BAKI, 3 sentyabr — Sputnik. Rusiya Liberal Demokrat Partiyasının (LDP) sədri Vladimir Jirinovski Türkiyə prezidenti Rəcəb Tayyib Ərdoğanın ölkəsində bir rus hərbi bazası yaratmağa hazır olduğu iddiasını irəli sürüb.
Sputnik Azərbaycan "Haberdurus"a istinadla xəbər verir ki, Jirinovski iştirak etdiyi bir televiziya verilişində deyib ki, vaxt itirmədən İran və Türkiyədə Rusiyaya məxsus hərbi hava və hərbi dəniz bazaları yaradılmalıdır.
Daha sonra Jirinovski Türkiyədəki İncirlik hərbi bazasından danışıb. O iddia edib ki, İncirlik hərbi hava bazası NATO-nun istifadəsi üçün bağlanıb, Rusiyanın istifadəsinə verilə bilər.
Qeyd edək ki, Jirinovski iyul ayında Ərdoğanın şəxsi dəvəti ilə andiçmə mərasimində iştirak etmək üçün Ankaraya səfər etmişdi.
