Ekspertin sözlərinə görə, burada məqsəd BP-nin iştirakı ilə daha çox neftin dünya bazarına çıxarılmasını təmin etməkdir: “Yeni anlaşmada enerji resurslarının istehsalı nəzərdə tutulur. Nəticədə Azərbaycan BP-nin investisiyasını cəlb etməklə enerji resurslarının istehsalını artırmaq imkanı qazanacaq. BP kimi şirkətlərin prosesə cəlb edilməsi təkcə investisiya cəlb olunması baxımından deyil, eyni zamanda yeni innovasiyaların cəlb edilməsi üçün vacibdir. Azərbaycan və BP arasında əməkdaşlığın modeli müəyyən olunub. Azərbaycan investisiya yatırımı baxımından cəlbedici ölkədir”.
Aprelin 26-da Prezident İlham Əliyevin Böyük Britaniyaya səfəri çərçivəsində Azərbaycan Respulikası Dövlət Neft Şirkəti (SOCAR) və BP arasında Xəzər dənizinin Azərbaycan sektorunda Şimali Abşeron hövzəsindəki D230 blokunun birgə kəşfiyyatı və işlənməsi üçün hasilatın pay bölgüsü haqqında yeni saziş (HPBS) imzalanıb.
