Fazil Mustafa: “Mülki xarakterli hər hansı informasiyanın yerləşdirilməsində problem yoxdur”
Azərbaycanda ".az" ölkə kodlu yüksək səviyyəli domen üzərində qurulan internet informasiya ehtiyatının fəaliyyəti qanunvericiliklə tənzimlənəcək. Bununla bağlı "İnformasiya, informasiyalaşdırma və informasiyanın mühafizəsi haqqında" qanuna dəyişiklik təklif edilir.
Millət vəkili Fazil Mustafa deyir ki, hərbi vəziyyət rejimi tətbiq olunarsa, informasiyanın yerləşdirilməsi icazə ilə olmalıdır: “Burada “hərbi senzura” ifadəsi işlənib, hərçənd ki, biz buna qarşıyıq. İnformasiyalar hərbi komendantın, hərbi vəziyyətə məsul şəxslərin razılığı ilə yayılmalıdır. Çünki bu düşmən üçün hər hansı bir addımın atılmasına səbəb ola bilər. Məsələnin mahiyyəti budur. Yoxsa burada senzura, qadağa, hər hansı fikir məhdudiyyətindən söhbət gedə bilməz”.
“Hər halda, hərbi rejimin mahiyyətinə zidd ola biləcək informasiyalardan söhbət gedir. Mülki xarakterli hər hansı informasiyanın yerləşdirilməsində problem yoxdur. Hərbi məzmunda olan informasiyalara daha çox diqqət yetirilir” – deyə o bildirib.
