Bakıda XİN-nin binası, arxiv şəkli

XİN Qarabağa qanunsuz səfər edən şəxslərin siyahısını yenilədi

38
Azərbaycanın Ordusunun işğalda olan torpaqları azad etmək üçün keçirdiyi əks-hücum əməliyyatları dövründə və Vətən müharibəsindən sonrakı vaxtlarda Qarabağa qanunsuz səfərlər baş tutub.

BAKI, 23 yanvar — Sputnik. Xarici İşlər Nazirliyi Qarabağa qanunsuz səfər edən şəxslərin siyahısını yeniləyib.

Sputnik Azərbaycan-ın məlumatına əsasən, siyahıya ümumilikdə 1 040 nəfər daxildir. Siyahıya nəzər salsaq, görərik ki, 2020-ci ilin sentyabrın 27-dən etibarən Azərbaycanın Ordusunun işğalda olan torpaqları azad etmək üçün keçirdiyi əks-hücum əməliyyatları dövründə və Vətən müharibəsindən sonrakı vaxtlarda Qarabağa qanunsuz səfərlər baş tutub. Müharibə dövründə Qarabağa səfər edənlərin çoxu xarici ölkələrin jurnalistləridir. 2020-ci ilin noyabrında Ermənistanın kapitulyasiyaya imza atmasından sonra isə Qarabağa qanunsuz səfər edənlərin əksəriyyəti siyasətçilərdir.

Ümumilikdə 2020-ci ildə Qarabağa 40 qanunsuz səfər baş tutub. Qeyd edək ki, Azərbaycan dövləti dəfələrlə bəyan edib ki, Qarabağa, o cümlədən Rusiya sülhməramlılarının nəzarət etdiyi ərazilərə bütün səfərlər rəsmi Bakının razılığı ilə həyata keçirilməlidir.

38
Bakıda XİN-nin binası, arxiv şəkli

XİN: Bəzi ölkələrin parlamentarları qərəzli mövqelərini hər şeydən üstün tuturlar

10
Bir daha vurğulamaq istərdik ki, hərbi əməliyyatların dayandırılmasına dair razılığın əldə olunması ilə bölgədə yaranmış yeni vəziyyətdə, dayanıqlı sülhün əsas təminatçısı qismində çıxış edən üçtərəfli bəyanatların həyata keçirilməsi olduqca vacibdir.

BAKI, 3 mart — Sputnik. Azərbaycan Respublikasının Xarici İşlər Nazirliyinin (XİN) Mətbuat xidməti idarəsinin rəisi Leyla Abdullayeva bəzi Avropa ölkələrinin parlamentlərinin qəbul etdiyi sənədlərlə bağlı yerli KİV-in sualını cavablandırıb.

Sputnik Azərbaycan L.Abdullayevaya ünvanlanmış sualı və onun cavabını təqdim edir:

- Son günlər bəzi Avropa ölkələrinin qanunverici qurumları tərəfindən Ermənistan və Azərbaycan arasında əsirlərin mübadiləsi məsələsi ilə bağlı qətnamələr qəbul edilir. Bununla bağlı fikirlərinizi öyrənmək istərdik.

- Qeyd etmək istərdim ki, Vətən müharibəsindən sonra bölgədə yaranan yeni vəziyyət və 10 noyabr tarixli üçtərəfli bəyanatın icrası sadəcə bölgə ölkələrinin deyil, beynəlxalq ictimaiyyətin diqqət mərkəzində saxladığı məsələlərdəndir. Azərbaycan tərəfi hər zaman bəyan edib və bir daha vurğulayırıq ki, bölgədə dayanıqlı sülh və təhlükəsizliyin, inkişafın təmin olunması üçün imzalanmış üçtərəfli bəyanatların yerinə yetirilməsi vacib şərtdir. Doğru qeyd edirdiniz, son günlərdə bəzi Avropa ölkələrinin qanunverici qurumları bölgədəki vəziyyət və razılaşmaların icrası ilə bağlı sənədlərlə çıxış edirlər. Bu ilin 2 mart tarixində İtaliya Parlamentinin Deputatlar Palatasının Xarici əlaqələr daimi komissiyasında "Ermənistan və Azərbaycan arasında razılaşmanın yerinə yetirilməsi vəziyyəti haqqında" qətnamə qəbul olunub. Qətnamədə hər iki tərəfə müraciət edilərək, tərəflər konstruktiv fəaliyyətə dəvət olunurlar. Balanslaşdırılmış mövqe nümayiş etdirən İtaliya Parlamenti İtaliya hökumətinə Ermənistan və Azərbaycan arasında gələcək barışıq şəraitinin yaranması üçün etimad quruculuq tədbirlərini təşviq etmək istiqamətində hər iki dövlətlə ikitərəfli səviyyədə iş aparmağı tapşırıb. Burada ən önəmli məsələ kimi, Parlamentin ərazilərin minalardan təmizlənməsi məsələsinə diqqət ayırdığını və bu xüsusda minalanmış ərazilərin xəritələrinin verilməsini qeyd etdiyini vuruğulamaq istərdim. Ümumiyyətlə, bildiyiniz kimi, artıq ikinci dəfədir ki, İtaliya Parlamenti üçtərəfli bəyanatın icrası ilə bağlı məsələyə diqqət ayırır. Bir müddət öncə 18 noyabr 2020-ci il tarixində qəbul olunmuş qətnamədə də sözügedən birgə bəyanatın imzalanması alqışlanmış və tərəflər, bu bəyanatdan irəli gələn öhdəliklərini yerinə yetirməyə dəvət olunmuşdular.

Bununla yanaşı, bu ilin 25 fevral tarixində Niderland Parlamentinin Xarici əlaqələr komitəsi tərəfindən "Azərbaycan tərəfindən həbs edilmiş hərbi əsirlərin azad edilməsi ilə bağlı" Niderland hökumətinə çağırış edən qətnamə qəbul olunmuşdu. Niderland Parlamentinin növbəti əsassız və tamamilə birtərəfli xarakter daşıyan bu sənədi Komitənin hər zaman qərəzli mövqeyi ilə tanınan üzvlərinin canfəşanlığı nəticəsində qəbul olunub. Qeyd etmək istərdim ki, qətnamənin müzakirəsi zamanı iclasda çıxış edən Niderland xarici işlər naziri Stef Blok qətnamənin əleyhinə çıxış etmiş, həm Ermənistan, həm də Azərbaycanın hərbi əsirlərlə bağlı qarşılıqlı iddialarının olduğunu söyləmiş və qətnamədə hər iki tərəfə çağırışın edilməsi düzəlişini təklif etmişdir. Buna rəğmən qətnaməyə düzəliş edilməmişdir. Bu, bir daha bəzi ölkələrin parlamentarlarının öz qərəzli mövqelərini hər şeydən, hətta bölgədə sülhün təmin olunması səylərindən üstün tutduqlarını göstərir.

Bir daha vurğulamaq istərdik ki, hərbi əməliyyatların dayandırılmasına dair razılığın əldə olunması ilə bölgədə yaranmış yeni vəziyyətdə, dayanıqlı sülhün əsas təminatçısı qismində çıxış edən üçtərəfli bəyanatların həyata keçirilməsi olduqca vacibdir və bölgəmizdə sülhü arzulayan hər hansı tərəf məhz bu razılaşmaların icrasına istər bəyanatları, istərsə də fəaliyyəti ilə töhfə verməlidir.

10
Nikol Paşinyan, arxiv şəkli

Ermənistan olayları - Paşinyana göz dağı verilib siyasətdəki inam mühiti zədələnib

626
(Yenilənib 15:20 03.03.2021)
Öztarsu: "Müharibədən sonra isə Koçaryan və Sarqsyanın Moskva ilə danışıqlar aparmasına dair xəbərlər yayıldığından, ordunun mövcud iqtidardan duyduğu narahatlıq artıq üzə çıxdı"

Eldar Tanrıverdiyev, Sputnik Azərbaycan

BAKI, 3 mart — Sputnik. Ermənistanda gözlənilmədən başlayan və bir həftəyə yaxın müddətdir ki davam edən hökumət böhranı öz kulminasiyasına çatmaqdadır. Belə ki, Ermənistan Silahlı Qüvvələrinin Baş Qərargahı və onun rəhbəri Onik Qasparyan tərəfindən başladılan çevriliş cəhdi, həm iqtidar, həm də müxalifətin bir-birilərin ünvanına sərt ifadələr səsləndirməsi, paytaxt Yerevanda mitinqlər keçirməsi ilə nəticələndi. Ermənistan Baş naziri Nikol Paşinyanın Baş Qərargah rəisini istefaya göndərmək barədə qərarı isə ölkə prezidenti Armen Sarkisyan tərəfindən iki dəfə imzalanmadı. Sarkisyan bu qərarın özünün deyil, hələ 2018-ci ildə "Hərbi xidmət və hərbçilərin statusu" haqqında edilən dəyişikliklərin Konstitusiyaya uyğunluğunu nəzərdən keçirməsi üçün Konstitusiya Məhkəməsinə müraciət edib. Bundan sonra Ermənistan Konstitusiyasına görə, Paşinyanın Onik Qasparyanı tutduğu vəzifədən azad etmək qərarı avtomatik qüvvəyə minəcək. Düzdür proseslərin inkişafı Paşinyanın xeyrinə ola bilər, lakin istefaya göndəriləcək Onik Qasparyanın və onu dəstəkləyən Ermənistan müxalifətinin belə asanlıqla təslim olacağını da gözləmək yanlış olardı.

Sputnik Azərbaycan Ermənistanda baş verən son olaylarla bağlı Türkiyənin "Strategic Outlook" beyin mərkəzinin Qafqaz üzrə eksperti Mehmet Fatih Öztarsu həmsöhbət olub.

Türkiyənin Strategic Outlook beyin mərkəzinin Qafqaz üzrə eksperti Mehmet Fatih Öztarsu
Türkiyənin "Strategic Outlook" beyin mərkəzinin Qafqaz üzrə eksperti Mehmet Fatih Öztars

Öztarsu qeyd edib ki, Ermənistan Baş naziri Nikol Paşinyanın Qarabağ müharibəsi zamanı məğlubiyyətdən sonra xalq arasında azalan nüfuzu müxalifətin əlini gücləndirib: "Bundan əlavə, 2018-ci ildə Ermənistanın sabiq prezidentləri Robert Koçaryan və Serj Sarqsyanla bağlı cinayət işləri başlatmaqla daha çox düşmən kütlə qazanan Paşinyanın istefa tələblərinə cavab verməməsi ölkədəki narahatlığı artırdı. Çevriliş mövzusu, Paşinyan müharibə zamanı məğlubiyyət siqnalları aldığı zaman müxalif dairələrin dilə gətirdiyi mövzu idi. Müharibədən sonra isə Koçaryan və Sarqsyanın Moskva ilə danışıqlar aparmasına dair xəbərlər yayıldığından, ordunun mövcud iqtidardan duyduğu narahatlıq artıq üzə çıxdı".

Qafqaz üzrə ekspert bildirib ki, Koçaryan və Sarqsyan birbaşa çevrilişə cəhd etmələri kiçik bir ehtimaldır: "Hətta çevrilişin özünün baş tutması özü belə kiçik bir ehtimaldır. Çünki belə bir hadisə Ermənistanın dünyadakı imicini ciddi bir şəkildə zədələyər. Bunun əvəzinə, Paşinyanın istefaya məcbur edilməsi və bu prosesdə daha çox səhv etməsi müxalifətin istədiyi bir durumdur. Çevriliş cəhdi bəzi generalların öz iradəsi ilə yanaşı, onları arxa plandan idarə edən siyasətçilərin nəbz yoxlaması da ola bilər. Nəticə olaraq Paşinyana göz dağı verilmiş və siyasətdəki inam mühiti zədələnmişdi. Paşinyanın gələcəkdə siyasətdən kənara çəkilib, yerini sabiq rəhbərlərdən birinə verməsi ehtimalı da yüksəkdir".

Öztarsu vurğulayıb ki, hazırda baş verənlər Ermənistanın "Qafqazda demokratiya adası" fikrinə də zərər vurub: "Bundan sonra ermənilər özlərini regionun digər ölkələri ilə demokratiya planında müqayisə edə bilməyəcəklər. Eyni zamanda xalqın bir qisminin çevriliş cəhdini dəstəklədiyini nəzərə alarsaq, Ermənistan cəmiyyətinin demokratiyadan nə qədər uzaq olduğunu göstərdi. Hadisələrin Rusiyaya baxan istiqamətinə nəzər salsaq görərik ki, Paşinyanın "İskəndər" raketləri ilə bağlı söylədikləri sözlər onun Rusiyaya heç bir şəkildə güvənmədiyini göstərir. Onsuz da, Paşinyan hakimiyyətinin ilk anlarından bəri Moskva ilə məsafəli davranırdı. Böyük ehtimal Rusiya ilə aralarındakı münasibət bundan sonra da eyni soyuqluqla davam edəcək. Moskva isə onu "istənilməyən ortaq" olaraq dəyərləndirməyə davam edəcək".

626
Berlin kinofestivalının mükafatları, arxiv şəkli

Erməni yalanları Berlin film festivalında ayaq tutacaqmı? - Azərbaycan əks-tədbirlər görür

2
Azərbaycan haqqında yalan informasiya olan hissə çıxarılıb, filmin "Arsax Respublikası" kimi qeyd olunan hissəsi dəyişdirlərək, Ermənistan ilə əvəz olunub.

Şahpəri Abbasova, Sputnik Azərbaycan

BAKI, 3 mart — Sputnik. Erməni yalanlarını təbliğ edən "Arsax Qara bağ" filmi 2021 Berlin Film Festivalında nümayiş olunacaq. Bununla bağlı Mədəniyyət Nazirliyinin Kinematoqrafiya şöbəsindən Sputnik Azərbaycan-a bildirilib ki, Mədəniyyət Nazirliyinin bu barədə məlumatı var və bununla bağlı müəyyən addımlar atılıb: "Həmin film 71-ci Berlin film festivalında festival proqramlarının birində nümayiş etdirilməsi nəzərdə tutulub. Həmin film haqqında festivalın saytında məlumat gedən kimi Mədəniyyət nazirliyi bunun qarşısını almaq məqsədi ilə tədbirlər görməyə başladı. Mədəniyyət naziri Anar Kərimov Almaniyanın Mədəniyyət və Media üzrə müvəkkilinə etiraz məktubunu göndərdi. Bundan əlavə, Berlin film festivalının direktoruna da etiraz məktubu göndərilib. Bununla yanaşı, Almaniya Federativ respublikasının ölkəmizdəki səfiri ilə nazirlikdə görüş keçirildi. Görüş zamanı cənab nazir Anar Kərimov səfirə bu məsələ ilə bağlı öz etirazını bildirdi".

Kinematoqrafiya şöbəsindən verilən xəbərə görə, filmin məlumat hissəsində böhtan və qərəz xarakterli məlumatlar yer almışdı: "Hətta filmin istehsal edildiyi ölkə kimi qondarma "Arsax Respublikası" kimi qeyd olunmuşdu. Hazırda Azərbaycan haqqında yalan informasiya olan hissə çıxarılıb, filmin "Arsax Respublikası" kimi qeyd olunan hissəsi dəyişdirlərək, Ermənistan ilə əvəz olunub. Amma film hələlik qalıb. Nazirlik öz işini davam etdirəcək. Biz nəticəni gözləyirik. Festivaldan çıxarılma məsələsi belədir ki, filmin proqramdan çıxarılması mələsi qəliz məsələdir. Bilirsiniz ki, festivallar Avropada müstəqil qurumlardır. Hər halda biz öz etirazımızı bildirmişik".

2