Nikol Paşinyan, arxiv şəkli

"Reanimasiyada yatan Paşinyana süni nəfəs verilir" - Vitse-spiker

551
(Yenilənib 15:40 12.01.2021)
"Bu nəqliyyat dəhlizinin açılması iki dövlət arasında olan münasibətin hərbi və qarşıdurmadan işçi müstəviyə yönəldilməsi deməkdir"

Zülfiyyə Quluyeva, Sputnik Azərbaycan

BAKI, 12 yanvar — Sputnik. "Yanvarın 11-də Moskvada Azərbaycan Respublikasının Prezidenti İlham Əliyev, Rusiyanın Prezidenti Vladimir Putin və Ermənistanın Baş naziri Nikol Paşinyan arasında imzalanan üçtərəfli bəyanat 10 Noyabr razılaşmasının davamıdır. Bu kommunikasiya xətlərinin açılması təkcə iki dövlət arasında deyil, regiondakı qonşu dövlətlərin də iqtisadiyyatına kifayət qədər müsbət təsir göstərəcək".

Bu sözləri Sputnik Azərbaycan-a müsahibəsində Milli Məclisin vitse-spikeri Fəzail İbrahimli deyib.

Dünən dövlət başçılarının Moskvada keçirilən görüşünü şərh edən Vitse-spiker deyib ki, burada diqqəti çəkən əsas məsələ Azərbaycan prezidentinin Rusiya prezidentinin fikrinə əsasən bir daha dünyaya Dağlıq Qarabağ probleminin olmadığını bəyan etməsi oldu.

"Paşinyanın sonradan küskün və rəzil durumda bu problemin hələ də öz həllini tapmamasını deməsi çox uğursuz göründü. İlham Əliyev bəyan etdi ki, Dağlıq Qarabağ problemi bitib, artıq yoxdur. Bunu özünün düşüncələri, bir ölkə başçısının istəyi, yaxud real fakta söykənən bir düşüncə kimi ortalığa qoymadı. Fikir belə ifadə olundu: "Vladimir Vladimiroviçin dediyi kimi, Dağlıq Qarabağ münaqişəsi keçmişdə qalıb və biz gələcək barədə, qonşular kimi birlikdə necə yaşamaq, nəqliyyat arteriyalarının açılması məsələlərini həll etməyə necə çalışmaq və gələcəkdə regional sabitliyi və təhlükəsizliyi möhkəmlətmək haqqında düşünməliyik". Yəni bu fikir ciddi fikirdir və axıra qədər bunun üstündə durmaq lazımdır".

F.İbrahimli Prezidentin "Mən əminəm ki, erməni tərəfi 9 noyabr tarixli Bəyanatı təftiş etmək üçün heç bir cəhd göstərməyəcək, hər iki xalq gələcək barədə və barışıq haqqında fikirləşmək üçün özündə iradə və müdriklik tapacaq" sözlərini yüksək qiymətləndirib.

"Başlanğıc kimi sonluq da uğurla tamamlandı. Bizə də lazım olan elə bu idi. Bu görüşə qədər hər hansı statusun olması və sair səsləndirilən fikirlərə qəti mövqe ilə nöqtə qoyuldu, - deyə Vitse-spiker əlavə edib. 

F. İbrahimli deyir ki, görüşdə İlham Əliyev Ermənistana çox ciddi mesaj verib:

"Ermənistan ərazisindən açılacaq yolla bağlı cənab prezident bu dövlətə bir daha mesaj verdi ki, boğulursuz, məhv olursuz, iqtisadi durumunuz rəzil vəziyyətdədir. Bu mesajla prezidentimiz demək istədi ki, ay Ermənistan sizin ağlınız olsa, bu kommunikasiya xətlərinin açılışı ilə iqtisadi nəfəs ala bilərsiniz. Mehriban qonşuluq münasibətləri yarada bilərsiz. Bu kommunikasiya xətlərinin açılması təkcə iki dövlət arasında deyil, regiondakı qonşu dövlətlərin də iqtisadiyyatına kifayət qədər müsbət təsir göstərə bilər".

Vitse-spikerin fikrincə, baş verənlər həm də Azərbaycanın regionda nəhəng bir qüvvə olduğuna işarədir. Azərbaycan təkcə bir nəqliyyat dəhlizinin açılması ilə öz qonşularını da xöşbəxt edə bilər. İlham Əliyevin Rusiyaya səfəri, ümumi ab-hava, əhval-ruhiyyə, eləcə də keçirilən mətbuat konfransından belə nəticəyə gəlmək olar ki, prezident mövqeyində qətiyyətlidir. Rusiya tərəfinin də heç bir təkidi yoxdur.

"Ola bilər məsələnin görünməyən məxfi tərəfləri var ki, bunların da olması təbiidir. Hər üç ölkənin Baş nazirinin müavinləri səviyyəsində birgə İşçi Qrupu yaradılması, İşçi qrupunun bu ayın sonunadək ilk iclasının keçirilməsi nəzərdə tutulub. İşçi qrupunun yaradılmasının mühüm əhəmiyyəti var. Bu nəqliyyat dəhlizinin açılması iki dövlət arasında olan münasibətin hərbi və qarşıdurmadan işçi müstəviyə yönəldilməsi deməkdir. Ola bilməz ki, bir tərəfdən İşçi qrupu iş görsün, digər tərəfdən münaqişə baş versin. Bu ATƏT-in Minsk qrupu deyil ki, "dovşana qaç, tazıya tut" desin. Bu işçi qrupu üç dövlətin iştirakı ilə fəaliyyət göstərəcək. Əgər Ermənistan tərəfi müharibə istəyirsə, bu prosesin iştirakçısı ola bilməz! Bunu ləğv edərsə, yenidən özünü rəzil duruma sala bilər. Reanimasiyada yatan Paşinyana bir növ süni nəfəs verilir. Onun ömrünün nə qədər olacağı isə növbəti vəziyyətdən asılıdır!", - deyə İbrahimli əlavə edib. 

551
XİN-nin binası, arxiv şəkli

XİN: Azərbaycanla UNESCO arasındakı dialoqa üçüncü tərəf müdaxilə edə bilməz

11
(Yenilənib 23:46 15.01.2021)
XİN: Son onilliklər ərzində Ermənistan beynəlxalq missiyaların Azərbaycanın işğal altındakı ərazilərinə səfər etməsinə maneçilik törədib

BAKI, 15 yanvar - Sputnik. Xarici İşlər Nazirliyinin mətbuat xidməti idarəsinin rəisi Leyla Abdullayeva Ermənistan Xarici İşlər Nazirliyinin nümayəndəsinin Azərbaycan Respublikası Prezidentinin ICESCO Baş direktoru ilə görüşü zamanı çıxışına dair bəyanatını şərh edib.

Xarici İşlər Nazirliyinin mətbuat xidməti idarəsindən bildiriblər ki, Leyla Abdullayeva şərhində bildirib: “Azərbaycan Respublikasının Prezidenti bu il yanvarın 13-də ICESCO-nun Baş katibi ilə keçirdiyi görüş zamanı çıxışında ölkəmizin işğaldan azad olunmuş ərazilərində Ermənistan tərəfindən onilliklər ərzində həyata keçirilən, Azərbaycanın tarixi, maddi-mədəni irsinin məhv edilməsinə hədəflənən məqsədyönlü siyasəti növbəti dəfə ifşa etdi.

Bu ərazilərdə Azərbaycan xalqına məxsus hər bir şeyi məhv edərək, azərbaycanlıların öz evlərinə geri qayıtmasına imkan verməmək məqsədini güdən Ermənistan tərəfindən 30 ilə yaxın işğal altında qalan ərazilərdə tarixi, mədəni və dini abidələrin dağıdılması, talan edilməsi, onların mənşəyinin dəyişdirilməsi istiqamətində fəaliyyət hərbi cinayətlərə bərabərdir. Əlbəttə, bu cinayətlərə görə Ermənistan məsuliyyət daşıyır və beynəlxalq məhkəmələr qarşısında cavab verməlidir.

Qədim erməni dini və dünyəvi abidələrinə gəldikdə, Qafqaz etnoslarına aid olmayan və Qafqaza kütləvi şəkildə XIX əsrdə köçürülən ermənilərin bu kimi abidələri bəlkə də haradasa mövcuddur. Bizim bölgəyə aidiyyəti olmadığı üçün bu məsələni şərh etməzdim.

O ki, qaldı Ermənistan XİN-in guya Azərbaycanın beynəlxalq təşkilatların, xüsusilə də UNESCO-nun əraziyə səfər etməyə icazə verməməsinə dair əsassız ittihamlarına, Ermənistan XİN-in yadına salırıq ki, son onilliklər ərzində məhz Ermənistan beynəlxalq missiyaların Azərbaycanın işğal altında olan ərazilərinə səfər etməsinə maneçilik törədib. Bu fakt hətta UNESCO-nun 2005-ci ildə dərc etdiyi fəaliyyət hesabatında aydın şəkildə əks olunub. Belə ki, hesabatda Azərbaycan hökumətinin Dağlıq Qarabağ və işğal olunmuş digər ətraf ərazilərdə mədəni irsin mühafizəsi ilə bağlı narahatlığını ifadə edərək bu ərazilərə fakt araşdırma missiyasının göndərilməsi müraciəti etdiyi, lakin Ermənistanın hərbi işğalı səbəbindən bu missiyanın həyata keçirilməsinin mümkün olmadığı göstərilir.

Azərbaycan tərəfi UNESCO missiyasının təşkili ilə bağlı cavabını qarşı tərəfin diqqətinə çatdırıb. Ümumiyyətlə, Azərbaycanla UNESCO arasındakı dialoq prosesinə heç bir üçüncü tərəf müdaxilə edə bilməz.

Əminik ki, UNESCO/ICESCO missiyası Ermənistanın 30 illik işğal dövründə törətdiyi vandalizm əməllərini obyektiv əsaslarla və real faktlarla beynəlxalq ictimaiyyətin diqqətinə çatdırılması üçün əlverişli imkan olacaqdır.

Azərbaycan multikultural ölkədir və Qarabağdakı bütün müsəlman və xristian-alban abidələri Azərbaycan xalqının tarixi, mədəni və dini irsinə məxsusdur. Azərbaycan ərazisindəki bütün abidələr dövlət səviyyəsində qorunur. Ölkəmizin zəngin irsinin mühafizəsi bundan sonra da yüksək səviyyədə təmin ediləcək, o cümlədən işğaldan azad olunmuş ərazilərdəki abidələrin bərpası, təmiri və yenidən qurulması işləri həyata keçiriləcək.

11
Ceyhun Bayramov və Sergey Lavrov, arxiv şəkli

Azərbaycan Rusiya XİN başçıları Qarabağla bağlı məsələni müzakirə ediblər

6
(Yenilənib 19:19 15.01.2021)
Tərəflər, həmçinin ikitərəfli əməkdaşlıq gündəliyinə daxil olan məsələləri və qarşılıqlı maraq doğuran digər mövzuları müzakirə ediblər.

BAKI, 15 yanvar — Sputnik. Azərbaycan Respublikasının xarici işlər naziri Ceyhun Bayramov və Rusiya Federasiyasının xarici işlər naziri Sergey Lavrov arasında telefon danışığı baş tutub. Bu barədə Sputnik Azərbaycan-a Xarici İşlər Nazirliyindən daxil olan məlumatda bildirilir.

"Nazirlər 10 noyabr 2020-ci il tarixli üçtərəfli bəyanatın icrası ilə bağlı son vəziyyəti, eləcə də 11 yanvar 2021-ci il tarixində Moskvada imzalanmış birgə bəyanatdan irəli gələn məsələlər üzrə fikir mübadiləsi aparıblar.

Tərəflər, həmçinin ikitərəfli əməkdaşlıq gündəliyinə daxil olan məsələləri və qarşılıqlı maraq doğuran digər mövzuları müzakirə ediblər", - deyə məlumatda bildirilir.

6
Türkiyə Prezidenti Rəcəb Tayyib Ərdoğan koronavirusdan peyvənd vurdurur

Ərdoğan koronavirus peyvəndindən sonra: "Sapsağlamam"

0
(Yenilənib 00:05 16.01.2021)
Türkiyə Prezidentinə yanvarın 14-də Çinin "Sinovac" şirkətinin istehsalı olan "CoronaVac" vaksini vurulub.

BAKI, 16 yanvar — Sputnik. Bu ana qədər hər hansı bir yan təsiri olmayıb. Sputnik Azərbaycan "Hurriyet" nəşrinə istinadən xəbər verir ki, bunu Türkiyə Prezidenti Rəcəb Tayyib Ərdoğan jurnalistlərə açıqlamasında bildirib.

"Bu ana qədər hər hansı bir yan təsiri olmayıb. Sapsağlamam. 28 gün sonra ikinci iynəmizi vurduracağıq", - deyə Ərdoğan qeyd edib.

Qeyd edək ki, Türkiyə Prezidenti Rəcəb Tayyib Ərdoğan canlı yayımda koronavirusa qarşı peyvənd edilib.

Türkiyə Prezidentinə Çinin "Sinovac" şirkətinin istehsalı olan "CoronaVac" vaksini vurulub.

0