BAKI, 23 avqust — Sputnik. Birləşmiş Ştatlar Senatının kəşfiyyat üzrə komitəsi, Konqresin icazəsi olmadan, prezident Donald Trampa Rusiya ilə əməkdaşlığı qadağan edən qanun layihəsini qəbul edib.
Sputnik Azərbaycan "Reuters"-ə istinadən xəbər verir ki, Senatın bu cür sərt addım atmasına səbəb, Trampın iyul ayında Almaniyada keçirilən G20 sammitində, Rusiya prezidenti Vladimir Putinlə kiber təhlükəsizliyin birgə qorunması haqda söhbət aparmasıdır. Məhz bu hadisədən sonra sözügedən qanun layihəsinə komitə tərəfindən baxılıb və qəbul olunub.
Rusiyanın 2016-cı ildə ABŞ-da keçirilən prezident seçkisinə müdaxiləsini bilə-bilə Trampın Putinlə yaxınlıq etməsi də senatorları narahat edib. Bəzi analitiklərə görə, əgər proses bu cür davam etsə, Ağ Ev rəhbərini impiçment gözləyir.
