Auditoriyada tələbələr, arxiv şəkli

Rusiya xarici tələbələrə böyük güzəştlər vəd edir

22
(Yenilənib 15:32 18.11.2020)
Müstəqil Dövlətlər Birliyi Federal Agentliyinin rəhbəri Yevgeni Primakov "Rossiya Seqodnya" BİA-da onlayn formatda keçirdiyi mətbuat konfransda qurumun işindəki yeniliklərdən danışıb.

Sputnik, Maria Naumenko

BAKI, 18 noyabr — Sputnik. Rusiya xarici ölkələrin vətəndaşlarına öz universitetlərində pulsuz təhsil almaq üçün tətbiq olunan kvota sistemini dəyişdirəcək, xarici tələbələrə qrant və təqaüdlər ayıracaq.

Bu barədə Rusiyanın Müstəqil Dövlətlər Birliyi, xaricdə yaşayan soydaşlar və beynəlxalq humanitar əməkdaşlıq Federal Agentliyinin ("Rossotrudnichestvo") rəhbəri Yevgeni Primakov məlumat verib. Onun sözlərinə görə, bu halda başqa ölkələrdən olan istedadlı uşaqların təhsil prosesindən yayınmasına ehtiyac qalmayacaq. Digər tərəfdən, tətbiq olunacaq güzəştlər Rusiya Federasiyasına daha çox xarici məzunun müraciət etməsinə gətirib çıxaracaq.

"Tələbələrə dövlət hesabına Rusiyada təhsil almaq hüququ veririksə, deməli, onların həqiqətən təhsil almasını istəyərik. Özlərini maddi cəhətdən təmin etmək üçün ümidsizliyə qapılmalarını, taksi sürücülüyü, gözətçilik etmələrini və ya başqa yerlərə üz tutmalarını istəmirik. Əgər tələbə Rusiyaya kompüter proqramçısı olmağa gəlibsə, qoy elə bu ixtisasa da yiyələnsin, daha gedib taksi sürücüsü olmasın", – deyə Primakov bildirib.

Beynəlxalq təcrübədən nümunə gətirən agentlik rəhbəri Amerika və Avropa ölkələrində tələbələrə təqaüd və qrantların verildiyini xatırladıb.

"Biz (Rusiya – red.) isə sadəcə kvota ayırırıq. Mən belə hesab edirəm ki, bu kvotanın müəyyən bir hissəsi minimum məbləğdə olsa da, təqaüdə sərf olunsa, daha çox fayda gətirər. Bu büdcə vəsaitlərinin havaya sovrulması və ya xeyriyyəçilik fəaliyyəti deyil. Bu elə bir məsələdir ki, gələcəkdə mütləq öz bəhrəsini verəcək. Rusiyada təhsil alan xarici tələbələr öz ölkələrinə qayıdandan sonra orada bir növ Rusiyanın xoşməramlı səfirlərinə çevriləcəklər. Öz ölkələrinin Rusiya ilə münasibətlərinin yaxşılaşmasına töhfə verəcəklər", – deyə Primakov vurğulayıb.

Kvota iki dəfə artırılıb

Xarici vətəndaşlara Rusiya universitetlərində təhsil almaq üçün ayrılan kvota da artırılacaq. Bu barədə məlumat verən Primakov qeyd edib ki, Rusiya Prezidenti Vladimir Putinin artıq bu barədə müvafiq qərarı var. "Hazırkı proqram 15 min büdcə yeri üçün nəzərdə tutulub, 2023-2024-cü ildə bu rəqəm 2 dəfə artırılacaq. Düzdür, koronavirus (COVID-19 pandemiyası-red.) səbəbindən biz iqtisadi vəziyyətin necə dəyişəcəyini bilmirik. Ancaq yenə də bir həll yolu olduğuna və tələbələrin sayının artacağına inanırıq".

Keçmiş SSRİ respublikları prioritetdir

Primakovun sözlərinə görə, agentlik yeni konsepsiyasında postsovet ölkələrinə daha çox diqqət ayıracaq. "Bizi ilk növbədə keçmiş sovet respublikalarından və MDB ölkələrindən daha çox tələbənin cəlb olunması maraqlandırır", – deyə agentlik rəhbəri bildirib.

"Bu, uzaq xarici ölkələrdən imtina demək deyil, daha yaxın ölkələrə, başqa sözlə, keçmiş SSRİ respublikalarına fokuslanmaq deməkdir. Bu prioritet Rusiya Federasiyasının xarici siyasət konsepsiyasında da öz əksini tapıb. İndi sadəcə həmin prioritet çərçivəsində öz resurslarımızın yenidən bölüşdürülməsini həyata keçirəcəyik", – deyə Primakov fikrini izah edib.

Primakov onu da qeyd edib ki, təmsil etdiyi qurumun əsas vəzifəsi, əsasən, mədəniyyət, dil və elm sahəsində humanitar iş idisə, indi qurumun fəaliyyət dairəsi əhəmiyyətli dərəcədə genişlənəcək. O belə hesab edir ki, artıq sərgilər və xalq ansambllarının çıxışları az effekt verir.

"İndi buraya insan hüquqları və sosial aspektlər də əlavə olunur. Artıq bizim agentlik xaricdə ictimai rəy yaradan və bu sahədə fəaliyyət göstərən qurumdur. Bu çox prinsipial məsələdir. Biz xaricdə sadəcə bayrağımızı dalğalandırmaqla və böyük mədəniyyətimizi nümayiş etdirməklə kifayətlənə bilmərik", – deyə Primakov vurğulayıb.

22
Rusiyada koronavirusa yoluxanan xəstələrin müalicə aldığı hospital, arxiv şəkli

Rusiyada bir gündə 500-dən çox adam koronavirusdan öldü

8
(Yenilənib 15:15 25.11.2020)
Ümumilikdə, Rusiyada bu xəstəliyə yoluxanların sayı 2162503-ə çatıb. Rusiyada pandemiya yayılandan 37538 nəfər COVID-19-dan vəfat edib. Ölkədə bu virusdan sağalanların sayı 1660419-a çatıb.

BAKI, 25 noyabr — Sputnik. Son bir sutka ərzində Rusiyada 23 675 koronavirusa yeni yoluxma halı aşkarlanıb. Sputnik Azərbaycan Rusiya Operativ Qərargahına istinadən xəbər verir ki, bir gün ərzində qonşu ölkədə 507 nəfər ölüb.

Ümumilikdə, Rusiyada bu xəstəliyə yoluxanların sayı 2162503-ə çatıb. Rusiyada pandemiya yayılandan 37538 nəfər COVID-19-dan vəfat edib. Ölkədə bu virusdan sağalanların sayı 1660419-a çatıb.

Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus dünyanın əksər regionları və ölkələrində yayılıb. Dünyada koronavirus infeksiyasına indiyədək yoluxanların sayı 59,8 milyonu keçib, 1,41 milyondan çox adam isə virus səbəbilə ölüb.

Ümumdünya Səhiyyə Təşkilatı (ÜST) fevralın 11-də infeksiyanın törətdiyi xəstəliyin adını COVID-19 qoyub, martın 11-də isə koronavirusu pandemiya elan edib.

8
Teqlər:
ÜST, korona virusu, Koronavirus, epidemiya, COVID-19, Rusiya
Rusiya Prezidenti Vladimir Putin və Türkiyə Prezidenti Rəcəb Tayyib Ərdoğan

Ərdoğan Qarabağa görə Putinə zəng vurdu

68
(Yenilənib 09:58 25.11.2020)
Həmçinin Türkiyə Prezidenti Ermənistan tərəfinin razılaşmada göstərilən məsuliyyətlərindən yayınmasına izn verilməməsinin vacibliyini də qeyd edib.

BAKI, 24 noyabr - Sputnik. Türkiyə Prezidenti Rəcəb Tayyib Ərdoğan rusiyalı həmkarı Vladimir Putinə zəng vurub.

Sputnik Azərbaycan Anadolu agentliyinə istinadən bildirir ki, iki ölkənin liderləri Türkiyə ilə Rusiya arasında ticari həcmin artırılması, Dağlıq Qarabağ, Suriya və Liviyadakı vəziyyəti müzakirə ediblər.

Ərdoğan Dağlıq Qarabağda Türkiyənin Rusiya ilə birlikdə quracağı Müştərək Mərkəzin qısa zamanda fəaliyyətə başlamasını gözlədiklərini vurğulayıb.

Həmçinin Türkiyə Prezidenti Ermənistan tərəfinin razılaşmada göstərilən məsuliyyətlərindən yayınmasına izn verilməməsinin vacibliyini də qeyd edib.  

Ərdoğan Minsk qrupu həmsədrlərinin sülh üçün atılan addımları tənqid etmələrini anlamadığını da dilə gətirib.   

68
Teqlər:
telefon zəngi, Vladimir Putin, Rəcəb Tayyip Ərdoğan, Azərbaycan, Rusiya, Türkiyə, Qarabağ

Cəbhəyanı ərazilərdə onlarla tank piyada əleyhinə mina, bombacıqlar aşkarlandı

0
Mina təhlükəsinə dair maarifləndirmə üzrə mütəxəsisslər tərəfindən 80 141 nəfər mülki şəxs arasında mina təhlükəsizliyinə dair maarifləndirmə təbliğatı aparılıb.

BAKI, 26 noyabr - Sputnik. Azərbaycan Respublikası Ərazilərinin Minalardan Təmizlənməsi üzrə Milli Agentliyə (ANAMA) Ağcabədi, Ağdam, Beyləqan, Füzuli, Goranboy, Göygöl, Tərtər rayonları ərazisində mərmilərin aşkar olunması barədə Daxili İşlər Nazirliyinin ″102″ Xidməti-Zəng mərkəzi sistemindən 38 və Fövqəladə Hallar Nazirliyinin Böhran Vəziyyətlərində İdarəetmə mərkəzindən 7 müraciət daxil olub.

ANAMA-dan Sputnik Azərbaycan-a verilən məlumata görə, daxil olmuş 45 çağırış əsasında agentliyin xüsusi mobil çevik əməliyyat qrupları tərəfindən Daxili İşlər Nazirliyinin əməkdaşları ilə birlikdə 28 operativ və təxirəsalınmaz əməliyyat çıxışı həyata keçirilib.

Aparılmış əməliyyat-axtarış tədbirləri zamanı 71 ədəd partlamamış hərbi sursat (PHS), 2 ədəd tank əleyhinə mina, 42 ədəd piyada əleyhinə mina, 4 ədəd bombacıq və 40 ədəd partlamış mərmi qalıqları aşkar olunub.

Agentliyin partlayış qrupu tərəfindən 26 ədəd mina və partlamamış hərbi sursat (PHS), 4 ədəd bombacıq zərərsizləşdirilib, mina təhlükəsinə dair maarifləndirmə üzrə mütəxəsisslər tərəfindən 80 141 nəfər mülki şəxs arasında mina təhlükəsizliyinə dair maarifləndirmə təbliğatı aparılıb.

0