti Donald Trampın tərəfdarları ilə polis arasında toqquşmalar baş verib. Seçkinin nəticəsinə etiraz edənlər Konqres binasına hücum çəkərək 4 saat orada qala biliblər. Hadisə nəticəsində 4 nəfər ölüb, 50-dən çox etirazçı həbs olunub.

BAKI, 16 yanvar - Sputnik, Kəmalə Əliyeva. Akademik təhsilinin olmamasına rəğmən, on dörd yaşlı Səməd İskəndərli karandaşla unikal əsərlər yaradır. O, daha çox Qarabağ müharibəsinin qəhrəmanlarının portretlərini çəkir. Sputnik Azərbaycan bildirir ki, gənc rəssam üçün hazırda ən böyük çətinlik işləmək üçün şəraitin olmaması və rassam ləvazimatlarının yoxluğudur. 

Səməd Yardımlı rayonunun Sırıq kəndində yaşayır. O, rəsmlə uşaqlıqdan maraqlanır. Maliyyə problemlərinə görə ailəsi ona inkişaf etməkdə yardım edə bilmir. Müəllimlə çalışmaq imkanı olmayan Səməd internetdə müxtəlif videoçarxlara baxaraq öyrənir. 

"Təəssüf ki, valideynlərim mənə rəssamlıq üçün lazım olanları ala bilmirlər, çünki bu ləvazimatlar çox bahadır. Əvvəl ancaq sadə karandaşla çəkməyə başladım. Sonra mənim xaricdə yaşayan dostum tanışları vasitəsilə mənə rəngli karandaşlar göndərdi, indi də onlardan istifadə edirəm. Onun sayəsində öz üzərimdə daha çox işləmək arzusu yarandı", - Səməd deyir.

© Photo : Courtesy of Samed Iskenderli

Səməd İskəndərli

Gənc istedad qohumlarını, tanışlarını, müxtəlif filmlərin qəhrəmanlarını çəkir. Son işləri isə Vətən müharibəsinin qəhrəmanlarına həsr olunub. Onun sözlərinə görə, hər dəfə şəhidlərin portretlərini yaradanda böyük məsuliyyət hiss edir və çalışır ki, hər yeni işi öncəkindən daha yaxşı alınsın. 

Səməd əmindir ki, gələcəkdə məşhur rəssam olacaq və onun əsərlərini hər kəs tanıyacaq.