Pərvanə Alcanova: “Mən ora hazırlıqsız getmişdim, ona görə də bir az həyəcan var idi”
Fevralın 11-də Rusiyanın NTV telekanalı və Sputnik-in birgə layihəsi olan “Tı super!” Beynəlxalq vokal müsabiqəsi başlayıb. Müsabiqədə valideyn himayəsindən məhrum olmuş istedadlı uşaqlar iştirak edirlər.
Yarışmanın Azərbaycanlı iştirakçısı Pərvanə Alcanova Sputnik Azərbaycan-a açıqlamasında bildirib ki, yarış onun üçün çox uğurlu keçib: “Həyəcanlı olduğum üçün ikinci turda səhvlərim ola bilər. İstəyərdim ki, bu sahə üzrə yaxşı yerlərdə çıxış edim. Bundan sonra da hansısa yarışlara dəvət alsam məmnuniyyətlə gedəcəm. Yəni bu mənim istəyimdirsə, hər zaman onu dəyərləndirəcəm”.
“Bundan sonra çox dəyişikliklər olacağına inanıram. Yarışma müddəti əslində çox az oldu. Mən ora hazırlıqsız getmişdim. Bəlkə də ona görə bir az həyəcan var idi. Hazırlıqlı getsəydim, bəlkə də daha yaxşı olardı” – deyə o bildirib.
